A Winawara
re Jon
Ire tokobo ösöxö ina axana bung nang e Jon ixo geet oxe inabo lalaa nang e Krais ixo osen te ine, inexalik a oleleng ne tene nanase idi te döxömen bere Jon ixo geet ina na lörörö xö awat 95. Kö ina axana bung e Domitian ixo warkurai sik kiso Rom ma ixo tengen bara ine a Orong, önga god, ma oleleng ne nangadi xö xönö nang Rom ixo kure, idi toxo lotu wösöt ine. Inexalik abo Kristien belek idi tokoxobo lotu wösöt ina king mee Rom, möxösa, idi toxo nunu bara önga Orong kalik mon, e Jisas Krais a Barok kö God. Io nang, abo Rom idi toxo urulo rua eler mabo Kristien, ma abo tiip tataxin ixo uban a dauleng ne Kristien (pere Winawara 2:10; 2:13; 3:10; 6:9). A aposol nang e Jon, toxoro bulus ine xö gunon ne aömokorot kö muxulamin Patimos.
A unine ina ginigeet na i bira, bara ire tabo mana tuu lölös köbo nunu re ire me ire tabo pas ösu abo ölelewen, möxösa, xö xakawam möxö öxöno lagunon, e Jisas Krais a Orong irabo sila esexere ma irabo pas ösu e Satan mabo tultul te ine. A ginigeet i wöwö mabo aömokorot lölös se God nang irabo ömaso abo tene saban. Inexalik e Krais i öxaxat abo Kristien bere idi tabo mana tuu lölös köbo nunu re idi mabo tatalien deek ke idi ot kö xakawam pua nang e God irabo wadöane idi. Ma ina ginigeet i wöwö ma oleleng ne malalar (ma oleleng ne malalar i lörörö xarnang abo malalar kö ginigeet te Daniel). Inabo malalar a mangana tinenge eöt ma a mon unine idi. A dauleng a unine idi i lölös, inexalik a unine i maras, ma i bira, bere God irabo sila esexere. Io nang, abo Kristien tabo mana tuu lölös köbo nunu re idi.
Xö sisila ne xönö Jon ixo pere e Jisas Krais nang ixo ömaras inabo lalaa re ine. Xö Winawara 2-3 Krais ixo isik a tinenge lölös kö pitnö ma ninöng ne lotu ro Esia bere idi tabo mana tuu lölös kaluluonin abo ölelewen. Winawara 4-5 i osen bara e God i deek köba ma i taxin saxit, ma bie bölök ke Jisas a Barok ke ine, ine a Bak kö Sipsip nang ixo liling tewe a pitnö ma ninöng ne bubulut nang i osen abo ömokorot lölös. A sese öpitnö ma ninöng ne bubulut (6:1-8:1) i osen a pitnö ma ninöng ne tauu nang ma ömokorot lölös köba (8:2-11:19). Ma melamu xö ina na, a pitnö ma ninöng ne bile nang i wöwö ma laie re God (15:1-16:21). Satan, a mawak, a propet töxö, ma ina tene ilawa idi takarabo eöt tua ululo wes a laie xö God (12:1-14:20; 17:1-19:5). Krais irabo baling ma irabo kure xirip abo tene saban (19:11-20:15), inexalik bara abo Kristien tabo laxa xö watmaep maxat ma a öxöno lagunon maxat, me idi tabo to ulorexe saxit (21:1-22:17).
1
Jon ixo etöngösen maras mabo lalaa nang e Jisas ixo osen te ine
1 Ina ginigeet na i etöngösen ulamun abo lalaa nang e Jisas Krais ixo osen, nang e God ixo tabaa ine min bara irabo osen köbo tultul te ine ma inabo lalaa na nang i karabo alilis ma irabo wanot. Me Krais ixo tile a angelo re ine ura re Jon, a tultul kö pu re ine, bara irabo osen inabo lalaa urungan te ine. 2 Me Jon iri etöngösen maras mabo lalaa xirip nang ixo pere. Ma iri etöngösen mabo tinenge re God, arixe mabo turunon nang Jisas Krais ixo öwösö. 3 Irabo deek ke ewe a öng nang i kos inabo tinenge ne propet na. Ma irabo deek bölök ke ewe idi nang te ölangen ma te muu inabo tinenge möxö ina ginigeet na, möxösa, axana bung iri lörörö im bara inabo lalaa irabo wanot.
Jisas a sisila raxin saxit nang i eka inuanot
4 Me e, e Jon, e geet ina tinenge na urungan te mum abo marakörö ne lotu möxö pitnö ma ninöng ne xönö mee Esia.
A abalamu ma malum urungan te mum. Irabo wanot meringan te God, ewe nang i to na, ma ixo to mesila, ma irabo to bölök melamu. Ma irabo wanot bölök meringan kalik abo pitnö ma ninöng ne tanono, ewe idi te tuu mesila xö kinis ne king kö God. 5 Ma irabo wanot meringan iat te Jisas Krais bölök, ewe nang ibo etöngösen maras mabo tinenge turunon. Me ine a sila möxö tinaru kaa xalik a minet, me ine i kis ne warkurai sik köbo king möxö öxöno lagunon.
Io, ine ibo mamaa rö ire ma ixo ölanglanga rewe ire xalik abo magingin saban te ire xö dee re ine. 6 Me ine iri kos ölaxa ire xö kingdom pe ine, bere ire tabo pet abo tinörön möxöbo pris urungan te Tamana, a God te ine. Io nang, ire tabo ölet ine ma tabo sixaut bara irabo kure abo lalaa ulorexe. Amen.
7 Pere bang! Ina na i eka inuanot arixe mabo kubu.
Mabo nangadi xirip idi tabo pere ine,
me idi iat bölök ewe idi toxo buso ine.
Ma nangadi xirip möxö öxöno lagunon tabo gee ne tapunuk pönö ine.
Turunon saxit, irabo bie xarna na.
8 Me God, a Orong, nang ine mabo lölös kirip, ewe nang i to na ma ixo to mesila ma irabo to melamu, ine i tengen bira, “E a araun ma a xakawöm.”
A winawara ulamun e Jisas
9 Me e, e Jon, a tönö e mum. E a öng mere mum kölöme re Krais, me e bölök e tuu lölös köbo tiip nang i ot pösöt ire nang ire möxö kingdom pe ine. Me idi toxo kip tewe e urungan kö muxulamin Patimos, möxösa, e xo wöwörö ma tinenge re God me e xo etöngösen mabo turunon ulamun e Jisas. 10 Ma xö Bung ke Orong e xo kis kölöme xö lölös möxö Töxödös ne Tanono. Me e xo ölangen a inöno öng melamu re e, ixo gee xarnang a tauu. 11 Ma ixo tengen bira, “Nöngön örobo geet abo lalaa nang nöngön u pere ma örobo tile urungan köbo pitnö ma ninöng ne lotu mee Epeses, Semerna, Pergamam, Taiataira, Sadis, Piladelpia me Laudisia.”
12 Io, e xo talingen tua werwere bere ewenene i wöwörö rö e. Ma nang e xo tawuxus e xo pere a pitnö ma ninöng ne kinis ne laam ne gol. 13 Ma kaluluonin inabo kinis ne laam, e xo pere a öng xarnang a Barok kö Tödi, ma ixo sige sik önga man ömat. Ma a kie toxo pet ma gol ixo iis a böngböngöno ine. 14 Ma bebene öxöno ixo pidien xarnang a bebene sipsip ma xarnang a op. Ma nine marna ixo xarnang a kamene ia. 15 A nine xexene ixo sisiek xarnang a baras te söngöt kö ia sösöt. Ma inöno ixo xarnang a ginee möxö ari lölöös. 16 Ma xö lime tuun te ine, ine ixo tön sik a pitnö ma ninöng ne tii ma önga sele aan, ixo aan kö nine lawa xirip. Ma ixo wan su xalik a ngalna. Ma a mamaran te ine ixo mararang köba xarnang a luono xaken.
17 Ma nang e xo pere ine, e xo subu xö xexene xarnang a öng i met. Io, ixo bulus a lime tuun te ine lömö re e ma ixo tengen, “Ganim a binuut. E a sila, me e a xakawöm. 18 E ina öng na nang ine ma to. E xo met ma lamun na e kis ulorexe. Me e tön sik a ki möxö marame möxö minet ma möxö lagunon ne minet bölök.”
19 Io nang, nöngön örobo geet inabo lalaa nang u rö pere, ma lalaa nang i önan ot na, ma abo lalaa nang irabo ot melamu xina na. 20 Me e rabo öwösö a unine nang ixo mun sik möxö ina pitnö ma ninöng ne tii nang u xo pere xö lime tuun te e, arixe ma pitnö ma ninöng ne kinis ne laam bölök. A pitnö ma ninöng ne tii, idi abo angelo möxö pitnö ma ninöng ne lotu. Ma pitnö ma ninöng ne kinis ne laam, idi a pitnö ma ninöng ne lotu iat.