1 Ŋanne ki malaka nba bo piak nanin na jen ki fiinin, ki li tee nan n bo gɔɔnte na, 2 ki boin a, “A la bia?”

Ki n jiin a, “N la salima fitsentire, ki kpan seŋ tɔɔ li paak, ki fita ŋanlore tɔɔ ki lintir, ki fitir kur mɔk fitŋmii kunkɔɔnboa ŋanlore, 3 ki bia la kpan tiinii ŋanlee, ki yenn see fitsentir na lokyenn po, ki leer see lokleer na po.” 4 Ŋanne ki n boi malaka na a, “Chanbaa, bona nba na paak tee bee?”

5 Ki u boin a, “A ki mi-i?”

Ki n jiin a, “Chanbaa, n ki mi.”

10b Ki malaka na yetin a, “Fita ŋanlore na tee Yennu ninbina ŋanlore nba laat tingbouŋ na kur poe.”

11 Tɔn, ki n ji boiɔ a, “Kpan tiinii ŋanlee nba see fitsentir na kpinii na paak mun tee bee? 12 Ki kpan tiik yiinii ŋanlee nba kpia salima funfoontii ŋanlee nba ki kpan nyi leŋ na paak mun tee bee?”

13 Ki u boin a, “A ki mi-i?”

Ki n jiin a, “Chanbaa, n ki mi.”

14 Ŋanne ki u yetin a, “Binba nae tee jab banlee nba ki Yennu nyinnib, ki mɔɔn kpan bi paak, a bii tuun ŋɔɔ Yennu nba tee tingbouŋ na kur daanɔ na toona.”

6 Ki malaka na betin a n yet Serubabel maan nba nyii Yennu boor na a, “Yabint Yennu yet a, li ki tee a paŋ, koo a yiikoo kaa, ŋaan n Seeke saa tura nyannu. 7 Bonjarkara nba gbeŋ nan jɔfɔkit na, ŋaan li kur saa mirinte a tɔɔnn. A saa ŋamm maa jiantu ŋasaakak na, ki fi-i taŋi paan tanjoontik na yoo nba, niib na saa yikin a, ‘Li fan, li fan.’ ”

8 Ki mɔmaleer nyii Yennu boor ki baarin, 9 ki yet a, “Serubabel bir Yenjiantu ŋasaakak na fiakira, ki saa maa gbenn. U-u maa gbenn yoo nba, n niib na saa bann nan mine tuma bi boor. 10a Bi din kɔŋ bi dindann, kimaan toona din ki somm fanu, ŋaan bi saa la ki Serubabel maa Yenjiantu Ŋasaakak na, ki bi sii mɔk parpeenn.”