1 Pita
Iesu Gaabee Ari Kakatodu, Pita Da Ambova Gefiria Gaga Re.
Iesu da ambo nimbi ragaro Pita unda ingiso tutunova aná “God da gateguturia enembo” Pontus, Galesia, Kapadosia, Esia, kotú Bitinia frovensiva didighigea vitiria-dava gefirie. Pita ená ingiso aghajora ghaeko* 65 Iesu siroruturia-da ambova gefirie.
God gaabee ari kakatodava gitofomi bouvude memade ututuaveta, númane mema itatama eta uria-nu nundubuturota, Pita ená gaga gefirie. Kotú, númane sonembuturota, rourogo mema itatama egeguturota, mana-mana ea, Iesu injigha egegauve-degea, ená gaga gefirie.
Pita Ená Buka Gefiria Gagada Mendó Mane, Aná Evere:
1:1-2 Pita na God da natofo ghanena urie.
1:3-2:10 God namonde amó sonembuturota, fefera ambova jebuga utaita rouvia-du, Pita namonde amó ano ea, kaifa egegari-du riria re.
2:11-5:9 Namonde Amó God gaabee ea, Iesu da furari kaifa urota, donu egegasira-nu Pita na ririe.
1
1:1-2 Pita Enembo Ghanena Urie.
Ariee, anda ikoko mendi, ariri gharovu! Anda ragaro Pita re. Amó Iesu Keriso da aghi kato eini re. Nímane God da gateguturia natofo Pontus, Galesia, Kapadosia, Esia, kotú Bitinia frovensi anava taivea andivea arera didighigea vitera dano, ghanena roreta! Yata bua gigige! God Afa unda unova nímane gateguturie. Aghade, nímanda ari akokogo Iesu Keriso da tatangumi seseghurota, unda Gaga niningigadi rea, God da Asisi Kakarami ririeta, God da natofo kakarago ea viteravore. God da sonembade siriri aride nímanda neno rova vorea baria jojabe ae!
1:3-12 God Namonde Andava Sonemba Jojabe Utaita Rei-simbugetua-du Raga Regegore!
3-4 Namonde anda Jojabee Iesu Keriso da God, kotú Afadu “aiye” regegore! Anada bee mo, umó namonde andú neno mema jojabe ea, Iesu Keriso amburarivareta jebugea eroruria-da anomi namonde andú jebuga reka ututurie. Aghá uria-mi, namonde amó God da ea simbugari fefera ambova bubugaita rosora-nu kaifa gigita urota vitere. Aná ea simbugari rera, unona uutuva kaifa rouvie, jo nanjigo aghade sidara ambi, kotú akuago ea betambi aita rouvie! Avore, aná ea simbugari esiko-esiko bee fefera ambova nímanena bubugadi, God na uutuva kaifa ueta vitie. Kotú nímane beago, God na kaifa ueta viteravore. Amindu, nímane beago gaabee egeguturadi-gea, nímane unda anomi kaifa urota, unda jebuga tumanadu irari utaita rea simbuguturia-da rifo furá banuna ata-gea, bubugadi!
Amindu, nímane aná ea simbugari esiko-esiko bubugaita rosora-du gangorogha iririgasiravore. Avotago, fefera tufokoda rova dara kotú bouvu nímandava siroreta rouvia-du neno mema urota viteravore. Auri goldi ananu nundubea gigige! Goldi mo, taubana re-tago, jo tumanadu irambi aita rouvie. Nímanda gaabee arimi donu siroraita rouvia, tumanadu iraita rouvie. Tago, goldi taubana ari-du rea, ivariva dungeaveta jee vorea sidara eaveta, aná goldi taubana eta rouvie. Avore, namonde amó gaabee ea goghó urota, mema rova jiraita rosora, aĩ tefo, ananu kuvia gerurota, God, aná ivari retora aghago, namonde andava dara kotú bouvu utuaveta itatama egegeta rosore. Anami namonde anda gaabee ari kuvia gita rouvie. Enembo avona jiradua mo, ambova Iesu Keriso da furaita rouvia feferava, God aná enembodu durogha utua, númane righota erorurota, númandu raga raita rouvie. Nímane Iesu Keriso jo gigigambi re. Avotago, umó neno buta rosoravore. Kotú oreki beago, nímanda dibe mokomi umó jo gigigambi viteravore-tago, umó gaabee egeguturota, undú gangoro jo namonde anda enemboda bemi isuri ari aghago irambi-nu urota viteravore. Anada bee mo, nímanda asisi jejebugea tumanadu irari-du rea, nímane Iesu gaabee egeguturera-da bee aná rururota viteravore.
10-11 Atá, fefera nanjigo aghade emboro daiyagha ea utota bubugaita rosora-nu, feroveta manemi gia tanana egegaita nundubuturota, uriga ea ningia egegutueta, Keriso da Asisimi númanda neno rova buro ueta, God emboro daiyaghava jebuga utaita rouvia, kotú Keriso furá mema tafirota, ambua, rekago amburarivareta jebugea duroghagha eraita rouvia-nu tanana ea, minono regeguturota, gegembuguturie. 12 God na urieta, feroveta maneda tanana egeguturia mo, jo nendufa númanda taubanadu buro urota, minono regegambi re. Aná mo, nímane daiyagha ea jebuga tatambugasira-du minono rirota gegembuguturie. Anada ambova God unda Asisi Kakara ninenguturieta vorea furia, God da Gaga Taubanada aghi kakatodu ano ututurieta aria, nímandava aná feroveta maneda sei gegembuguturia gaganu minono regeguturieta niningigutureravore. Atá, anera mane aná gaga rera ningia, tanana egegaita uno eta rousue.
1:13-25 Namonde Amó Aito Taubana Fugiturota, God Da Natofo Kakarago Egegore!
13 Aghá-gea, nundubea goghó urota, dibe fangea, Iesu Keriso kaverea furarida rifo furá, isagha aita rouvia aghade, God unda ea simbugari nímandu utota bubugaita rosora-nu neno dano ititurota, kaifa gigita urota iririgadi rere! 14 Nímane sei nundubambi irirota, tamo firída uno egeguturota, bingoiva fufugegea vitaravore. Oreki, mania aghagonu egegata! God da unonu urota iririgadi rere! 15 Anada bee mo, God nímane aghi uria, umó aná Kakara bee re. Amindu nímane beago aghagonu egeguturota, unda enembo kakarago ea iririgadi rere! 16  Lev 11:44-45; 19:2Anada bee mo, unda gagava eghá gembari vitie, “Amó ari kakarago nuenembo eta rore. Amindu, nímane beago, dabako aghago egegadi rere!”
17 Nímane benunuva God du “Afa” regegeta rosoravore. Tago, umó enembo dano inonova gia irureta rouvia-du, ená endava jebuga irirota, undú oru egeguturota, kakara urota iririgadi rere. 18 Anada bee mo, irari sembago mambu bee maneda vareta furia-mi bebeta egeguturera-da dongoro segharida mino aná jojabe beenu, nímane sei tanana egegutureravore. Jo itoko goldi o siliva genanje ea betea sidara eta rouvia aghago irambi re. 19 Anada mino mo, God du ari akokogoda mino ututurota, oka sifi da mendi gari taubana kotú betoda bubugha eini tefo aghago dea buria ivariva dungeta egeguturia aghago, God namonde anda ari akokogo nundubea gia doaita rea, unda mendi Iesu Keriso nu ninenguturieta furia, endava unda tatangu averegea ambubuturie. 20 Avore, uutu enda sirorambi-da dibeva, Keriso mo, seibe gateguturieta vitirie. Avotago, nímandu rea, reka sirorarigo ea furia, uutu enda banuna aita uua feferava, nímandava isagha urie. 21 Keriso donu uria-mi, nímane God gaabee egegutureravore. Kotú, God Afa na ririeta, Keriso amburarivareta jebugea unda durogha rururie. Amindu, umó donu utaita riria-nu bubugaita rirota, nímane God gaabee ea, unda sonemba kaifa gigita urota viteravore.
22 Gaa bee, nímane God da Gaga beenu ambo-ambo egeguturota, nímanda neno roo seghea simbugea, nímane neno dabako urota, nímanda ikoko mendi, ariri gharovu neno bubugeta rosoravore. Avore, neno dano avo ititurota, aghá urota iririgadi rere.
23 Anada bee mo, God da jebuga bua furia, kotú tumanadu vitia Gaganu, vee aghago, unona nímanda neno rova goviturieta, nímane unda jebuganu bua, unda sasingu ea viteravore. Tago unda Gaga mo, jo ená endava goveaveta beteta rouvia vee aghago irambi re. Tumanadu iraita rouvie. 24  Is 40:6-8Amindu rea, God da gagava eghá reirie,
“Enembo nanjogoda gari aná kirisago re. Númanda durogha gari mo, siginago re.
Kirisa evia, gharasa eta rouvia o sigina mane fangea jua voraita rouvia aghago,
enembo beago, tutomi ambua tamo betea sidara eta rouvie.
25 Avotago, God da Gaga jo nanjigo aghade manjambi,
tumanadu iraita rouvie.”
Avore, ená Gaga rera mo, God da Gaga Taubana nímandu minono reta uria avore.

1:16 Lev 11:44-45; 19:2

1:24 Is 40:6-8