Mɛkana ɛ Pyɛɛd, yii mɛkɛn
Pyɛɛd Mɛkɛn
Ɛniel
Pyɛɛd nakyeed mɛkana mɛ yii mɛkɛn ɛ pɛ daa ekeletyɛ e kyee mɛdhik mɛtɛn nadi si ekukuma eLɔm ɛ. Mɛdhik mɛ tak nadi ɛ́ pɛ ɛko ɛ bɔs, nɛ pɛ ɛdjem ɛ dwoo ɛ dik Azi Minɛɛd, kadi edjóoaa mos Tuulki ɛ. Ekeletyɛ binɔk nadidi penek ɛ dáa bɛdjoŋ (1.1; 2.11). Bot ɛ mɛl tak nadi ebhinaa, nɛ ɛbyen ɛ bɛ. Bɛ nadi esuu bɛ etɛp nɛghu ɛwa bɛ tɔ tsik mezuk.
Mot nakwyal mɛkana mak ɔ, nakwyal ye ɛ́, étɛp ɛdjɛ ekeletyɛ tak mɛghaaz tɔ ɛdum ɛ koŋ ɛ lɔɔ nɛ Zɛɛb. Deenek, étɛp nyɛ needjɛ bɛ mɛghaaz mɛ ɛkɛ dáa bot ɛ zedum koŋ nɛ Zɛɛb di egoka nɛ ɛkɛ ɛ.
Pyɛɛd nakwyal mɛkana mɛ yii mɛkɛn ɛ, étɛp bot ɛ di eduwal bɛdhiiti bɛzɛɛb ɔ. Nenak yak, bɛ moo ɛ́ bɛ eezebyel byela bes, etɛɛ náá, bɛ kadum koŋ ɛ nɛ Zɛɛb di nɛ tsik ɔ. Deenek, ye nabɛ ɛ́ ààkagoka náá, bɛ baakɛ dáa bɛbhaab nadi ekekɛ sok ɛ (1.13—2.4). Bɛ moo ɛ́ bot ɛ mbyak'ɛ Zɛɛb (2.4-10). Tin, bɛ nɛ ghwyil ɛkamaad edjel nɛ mezuk etɛɛ náá, bɛ nɛ ɛbwaalel di edjɛ bɛ tsik ɛ (1.3,13,21; 3.15).
Zɛɛb naagomal Yezu Klisto pak bɛmyoŋ. Ye ɛ́ sa di edjɛ ekeletyɛ ɛbwaalel ɛ. Ye ɛ́ ɛbwaalel ɛlenek ɛ di esa náá, bɛ maad mɛlee nɛ mɛnyeka dáa Yezu namaad ɛ. Yezu naazuk, nyɛ naaleea, nyɛ naabyenaa. Ye nakoozodi deenek, nyɛy nazowa ɛbwaalel ɛ lɛ nɛ Zɛɛb (4.12-19). Mɛkana mɛ mɛkɛn ɛ Pyɛɛd lyaal ɛ náá, tsik nɛ ɛsyee ɛ Yezu Klisto ɛ dhatyee geka étɛp ekeletyɛ.
Deenek, geka yenek lyaal ɛ dáa ekeletyɛ di egoka nɛ ɛdi nɛ bot ɛ di ààbɛ ekeletyɛ ɔ. Ye baalyaal ɛ, dáa baagoka nɛ ɛdi tɔ zɛɛga bot ɛ mendjaala ɛ. Mɛkana mak djɛ mɛlyo daŋ-daŋ ɛ nɛ bot ɛ di náá, bɛ tɔ edjel ɔ (2.18—3.6). Ye lii ɛ nɛ ekwom e bot di esa mɛsa pɛ daa ekukuma di ààdi keletyɛ ɔ. Ye baalii ɛ nɛ boa dinaa botom bɔɔ tok ekeletyɛ ɛ́. Tin, mɛfulu mɛ ekwom nɛ yii boa binɔk nɛ ghwyil ɛlyaal nɛ bɛdhiiti bot sa di edjóoaa ɛdum ɛ koŋ nɛ Zɛɛb ɛ. Tɔ zɛɛga yenek, ye ɛ́ kwyɛl nɛ ɛdilel pak'en di edjɛɛd ekukuma, mengbaaz, zɛnɔɔ bot ɛ zɛɛga djas (5.1-7; 1.22—2.3). Mbi yenek mɛfulu ɛpelyaal nɛ bot ɛdi ààbɛ bot ɛ zɛɛga ndjaa mendjaala náá, mot tok nɛ ghwyil bela ekeletyɛ nɛ ndjɛ.
1
Mɛswosel
1 Mam Pyɛɛd, mot-lwoma ɛ Yezu Klisto, mɛ kwyal mɛkana mak ɛ étɛp bot ɛ Zɛɛb nasɛ́ɛ ɔ, bot ɛ nazewyɛɛza tɔ́ mɛdjoŋ ɔ. Bot ɛ di etima pɛ kyee mɛdhik mɛsis dáa pɛ Pɔŋ, pɛ kye dik Ghalati, pɛ Kapadɔs, pɛ Azi nɛ pɛ kyee dik Bhitini. 2 Tin, Zɛɛb Sɛɛg naaloosɛ́ɛ bin dáa nyɛ naaloolɛɛ ɛ. Yɛ bɛ náá, Zɛɛb Sɛɛg ɛ nasɛ́ɛ wɔ ɔ, nyɛ nasɛ́ɛ wɔ dum nɛ mɛsa mɛ Sisim. Ye nabɛ ɛ́ etɛɛ náá, bi neelooba nɛ Yezu Klisto, nɛ náá, ghiya ɛ Yezu nasee ɛ waasa náá bi di Dɛɛ. Beta náá, Zɛɛb sa bin enɛm nɛ embɛɛ nɛ náá egwyem lwood tɔ len.
Mena aaka ɛ bot ɛ di nɛ ɛbwaalel ɛ tsik ɔ
3 Bhɔɔ nɛ Zɛɛb, Sɛɛg ɛ Ghɛŋ'es Yezu Klisto! Tin, tɔ lyem ghoŋ nyɛ di nɛ yɛ nɛ mena ɛ, nyɛ eesa náá, mena byel byela na bes dum nɛ ɛgom ɛ Yezu Klisto tɔ ɛsyee. Deenek, mena aaka ɛ bot ɛ di nɛ ɛbwaalel ɛ tsik ɔ. 4 É di'enek, menaka ɛ́ bot ɛ di egwaal tɔ mɛmyaala embɛɛ esa e Zɛɛb kwom étɛp'enaka ɛ. Nyɛy nyɛ ɛmet ɛ di ebaal bin yɛ pɛ tɔ gwoo. Tin, esa binek, tok nɛ ghwyil ɛ saabel, ààpulel, ààsyee. 5 Tin, mena bot ɛ di edum koŋ nɛ Zɛɛb ɔ, Zɛɛb mot mɛbwala ɛ waabaal mena nɛ ghwyil mɛbwala mɛ. Nyɛ baal mena étɛp ɛdjɛ mena tsik zekunaa nɛ ɛgunel ɛ.
6 Yɛ dum nɛ esa ee Zɛɛb nasa bin ɛ, bi goka ɛ́ nɛ di lwoodla tɔ mɛmyaala, ye nakozoodi náá, membi mɛ mɛbhowal bi di eboma nɛ yɛ tɔ bim mɛlu mak ɛ. 7 Mɛbhowal menek ɛ étɛp ɛlyaal mbi ɛdum ɛ koŋ ɛ len nɛ Zɛɛb. Tin, ɛkok ɛ lɔaad ɛ́ nɛ ghwyil ɛpulel, ye nakoozodi náá, yɛ eewaa tɔ du étɛp ɛbee enɛm e tak. Ye ɛ́ dhatyee ɛdum ɛ koŋ ɛ len nɛ Zɛɛb, ye nɛ val dhaa ɛkok ɛ lɔaad, ye ɛ́ nɛ ghwyil ɛni tɔ mɛbhowal. Tin, é ghɛŋ Yezu Klisto aatuula ɛ, nyɛ waaval bin, bi waabela duu nɛ duma. 8 E di'enek, ye nakozobɛ náá, bi dinaa ààpaabee Yezu, bi ɛpekwyɛl nyɛ. Nenak yak, bi ààbee nyɛ, bela náá, bi nɛ dum koŋ nɛ nɛ. Dáa dinaa bi ɛpedum koŋ nɛ nɛ ɛ, bi ɛ tɔ boo mɛmyaala, nɛ duu dinaa bot tok nɛ ghwyil ɛ gek ɛ. 9 Deenek, bi bela mɛmyaala menek ɛ, etɛɛ náá, bi moo ɛ́ nɛ tsik. Tsik mɛnyel men ɛ efute ee bi aabela tɔ ɛdum ɛ koŋ nɛ Yezu ɛ.
10 Deenek, bɛngoolel ɛ mɛkpa ɛ Zɛɛb naani tɔ ɛsɛɛga dum nɛ ɛsuk ɛ tsik tak. Bɛ naazeloolɛɛ mɛkpa dum nɛ enɛm nɛ embɛɛ ee Zɛɛb nakoobal bin ye ɛ́. 11 E di'enek, Sisim ɛ Klisto nabɛ ɛ́ sama nɛ nɔɔ. Ye nadi elyaal bɛ mezuk mɛ Klisto nawaagoka nɛ ɛbee ɛ, dɔɔ nɛ duma aabɔɔba ye ɛ́. Tin, bɛngoolel ɛ mɛpka Zɛɛb naadyeebani tɔ ɛsɛɛga étɛp ɛgu ɛ ɛwala tak nɛ dáa esonok binek aasael. 12 Zɛɛb nalyaal bɛ náá, mɛkpa mɛ nyɛ nalɛɛ bɛ ɛ, nabɛ ɛ́ ààbɛ étɛp'ɔɔ, ye nabɛ ɛ́ étɛp biyɔ bɛ ɛmet. Nenak, bot ɛ di goola bin Mbɛɛ Bhaadal ɔɔ, bɛ lɛɛ bin mɛkpa mak ɛ nɛ ghwyil mɛbwala e Sisim na Dɛɛ zedus tɔ gwoo ɛ. Tin, efofop ɛpebaasaa náá, bɛ gu mɛkpa mak ɛnyɔɛpe.
Zɛɛb kwyɛl ɛ mena dika bot ɛ mɛbyel mɛ eDɛɛ
13 Tin, dum nɛ tɛp tak ɛ, dika e bhwood, bi goka ɛ́ nɛ ɛdi djem. Deenek, waka ɛbwaalel ɛ len djas tɔ enɛm nɛ embɛɛ, ee bi aabela é ghɛŋ Yezu Klisto waatuula ɛ. 14 Loobaka nɛ Zɛɛb, tin, sa bi ààdu ɛkwosak ee bi nadi nɛ yɛ sok e sok bi nadi ààgu Klisto ɛ. 15 Tin, Zɛɛb mot djóo bin ɔɔ, nyɛ ɛ́ Dɛɛ. Deenek, bi goka ɛ́ nɛ ɛbaadi Dɛɛ tɔ mɛfulu men. 16 E di'enek, ekwyala Zɛɛb lɛɛ ɛ náá: «Dika Dɛɛ etɛɛ náá, mam ɛ DɛɛMsa 19.2..»
17 Yɛ bɛ náá, tɔ mendjaala men, bi nɛ djóo Zɛɛb «Sɛɛg», mot di epɛ́ɛ etɛp mot nɛ mot naadi esa ɛ, ààwa mbɛk ɔɔ. Tin, ye goka ɛ́ bi di nɛ ɛbwaalel tɔ ɛkaab ɛ Zɛɛb, e sok bi dinaa kɔ ɛko ɛ bɔs ɛ. 18 Deenek, mbee mɛfulu mɛ di ààval sonok, bi nanɔɔ nɛ bɛbhaab bin ɛ. Mɛfulu mɛ tak ɛ aanàdul bin e dhiiti di. Tin, bi nɛ gu náá, Zɛɛb naadjɛ boo efute étɛp ɛpɛk bin tɔ mbee mɛfulu menek. E di'enek, efute tak nabɛ ɛ́ ààbɛ sa di ààbɔya dáa ɛkok ɛ lɔaad nɛ pata. 19 Tin, efute tsik'en nabɛ ɛ́ ghiya na Dɛɛ ɛ Klisto mot nadi dáa mɔɔ bhata nakaa e buwa ɛ. Mɔɔ bhata tak nabaagoka nɛ ɛdi ɛ́ ààbɛ djam, ààbɛ nɛ edhuud. 20 Dáa dinaa Zɛɛb naatɔ́ nyɛ e mɛkɛn «tɔɔɔ», nyɛ kazyɛ e mɛwala mɛ mɛsik mak ɛ étɛp mɛnyɔ men. 21 Deenek, ye ɛ́ dum nɛ Klisto ɛ bi di edum koŋ nɛ Zɛɛb, mot nagomal nyɛ pak myoŋ ɔ. Nyɛ nadjɛ nyɛ duu ɛ, etɛɛ náá bi needum koŋ nɛ Zɛɛb, nɛ ɛbwaalel ɛbela sa nyɛ nakɛk bin ɛ.
Kwyɛl pak'en.
22 Tin, bi ɛ di elooba nɛ Mbɛɛ Bhaadal ɔɔ, nenak bi tok ààbɛ si bhel esyem, bi kagyee ɛ tɔ etsɛɛtsɛ. Kɔ ɛsu ɛ tak ɛ kwyɛl bɔn nyoog mɛgyɛ-mɛgyɛ. Kwyɛlelka pak'en nɛ lyem wat. 23 Deenek, Mbɛɛ Bhaadal eesa náá, bi baabyel byela na bes. Ààkabɛ byela bot nabya bin nɛ ghiya nɛ epuud ɛ. Ye ɛ byela dum Zɛɛb mot di ààgwyɛ ɔ, nyɛ nasa deenek ɛ́ nɛ mɛkpa mɛ di nɛ tsik na kɔm-kɔm ɛ. 24 Tin, ekwyala bɛ na Dɛɛ lɛɛ ɛ náá:
«Bot djas ɛ dáa eka,
tin, duu bot di nɛ ye ɛ́ dáa mɛzɛm.
Mɛbhek nɛ swɔs,
wɔ gwaa lɔwa kwyit,
25 deenek, mɛkpa ɛ Ghɛŋ nɛ bɔya kɔm-kɔmEza 40.6-8. .»
Tin, mɛkpa menek ɛ Mbɛɛ Bhaadal, ee bɛ nagoola bin ɛ.