A Ginigeet te Pol urungan köbo
EPESES
Ina ginigeet te Pol na i etöngösen maras mabo mangana warwadöan kölöme re Krais ura re ire (1:3-14). Kölöme re Krais, God iri pere kos ire (1:4), iri ölön lo ire bara ire tabo barok ke ine (1:5), ma iri kun ölanglanga ire (1:7), iri döxömen taun tewe abo magingin saban te ire (1:7), ma iri tabaa ire ma Töxödös ne Tanono rua isik pi abo lalaa rö ire nang God ixo kubus bara irabo isik kö ire melamu (1:13-14). Me God ixo öro ire bira bara ire tabo ölet ine (1:6, 12, 14). Io nang, e Pol ixo seseng bere ire abo Kristien tabo ösöxö ödeek ina mangana ineöro xö God (1:15-23). Mesila ire toxo kis kö ene abo magingin saban te ire, ma lamun God ixo marse ire (2:1-7), me ewe a öng nang i nunu re Krais, God irabo tabaa tataunin ine ma to turunon, ma kaim pe öng irabo eöt tua wewet te laa rua kip lo a ineöro xalik e God (2:8-10). Mesila, ire nang kaim bara abo Judeia, ire toxo palaa xalik e God, ma inexalik kölöme re Krais ixo is arixin abo Judeia me idi nang kaim bara abo Judeia me ire önga tödi maxat ta (2:11-3:13). Ina niang a laa raxin saxit ma ixo kis mun sik kö oleleng ne awat (3:3-6), me Pol ixo seseseng bara ire tabo eöt tua ösöxö xulen ina abalamu re Krais (3:14-21). Ma bara e God iri öro ire bira, ire tabo mana talien eöt mabo to maxat te ire (4:1-6:20). Ire ta perexulen bara ire önga aine Krais kalik mon (4:1-16) me ire tabo mana sige abo to maxat te ire (4:17-32). Ire tabo mana to xö maras (5:1-21) me ire tabo mana pet a dedeek köbo usuono re ire, ma a bung baroxorok ke ire, ma abo nago re ire, ma abo tamana ire, ma abo orong ke ire, ma abo tultul te ire (5:22-6:9). Ma rua öxawam ina tinenge re ine, Pol ixo tengen ölölös bere ire tabo sige abo lalaa deek möxö inarse meruso xö God xarnang önga umri bere ire tabo eöt tua inarese mabo mangana tanono saban me ire tabo eöt tua tinuu lölös kalik abo sasaban (6:10-20). I wawara bara a unine ina ginigeet na i bira, bara ire abo Kristien ire tabo mana to eöt ma ineöro deek nang e God iri tabaa ire min kölöme re Krais.
1
1 E, e Pol, önga aposol te Krais Jisas eöt ma mamaa re God. Me e gegeet urungan tö mum abo nangadi runon te God nang Epeses, mum abo tene nunu xö kinis se mum kölöme re Krais Jisas.
2 A abalamu ma malum urungan te mum meriso re God a Tamana ire me Jisas Krais, a Orong ke ire.
Abo lalaa deek kölöme re Krais
3 A aölelet urso xö God. Ine a God ma a Tata xö Orong ke ire, Jisas Krais, ewe nang ixo wadöane ire mabo lalaa xirip meriso xö watmaep nang i eöt tua rorop abo tanono ire xö kinis se ire kölöme re Krais. 4 Me God ixo pere kos ire bölök kö kinis se ire kölöme re Krais mesila iat kö uxixis möxö öxöno lagunon bara ire tabo madakdak me ire tabo kaim pe önga sasaban kö wawara re ine. 5 God ixoro döxömen mesila bara irabo ölön lo ire bara ire tabo barok ke ine kölöme re Jisas Krais, möxösa, God ixo mamaa xöba ulamun ire. Ma ixo pet bira, möxösa, ixo mamaa ma ixo axanan bölök kua wewet bira, 6 bara ire tabo ölet ewe nang ixo isik tataunin a abalamu nang a lak mariris urungan te ire xö kinis se ire kölöme xö Barok nang e God ibo mamaa xöba ulamun ine. 7 God ixo kun ölanglanga ire ma dee xö Barok ke ine ma ixo döxömen taun abo sasaban te ire, eöt ma a abalamu re ine nang i taxin köba ma nang ixo tabaa tataunin ire min. 8 Ina abalamu nang e God ixo isik köbanin tö ire arixe ma abo mangana nanase xirip. 9 Ma ixo ömaras ire ulamun abo lalaa nang ixo mamaa rua wewet nang ixo mun sik mesila, inabo lalaa nang ixo axanan tua wewet, ma ixo bulus a dinödöm pua wewet kölöme re Krais. 10 Ma ina dinödöm pe ine i bira: nang bara a axana bung i kis eöt, irabo lamus etok abo lalaa xirip piso xö watmaep ma ra xö pu bölök, bara idi tabo kis kö ene e Krais. 11 Me God ibo wewet abo lalaa xirip eöt ma a dödöxömen te ine nang i wanot meringan kölöme xö mamaa re ine. Möxö ina na, xö kinis se ire kölöme re Krais, God ixo pere kos lo ire rua a nangadi runon te ine, möxösa, ixo pere kos sik iat mesila bira, eöt ma dödöxömen te ine. 12 Ma ixo pet bira rue ire ewe ire tere xixiset ma nunu xöbo lalaa kölöme re Krais, ire tabo örarik a nangadi rua ölelet e God ulamun a mariris se ine. 13 Me mum mo kis kölöme re Krais bölök, möxösa, mum moxo ölangen a atöngösen ulamun a turunon, ina atöngösen deek nang i isik ot a ineöro re mum. Ma nang e mum moxo nunu, God ixo isik ke mum a Töxödös ne Tanono rua öturunon bere ire mere ine iat, ma ina Tanono ewe e God ixo xuxubus sik kö ire ulamunon. 14 Ixo tabaa ire ma Töxödös ne Tanono rua isik pi abo lalaa rö ire nang God ixo kubus bara irabo isik kö ire melamu. Kö ina ngas a Tanono i öturunon bere God irabo unan tunonin ire bere re ine tus iat, ire ewe e God ixoro kun ölanglanga. Io, ire tabo mana ölet ine ulamun a mariris se ine.
A sineseng ke Pol
15-16 Ma ina na a unine bara e bo seseseng ulamun e mum. E xo see lo abo nunu re mum kölöme re Jisas a Orong ma abo inemarse ulamun a nangadi tus iat te God. Möxö ina na, ot na e kela mamas sua rengrengen deek urungan te God tua gene mum nang e bo rengrengen e mum kölöme xöbo sineseng ke e. 17 E bo seseng sösöxöin a Tata raxin te ire, ine a God te Orong ke ire, e Jisas Krais, bara irabo tabaa e mum ma a nanase ma irabo osen abo turunon ulamun ine iat tue mum pa ösöxö ödeek ine. 18 E seseseng bölök bara ine irabo ömaras abo bala mum, rue mum morobo ösöxö abo lalaa nang ixo kuwe e mum pua xikip lo, inabo lalaa nang a lak mariris taxin nang e mum mo xixiset ma nunu ulamunon, nang e mum morobo uruoxe meringan te ine, möxösa, mum a nangadi tus iat te ine. 19 Me e seseng bara mum morobo örasen bölök a lölös taxin saxit te ine nang ine ibo rörörön min kölöme re ire abo tene nunu. Ina lölös i eöt ma lölös taxin 20 nang e God ixo rörön min nang ixo öraru öbaling e Krais kalik a minet ma ixo isik a kinis se ine xö lime tuun te ine ringan kö watmaep. 21 Ma kinis se ine i manga taxin köba re idi ewe idi te kip a kinis möxö warkurai me idi abo tene walbalaurai me idi abo tene sisila me idi abo asuono orong bölök. Ma esene i taxin saxit bölök köbo ese xirip na ma xö ina axana bung kabise nang irabo ot melamu. 22 Me God ixo bulus ösu abo lalaa xirip kö ene xexene Krais. Ine a tene sisila raxin köbo lalaa xirip, me God ixo isik ine urungan kö marakörö ne lotu. 23 Idi a aine Krais, me Krais ewe nang ibo wewet öxudun abo lalaa xirip, ma ibo öxudun a marakörö ne lotu.