Filipai Enembodu
Pol Unda Ingiso Filipai Enembodu Gefiria, Aná Evere.
Iesu da aghi kato, Pol, umó Rom anava dibura ea irirota, ená ingiso ghaeko* 62 Iesu siroruturia-da ambova gefiria-jogo. Filipai enembomi sonembea, undú guri ututuria-du, “aiye” rirota, ená ingiso gefirie.
Kotú unda gefiria-da bee eini mo, Filipai enembodu nghaĩ ituturie. Irugari gavera kakatomi, Kuristini embobo dano vii mendó andoro tafugari-du, kotú Jiusi enemboda agho dari ijoijokoko dano kaifa egegari-du regeguturie. Avore, Pol aná irugari kakato sembagoda gaga ningauve-degea gefirie. Kotú irugari sembago dumeni dodogea neno kaverea, Iesu gaabee urota, Kuristini mokogo iririgari-du, gefirie.
Aghade ekaresia* avo Filipai vitiria-da rova besiga eini siroruturia-du, Pol na gaga dumeni tano 4 anava gefirie. Kotú banuna urota, rekago númanda guri ututuguturia-da sonembadu “aiye” gaga gefirie.
Pol Ená Buka Gefiria Gagada Mendó Mane, Aná Evere:
1:1-11 Pol unda ghanena uria re.
1:12-30 Pol umó daiyagha diburava vitiria-da gaga re.
2:1-18 Pol da, Iesu Keriso undufa unda durogha gari uutuva doa furia, enembo bee nindia durumugea, mema tambua ambubuturia aghagonu, namonde amó aghagonu egegari-du, riria re.
2:19-30 Timoti ungá Epafroditus ya, Filipai bogu naava bubota, natofomi “Orokaiva!” rirota, númane bubugarida gaga re.
3:1-21 Pol na, rourogo irugari gavera kakatoda gaa niningigea, ambo-ambo egegauve-degea gaa rirota, isuri uria re.
4:1-23 Besiga dodogea, taubana iririgari-du rea, Pol unda aiye gaga rirota, tano uria re.
1
1:1-11 Pol Na Filipai Enembo Ghanena Urota, Númandu Daiyagha Benunu Eta Uria-nu Riria Re.
1 Eka 16:12Ariee, anda ikoko mendi, ariri gharovu!
Gaga oreki tutuno ea reisi-gefera mo, nímanda kokomana, Iesu Keriso da buro kakato, Pol ungá Timoti gha, angá amó re. Nímane dano avo Filipai bogu naava, Iesu Keriso de takembea, God da natofo ea vitera enembo dano, námanena nenode asiside dano ghanena rosoreta. Yata bua gigige!
Kotú nímanda ekaresiada* beforo ririkigaride ogabada manede dano ghanena rosoreta. Yata bua gigige!
2 Namonde anda Afa God de, Jojabee Iesu Keriso deda kauta kaveverade siriri aride utota bubugadi rere!
3 Amó nanjigo nímane nundubeta rora aghade, God dava nímandu “aiye” reta rore. 4-5 Anada bee mo, nímane tutuno ea, God da Gaga Taubana niningiguturera fefera aghade reta, sonembuta reisi-foravore. Nímanena amó sonembutuaveta, God da Gaga Taubana-nu minono rita deĩ eta rore. Oreki aná dabako aghagonu rosoravore. Amindu, amó tumanadu nímane nundubuturota, gangorogha nímandu benunu urota vitere. 6 Amó tanana rore: God undufa nímanda neno rova unda buro taubana tutuno uria-nu uta irurota, Iesu Keriso kaverea furaita rouvia feferava, aná buroda bee isagha aita rouvie.
7 Amó nenode asiside dano, nímane nundubuturota irita rore. Kotú anda aghá eta rora, aná jo akuago irambi re. Anada bee mo evere. Unda Gaga Taubana minono rari-du rirota, God na sei amonu gateguturieta, amó iru-furu urota, unda Gaga Taubana-nu gaabee egegari-du rea, enembo dumenide besiga ea minono rirera-va, nímane anda kasava jiria sonembutureravore. Kotú, amó oreki diburava iria, nímane aghá egegeta rosoravore. 8 Atá God umó rei-gerue: Iesu Keriso da nímane neno buta rouvia aghagonu, amó neno dano ututurota nímane neno buta rore.
9-11 Kotú amó nímandu rea God dava, donu benunu eta rora, aná evere, nímanda neno bari daiyagha baria, jojabe asueta, nímane gaa beenu tanana ea bua righia goghó urota, neno nundubarida emboro tanana egegasira-du rea, benunu eta rore. Aghá egegadora, nimane eini-eini taubana, gaga taubana kotú emboro taubana tanana egeguturota, gategari inono egegaita rosoravore. Aghá urota iririgadora mo, ari bari kotú nundubari taubanami, nímanda neno rova beda urota, Keriso da Kaverea furari feferava, God da dibeva nímanda dinunu eini kotú ari akuago eini jo gambi aita rouvie. Atá aná dano, enembomi God da duroghadu raga regegari-du rea, Iesu Keriso na utuaveta nímanda neno rova siroreta rouvie.
1:12-30 Pol Da Tamova Donu Siroruturia-Mi, Gaga Taubanada Ragaro Aria Fafate Uria Re.
12 Anda ikoko mendi, ariri gharovu, nímane enanu gia tanana egegadi rere. Dara kotú mema sirorutata, itatama utara-mi, sonembutata God da Gaga Taubana bejea irueta, enembo oruabe, niningigea gaabee egeguta. 13 Eka 28:30Atá anda aghá utara-da kikinu, Rom enemboda kotofu jojabeda kambo kaifa arida mene-mene ari kakatode, kotú enembo eve vitia-de dano niningigea, tanana egeguta: amó jo tefo diburava irambi re. Amó Keriso da buro kato-gea diburava vitere. 14 Amó diburava itutata irieta, namonde anda ikoko mendi ekaresia* rova vitia ananu gigigea, númane jo oru ambi faghighi egeguturota, Jojabee gaabee ea goghó egegeta rousue. Aghá urota, God da Gaga aná minono rita deĩ eta rousue.
15 Gaa bee re: enembo daba-daba nundubari akuago urota, anda bingádu mandudu urota, nenuka númanda ragaro righota erari-du rea, minono regegeta rousue. O enembo dumeni mo, nundubari taubana urota, amó sonembaita rea, Keriso da Gaga Taubananu minono regegeta rousue. 16 Ená enembo rera, númane eghá tanana egegeta rousue. Amó bua diburava itieta vitera-da bee mo, Gaga Taubana sorari-du rea, Jojabee na, amó bua diburava itieta vitere. Amindu, númane amó neno rururota, minono anda rasira katogo, númanena regegeta rousue. 17 O sei retora nundubari akuago enembo dumeni, númane gaabee ambi urota, nendufa númanda bingádu rea, minono regegeta rousue. Amó eve diburava irirota, bouvu memagha tambari-du rea, númane Keriso da ragarova minono rari aghago egegeta rousue.
18 Avotago, enembo númanda bingánu nundubuturota o Keriso da bingánu nundubuturota minono regegadua, amó jo mema ambi re. Anada bee mo, evere. Eini-eini jojabe bee aná Keriso re, jo namonde amó irambi re. Amindu rea, nundubari akuago eta rousua enembomi aĩ, nundubari taubana eta rousua enembomi Keriso da Ragarova reaveta, enembo Kerisoda Gaga ningia gaabee egegadua mo, amó gangoro aita rore. Kotú amó aiye rirota, gangorogha iraita rore. 19 Anada bee mo, amó tanana rore, nímane andú rea, benunu egegeta rosora-mi, kotú Iesu Keriso da Asisi amó sonembeta rouvia-mi, amó jebugea neno asegaitare. 20 Kotú amó dodu uno ea, kaifa gigita rora mo, aná evere: amó daiyagha ea, jo jabura o meka gambi, dibe emboro asire. Amó jebuga iradora, o Keriso da bingádu amburadora mo, Keriso da bingá baria, jojabe asua amindu, amó uno gogorego eta rore.
21 Avotago, gigige! Jebuga mo, doro? Jebuga andava vitia-da ruru aná, Keriso umó re. Amburadora beago, angá danode takembea irirota, taubana tafirota iraitare. 22-23 Atá, ená endava jebuga irirota mo, minono rirota-gea enembo dumeni niningigea, Keriso da jebuga tambua bubugaita rousue. Emboro niananu ba? Anda mana-mana evere: amó mo diburavareta doata bubua furá ená endava buro ara, aĩ, dedegota ambua Keriso dava yara? Amó rorova righia sarigari aghago rouvie. Taubana bee mo, amó ambua ya, Keriso gha irasire. 24 Tago, eve endava amó jebuga irasira aná, nímandava mo, taubana asue. 25 Aghá-gea, amó tanana rore, nímanda gaabee ari baria jojabe ea, kotú gangoro egegadi rea, Jojabee na rata, amó numbogo nímandava iraitare, jo oreki amburambi aita rore. 26 Amó diburavareta bubua ya, nímandava bubota gigigadora-da bee mo, nímane Keriso de dano takembea vitera-du rekago gangoro urota, undú raga regegadi rea, aghá aita rore.
27 Atá, amó eghá egegadi rere. Keriso da Gaga Taubana ambo-ambo eta rousua enemboda ari-bari esiko-esiko ananu egeguturota iririge! Aghá egegasira-da bee mo, amó ya, nímandava bubadora, o airo irirota, tefo bingá nuenembo ningadora mo, nímane ano ea, Keriso da Gaga Taubananu enembo dumeni gaabee egegari-du rirota, nundubari dabako urota, enembo dabakomi irarigo mino-mino sonembuturota, ininigha buro urota, iraita rosora-nu ningasire. 28 Nímanda gitofodu mania oru egegata! Gitofomi nímandava donu egegota, nímane jo oru ambi egegadora anami, númane sirivu aita rousua-nu, tanana egegaita rousue. Kotú, oru jo egegambi adora mo, God na sonembota, jebuga tumanadu irarinu bubugaita rosora beago, nímanda gitofomi tanana egegaita rousue. 29 Ano egegadi retora-da bee, aná evere: Keriso jo tefo umonu gaabee egegari-du rambi re. Tago, umonu gaabee urota, unda ragarova bouvu mema tambari-du rea, nímandu kavevera urota, emboro ifeguturie. 30 Eka 16:19-40Amindu, oreki namonde amó dano Keriso du rea mene-mene egegore! Anada bee mo, amó sei mene-mene ueta niningigutara, kotú oreki aghá urota vitera-nu reisi-niningoravore.