9
Tubdatu ki jiin boorganii po
1 Linba nae tee Yennu maan:
Yennu senn tubdatue ki tur Hadrak tiŋ nan Damaskus doo. Li ki tee Israel teeb booru kɔɔ kaa ki Yennu yemmi, ŋaan nan Siria digbansaakar na kura tee Yennu yare. 2 Hamaf nba ter nan Hadrak na mun bia tee u yare, li mun bia tee nnae ki tur Taya nan Sidonn doi nan bi niib bannu na kur. 3 Taya doo maa ki ŋamm li mɔŋ, ki mɔk paŋ, ki kpekin salimmɔna nan salimpeena leŋ, ki li yab nan tanbiinii nae. 4 Ŋaan Yennu saa jii linba kur ki Taya mɔk na ki yaat nanna. Yennu saa lu li mɔkint maŋ kur mɔkgbeŋir ni, ŋaan joo doo na muu.
5 Ki Askelonn teeb na saa la linba na, ki jaŋmaanii n soorib. Gasa doo saa lar, ki lin toŋɔ bonchiann. Nnae ki li mun saa toŋ Ekronn teeb, ki bi dindann n yaat. Gasa teeb saa kɔŋ bi bat, ki Askelonn doo mun saa biar ki dɔɔ yann. 6 Boorganiie ji sii kɔɔ Asdod doo ni. Yennu yet a, “N saa nyinn karinbaanii nba ki Filistia teeb mɔk na kure. 7 Bi ji kan mi ŋman nant nba mɔk sɔn, koo ki di jeet nba ki n yaa bi daa di na. Ki binba tinn na kur ji saa kpant n niib, ki tee naakuuk, Juda booru ni. Ekronn saa kpant n niib na bɔkir, nan Jebus teeb nba din teen na. 8 N saa guur n tiŋ na, ki datai kan gar leŋi. N ji kan sak ki niyoona-ii mukis n niibi. N la n niib nba dii biak biaŋinbawa.”
Ki jiin kpanbar nba tan saa baar na po
9 Sayɔnn teeb, ii mɔk kpinkpammuk man.
Jerusalem teeb, ii yikin man nan parmaasir.
Gotir man, i kpanbar nae baat i boor na.
U tee yiikoo daanɔe ki mɔk nyannu,
ŋaan u tee wunba sikint u mɔŋe,
ki jak boŋ nba set tee bonpaaŋ.
10 Yennu yet a,
“N saa nyinn tɔb taantorit Israel teeb boor ni,
ki nyinn taanii nba be Jerusalem na,
ki biir tɔdaat nba ki bi jii kɔn kɔnn na kur.
I kpanbar na saa baar nan parmaasir booru kur ni,
laa nyi mɔkgbeŋir ki saa tuu mɔkgbeŋir sii be u yent ni,
laa nyi Yufrates mɔkir ki saa tuu tingbouŋ na paak,
li be u yent nie.”
Ki jiin Yennu niib na jenu po
11 Yennu yet a, “Kimaan n mɔlor nba ki n lor nani
ki jii maruŋ sɔn ki gbeen na,
n saa ŋaa i niib yann, ki bin nyi yommisin
nba tee nan bunbunkoonn na ni.
12 Jenin man, yimm yommii nba ki mɔk dindann na,
ŋmatir kun i doi ni, siaminba ki fat-n-mɔŋ be na,
n beerie, n saa pa piisin ki jiini,
ki lin gar biak nba ki i dii na taar munlee.
13 N saa te ki Juda-ii tee nan kunkɔnkɔnnɔ tɔdaauk nae,
ki Israel-ii tee nan peenii na.
N saa jii Sayɔnn jab ki bi tee nan banjiak nae
ki kɔn nan Griis jab.”
14 Yennu saa dɔkit ki be u niib yur paak.
U saa tɔ u peenii nan sanyikintii nae.
Yabint Daanɔ Yennu saa peb naatunn,
ki sii be wonpaaruk nba saa nyi niidiitu po ki baar na ni.
15 Yabint Yennu sii guu u niib,
ki bi saa boont bi datai.
Bi sii yikin nan dayibira nae tɔb ni,
ki saa kpi bi datai,
ki bi sɔn n pubir nan baa tuu kpaar maruŋ sɔn
binbintir paak biaŋinba na.
16 Li daar-i baar, Yennu saa tinn u niib
nan pekpaarik nba tuu nyinn u pei ninbɔŋ ni biaŋinba nae.
Bi sii nyirii u tiŋ ni nan tanbinyinyira nba tuu be
naan fokirik paak nae.
17 Tiŋ na sii ŋan ki bia kpai bonchiann,
ki nipaauŋ na saa di tiŋ na jeet, ki nyu li daan,*9.17 Bi din dia tilɔɔnae ki tee daan.
ki kpaat nan paŋ.