3
1 Namonde Jiusi enemboda rova sirorarida taubana mo, doro? Aghago, vii mendó andoro tafugadua-da taubana mo doro? 2 Atá, Jiusi enemboda rova sirorarida taubana vitie. Jiusi enemboda irari taubana jojabe mo, unda Gaga beenu bua kaifa ari-du rea, God na ututurieta, namonde anda mambube manemi bubuguturie. 3 Tago, Jiusi enembo dumeni, God umonu ambo-ambo egegaita bee gajituria-nu bebejeguturia-du, God unda donu aita be gajituria mo, injigha ea doambi adua aĩ? 4 Ps 51:4Tefo! Enembo dano gavera regegeta rousue. Tago, God gaa bee nuenembo reta rouvie. Amindu, unda Gaga da rova eghá gembari vitie,
“Imó gaga rirota, gaa bee reta rora-nu enembo gia tanana egegaita rousue.
Kotú, imó iruraita rosora feferava, inda gagami gitofoda gaga serigaita rouvie.”
5 Kotú enembo dumeni donu reisi-nundubetua-nu nundubadi rere, aná evere: “Namonde anda ari akokogo egegeta rosora-mi, God aito taubana nuenembo fugeta rouvia-nu isaghava bubuaveta natofo jede gigigea, God du raga regegeta rousue. Amindu namonde anda ari akokogo egegeta rosora-du, God jo namonde amó data amburari gaa rambi asue,” númane nundubari sembago aghá egegeta rousue. 6 Aná jo gaa bee irambi re. God ari akokogoda mino jo inonova utambi asua mo, umó jo enembo irurari inono irambi asue.
7 Aghagonu, enembo dumeni gavera rirota, nundubari sembago eghá egegeta rousue, “Gaa bee re, namonde amó gavera kakato re. Tago, namonde anda gavera regegeta rosora-nu enembomi niningigea injigha egegutuaveta, God da durogha baria, jojabe eta rouvie. Amindu, namonde anda gavera regegeta rosora-du rea, God namonde amó jo akuago gaa rambi asue.” 8 Avona aghá radua mo, eghá beago raita reisi-nundubetua-jogo: “Ari taubana isagha ari-du, namonde amó ari akokogo egegore!” Aná mo, nundubari akuago bee re. (Enembo dumeni anona aghá rari gaa anda tamova regeguta. Aná gaga sembago reisi-rera-da bouvu God na utasueta bubugasua, aná taubana re!)
3:9-20 Enembo Dano Akokogo re!
9 Amindu námane Jiusi enembo jo eghá rambi egegasire, “Námane taubana re, námanda gitofo akuago re.” Tefo, amó gaga seibe retueta niningigetoravore. Námane Jiusi enembo, kotú námanda gitofo dano inono re. Namonde amó dano ari akokogonu ambo-ambo egeguturota iririgeta rosore. 10 Ps 14:1-3; 53:1-3God da Gagava eghá reirie!
“God da dibeva enembo taubana eini tefo, tefo bee tefo re.
11 Enembo eini jo ari taubana arida emboro tanana ambi re, kotú eini jo dibe fangea, God tava ambi re.
12 Enembo dano ari-bari sembago egeguturota, emboro taubanadu ambo fotea, ari akuagoda emborova igigeta rousue.
Enembo taubana eini tefo bee tefo re.
13 Ps 5:9; Ps 140:3Númanda bemi dubo eaveta, amburari siroreta rouvie.
Eto-bato ningabudava kae sembago iriaveta eini-eini eini gambuaveta ambuu-rouvia aghagonu, gaga akokogo númanda bevareta buburituaveta, dara siroreta rouvie.
14 Ps 10:7Númanda bemi simboro uaveta, kokomana maitada bee gambuaveta, dighighi eta rouvia aghagonu itatama eta rousue.
15 Is 59:7-8Tataya bingá niningigadua, númane seibe sumbua ya, kokomana dedegota ambubugaita rousue.
16 Númane ya niavo bubari mo, naa susughi ea, ivata dumeni uaveta, neno mema siroreta rouvie.
17 Siriri arida emboro númane jo itoko tanana ambi re.
18 Ps 36:1Númane jo God du oru urota, kakara ambi eta rousue.” God da Gaga aghá reirie.
19 Avore, namonde reisi-gerore: Agho Dari donu reiria, avona Agho Darida tuva vitia enembodu reirie. Enembo dano númanda iraride aito fugaride bebeta ea vitia-nu gigigea be fusama reiria-nu doari-du rea, God na unda Agho Dari ututurie. 20 Ps 143:2; Gal 2:16Jo enembo einimi Agho Darida emboro inonova kaifa uradua-du, God undú “taubana” gaa rambi aita rouvie. God unda Agho Dari ututuria-da bee, aná evere: namonde amó, ari akokogo eta rosora ananu, totofo gia tanana egegari-du rea, ututurie.
3:21-31 God, Enembodu “Imó Taubana Re.” Rari-Da Emboro, Aná Evere.
21 Tago, God na enembodu “Imó taubana re.” rarida emboro Moses da Gagava kotú ferovetada gagava reiria, aná oreki reta isagha etueta reisi-gerore. Avotago, namonde amó jo Agho Darida ambo-ambo egeguturota gia, aghá rambi aita rouvie. 22-23 Gal 2:16Emboro evere: enembo Iesu Keriso gaabee eta rousua-du, God na númandu “Imó taubana re.” raita rouvie. Enembo dano gari dabako re. Namonde amó dano ari akokogomi bebeta ea, jo God da duroghava jirari inono irambi re. Amindu, Jiusi de Jiusi enemboda gitofodedu inonova eta rouvie. 24 Namonde amó Iesu gaabee egeguturota, mino namonde andú ututuria-mi jebugeta rosore. God unda sonemba mino tefo utuaveta, namonde amó Iesu gaabee egegutuaveta gia, namonde andú “Imó taubana re.” reta rouvie. 25-26 Namonde reisi-gerore, seibe God umó durumugea kaifa urota, enemboda ari akokogoda mino jo utambi re. Tago, umó enemboda ari akokogo jo neno itambi, ambova iruraita rouvia-nu irugota gigigari-du rea, umó Iesu ninenguturieta furia, unda tatanguda anomi namonde anda ari akokogoda mino ututurie. Ututuria-du, oreki avona Iesu gaabee adua mo, God undú “Imó taubana re,” raita rouvie. Kotú, mino ututuria-du God oreki enemboda ari akokogo nundubea gia doadua, aná avore.
27-28 Amindu, namonde andufa raga rari-da bee eini tefo re. Anada bee mo, namonde jo Agho Darida emborova irurota, ari taubana eta rosora-mi, God da jebuga bambi aita rosore. Namonde gaabee egeguturota-gea, God namonde andú “Imó taubana re.” reta rouvie. 29 God jo Jiusi enembo nenuka númanda God irambi re. Tago, umó námanda kotú nímane Jiusi enemboda gitofo beago, namonde anda God re. 30 Deut 6:4; Gal 3:20God umó dabako re. Unda uno aná evere: námane Jiusi enembode kotú námane Jiusi enemboda gitofode beago gaabee egeguturota-gea, namonde andú “Imó taubana re.” raita rouvie. 31 Tago, namonde anda gaabee rosora-mi Agho Dari jo doata ya, sidara ambi aita rouvie. Namonde Iesu da amburarida ano gaabee egegadora-mi, Agho Darida bee furá isaghava bubaita rouvie. Tago, namonde amó God dava gaabee arida emborova igigadora-mi jo Agho Dari doata ya, sidara ambi aita rouvie. Namonde Iesu da amburarida ano gaabee egegeta rosora-mi, Agho Dari mo, aná ari akokogo irurarida rurunu isaghava itaita rouvie.