10
Yesu ga mijikia rila kito romemedu ea Atua mirano
Bilbilu nalo, kiniou nomijog bova napano kiaku yati nalo memedu, jibe kulo Ju nalo, maka amonea ga. A kiniou nojidom laka ka nalo monoka avokar ioruriano, nina naruei kiniou nojo nobolkouo jikili ban Atua kalo.
Nalo aju amila vonio laka ka asira-rag ka Atua ea kialo meuliano, a neber be riano, nalo maka ajikia m̃arabo, mia maka ajikia aleal naio.
Nina bior napano nalo aju ajakii kialo jidomiano ga, a nalo maka asidom atakii m̃arabo napano Atua mim̃aukanio ka toro rijikia rimei rimemedu ea mirano bereio.
Nalo aju ajikili ka aber ka ajogkar tuboiano, naio ga be m̃arabo, mia m̃arabo nene bova ruei, kar napano kito robiniu romila korovio tuboiano nalo. M̃arabo napano kito rober ka romemedu bija Atua bior napano romijogkar tuboiano, Kristo juko ruei, a naio mim̃auka kiado m̃arabo vou tai. A vonganei, ver romonea ka Kristo bar bulag kiado kariano nalo, naruei Atua mijikia rila kito romei romemedu ea mirano.
Ver kito rala korov re tuboiano, mia rivu ga, romijikia romemedu ea Atua mirano, bior napano ga romijogkar tuboiano, kar napano Mosis berenio iliano tai ea tivelinio nei ruei, berinavo
“Toro napano jakii vatitig bo tenalo napano tuboiano nei berenio, mia mijikia rivokar meuliano.” Lev 18:5
Mia maka toro tai napano kiano meuliano bo jibe napano Mosis berenio, ana maka rejikia rovakar meuliano sel ea tonovo nalo napano romilaio.
Ka rila tibe na, naio jikili laka, a ver romonea ga Kristo romijikia romei romemedu ea Atua mirano, a nina maka titai napano jikili. Jibe iliano tai napano Mosis berenio, napano beriio
Maka rivu ka kamiu kuvisidomii ka tenei naio jikili laka, ana kuvitu kuvivika kuver kei mia rila m̃arabo beamu ka kamiu riva mave ea tiniabene? Tiut 30:12
Vikadeniano nei berenio ka kei mijikia riva rivokar tiniabene rivuru Kristo rimei yetano ea vio nei ka rilarur kito, a jidomiano jibe nei naio maka rimemedu.
P̃eli nalo avika vikadeniano dolu tai napano joa Iliano Lu, napano ber
A kei mijikia rivatove riva rivokar vio na tomu na am̃arm̃aro a rimei bereio? Tiut 30:13
Vikadeniano na ber ka nalo ajidom ka Kristo naio m̃aro ea m̃akolkolo, ana nalo aber p̃eli maka toro tai rijikia riva ridular naio ea vio na bereio ka rijikia rimei rilarur kito, a mia romijikia ka iliano nalo na maka rimemedu. Kito romijikia vatitig ka Kristo jaluvo ea tiniabene batove ea yetemeriba ruei, a iorou ka napano naio m̃aro, naio jumolu meul bereio a ban ea tiniabene ruei.
Jibe na, kito romijikia rosian verdop̃eiano na vikadeniano nalo na, rover iliano dolu tai napano Mosis ber nua, napano berinavo
Atua kiano iliano ban kito kulorinio naio jo bija kito ruei. Jua jum̃ado ruei,
ana romijikia rodu toa niodo, romijikia rodu vatitigio toa kiado jidomiano. Tiut 30:14
A Atua kiano iliano napano iliano nene beriio, nina Ioluano Vou napano kumemi numitu numioliolu kanio, napano berialio ka tomu nalo monoka amonea Yesu Kristo.
A jau kei napano komonea Yesu Kristo ea kiamo iviso, kober ka Atua mila naio meul bereio ea m̃ariano, a kojaaro ka koverialio ea vio reraio ka jau komidu Yesu jibe kiamo Tubo, mia jau kovokar meuliano. 10 Nina bior napano toro na biekouo ea kiano iviso ka Yesu meul bereio ea m̃ariano, a berialio ea vio reraio ka Yesu be kiano Tubo, mia Atua sian re bunu vironiano van naio kar kiano kariano nalo, mia rilarur naio.
11 Nina jibe iliano tai ea Vivitauiano Lu re nua, napano jibe ka napano beriio napano romonea Kristo, napano berinavo
Toro napano monea naio, naio maka rijikia rijog kiano jidomiano rijoru bogo tai. Ais 28:6
12 Mia toro napano monea ka naio be Ju, p̃eli maka rive Ju, mia Tubo naio takurano be kialo tubo abiniu, mila bo kalo abiniu ga napano ajegi banio naio.
13 Nina jibe iliano tai napano Naverialiano Joel nua bivitauia, napano berinavo
“Toro kei napano bio Tubo siano, mia rilarur naio.” Joel 2:32
14 Be riano, kulo Ju miroano maka avio van Kristo ka rilarurlo, a jum̃abe jibe na? Nina bior napano maka ajikia avio naio verver maka amonea naio, a maka ajikia amonea naio verver maka leleio ajog siano vo, a maka ajikia ajog siano verver maka toro tai rioliolu ka vanlo.
15 A maka jikia toro riva rioliolu verver Atua maka riilaio ka rivano, a verver naio jaaro ka rivano, mia tibe na napano Vivitauiano Lu berenio ruei, napano ber
“Siva toru ka Atua napano kiano naverialiano nalo, romijog jaalo aju amijubariva ea kialo m̃arabo ninio nalo ka avanvan tanea vio vija kiano Ioluano Vou.” Ais 52:7
16 Nina naruei iliano napano tom tealo aberenio, a nemijikia never makanio, Atua jo miila kiano naverialiano nalo abanvan ruei, mia aua toru napano Ju nalo miroano maka asidom ajogio ga. Nina jakii iliano tai ea Vivitauiano Lu bereio, napano Naverialiano Aisea jegi ban Atua, ber
“O Tubo, kumemi numitu numioliolu ka kiamo iliano banbano-o, mia jibe napano maka toro tai rive tinieno ka rijogio.” Ais 53:1
17 A banei kumemi jibe nei naruei, numitu numioliolu ka Yesu Kristo banlo, a bogo napano kumemi numitu numioliolu, tealo amijog, a bogo napano amijog, tealo amonea.
Kar vaio jau komioliolu ban kulo Ju nalo napano abuluku Vivitauiano Lu nalo ruei?
18 Nina naruei kiniou nojo nomioliolu ban Ju nalo, a vikadeniano tai mijikia rimei mave ea vio nei, ber p̃eli kojo komioliolu banlo kar napano kojidomii ka nalo maka ajog venia napano Vivitauiano Lu nalo aberenio? Vonganei mia neverdop̃eio never, makanio, Atua kiano iliano bokarlo kirisiou ruei. Nalo abiniu amijikia bare ga napano nalo abiniu aju abiti m̃erenio a siberio bija m̃arvitano nalo, jibe napano iliano tai ea Niosi na Iouano berenio, berinavo
“Tomu nonovio na yetemeriba amial tenalo na ea vio yauo mave, a nalo abitilubario ka Atua jo,
ba bokar tomu nalo reraio napano aju koalabo, nalo bunu abitilubar ka kiano moroano toru laka.” Iouano 19:4
19 Jibe na, kulo Ju nalo abitilubar tenalo miroano ruei, a mia titai bova, nalo aber p̃eli Atua jidom rilarurlo nalo ga.
Nalo maka avitilubar ka Ioluano Vou be tomu nonovio kialo, kar napano Atua jidom rilarur bunu tomu dolu nalo napano maka ave Ju. Mia bo ka avitilubar vite nei, bior kialo naverialiano moruo juo aberiio nua ruei ea Vivitauiano Lu, aber mia tibe nei. Mosis be motoru, napano berial iliano tai napano Atua ber ka kulo Israel, napano ber
“Kamiu kubitii bova ka nalo napano maka ave Ju, jibe napano abe iakurano ga, a mia kamiu kuvijoku ka ilivuiano nalo napano mia kiniou nala kalo.
Kamiu kuber nalo maka ajikia ala titai na bo leleio, a mia kamiu tiniemiu serlo bogo napano kuvial napano kiniou nelarurlo bunu.” Tiut 32:21
20 A juo nene kanio, naio be Naverialiano Aisea, naio bunu jumolu berial memedu Atua kiano iliano dolu tai ban korobido nalo kulo Ju miralo, napano Atua berii nalo napano maka ave Ju, berinavo
“Beamu, nalo maka asirarag ka kiniou, a iorou, mia nalo amijev kiniou,
nua maka avika kiniou, a mia iorou, ajidom ka nava noyotuba keanlo.” Ais 65:1
21 A Aisea bivitauialar Atua kiano iliano dolu tai bereio, napano Atua berii nalo na abe Ju, berinavo
“Tomu nalo na aju maka amonmonea kiniou, nalo aju abukular kiniou bogo nonovio.
Kirisiou ruei kiniou nebetavo ka jum̃aku kalo, nojidom nalo amei bereio kean kiniou, mia maka garuei.” Ais 65:2