Mɛkana ɛ Zaŋ, yii Mɛkɛn
Zaŋ Mɛkɛn
Ɛniel
Ye nabɛ ɛ́ nɛ bɔɔ mɛkana mɛlɛl ee mɛ Zaŋ nakyaal nɛ bot nadi tɔ bɛdhiiti eghaada ɛ. Tɔ sama bɛmɛkana menek, mɛkana mɛkɛn ààlyaal din ɛ mot nakwyal mɛkana mɛ tak ɔ. Mot nakwyal mɛkana mɛ bhɔɔba nɛ mɛkana mɛ mɛsik ɔ, ye ɛ́ «Paa». Nyɛ ɛ́ mot di djɛɛd zɛɛga ndjaa mendjaala ɔ, bot ɛ nyɛ di ekwyal bɛmɛkana ɔ nɛ kaab nyɛ.
Tɔ mɛkana mɛ mɛkɛn, din ɛ mot mɛkana di ekwyalaa étɛp ɔ, ààgua. Mɛkana mɛ bhɔɔba kwyalaa ɛ nɛ «Moma Zɛɛb nasɛɛ ɔ dɔɔ nɛ bɔɔ bɛ», ye kwyɛl ɛlɛɛ, zɛɛga ndjaa mendjaala ye ekeletyɛ dɔɔ nɛ bot bɛ. Mɛkana mɛ elɛl, ye nakwyalaa ɛ etɛp keletyɛ wat nɛ din ɛ Ghayis. Nyɛ wat tɔ sama bot ɛ zɛɛga ndjaa mendjaala, pɛ ekeletyɛ di nɛ etɛp pak'ɔɔ ɔ.
Bɛmɛkana mɛlɛl mak kwyalaa ɛ étɛp ezɛɛga ndjaa mendjaala, bot ɛ di egu Mbɛɛ Bhaadal ɛ Zaŋ ɛnyɔɛpe ɔ. Ye moo mos ɛ nɛ bɛtɛ nɛ membu bhis bɛ nagoola Mbɛɛ Bhaadal e mɛkɛn «tɔɔɔ» ɛ Yezu Klisto ɛ. Bɛdhiiti ekeletyɛ nalaa Mbɛɛ Bhaadal ɛ Zaŋ tak ɔ, bɛ nabɛ ɛ́ ààmyaala nɛ esa djas bɛ nagwak tɔ mɛkana mɛ. Bɛdhiiti nadus tɔ ezɛɛga mendjaa mɛ mendjaala mɔɔ. Bak bot eekus ɛzɛm pak'ɔɔ. Bɛ ààkwyɛl ɛmyaal náá, Yezu nazyɛ kɔ bɔs ɛ dáa bot djas di zoozyɛ ɛ́. Tin, bɛ tok nɛ gwyes ɛ Yezu: Tsik'ɛ nɛ ɛsyee ɛ lɛ e mis mɔɔ toto. Bɛ ke ɛ náá: «Bis tok nɛ mesyem», «Bis nɛ gu Zɛɛb» nɛghu «Bis ɛ tɔ mengel». Tin, tsik'ɔ lyaal ɛ sa sis.
Mot nakwyal bɛmɛkana mɛ tak ɔ, ɛpedul ekeletyɛ mɛlɔ étɛp bɛ needi ààgwak elɛŋ etsal ee bot di elɛɛ bɛ dum Yezu nɛghu Zɛɛb ɔ. Tinaak, tɛtɛ bɔɔ Zɛɛb ke ɛ náá, Yezu Klisto nazyɛ kɔ bɔs ɛ dáa bot djas di ezyɛ ɛ́. Bot di ààmyaal náá ye ɛ́ deenek ɔ, bɛ ɛ́ bot ɛ mɛbhuka ɛ Yezu. Bot ɛ zedum koŋ nɛ Zɛɛb ɔ goka ɛ́ nɛ ɛdi ɛ́ sosoob nɛ Mbɛɛ Bhaadal bɛ nakwak e mɛkɛn «tɔɔɔ» ɛ. Mbɛɛ Bhaadal tak lɛɛ: ɛkwyɛl Zɛɛb nɛ ɛkwyɛl Yezu, ye ɛ́ ɛkwyɛl ɛ bɔɔ bɛsɔ. Kyeed e ekeletyɛ di ekɛ ɛ goka ɛ́ nɛ ɛlyaal dáa ɛdum ɛ koŋ ɛ lɔɔ di ɛ.
1
Mɛkpa mɛ tsik
1 Esa ee nadi e mɛkɛn «tɔɔɔ» ɛ, mena naazegwak yɛ, naabee yɛ nɛ mis, mena naabee nɛ ɛmɛt yɛ nɛ mɛmbɔ menaka. Ye nabɛ ɛ́ mɛkpa mɛ di esa náá, mot di nɛ tsik ɛ. 2 Zɛɛb naalyaal bot náá, mot tak ɛ mot di edjɛ tsik ɔ, bis naabee yɛ. Bis ɛ bɛtyaasɛs etɛp bɛ, étɛp tak ɛ bis di egoola bin tsik na kɔm-kɔm nadi tɔ Zɛɛb Sɛɛg ɛ. Ye ɛ́ nyɛy Zɛɛb ɛ natel bis ye ɛ́. 3 Sa bis nabee nɛ ɛgwak ɛ, bis ɛpegoola bin ye ɛ́, etɛɛ náá, bi needi sama nɛ nes tɔ ɛgwakel ee bis di nɛ yɛ nɛ Zɛɛb Sɛɛg dɔɔ nɛ mɔn'ɛ Yezu Klisto ɛ. 4 E di'enek, bis kwyal etɛp bak ɛ etɛɛ náá, mɛmyaala mis needjala.
Zɛɛb ɛ́ mɛkas
5 Bhaadal bis nagwak nɛ Yezu Klisto, da bis ɛgoola bin ɛ, ye ɛ́ náá, Zɛɛb ɛ́ mɛkas, ye tok nɛ ghooghom tɔ lɛ. 6 Mena keka náá, menaka ɛ́ nɛ ɛgwakel nɛ Zɛɛb, e di'enek, da mena baadi ekekɛka tɔ ghooghom ɔɔ. Tin, menaka ɛ́ bot ɛ etsal, etsɛɛtsɛ tok tɔ lena. 7 Zɛɛb ɛ́ mɛkas. Tin, menabɛlka djas ɛ di ekɛ tɔ gwyɛ ngel dáa Zɛɛb nyɛy nyɛ ɛmet di ekɛ ɔɔ, menaka ɛ́ tɔ ɛgwakel pak'enaka. E di'enek, ghiya ɛ Yezu, mɔn'ɛ waadis mena edhuud e mesyem djas.
8 Mena keka náá, mena tokeka nɛ mesyem ɔɔ, mena eekɔɔka mɛnyel mena met. Tin, etsɛɛtsɛ tok tɔ lena. 9 E di'enek, mena vaa mesyem mena pɛ daa Zɛɛb ɔɔ, mena ɛ́ nɛ ghwyil ɛdi nɛ ɛbwaalel etɛɛ náá nyɛ ɛ́ mot epiki nɛ esosoob. Nyɛ waapel mesyem mena, nɛ ɛdis mena edhuud embee etɛp djas. 10 Mena keka náá, mena ààpasyemka ɔɔ, guka náá, mena eesaka náá, Zɛɛb di mot etsal. Tin, mɛkpa mɛ tok tɔ lena.