A Tinenge Deek ke
Luk
Luk ixo geet ina ginigeet na urungan kö önga tödi a esene e Tiopilas (pere Luk 1:1). Ine önga orong kuso Rom. Me Luk ixo mamaa bere Tiopilas irabo maras ulamun a bung a nago re Jisas ixo kip ine, ma ulamun a tino re Jisas, a minet, ma a tinaru xalik a minet te ine, ma bere ine a Mesaia (nang toxo tengen bara ‘e Krais’) ewe i eöt bara irabo öro abo Judeia me idi bölök nang kaim bara abo Judeia. Ine a Mesaia ulamun a öxöno lagunon kirip. Me Luk ixo bulus ölaxa abo pii oleleng nang kaim pingan te Matiu me Mak (pere a öxöno tinenge re Matiu). Ma ina Tinenge Deek na re Luk a urulo möxö pii nang e Luk ixo mamaa bara irabo töngösen e Tiopilas ulamunon. Ire ta pere a xakawam möxö pii xö ginigeet ‘Abo Tinörön köbo Aposol’ (Aposol 1:1-2). Ire ta pere xö xakawam pe Tinenge Deek kö Luk bere Jisas ixo töngösen abo bak ne ausu bere idi tabo kis xiset a laa e God ixo xuxubus ulamun ine (Luk 24:29). Jisas ixo wöwörö ulamun a Töxödös ne Tanono. Ma xö sisila ne xönö xö Aposol tabo pere öbaling bere Jisas ixo töngösen idi bere idi tabo kis xiset a Tanono nang e God ixo xuxubus bara irabo tile rue idi. Io nang, Luk ma Aposol, idu önga xönö pii mon ulamun e Jisas ma xö nuan elixilik nana möxö tinenge deek nang ixo etöngösen ulamun e Jisas.
1
23Orong Tiopilas, a oleleng idi toxo döxömen bara idi tabo geet muu abo lalaa iri wanot kaluluonin e mem. Io, idi toxo muu abo atöngösen te idi abo tene atöngösen ma tinenge deek. Me idi abo tene atöngösen, idi iat niang idi toxo pere runin inabo lalaa mero xö urulo. Möxö ina na, e döxömen bara i deek bara arabo geet muu inabo lalaa na, möxösa, e iat e xo ose muu ödeek ulamun inabo lalaa mero xö urulo. Me e döxömen bara arabo pet bie bara örobo ösöxö a turunon ulamun abo lalaa nang u xoro kip abo inausu möxönan.
A angelo ixo etöngösen sila me Jon tabo kip ine
Xö axana bung nang e Erot ixo king mee Judeia, önga pris a esene iang e Sekaraia. Ine a marapun te Abisa, ma a une re ine e Elisabet. Me ine bölök a marapun te Aron. Me idu xirip a nine tene töxödös kö wawara xö God. Me idu xirip toxobo mumuu a warkurai xö Orong. Ma i kebeöt te öng bara irabo puk idu mere tatalien saban. Inexalik bara, kaim idu mere barok, möxösa, e Elisabet ixo une tuu me idu xirip toxo ötaxin saban.
Önga bung e Sekaraia ixo wewet a tinörön köbo pris kö mamaran kö God, möxösa, a axana bung bara abo pris nang idi mere Sekaraia idi toxo rörörön. Io, idi toxo egulös ma satu rua pere kos bere ewenene irabo laxa xö gunon lotu xö Orong kua söngsöngöt a arabaa nang a lak sixine deek. 10 Ma nang a axana bung möxö söngsöngöt a arabaa nang a lak sixine deek ixo ot, a nangadi nang toxo ot etok kö araman kö gunon kö God, idi toxo seseseng.
11 Io, a önga angelo ixo ot pösöt e Sekaraia. Ma a angelo ixo tuu sik kö lawa tuun kö öra möxö söngsöngöt a arabaa nang a lak sixine deek. 12 Ma nang e Sekaraia ixo pere ine, ixo wuwus ma ixo buut köba. 13 Inexalik bara a angelo ixo tengen te ine, “Sekaraia, ganim a binuut. A Orong iri ölangen a sineseng ke nöngön. Elisabet, a une re nöngön, irabo kip a bak suxurno rö nöngön, ma örobo isik a esene bere e Jon. 14 Ine irabo öaxanan nöngön ma oleleng tabo axanan nang tabo kip ine, 15 möxösa, ine irabo tödi raxin kö wawara xö Orong. Me ine i bele inim pe wain bara re ari lölös. Ma irabo wöwö ma Töxödös ne Tanono urulo iat mero xö balana nago. 16 Me ine irabo lamus puxus a marakörö oleleng mee Israel urungan kö Orong, a God te idi. 17 Me ine irabo kip a tatalien ma lölös se Elaija ma irabo sila xö Orong kua bulbulus a malum kaluluonin a tata ma bung barok ke idi. Ma irabo ötöxödös a dödöxömen köbo tabuno ölangen tinenge, me idi tabo kip a dinödöm deek xarnang a nangadi töxödös. Ine irabo tagur sik a nangadi bara idi tabo xixiset ulamun a Orong nang irabo wanot.”
18 Sekaraia ixo ose a angelo, “E rabo ösöxö bulengin ina na? E re ötaxin ma une re e bölök iri une raxin.”
19 A angelo ixo balu, “E, e Gabriel. E bo ruruu xö wawara xö God, me ine iat i tile e rua rengrengen te nöngön ma rua töngösen nöngön ma ina atöngösen deek na. 20 Ma nixinen nöngön örobo tabuno tinenge ma örobo ödödö ot kö bung nang ina laa irabo wanot, möxösa, nöngön u kobo nunu xöbo tinenge re e nang irabo ot turunon kö bung iat möxönan.”
21 Inexalik bara, a marakörö toxo xixiset me Sekaraia, ma toxo ngangao ruasanene ine ixo kis lis köba ruso kölöme xö gunon ne lotu raxin. 22 Nang ine ixo wan su, kaim ine ra eöt tua tinenge rö idi. Me idi toxo ösöxö xulen lo bara ine ixo pere önga winawara xö gunon ne lotu raxin, möxö ixo ööt mon ma limine urungan te idi inexalik bara i kexebe eöt tua tinenge.
23 Nang a axana bung ke ine möxö tinörön ixo kawam, ixo tawuxus baling u lagunon. 24 Melamu xö ina na, e Elisabet, a une re ine, ixo tienen, ma ixo kis mun sik kö ngasiene ot kö pitnö ne texe. 25 Me ine ixo tengen, “A Orong i pet bira rö e. Ma xö ina axana bung na, ine iri osen a inemarse ma iri kip tewe a minenge re e xalik a marana a marakörö.”
A angelo ixo etöngösen sila me Jisas tabo kip ine
26 Ma nang e Elisabet ixoro tienen kö pitnö ma öng ne texe, God ixo tile e angelo Gabriel u Nasaret, a lagunon kölöme Galili. 27 Ma ixo tile ine urungan kö önga une maxat nang kaim bang ine xö minaru arixe mere tödi ma toxo isik pi sik ine bara irabo elolo xö önga tödi a esene e Josep, a marapun te Dewit. Ma a esene ina une maxat e Maria. 28 Ma a angelo ixo wan urungan te ine ma ixo tengen, “A Orong iri kis arixe me nöngön ma iri wadöane nöngön.”
29 Maria ixo ngangao xöbo tinenge re ine ma ixo dödödöm bara a mangana tinenge sa ina na. 30 Inexalik bara, a angelo ixo tengen te ine bira, “U bele bubuut, Maria. God i axanan te nöngön ma i tagur sik bara irabo wadöane nöngön. 31 Nöngön örobo tienen ma örobo kip önga barok suxurno, me nöngön örobo pes a esene e Jisas. 32 Ine irabo tödi raxin ma tabo tengen ine ma Barok kö God lömö saxit. God, a Orong, irabo tabaa ine ma kinis ne king nang ke untubuno e Dewit. 33 Me ine irabo kure ulorexe a bung marapun te Jekop. Ma kinis ne warkurai te ine i karabo kawam.”
34 Maria ixo ose a angelo, “Ina laa na irabo ot turunon bara bule? E kobola ösöxö bang ke tödi.”
35 Ma a angelo ixo balu ine bira, “A Töxödös ne Tanono irabo ot pösöt nöngön ma lölös kö God lömö saxit irabo kawönö nöngön. Io, ina tee Madakdak nang örobo kip tabo tengen ine bara a Barok kö God. 36 Örö ölangen! E Elisabet nang a unaun te nöngön, ine iri tienen, ma a une raxin ine. Ma toxo tengen bara ine a une tuu, inexalik bara ine iri tienen eöt ma pitnö ma öng ne texe. 37 Kaim pe laa i lölös se God.”
38 Me Maria ixo balu, “E a tultul kö pu xö God. I öt bara irabo bie ura rö e xarnang nöngön uru tengen.” Io, a angelo ixo wan lie ine.
Elisabet ixo perexulen a nago xö Orong
39 Io, xö ina axana bung nang Maria ixo tagur lo ma ixo wan pasaxit urungan kö önga lagunon tuso xöbo maii mee Judeia. 40 Ma ixo laxa xö gunon te Sekaraia ma ixo öga e Elisabet. 41 Ma nang e Elisabet ixo ölangen bere e Maria ixo öga ine, a barok nang kö balana ixo mamagi xöba, me e Elisabet ixo wöwö ma Töxödös ne Tanono. 42 Io, ixo tenge lömö saxit, “Irabo deek kö nöngön köbo balixilik kirip, ma ina barok bölök nang örobo kip. 43 Inexalik bara, e ewe, bara a nago xö Orong ke e irabo wanot ura rö e? 44 Nang iat mon a nine talingine e i ölangen nang u öga lo e, a barok na kölöme re e i mamagi ma axanan. 45 Irabo deek kö nöngön nang uru nunu bara a lasanene a Orong iri tengen te nöngön, ine irabo ot turunon.”
Maria ixo ölet a Orong
46 Me Maria ixo tengen,
“Mera kölöme re e, e ii öraxin a Orong.
47 Ma a tanoke i axanan te God a Tene Aöro re e,
48 möxö ixo döxömen e xö kinis ne maris se e, a tultul te ine.
Io, urulo im na a marakörö nixinen me idi nang melamu idi tabo tengen bara irabo deek kö e,
49 möxösa, a God nang a lak lölös saxit iri pet abo lalaa rataxin tö e.
A esene ine i madakdak.
50  Ma a inemarse re ine i önan urungan te idi nang tobo buburin ine
möxö önga mexubu urungan kö önga mexubu.
51 Iri pet abo lalaa lölös ma limine.
Iri tile ebasin idi nang idi te döxömen öraxin öbaling idi.
52  Iri bulus ösu abo sisila raxin meringan köbo kinis möxö pet warkurai te idi.
Inexalik bara ine iri ii öraru abo maris.
53 Ine iri öwöwö idi nang te irilöng ulamun abo lalaa deek.
Inexalik bara ine iri tile rewe tataunin abo asuono orong.
54 Ine iri top e Israel, a tultul kö pu re ine.
Ma i döxömen sik iat bara irabo isik ulorexe saxit a abalamu re ine
55 rue Abaram mabo untubuno melamu,
xarnang bölök ixo tengen urungan köbo untubuno ire.”
56 Me Maria ixo kis arixe me Elisabet ot kö narun ne texe ma ixo tawuxus baling im urungan lagunon.
A bung nang toxo kip e Jon
57 Nang a axana bung ke Elisabet ta xikip a barok, ixo kip a barok suxurno. 58 Idi nang idi tobo kis lörörö sik ke ine ma bung unaun te ine, idi toxo ölangen bara a Orong ixo osen a inemarse re ine, me idi toxo axanan arixe me ine.
59 Ma xö pitnö ma narun ne bung idi toxo wanot tua xurxuru a lewene aine barok, me idi toxo eka isik a esene tamana e Sekaraia re ine. 60 Inexalik bara a nago re ine ixo tengen bara, “Kawaim! Tabo tengen ine bere e Jon.”
61 Me idi toxo tengen te ine, “Kaim pe öng kaluluonin abo unaun te nöngön ewe ma ina ese niang.”
62 Io, idi toxo ööt urungan kö tata re ine rua ösöxö lo bara ese sa ine i mamaa bara tabo isik kö barok. 63 Ixo seseng ulamun te laa rua ginigeet könan, ma ixo geet bira, “A esene e Jon.” Me idi xirip toxo wuwus saban. 64 Ma nang iat mon a ngalana ixo tamasawang ma a kamene ixo tawalas, ma ixo urulo rua tinenge ma ixo ölet e God. 65 Me idi nang lörörö toxo wöwö ma binuut. Ma a nangadi ringan kö boxönö xirip köbo maii mee Judeia, toxobo wöwörö ulamun inabo lalaa na. 66 Me idi xirip nang toxo ölangen ina na, toxo dödöm oleleng ulamun, ma toxo eose, “Ina barok na, irabo mangana tödi bule?” Möxö a lölös kö Orong ixo kis arixe me ine.
Sekaraia ixo tenge propet
67 A tamana ine e Sekaraia ixo wöwö ma Töxödös ne Tanono ma ixo tenge ne propet bira,
68 “A aölelet urungan kö Orong, a God mee Israel,
möxösa, ine iri wanot ma iri ölanglanga a nangadi re ine.
69 Ine iri öraru a önga tödi lölös meringan kö bung marapun te Dewit, nang a tultul kö pu re ine,
bara rua öro ire.
70 I xarnang ixo tengen mesila saxit meringan köbo madakdak ne propet te ine.
71  Irabo öro ire xalik abo iuo re ire
ma meringan kö limine idi xirip nang tobo melentexin ire.
72 Ixo pet bira rua osen a inemarse urungan köbo untubuno ire,
ma rua dödöxömen lo a kunubus madakdak ke ine
73 nang ixo usugurno xö untubuno ire e Abaram
74 rua ölanglanga ire xalik a limine abo iuo re ire,
bara ire tabo eöt tua tinörön tö ine ma kaim a binuut
75 arixe ma tatalien madakdak ma tatalien töxödös
xö mamaran te ine xöbo bungbung kirip pe ire.
76 Me nöngön a barok ke e, tabo tengen nöngön bara a propet nang ke God lömö saxit,
möxö nöngön örobo sila xö Orong kua tagure a ngas sö ine
77 rua tabaa a nangadi ma nanase rua xikip a ineöro
nang e God irabo döxömen taun abo magingin saban te idi,
78 möxösa, xö inemarse deek kö God te ire.
Ma arixe ma a inemarse re ine irabo tile a maras möxö xaken meruso xö watmaep ura re ire,
79 rua mararang lömö re idi nang te xisixis kö ködö ma xö ene lölös möxö minet,
ma rua silien ire ra nuan kö ngas ne malum.”
80 Ma a barok ixo taxin kaa ma ixo lölös kölöme xö tanono, ma ixobo xisixis kö xönö tataun ot nang ixo wanot wösö xöbo Israel.