Ⅰ A anyã puor, n pãa nyɛn saaju paalaa nɩ tẽpaalaa, bojũu a saaju koraa nyã nɩ a tẽkoraa nyã bɔr naa, ka a man ba lɛ be be go ɛ. Ⅱ N nyɛn a Tẽchɛchɛ na ɩ a Jerusalɛm paalaa ka wʊ yi a saaju a Nãaŋmɩn sɛ̃ suro waara fɩka, pɔɔsaraa na pãɛn bʊ̃kãkaɛ gun a sɩrɛ kulfʊ. Ⅲ Ka n wõ kɔkɔr na yi a be a nãa dakɔɔ par 'yɛrɛ, “Pʊ̃pãanyã, Nãaŋmɩn na kpɩɛraa a nɩsaalba pɔ, na wʊ be a ba sɛ̃. Ban ɩn a wʊ nɩbɛ, ka wʊ mɩ be a ba sɛ̃ ɩ a ba Nãaŋmɩn. Ⅳ Wʊn 'yɩɛr naa a ba nɩbikʊ̃ɔ a nie pɔ bar. Kũu kʊ̃ lɛ be be go ɛ. Waal ba lɛ be be go ɛ. Kõn mɩ ba lɛ be be go ɛ. Nɩrɛ ba lɛ bɩɛrɛ be go ɛ. Bojũu a yelkoro a jaa põn chen.”

Ⅴ Ka a 'lɔ na jãnɛ a nãa dakɔɔ ju 'yɛr, “N maala naa a bomo a jaa bʊ̃paalaa!” Na wʊ pãa lɛ 'yɛr kʊ ma, “Sɛb a anyãna bin, baal ba be be ɛ, a ɩn yelmãɛ.”

Ⅵ Wʊ 'yɛr kʊ ma, “A maal naa. Maa lɛ a Pielfʊ nɩ a Baaraa. 'Lɔ jaa a kɔ̃nyũur na kpɛ, ɩn kʊ wʊn a nyɛvʊr kʊ̃ɔ na yi a bulo pɔ ka wʊ nyũ pɔrɔ. Ⅶ Nɩrɛ 'lɔ jaa na jɛb tʊ̃ɔ, ɩn kʊ wʊn a anyãna a jaa. Ka n ɩ a wʊ Nãaŋmɩn ka wʊ mɩ ɩ a n bie. Ⅷ Tɩchɛ a bala na ɩ a dãbãn dẽme, nɩ bala na ba sɔɔ de ɛ, nɩ tɩɛr dɛbɛ dẽme, nɩ nɩkʊrbɔ, nɩ sɛ̃sɛ̃nbɛ, nɩ sʊɔbɔsɩ, nɩ tɩpuorbo, nɩ jir ŋmarba ba jaa, a ba jie ɩ naa be a jerbɩ bũu dagel pɔ. A nyã lɛ ɩ a kũu gbɛɛ ayi.”

Ⅸ Ka a malakasɩ ayopõi na tara a wõm ayopõi 'lɔ na tara a baaraa wa 'yɛr kʊ ma, “Wa, ka n wiil fʊ a pɔɔsaraa na ɩ a Pɛraabile pɔɔ.” Ⅹ A malaka 'mɔɔ man a Sɩɛ pɔ don a tɔ̃ wõo kpɛ̃ɛ ju na wʊ tɩ wiil ma a Tẽchɛchɛ na ɩ a Jerusalɛm na yi a Nãaŋmɩn sɛ̃ suro waara. Ⅺ Wʊ chaar wʊ jaa nɩ a Nãaŋmɩn tɩɩr, a chaarfʊ kaara fɩka a kʊsɩsʊ̃n na wʊ nyɩlɛ chaar jaa wel wel a kʊsɩbɛ ala ban bʊɔlɔ a jasɩpa kaar. Ⅻ Dachin wõo na kpɛ̃mɛ jilʊ̃ wʊ jaa na wʊ tara dɔ̃dɔɩ pie nɩ ayi, ka a dɔ̃dɔr ãsʊɔ jaa tara malaka na kaara. Ba sɛb a Isɩral bal pie nɩ ayi yoe mar a dɔ̃dɔɩ pɔ. ⅩⅢ Dɔ̃dɔɩ ata ben a mɔ̃tɔ̃ɔ purfʊ jie, ka ata mɩ be a kõkoor, ka ata mɩ be a kõkoor nyã, ka a ata mɩ be a mɔ̃tɔ̃ɔ mʊrfʊ jie. ⅩⅣ Dachin par kparsɩ pie nɩ ayi ju lɛ a dachin dɔɔl. Ala pɔ lɛ ba sɛb a Pɛraabile nɩtʊ̃nsɩ pie nɩ ayi yoe dɔɔl.

ⅩⅤ A malaka 'lɔ na 'yɛrɛ nɩ ma tara na sɛlma damanaa ɩka wʊ man a tẽe dɔ̃dɔɩ nɩ a dachin. ⅩⅥ A tẽe par kparaa jãtaa, a wõofʊ nɩ a yalfʊ wʊ jaa. Wʊ man a tẽe nyɛ ka wʊ ɩ mɛl tur dɔɔl kɔɔr anaar (1,400). A wõofʊ nɩ a yalfʊ, a dofʊ, nɩ a jãafʊ. ⅩⅦ Wʊ man a dachin ka a yal ɩ gbɛɛ kɔɔr ayi dɔɔl pie nɩ ayʊɔb (216). A malaka man a lɛ a nɩsaal na ma man. ⅩⅧ A kʊsɩbɛ ala ban bʊɔlɔ a jasɩpa lɛ ba mɛn a dachin, ka a tẽe wʊ jaa ɩ sɛlma na wʊ chaar chãana kaar. ⅩⅨ Kʊsɩsʊ̃n a jaa bʊrɔ lɛ ba de kpar a tẽe par kparaa. A par kpardɔ̃ɔ 'lɔ ɩn a kʊsɩsʊ̃n ala ban bʊɔlɔ a jasɩpa, ka a ayi sʊɔ mɩ di safer, ka a ata sʊɔ di agete, ka a anaar sʊɔ mɩ di ɛmerald, ⅩⅩ ka a anũu sʊɔ di ɔnɩksɩ, ka a ayʊɔb sʊɔ mɩ di kanɩlian, ka a ayopõi sʊɔ di keresolɩtɩ, ka a aniin sʊɔ mɩ di berl, ka a pie forbir sʊɔ di topajɩ, ka a pie sʊɔ di kɩrɩsopɩrase, ka a pie nɩ bʊ̃'yen di jasɩntɩ, ka a pie nɩ ayi sʊɔ mɩ di amɛtesete. ⅩⅪ A dɔ̃dɔr nɛɛ pie nɩ ayi ala ɩ naa a kʊsɩsʊ̃n pie nɩ ayi. Kʊsɩbʊ̃'yen lɛ ba maal a jaa. A sɔkpɛ̃ɛ na be a tẽkpɛ̃ɛ nyã pɔ sɛlma lɛ wʊ jaa ka wʊ chaar chãana kaar.

ⅩⅫ N ba nyɛ puorfʊ yir be a tẽe pɔ ɛ, bojũu a sɩ Soro Nãaŋmɩn na ɩ Tʊ̃ɔfʊ Sʊɔ nɩ a Pɛraabile lɛ ɩ a puorfʊ yir. ⅩⅩⅢ A tẽe nyã ba bʊɔrɔ mɔ̃tɔ̃ɔ, bɩɩ ŋmɛraa chãa ɛ, bojũu a Nãaŋmɩn tɩɩr lɛ ɩ a chãa, ka a Pɛraabile ɩ a wʊ fãtɩn. ⅩⅩⅣ A chãa nyã pɔ lɛ a paal bʊrsɩ nɩbɛ na yʊɔrɔ, ka a wɛr nãmɩne mɩ waan a ba nãbomo a be. ⅩⅩⅤ A wʊ dɔ̃dɔr nɛɛ ba be na wa pɔɔ a mɔ̃tɔ̃ɔ ɛ, an ɩ tãsɔɔ ba lɛ be be go ɛ. ⅩⅩⅥ A paal bʊrsɩ nɩbɛ nãbomo nɩ a ba tɩɩr, ban waan naa be. ⅩⅩⅦ Bʊ̃dɛɛr kʊ̃ kpɛ be ɛ, bɩɩ bala na tʊ̃nɔ̃ vĩ tʊ̃mɔ̃, bɩɩ nɩbɛlbɛ, tɩchɛ a bala tɛɛ yuor na sɛb a Pɛraabile nyɛvʊr gãn pɔ.