1 Saini ha mga lalang kasaligan gayed ha ku amin etaw ha agkabayà ha mabuhat ha pangulu hu mga tumutuu saena ha agkabayaan din maayad gayed. 2 Ba kinahanglan daan ha hurà ikasaway kandin daw sabuwa dà sa asawa din, tagpugung gayed hu kaugalingen din daw matinahuren, maalima hu mga langyaw daw matatau gayed hu pagtudlù, 3 kenà palainum hu binu daw kenà mapasipalahen, kenà palasabà daw kenà balimbayaan hu salapì. Ba kinahanglan ha maluluy-en 4 daw maayad daan mag-uwit hu pamilya din na sa mga batà din daan matinumanen daw matinahuren kandin, 5 ta ku harì din agkauwit sa pamilya din iyan pa kan mauwit din sa tagkaamul-amul ha mga tumutuu. 6 Kinahanglan ha saena kenà bag-u pa ha tumutuu ta kan ku bà din dà ipasigalbu sa katengdanan din aman silutan haena hu Dios iling hu kasiluti ki Satanas. 7 Kinahanglan ha saena matahuran daan hu kenà pa mga tumutuu ta daw harì makabuhat hu mga salawayen ha mahulug paman duun hu lit-ag hi Satanas.

8 Iling daan sa mga diyakono ha iyan magbubulig hu mga tumutuu kinahanglan ha angayan sidan ha tahuran daw matinud-anen, kenà palainum hu binu daw harì tag-agpas ha magsapian. 9 Kinahanglan ha mangeseg gayed sidan duun hu kamatuuran ha impadayag dini ta kanuy daw hurà daan salà duun hu henà-henà dan. 10 Kinahanglan daan ha sulayen enà sa kinaiya dan daw ku masusi ha hurà gayed makasaway kandan human sidan pilia ha diyakono.

11 Iling daan sa mga asawa hu mga diyakono kinahanglan ha angayan sidan ha tahuran daw harì tagpandaet hu dengeg, ba magpugung sidan hu kaugalingen dan daw agkasaligan gayed hu bisan inu.

12 Sa diyakono kinahanglan gayed ha sabuwa dà sa asawa din daw maayad daan mag-uwit hu pamilya din. 13 Sa diyakono ha maayad sa kabuhata din hu katengdanan din matahuran gayed daw hurà din kahaldek hu pagpanunultul mahitenged hu pagtuu din ki Jesu Cristo.

14 Ima ku ha laus a dà makadiyan, ba insulat kud haini sa mga panugun ta daw 15 ku mayawat a hu pagdiyan matun-an nud en ku inu sa maayad ku mag-amul-amul kaw hu pagsimba hu Dios. Ta sikuy sa mga tumutuu pamilya kuy hu Dios ha bubuhay daw mga tukud kuy daan ha duun sa kamatuuran. 16 Laus gayed ha labaw pa hu alan sa kamatuuran ha impadayag dini ta kanuy daw iyan tagtuuwan taw.