Fawu u e Leta
ke Jon
Orek famu
Leta igii Jon i siit ta u. I use u le i siit u usuf nenge fifin, isau le ifuun e tom tasum ri wol le i orek fatoftof sau isi lotu na nenge maleh turan foron tom unune lo. Aunbiing i use kisilik e fifin ae, i use lotu na nenge maleh sabin.
Na leta igii i fas ri le rin famais faliu ini ri ke rik tumarang isi foron tom fafausum famfabal.
Fawu e Leta ke Jon i aragii:
1:1-3 Tanwara na leta igii
1:4-6 Famais
1:7-11 Fafanau isi foron tom famfabal
1:12-13 Farfarop na Orek
1
1 Ia nenge famfamu na lotu, ia sisiit usuf o fifin ae God i tim pes ta wo turan berberat kiam. Ia ier tekentu isi gam, ma biil iau keskes sau, biil, fanu tikii sabin ae ri usum na tekentu, kemem tikii keme ier kanaka isi gam, 2 wara na tekentu ae i kiis na liu kirer ma in kiis fitliu naisrer.
3 Famais, falupes ke siaroh sing God Tama kerer ke sing ke Kalalik, Iesu Karisito, in kiis na liu kirer aunbiing kere usum na tekentu ma aunbiing kere famais faliu ini kerer.
Sinangun Famais Faliu
4 Ia laes kanaka aunbiing ia ongen u le berberat kiam ri mi na tekentu arae tom Tama kerer i fas ta kerer. 5 Jon 13:34; 15:12,17Ma igii ia sising o tin ier, le keren famais faliu ini kerer. Biil e nagogon fuuh igii ia siit u usuf o, biil. Nagogon sau ae o ongen u la tinpakanini. 6 Sinangun famais i aragii: Keren misuut na foron nagogon ke God. Nagogon kia ae gam ongen ta u pakanini i aragii, keren liu ini sinangun famais.
Gamen Tumarang isi foron tom Famfabal
7 Ifuun e foron tom famfabal ri ka sarara ta na piklinbat. Ri fakawe le Iesu Karisito biil i tapiek kaltu toh tah. Matngan fanu arae ri foron tom famfabal ma ri tuui ke Karisito. 8 Gamen tumarang isi gong gam posepel na tier ae gam ka foim ta isi. Gamen foim rakrakai isi gamek kep tikii u e fasuat kimi. 9 Fanse ae ri ka longe koseng ta fafausum ke Karisito, God biil i kiis tura ri. Isau le fanse ae ri mi na fafausum ke Karisito, Tama kerer ru e ke Kalalik ru kiis naisri. 10 Male tikas i la usuf gam ini ti fale matngan fafausum ae biil ifasi ini fafausum igii, ke gong gam somangat pes u ma gong gam fakau u na fel kimi. 11 Male tikas i somangat pes u, ke i fatal u na foim laulau kia.
Farfarop na Orek an Famais ke Jon
12 Ifuun e tier ia wol le ian siit u usuf gam, isau le biil ia ier le ian sisiit na ti aun buk, le ini ti pen. Ia unune le ian laum gam, kerek faparia turim ma iak faorek gam isi ik kuruur e laes kirer.
13 Berberat ke kisimlik ae God i tus pes ta u, ri tule orek an famais kiri usuf o.