Bekwel Tesalonik Mɛkɛn 1

Mɛkana ɛ Pɔl, yii mɛkɛn

Bot ɛ ghaada Tesalonik

Ɛniel

Pɔl nakus zɛɛga ndjaa mendjaala mɛ ghaada Tesalonik ɛ é mɛndjoŋ mɛ e ebá yii ɛkɛgoola Mbɛɛ Bhaadal. Bhis nyɛ nadus kɔ ghaada Filip ɛ nyɛ naazyɛ kɔ ghaada Tesalonik.

Ghaada Tesalonik ɛ́ pak pɛ ɛko ɛ kyee dik Ghɛlɛs, nɛ pɛ ɛdjem ɛ dwoo tɔ kyee dik Masedwan. Ye ɛ́ ghaada mɛbom. Mbula bɛdjoŋ nadidi ɛ́ kɔ ghaada tak, daŋ-daŋ ɛ mbula bot ɛ mbyak eYuda. Tin, bɛdhiiti bot tɔ mbyak eYuda nabɛ ɛ́ ààdi ekwyɛl mɛlyo ɛ Pɔl, wɔ gwak bɛ ɛzɛsɔ nyɛ. Pɔl nakwyal mɛkana ɛ étɛp bot ɛ Tesalonik, bot ɛ namyaal ɛdum ɛ koŋ ɛ na bes ɔ. Deenek, nyɛ kadjedjɛ mɛlyo mɛ ɛ, pɛ daa lɔɔ. Bɛlyoel gek ɛ́ náá, ye ɛ́ mɛkana mɛkɛn ee Pɔl nakwyal nɛ ekeletyɛ ɛ́. Ye ɛ́ di deenek ɔɔ, ye ɛ́ mɔɔ pes mɛkana mɛ mɛkɛn tɔ mɛkana mɛ ɛbhɛŋ ɛ na bes.

Tin, Ɛtsek ɛ mɛkɛn e mɛkana mak (1.3) kaada mena ɛ́, ɛgwakel Pɔl nadi nɛ yɛ nɛ bot ɛ ghaada Tesalonik ɛ. Tɔ ɛlaŋel ená kɛkum yii etɛn (4.5), Pɔl ɛpedjɛ mɛghaaz nɛ bot ɛ Tesalonik étɛp bɛ neetɔ́ sok tɔ tsik ekeletyɛ bɛ di nɛ yɛ ɛ.

Mɛkana mak ɛ étɛp ɛkoobal zyaala nadi tɔ ndjaa mendjaala mɛ na bes nyɛ nakus ɛ. Zyaala tak nabɛ ɛ́ dum nɛ bɛmɛlyo, kɔ ɛsu ɛ ɛbula ɛ Klisto. Nyɛ ɛpebaadjɛ mɛgaaz ekeletyɛ é ɛsa mɛsa.

Mɛtsek mɛ mɛkana mak ɛ dáak:

1) Mɛswosel (1.1)

2) Dáa bot ɛ Tesalonik nadum koŋ nɛ Zɛɛb ɛ (1.2—3.13)

3) Tsik Zɛɛb di emyaala nɛ yɛ ɛ (4.1-12)

4) Ɛbwaalel tɔ ɛbula ɛ Klisto (4.13—5.11)

5) Mɛlyo nɛ mɛswosel mɛ mɛsik (5.12-28)

Mɛswosel

1 Ye ɛ́ mam Pɔl zɛnɔɔ Silas nɛ Timote, bis kwyal mɛkana mak ɛ́ étɛp bot ɛ zɛɛga mendjaala ghaada Tesalonik, bot ɛ di bot ɛ Zɛɛb Sɛɛg'ena dɔɔ nɛ Yezu Klisto ɔ: beta náá, enɛm nɛ embɛɛ nɛ egwyem di nɛ nen!

Ɛdum ɛ koŋ nɛ Zɛɛb bot ɛ Tesalonik

2 Bis nɛ bulal bhɔɔ nɛ Zɛɛb mɛlu djas kɔ ɛsu ɛ len. Eghɛŋ bis djaala ɛ́, bis nɛ baadjaala kɔ ɛsu ɛ biyɔ djas. 3 Sok bhwoob Zɛɛb Sɛɛg'ena bis nɛ taala mɛlu djas nɛ ghiŋ ɛdum ɛ koŋ ɛ len nɛ Zɛɛb, nɛ mɛsa mɛ kwyɛl zɛnɔɔ ɛbwaalel bi di nɛ yɛ nɛ Ghɛŋ'enaka Yezu Klisto ɛ. 4 Bɔn nyɛɛg, bis nɛ gu náá, Zɛɛb nɛ kwyɛl bin, nyɛ nasɛ́ɛ bin ɛ étɛp bi needi bɛ. 5 Deenek, é sok bis nagoola bin Mbɛɛ Bhaadal ɛ, ye nabɛ ɛ́ ààbɛ mɛkpa nɛ mɛkpa toto. Tin, ye nabɛ ɛ́ nɛ ghwyil mɛbwala, nɛ Sisim na Dɛɛ dɔɔ nɛ ɛbwaalel djas. É sok mena nadika sama ɛ́, bi nabee mɛfulu mɛ bis nadi nɛ yɛ kɔ ɛsu ɛ len ɛ. 6 Tin, bi naabaŋa mɛfulu mes, nɛ yii Ghɛŋ. Ye nakoozodi mezuk men, bi naabalamyaal mɛkpa ɛ Zɛɛb nɛ mɛmyaala Sisim na Dɛɛ di edjɛ ɛ. 7 É di'enek, bi moo ɛ́ bot ɛ di náá, bot ɛ zedum koŋ nɛ Zɛɛb pɛ ghaada Masedwan nɛ bot ɛ ghaada Akayi aakadu mɛfulu mɔɔ ɔ. 8 Tin, ye ɛ́ kɔ kyee dik'en ɛ mɛkpa ɛ Ghɛŋ nakan ɛgoolaa, da ye ɛ́ djala kyee dik Masedwan djas nɛ kyee dik Akayi. Tin, bot djas nɛ gu ɛdum ɛ koŋ ɛ len nɛ Zɛɛb, bis tok nɛ ghwyil ɛbaalii kɔ ɛsu ɛ tak. 9 Bot djas ɛpelii dáa bi nabe bis é sok bis nadi pɛ yebɔ ɛ, nɛ dáa bi nakat ɛduwal ɛ bɛzɛɛb ɛ ekpaka-kpaka étɛp ɛdum ɛ koŋ nɛ Zɛɛb. Nyɛ ɛ́ tɛtɛ Zɛɛb, mot di nɛ tsik ɔ. 10 Tinaak, bi ɛpebwood náá, mɔn'ɛ mot di edus pɛ tɔ gwoo ɔ zyɛ. Mɔn'ɛ tak ɛ́ Yezu, mot Zɛɛb nagomal pak bot ɛ zegwyɛ ɔ. Ye ɛ́ mɔn'ɛ tak ɛ́ kwaapɛk mena é epɛ́ɛ e Zɛɛb di ezyɛ ɛ.