3
Foron Famfamu na Lotu
1 Orek igii i rokap le keren unune lo: Male tikas i ier isi tapiek nenge famfamu na lotu, foim ae i tim pes u, i rokap kanaka. 2 Taitus 1:6-9Nenge famfamu na lotu, i rokap le sinangu in tara aragii: Biil rin tiu u ini ti tier, in tikii sau e antu, wolwol kia in malal, in nagogon fakasi wolwol kia tom, in matngan kaltu ae fanu ri bulat la lo, in tom somangat pes fanu la una matanfel kia, ke ifasi in fausum fanu. 3 Ke biil in tom ininmet, biil in tom ngalngaliaf. In kaltu una kiis fofo, biil in tom balbalkutmet ke biil in lala ier la isi pitkalang. 4 In nagogon fakasi matanfel kia ke ik fausum berberat kia isi rin wong rokap sing i ma rik bulat lo. 5 Male nenge kaltu biil i usum na nagogon fakasi matanfel kia, ke arafa in fofonoi lon foron tom unune ke God arae? 6 Male i am sokiliis liu kia sau, ke gong i tapiek nenge famfamu, tarama ka falaumet u tom ma ka luut ke ka ti na nagogon arae Satan. 7 In rokap le nenge famfamu na lotu, in matngan kaltu ae fanu na kabarais rin bulat lo, isi biil rin orek laulau ulo, ma ka fiu na kuun ke Satan.
Foron Tom Falupes na Lotu
8 Ifasi sabin usuf foron tom falupes na lotu, i rokap le rin matngan fanu ae ifasi fanu rin bulat lo ri, biil rin fanu ae iwu la e kerme ri, biil rin fanu una lala umin dan rakrakai, ke biil rin tom akalemok. 9 Rin posefat na tekentu na unune ini tortores na wolwol. 10 Gamen tof famu ta ri bii, male biil ti tuk lo ri, ke aiam gamek somangat pes ri isi kep foim arae foron tom falupes na lotu.
11 Ifasi sabin usuf foron antu ri, rin matngan kelefin ae ifasi fanu rin bulat lo ri, biil rin orek kumkum la. I rokap le in malal e wolwol kiri ma rin tekentu na foron foim tikii.
12 Nenge tom falupes na lotu, in tikii sau e antu ke in nagogon fakasi berberat kia turan fanu tikii ae na matanfel kia. 13 Fanse ae ri tel fakasi foim arae foron tom falupes na lotu, fanu rin bulat lo ri, ke unune kiri lo Karisito Iesu ik lala rakrakai.
Waran Unune Kirer
14 Ia ier isi la sape unaisam, isau le ia wol le, in rokap le ian sisiit famu ta bii usuf o. 15 Male ti tier i tel kale iau ma biil ia la sape, ke on usum tom na sinang ae fanu ke God rin mi lo na fatpoto ri tom. Wara le fanu ke God ae i liu, ri arae rakrakai na tuh ke waran singlen ae i farakrakai orek tekentu. 16 I malal le fafausum ae kere unune lo, i laumet kanaka. Pakanini, i kiis mumun tah, isau le igii ka tapiek malal mang ma i lame kerer isi unune lo God. Waran fafausum ae i aragii:
Karisito i tapiek kaltu toh,
ke Tanwa Kalkaluu ka famalal u le, Karisito i tortores na mata God.
Foron angelo ri par ta u,
ma fafas lo ka sarara na fatpoton foron funmat tikii
ke fanu na piklinbat ri ka unune lo.
Ke God ka kep fatatkau u una memeh kia.