1 Tesalonaika Enembodu
Pol Unda Ingiso Sei Tesalonaika Enembodu Gefiria, Aná Evere.
Pol Jiusi enembomi tuviturieta umó Tesalonaika doa aria, Korin naava irirota, ená ingiso ghaeko* 52 Iesu siroruturia-da ambova aghago gefirie. Jojabee daiyagha kaverea furaita rouvia, ananu númane mana-mana egegauve-degea rirota, ená ingiso gefirie.
Pol Ená Buka Gefiria Gagada Mendó Mane, Aná Evere:
1:1 Pol númane ghanena urota, undufa isagha urie.
1:2-3:13 Pol na númanda gaabee ari gia, gangoro urota, raga ririe.
4:1-12 Ari-bari taubana ari-du rea, Pol na nghaĩ ituturie.
4:13-5:11 Pol na, Jojabeeda rekago kaverea furaita rouvia-nu, isuri urie.
5:12-28 Pol na Tesalonaika enembo ghanena urota, númane ano ea, Jojabeeda furari fefera kaifa egegari-du rea, ririe.
1
1 Eka 17:1Ariee! Námane Pol, Sailas kotú Timoti de nímane Tesalonaika naava God Afa kotú Jojabee Iesu Keriso da natofo ea vitera enembo ghanena rosore.
Nímandu benunu rosore. Sonemba kotú siriri ari nímandava iroe! 2 Námane tumanadu nímane nundubuturota, God dava benunu urota “aiye” rirota vitere. 3 Namonde anda God Afa gaabee egeguturota, unda buro eta rosora-du, God dava “aiye” reta rosore. God da neno bari nímanda neno rova vitia-du, kotú nímane ano urota, God da natofo sonembuturota, Barirari Iesu Keriso da kaverea furari fefera gangorogha kaifa eta rosora-du, Jojabee Iesu Keriso dava “aiye” rirota vitere. 4-5 Anda ikoko mendi, God da Gaga Taubana nímandu regegutara, aná unda anogha re, jo gaga nuenembo irambi re. Unda Asisi Kakara ututurieta, nímane bua, oreki gaabee ea goghó eta rosoravore. Amindu námane reisi-gerore, God nímane neno bua, unda buro egegari-du gateguturie. Kotú nímane daiyagha aito dabako aghagonu egegari-du rea, námane aito taubana fugitueta, gigigutaravore. 6 Eka 17:5-9Námanda ambo-ambo urota, kotú Jojabeeda ambo-ambo urota vitara-du, mema kotú dara jojabe itatama egegutaravore-tago, gangoro Asisi Kakarada ututa rouvia-nu bua, námanda gaga ningia gaabee egegutaravore. 7 Aghá egegutara-mi, Iesu gaabee ari kakato Mesadonia Frovensi kotú Akaiya Frovensi desea vitia enembodava beforo isagha ari taubana irugutaravore. 8 Anada bee mo, nímanda aghá egegutara-mi Jojabeeda Gaga sarigea angieta frovensi ragaro Mesadonia kotú Akaiya enembo niningigea fafate egeguta. Frovensi dumeniva beago, Jojabeeda Gaga kotú nímanda gaabee eta rosora-da bingá undufako sarigea angieta niningiguta. Jo námanena regegota niningigambi re. 9 Námandu orokaiva rea námanda gaga ningia kaifa egeguturota, enemboda uubu egegari god injigha ea, neno kaverea, God dabako jebuga tumanadu irari-da buro eta rosora-nu aná Mesadonia kotú Akaiya Frovensi enembomi isagha ueta reisi-niningore. 10 Aghá rirota, unda mendi amburarivareta unona ririeta jebugea eroruria aná uutuva reta kaverea furaita rouvia-nu kaifa rosora beago, regegutueta reisi-niningore. Kotú Iesu rera-da anomi, God da neno sembago furaita rouvia-nu serigaita rosore.