Ⅰ Nyɩnɛ lɛ a jɛɛr nɩ nɛchɩrɛ yi be a yɩ chara pɔ? A ba ɩ a yi naa a vɔlaa 'lɔ na be a yɩ 'yɔ̃ɔ jɛɛr ɛ? Ⅱ Yɩ ma bʊɔrɔ na bon kɔ̃ɔ tɩ yɩ maa nyɛ ɛ, na yɩ ma kʊrɔ taa. Na yɩ ma tara nyuur nɩ bomo, tɩ na yɩ maa nyãa ɛ, na yɩ pãa tara jɛɛr nɩ nɛchɩrɛ, tɩ maa nyãa ɛ, bojũu yɩ maa sʊɔr Nãaŋmɩn ɛ. Ⅲ Yɩn wa sʊɔr a Nãaŋmɩn sɛ̃, yɩ maa nyɛ ɛ, bojũu yɩ sʊɔr naa nɩ pʊtɩdɛɛr na de maal a lɛ na pɛl a yɩ pʊɔ.

Ⅳ Yɩn sɛ̃sɛ̃ nɩbɛ ba nyã, yaa bɔ̃ɔ ɩka nɩrɛ nyã na ɩ a wɛr baraa 'laar Nãaŋmɩn ɛ? Nɩrɛ 'lɔ jaa na ŋmaa a wɛr nyã baraa ɩn Nãaŋmɩn dɔ̃ sʊɔ. Ⅴ Ta baala a Nãaŋmɩn gãn na 'yɛr ɩka, yelmãɛ jaa lɛ a Nãaŋmɩn kaara a Sɩɛ 'lɔ wʊn de 'yɔ̃ɔ sɩ. Ⅵ Tɩchɛ Nãaŋmɩn ma kʊ sɩ naa a wʊ wãɛfʊ, ala lɛ so a Nãaŋmɩn gãn na 'yɛr, “Nãaŋmɩn ma tɔr naa bala na bʊɔr yuor, tɩ na wʊ ma wãɛ a bala na siir ba mãɛ.” (Sʊkpar Gãn 3:34)

Ⅶ A lɛ jũu, yɩ siir a yɩ mãɛ kʊ Nãaŋmɩn, na yɩ tɔɔ yɩ mãɛ yin a sɩdɛɛr sʊɔ sɛ̃, wʊn bar yɩn tɩ jo. Ⅷ Yɩ tɔɔ gbʊr Nãaŋmɩn, wʊ mɩ na tɔɔn gbʊr yɩ. Yɩn yelbe-ɩrbɛ, yɩ pɛɛ a yɩ nuur na yɩ lɩɛb a yɩ tɩɛr, yɩn tɩɛr ayi dẽme. Ⅸ Yɩ waala, na yɩ tara pʊsɔ̃ɔ, na yɩ kõnõ. Yɩ vɛ̃ ka a yɩ laar lɩɛb kõn, ka a yɩ pʊpɛl lɩɛb pʊsɔ̃ɔ. Ⅹ Yɩ siir a yɩ mãɛ a sɩ Soro niem, wʊn 'mɔɔ yɩn ka yɩ do.

Ⅺ N yɛɛr, yɩ ta sɔ̃ɔnɔ̃ taa yoe ɛ. Nɩrɛ 'lɔ jaa na sɔ̃ɔnɔ̃ a wʊ tɔ sʊɔ yuor, wʊ tɔɔr a wʊ 'yɛr, wʊ tɔɔrɔ naa a nɛbinãa 'lɔ 'yɛr. Fʊ̃ʊ wa tɔɔrɔ a nɛbinãa 'yɛr, faa turo a lɛ a nɛbinãa na 'yɛr ɛ, tɩ ɩ a wʊ 'yɛr tɔɔrɔ. Ⅻ Nãaŋmɩn lɛ bin a wʊ nɛɛ kʊ sɩ, na wʊ ɩ a 'yɛr tɔɔrɔ, 'lɔ lɛ na tʊ̃ɔ faa bɩɩ sɔ̃ɔ bar. Tɩchɛ fʊ̃ʊ mɩ nɩ ana na fʊ tɔɔrɔ a fʊ tɔ sʊɔ 'yɛr?

ⅩⅢ Yɩ chɛlɛ, a yɩn bala na ma 'yɛr ɩka, “Dɩna bɩɩ bio sɩn chen tẽkpɛ̃ɛ pɔ tɩ maal yuon, da bomo, da nyɛ libie.” ⅩⅣ Yaa bɔ̃ɔ lɛn na ɩ bio ɛ, bo lɛ a yɩ nyɛvʊr? Wʊ kaara fɩka ul na lo tɩ wɛl ajienaa. ⅩⅤ Yɩ ta ma 'yɛr ɩka, “Ala ɩ Nãaŋmɩn sɔɔ naa ka sɩ tara nyɛvʊr, sɩn maal nyã bɩɩ anyãna.” ⅩⅥ Tɩ lɛ an be nɩ nyã, yɩ bʊɔrɔ na yuor, na yɩ wile yɩ mãɛ, ka a mãɛ wiilfʊ nyã ɩ yelbier. ⅩⅦ Nɩrɛ jaa na pãa bɔ̃ɔ vɩla tɩ ba maal ɛ, wʊ ɩn bier.