1 Seibe Satan da feroveta gavera kakato, námanda natofo Israel enemboda rova sirorea, númane kuvia gigigeta urie. Eto-bato aghagonu, irugari kakato sembago nímanda rova siroraita rousue. Sirorea, Jojabee númanda ari akokogoda mino seghaita rirota ambubuturia-dava goitu fotea, nímandava terua kivumi irugari sembago beenu nímandu irugaita rousue. Kotú, aná irugari sembagonu gaabee egegadua enemboda asisi anami data amburaita rouvie. Aná irugari kakato sembago aghá egeguturadua-du, God na rata, númane tutomi sirivu egegaita rousue. 2 Avotago enembo oruaruabe, aná irugari kakato sembago dita faima eta rousua-da ambo-ambo urota, númanda ari-bari akokogo egegeta rousua-du natofo dumeni Iesu ambo-ambo arida emborodu*Tutuno enava námane kaverari kakatomi gaga tufoko eini Gaa Beeda emboro tambua, enembo ekaresia* siroruturia feferava, aná gaga niningigea, donu tanana egegeta uria-nu nundubea, aná gagada beenu isuri urota, Iesu ambo-ambo arida emboro gegembuguturere. gaa akuago regegaita rousue. 3 Irugari kakato sembago guri ututugota baita rirota, kiki dumeni dumeni númanda nenomi nundubuturota simbugea rirota niningigaita rosoravore. Avotago númanda Irurari Kato seibe tutuno ea, númanda darada mino rei-simbugutue. Númanda amburari fefera reifia-du tambaita rousue.

4 Nímane reisi-geroravore: anera mane ari-bari akokogo egeguturia-du, God jo númane taragha ambi re. Unona númane ari-bari akokogoda mino utari kambesiva fugiturieta teterurie. Númane bunditurieta, bingoi rova irirota, Irurarida Feferanu kaifa urota vitie. 5 Gen 6:1—7:24Eto-bato aghago, mambube maneda fefera enembo seibe ari-bari akokogo urota vitiria-du, God númane jo taragha ambi urie. Tago, umó Noa nu taragha urie. Noa rera mo, umó God da aghi urota, endava enembo ari-bari taubana egegari-du rea, minono reta urie. God na Noa kotú enembo ingo yoveni yoveniva ungagha nuenembo sonembuturieta jejebuguturie. O enembo dumeni ari-bari akokogo eta egeguturia, númandava ghisi jojabe ituturieta bubua, anami enda manduguturieta, sirivu egeguturie. 6 Gen 19:24God na bogu naa Sodom kotú Gomora enembodava dabako aghagonu urie. Ari akokogo enembo daiyagha sirivu egegadua anada irugarinu, natofo dano gigigari-du rea, God na ririeta, bogu naa unghagha dano ivarimi eviviguturie. 7-8 Gen 19:1-16O Lot nundubea gigige! Lot umó embó taubana re. Tago, umó bogu naa Sodom anava irirota, ari-bari akokogo donu eta egeguturia-nu gerurota, kotú númanda gaga sembago niningurota, neno mema jojabe urie. Aghá ueta, God na sonembuturieta umó sei seriguturieta, ambova ivarimi aná bogu naa evirie. 9 Amindu reisi-gerore, Jojabee enembo taubana daiyagha-daiyagha sonembuturota, mema bouvu itatama eta rouvia-vareta rogea bari inono re. Kotú dabako aghagonu, ari akokogo enembo bundota, bouvu mema utota itatama egeguturota, Irurari Fefera kaifa egegari-du rari, umó inono re. 10-11 Anda gaga retora, amó gogorego tamo firída unonu urota, God da reta rouvia gaganu injigha ea fugeta rousua enembo akokogodu rere.

Anera mane jojabe re. Kotú númanda ano jojabe re. Irugari kakato sembago retora, jo númane aghago irambi re. Avotago, anera mane númane, Jojabeeda dibeva jijireguturota, irugari kakato sembagoda tamova gaga akuago jo rambi egegeta rousue. Tago, aná irugari kakato sembago rera-mi, deriva urota, meka jo gambi egeguturota, anera duroghade vitia-du jo oru urota, kakara ambi egegeta rousue. Aghá urota, númane aneranu kuvia gegha reta rousue. 12 Aghá egegeta rousua-da bee mo, eto-bato nino oka aghago urota, númane jo neno nundubambi eta rousue. Aghá urota, eini-eini jo tanana ambi-nu tamova gaga rirota, kuvia gegha reta rousue. Avore, númane eto-bato nino oka aghagonu urota vitia-du, nino oka bua deaveta ambubugeta rousua aghago, God númane bua data sirivu egegaita rousue. 13 Númane ari-bari akokogo egeguturota, enembo dumenidava mema donu ututugeta rousua-da mino God na númandu mema dabako aghagonu utota, itatama egegaita rousue. Aná irugari kakato sembago númanda unonu urota, númane isaghava onembo rorova tamo firída unonu ambo-ambo egegeta rousue. Númanda uno akokogonu egeguturota, nemonde danode takembea, Jojabee nundubuturota, undari undita rosora feferava anami eaveta meka gari sembago bee siroreta rouvie. 14 Irugari kakato sembago rera mo, númane gonene evevetunu gerurota, daiyagha-daiyagha numonde danode kombo undiri egegasua-nu nundubuturota irita rousue. Ari-bari akokogo númane jo itoko doari aghago irambi re. Enembo avoda gaabee ari damé-damé ea vitia-nu, aná irugari kakato sembagomi kuveaveta jua, ari-bari akokogo egegeta rousue. Númane komanada eini-eini muu dirota irita rousue. Aghá egegeta rousua enembo, God na númane seibe simboro urie. 15-16 Num 22:4-35Númane emboro dambunu dotuturota kasoviguturie. Eto-bato Beor da mendi Balam†Ii, gaga Judg 1:11 anada tuva embó Balamdu daiyagha gembari vitia-nu irugadi reisi-rere! da eta uria aghagonu, númanena aghá egegeta rousue. Balam umó feroveta eini re-tago, umó ari akuago urota, daiyagha guri basua-nu gogorego nundubeta urie. Aghá urota vitirieta, God umó dibeva rirota, eghá urie. Umó ririeta, Balam da donki be fangea, enemboda be aghago ririeta ningia, unda nundubari sembagonu dotuturie.

17 Avore, aná irugari kakato sembagoda gaga eini evere: númane eto-bato uvu gorugea irita rouvia, o kotú yaurami gooso bua manjeta rouvia, aghago re. Númandava sonemba, kotú jebuga eini jo bambi aita rosoravore. God na kambesi akuago bee númandu rea simbuguturia, tumba bingoi bee anami gajea vitie. 18 Anada bee mo, númane nendufako raga regeguturota, be vivi reta rousue. Aghá urota, númane enembo dumeni avona neno kaverea, ari-bari akokogo doa, irari taubana iraita egeguturari-nu, tamo firída uno akokogomi kuviaveta, rekago kaverea, ari-bari akokogoda rova teterugeta rousue. 19 Irugari kakato sembago rera, númane enembo kukuvirota, be gagajeguturota, gavera eghá reta rousue, “Námanda ambo-ambo egeguturota, tefo neno iririgaita rosoravore,” aghá reta rousue-tago, númane nendufako, ari-bari akokogomi bunditurieta vitie. Anada bee mo, imó donu ambo-ambo adora, imó anami bundaita rouvie! 20-21 Amindu amó eghá rere: enembo avona namonde anda Jojabee, kotú Sonemba Kato Iesu Keriso tanana urota, númanda ari bari akokogo tutunova egeguturota, nendufa bebeta egeguturia-nu doa iririgadua mo, aná taubana re. Tago, ari-bari dabako anami rekago kukuvirota, tutuno ea uta igigadua, aná akuago bee re. Númane tutunova ari-bari akokogo egeguturota vitiria, itoko taubana re. O God da emboro taubana tanana ea, rekago kaverea, unda Agho Dari kakara ututurieta bubuguturia ananu, injigha ea dodogadua mo, akuago bee re. Taubana mo, númane jo sei God da emboro taubananu tanana ambi egegasue. 22 Prov 26:11Avotago nundubea gigige! Namonde amó gaga eini enembo aghago manedu regegeta rosora, aná evere: