11
Iwu e Tom Fafamalal
1 Esekiel 40:3; Sekaraia 2:1,2Ka ta nenge konon au sing iau una ngaf foron tier ke ka fas iau aragii, “La ma ok fatof pes Felun Tunmapek ke God ke salan tunmapek ma ok wes tikii fanu ae ri lotu na Felun Tunmapek. 2 Daniel 7:25; 12:7; Luk 21:24Isau le gong o ngaf laumet ken falifu ae na maleh kawil Felun Tunmapek, wara le ri ka ta ta u usuf fanu ae biil ri fan Iudaia. Rin fosfose maleh kalkaluu na in fet e sangful ini u e funiil. 3 Ma ian ta rakrakai usuf iun tom fafamalal kiak. Run kilkiliis ini kaen na mamais ke ruk orek profet ulo iau na in tikii e arip ini wu e mar ini won e sangful e biing.” 4 Sekaraia 4:3,11-14Iun tom fafamalal ae, ru e iun au na olif ke iwu e nian soti ken lam, ae ru soti na mata Kumguui ken fanu tikii na piklinbat. 5 Male tikas i ier le in falaulau ruh, ke yiif in suu tina ngusruh ma ik fasok foron tuui kiruh. Male tikas i ier le in falaulau ruh ke in met na yiif ae. 6 1King 17:1; KisimBek 7:17-19; 1Samuel 4:8Iun kaltu igii, imel e rakrakai kiruh una tikale bat isi gong i luut e us aunbiing ru orek profet. Ke imel sabin e rakrakai kiruh una sokiliis dan una dah ke una ta marmarsan tatawin usuf fanu na piklinbat na foron aunbiing ru ier le in tapiek.
7 Daniel 7:7,21; Parpar 13:5-7; 17:8 Aunbiing ruk farop ta fafamalal kiruh, ke muruuw aka ae i tatkau tina tara turuung ae biil ti farfarop lo, ik fapaket tura ruh, ik paket ruh ke ik siimete ruh. 8 Aisaia 1:9,10Rin faborong pununfo ru na palgan sal na tara maleh ae ri fakulkulik ta Kumguui kiruh lo. Maleh ae, i arae tintof na maleh na Sodom ke Isip. 9 Na in tuul e biing ma tiga, fanu tina marmarsan falifuh, tina marmarsan mat, tina marmarsan orek ke tina marmarsan funmat, rin kanap pununfo ruh ma biil rin somangat isi ile ruh. 10 Ke fanu na piklinbat rik lala laes, rin fafen faliu ini ri una finngas laes kiri, wara le iun profet ae, ru ta ta fangungut sing fanu ae ri kiis na piklinbat.
11 Esekiel 37:10Isau le, nami na in tuul e biing ma tiga, God in kuf kif na liu na ngusruh ke ruk liu fis ma ruk sotih. Fanu tikii ae ri par ruh, rik lala sokeh. 12 2King 2:11Ke ruk ongen kinen tikas i tautau tinbae na kukulii aragii, “Kamu tatkau uga.” Ke ruk tatkau ubae na kukulii na olon nenge laukaf na matan foron tuui tikii kiruh.
13 Parpar 6:12; 16:18Na aunbiing masau ae, nenge tara gih in tapiek. Arae ri tem ta tara maleh ae una i sangful e baba ma in tikii e baba in bereng sararah. Ma in fit e arip e fanu rin met na gih ae, isau le fanu ae ri liu, rin sokeh ke rik ta memeh usuf God tina kukulii.
14 Ongen u! Fawu u e tatawin ka rop ke fatuul u e tatawin fatat ik tapiek.
Fafit u e Angelo i Kuf Tafih kia
15 KisimBek 15:18; Daniel 2:44; 7:14,27Fafit u e angelo ka kuf tafih kia, ke ia ka ongen kinen fal bae na kukulii, ri tautau aragii,
“Matanfuntih na piklinbat ka tapiek
matanfuntih ke Kumguui kirer,
ke, ke Mesaia kia
ma in king fitliu
ma biil ti farfarop lo.”
16 Ma iwu e sangful ini fet e famfamu ae ri kiis na foron nian kiiskiis ken king na mata God buuii na kukulii, ri ka ilepul ini posong na matri una pikli ke ri ka lotu unaisa God. 17 Ke ri ka tarah,
“Kumguui God,
o Rakrakai Kanaka,
o liu igii ma o liu pakanini.
Kemem fotrokap usuf o
i wara le o ka kep ta tara rakrakai kiam
ma o ka tipes nagogon ta arae King.
18 BukSong 2:5; 110:5; 115:13Foron funmat ri ka ngaliaf tah
ma ngaliaf kiam sabin ka tapiek tah.
Ka aunbiing mang isi on nagogon foron minet,
ke isi ok fiil foron fafauun kiam foron profet,
turan fanu kalkaluu kiam, ae ri bulat la na asam,
fanu foes turan fanu ae imel e asri,
ke isi ok falaulau fanu ae ri falaulau ta piklinbat.”
19 Parpar 8:5; 16:18,21Namih, Felun Tunmapek ke God buuii na kukulii ka sapeng ma ifasi rin par Bokiis na Puput ke God awii na palga. Ka pil, waran bat ka ninih, ka pah, ka gih ke ais ka luut arae tara us.
11:1: Esekiel 40:3; Sekaraia 2:1,2
11:2: Daniel 7:25; 12:7; Luk 21:24
11:4: Sekaraia 4:3,11-14
11:6: 1King 17:1; KisimBek 7:17-19; 1Samuel 4:8
11:7: Daniel 7:7,21; Parpar 13:5-7; 17:8
11:8: Aisaia 1:9,10
11:11: Esekiel 37:10
11:12: 2King 2:11
11:15: KisimBek 15:18; Daniel 2:44; 7:14,27
11:18: BukSong 2:5; 110:5; 115:13
11:19: Parpar 8:5; 16:18,21