4
4:1-10 Namonde Andufa, God Da Ingova Itasira-Da Gaga Re.
1 Ená gaganu nundubea gigige! Besiga kotú tataya nímanda rorova siroreta rouvia mo, niavoreta futa rouvi? Aná nímanda tamoda uno vitia, anami eaveta siroreaveta, nendufako bebeta eta rosoravore. 2 Aghá urota, nímane eini-eini donu baita uno egegari, jo bubugambi eta rosoravore. Kokomanada eini-einidu muu dirota, nemonde besiga ea, númane deaveta ambubugeta rousue. Avotago, aná eini-eini jo bambi egegeta rosoravore. Anada bee mo, nímane jo God dava benunu ambi egegeta rosoravore. 3 Aghade, nímane dodu benunu ari mo, jo bubugambi egegeta rosoravore. Anada bee mo, nímanda benunu sembago, kotú jo God da unonu nundubambi irirota, tamoda uno donu eta rouvia, ananu nundubuturota, benunu eta rosoravore.
4 Nímane viro kakato aghago re! Nímane God doa, airo jiria, eto-bato embó einimi unda evetu injigha urota, gonene evetuda ambova deĩ eta rouvia aghagonu urota, God doa, airo jireta rosoravore. Enembo avona, tamo firída unonu ambo-ambo adua mo, aná embó seibe God doa, unda gitofo ea vitie. 5 God da Gaga eghá riria, jo gavera irambi re.
“God namonde anda neno rova asisi*Jems da gaga gefiria, jo isagha bee irambi re. Enembo dumenida nundubeta rousua mo, Jems umó namonde enembo nanjogodava vitiria asisidu ririe. Jo Asisi Kakaradu rambi re. Námane aghago nundubuturota, aná gaga itiva gegembuguturere. Tago, enembo dumenida nundubeta rousua mo, ená gagada ruru evere: “Tago, God unda Asisi Kakara namonde anda neno rova itituria-mi, namonde amó unda tofo baita uno eta rouvie.” itituria, aná tamoda uno sembagomi beda ea vitie.”
6 Prov 3:34Avotago, God da sonemba jojabe namonde andú ututa rouvia-mi sonembeaveta, namonde anda tamoda uno sembago buregeta rosore. Aghá eta rosora-du, unda gaga bukava eghá gefirie,
“God na gogore kakato buregeta rouvie-tago, unda sonemba,
aná durumugea irari enembodu ututa rouvie.”
7 Amindu, nímane durumugea irirota, nendufako God da ingova ututugadi rere. Aghá egegadora, Satan buregadi-gea, nímane doa sumbua serigaita rouvie. 8 Nímane aghagago enembo re! Tago, nímanda ari akokogomi bebeta ea vitera-nu, seghea neno kaverea furá, God dava utuvako egegadora mo, God beago furá, nimandava utuvako aita rouvie. 9 Nímanda ari akokogo egegeta rosora-nu nundubea, neno mema egeguturota, jii koko fugea regegadi rere! Kotú nímanda geghade, gangorode doa, neno mema egege! 10 Aghá egeguturota, nendufako durumugea, God da anoda tuva iririgutu-gea, unona nímane righota ereregaita rosoravoreta.
4:11-12 Namonde Anda Kokomana Jo Gia Irurambi Egegasire.
11 Anda ikoko mendi, ariri gharovu, nímane mania mino-mino iruruturota, komanada tamova gaa regegata! Avona unda komanada irari gia iruruturota, unda tamova gaga radua, umó aghá urota, aná undufa bua Agho Darida etova ititurota, aita rouvie. Umó aghá urota rei-irugutue, umó jojabe, God da Agho Dari ijokonu nundubuturota, aghá eta rouvie. Tago, aná nundubari sembago re. 12 God unuka unona Agho Dari ututurie. Kotú irurari kato bee umó re. God unuka unona rata jebugaita rouvie, kotú rata amburaita rouvie. Aghá-gea, imó doreta inda komana inona gia irurado?
4:13-17 Ambo kena Donu Siroraita Rouvia, God Na Unuka Rei-gerue.
13 Prov 27:1Atá niningige! Ambo kena donu siroraita rouvia, nímane jo gigigambi re. Amindu, mania eghá regegata, “Fufuge, namonde ya, bogu naa einiva, ghaeko dabako avo irirota, buro egegea guri oruaruabe bubugore!” 14 Aghá rera-da bee mo, nímane rifode donu siroraita rouvia jo gigigambi re. Nímanda jebuga, eto-bato dimborimi fefera tufoko irirota, sidara eta rouvia aghago re. Dabako aghagonu, nímane fefera tufoko iririguturadi-gea, God na rata ambubugaita rosoravore. 15 Amindu rea, nímane eghá regegasiravore, “God na avore radua mo, namonde amó irirota, buro dumeni eghá egegaita rosore.” Aghá nundubuturota iririgasiravore. 16 Avotago, nímane ambova donu egegasueta sirorasua-du, nendufa raga fusama reisi-reravore. Raga aghago mane aná dano sembago re. 17 Kotú, God imó ari taubana eini ari-du rata, itatama urota, jo ambi adora mo, God anadu ari akuago gaa raita rouvie.
*4:5 Jems da gaga gefiria, jo isagha bee irambi re. Enembo dumenida nundubeta rousua mo, Jems umó namonde enembo nanjogodava vitiria asisidu ririe. Jo Asisi Kakaradu rambi re. Námane aghago nundubuturota, aná gaga itiva gegembuguturere. Tago, enembo dumenida nundubeta rousua mo, ená gagada ruru evere: “Tago, God unda Asisi Kakara namonde anda neno rova itituria-mi, namonde amó unda tofo baita uno eta rouvie.”
4:6 Prov 3:34
4:13 Prov 27:1