Leta ke Pol usuf Fan
Kolosi
Orek Famu
Leta igii, Pol i siit u aunbiing i kiis ta na kamkabet na Rom. Aunbiing i kiis na kamkabet ka siit ta ifet e leta. Neng usuf fan Efeses, neng usuf fan Filipai, neng usuf fan Kolosi ke neng usuf Pilimon.
Leta igii i siit u usuf foron tom unune na Kolosi, ke ka ta u sing Tikikus ru e Onesimus, ma ru ka kep u usuf ri.
Aunbiing Pol i kiis na Efeses, i wuun nenge tom foim asa e Epafras una Kolosi isi ik fafas usuf ri (par Kol 1:7), ke usuf fanu sabin na maleh na Laodisia ke na Ierapolis (par Kol 4:13). Pol biil i to la ta una Kolosi, biil. I ongen u sau le ri ka kiliis ta liu kiri, pesu ka sising isi ri.
Aunbiing Epafras ka fis, ka ususe sing Pol le foron tom fafausum famfabal ri ka ier isi falaulau unune ken foron tom unune na Kolosi. Pesu, Pol ka siit leta igii, una farakrakai unune kiri. Foron tom fafausum famfabal ri use u le fanu rin lotu unaisan foron rakrakai na tanwa ke foron angelo, ke ri ka use u sabin le Iesu biil e Kalalik ke God, i arae foron angelo sau. Ri ier sabin le fanu rin mi na foron nagogon ke Moses ma rik kiit pununfon fanu tamat.
Na leta igii, Pol i fausum fanu le Iesu ru e God ru itikii sau. Memeh, wolwol, ke sinangu ru itikii sau. Ke lo Iesu Karisito sau, God ka fakiis ta piklinbat, ma keren kep liu fitliu lo i sau.
Leta usuf fan Kolosi i aragii:
1:1-2 Tanwara na leta igii
1:3-14 Pol ru e Timoti ru sising isi fanu na Kolosi
1:15-23 Karisito i laumet kanaka
1:24—2:5 Foim ke Pol usuf foron tom unune
2:6-23 Fafanau isi fafausum famfabal
3:1-17 Liu fuuh lo Karisito
3:18—4:6 Fafausum na foron rokap na sinang
4:7-18 Farfarop na orek ke Pol
1
Ia Pol, ia nenge aposel ke Karisito Iesu, na wolwol ke God tom. Kama e Timoti, tualikrer, kama sisiit usuf gam ae na Kolosi, gam fanu kalkaluu ma gam foron tualikmem na asa Karisito.
Famais ke siaroh usuf gam sing God Tama kerer.
Pol ru e Timoti ru Sising isi foron Tom Unune
Aunbiing kama sising la isi gam, kama fotrokap la tom lo God, Tama Kumguui kirer, Iesu Karisito, wara kama ka ongen ta ususe na unune kimi lo Karisito Iesu ke famais kimi usuf fanu kalkaluu tikii. Unune turan famais kimi i tapiek tina sani ae gam nene isi ini unune, ae God ka pakne ta u kimi buuii na kukulii, ma gam ka ongen ta u na orek tekentu, i e Rokap na Fafas, ae i tapiek ta usuf gam. Na piklinbat tikii, Rokap na Fafas igii i fufua la ke ka kuumkuum la. I arae sabin na fatpoto gam, tipes u na aunbiing gam ongen ta u, ma gam ka malal tekentu na famais ke God. Kolosi 4:12; Pilimon 1:23Epafras ka fausum ta gam ini. I tikiin foim kimem ae kemem ier kanaka isi, ma i nenge tom foim tekentu ke Karisito una lupes gam. I fas ta kama sabin ini sinangun famais kimi ae Tanwa Kalkaluu i ta ta u usuf gam.
I e wara ke biil kama mangeh la na sising isi gam, tanwara na aunbiing kama ongen ususe lo gam. Kama sising God isi ik fafuun gam ini tasum isi gamek usum na wolwol kia, ke isi ik mel e polo na wol turan tasum sing gam, ae Tanwa Kalkaluu i ta u la. 10 Kama sising arae, isi liu kimi ik fasi ini wolwol ke Kumguui, ke fitliu gamek falaes u ini foron rokap na foim tikii, ae i arae rokap na fuan liu kimi, ke tasum kimi lo God ik kuum lalala. 11 Ma God in farakrakai gam ini rakrakai tikii ae ifuun ini memeh kia, isi gamek kiis fofo ma gamek tifat na foron tatawin tikii ae gam tafe u, ke gamek laes. 12 Ma gamek fotrokap usuf Tama kerer, ae i somangat ufu ta gam isi gamek kep foron rokap na tier turan fanu kalkaluu ae ri kiis na malal na matanfuntih kia. 13 I wara le ka faliu pes ta kerer koseng rakrakai ken kubunor, ke ka lame fakau kerer una matanfuntih ke ke Kalalik ae i ier kanaka isi, 14  Efeses 1:7ae i fiil fasengsegeng ta kerer, ke ka pa ufu ta foron sinang laulau kirer.
Karisito i Laumet Kanaka lon foron Fakfakiis tikii
15 Karisito i e tantanwa God, ae biil ifasi keren par u, ma i e Kalalik famu ae i laumet na olon foron fakfakiis tikii. 16 Wara le, lo Karisito sau, God ka fakiis foron tier tikii:
Foron tier tikii buuii na kukulii,
ke igii na piklinbat,
foron tier ae kere par u la,
ke foron tier ae biil ifasi keren par u arae,
foron tanwa ae kiiskiis kiri i laumet,
foron tanwa ae imel e rakrakai kiri,
foron tanwa ae ri famfamu,
ke foron tanwa ae imel e rakrakai kiri una nagogon.
Foron tier tikii God i fakiis ta u lo Karisito, ma ke Karisito tom. 17 I liu famu na foron tier tikii, ma lo i sau, foron tier tikii ka kiis turim. 18  Efeses 1:22,23Ma i e paklun foron tom unune ma ri e pununfo. I e tanwara, ma i e Kalalik famu ae i apti fis ma ka fapu rakrakai ken minet, isi i tom ik famfamu na foron tier tikii. 19 Wara le God i laes kanaka le liu tikii kia ifuun lo ke Kalalik. 20  Efeses 2:16Ma lo ke Kalalik, foron tier tikii na piklinbat ke bae na kukulii, ri ka fatala fis tura. God i tel u arae aunbiing i fatapiek siaroh ini dawu ke Kalalik ae i ring na aupaket.
21 Pakanini gam kiis tapak ta koseng God, ma gam tapiek tuui kia na wolwol kimi, wara na foron sinang laulau ae gam tel ta u. 22 Isau le igii, ka fatala fis ta tura gam ini pununfo Karisito na minet kia. Ke ik fasoti gam arae fanu kalkaluu na mata God, ma biil imel e tuk lo gam, ke biil tikas in tiu gam ini ti tier. 23 Pesu, gamen tifat ta tom na unune kimi, ma gong gam gigin koseng tier ae gam nene isi ini unune. Tier ae, gam ongen ta u na Rokap na Fafas. Ri fafas ta ini una piklinbat tikii. Ma ia Pol, ia tapiek nenge fafauun una fafas ini.
Foim ke Pol usuf foron Tom Unune
24 Ia laes aunbiing ia kalsakai fangungut isi gam na pununfong tom, wara le fangungut ae ia kalsakai u, ia kalsakai u una fasuut fangungut ae Karisito i kalsakai ta u isi foron tom unune kia ae ri pununfo. 25 God i unune ufu ta foim igii usuf iau, isi ian tapiek tom foim una lupes foron tom unune kia, ke ka tim pes ta iau isi fafas tikii ini orek kia usuf gam. 26 Orek ae, i kum ta sing fanu na foron ulul pakanini, isau le igii mang ka tapiek malal usuf fanu ke God. 27 God ka famalal u usuf fanu kia, wara le i ier le fanu ae biil ri fan Iudaia rin usum na foron rokap na memeh tikii ae na orek kia ae pakanini i kum tah. Orek ae i kum tah, i aragii: Karisito i kiis na liu kimi, pesu gam ka nene ini unune isi gamen kiis na memeh ke God.
28 Keme fafas ini Karisito usuf fanu tikii, keme ka fanau ri, ke keme fausum ri ini foron rokap na wolwol tikii kimem, isi aunbiing kemen ta ri usuf God, ke liu kiri lo Karisito ik matuk. 29 I e wara, ia ka foim ke ia ka totof rakrakai ini tara rakrakai ke Karisito, ae i foim igii lo iau.

1:7: Kolosi 4:12; Pilimon 1:23

1:14: Efeses 1:7

1:18: Efeses 1:22,23

1:20: Efeses 2:16