Mɛkana ɛ Pyɛɛd, yii bhɔɔba
Pyɛɛd yii bhɔɔba
Ɛniel
Mɛkana mak nakwyalaa ɛ étɛp ekeletyɛ djas, ye ɛ́ dáa mɛkpa mɛ ɛmwana. Mot nakwyal mɛkana tak ɛpelɛɛ náá, ɛsyee ɛ lɛ moo ɛ́ eezekunaa (1.13). Nyɛ eekwyal yɛ étɛp bot ɛ zedum koŋ nɛ Zɛɛb ɔ, neetetaala nɛ mɛlyo mɛ.
Mɛkana ɛpewaab nɛ nɔɔ ɛ náá, bɛ baal mbɛɛ mɛfulu di edus tɔ ɛdum ɛ koŋ ɛ lɔɔ nɛ Zɛɛb ɛ, bɛ ɛ́ di sosoob nɛ mɛlyo mɛ bɛ nagwak ɛ (1). Ye ɛpebaalyo bɛmbee bɛlyoel di elyo bot etɛp esua-sua náá, nɛ ɛkɛ dáa di ààgoka ɛ (2). Bhii tak, ye ɛpebaalii dum nɛ ɛwala ee Ghɛŋ Yezu aabula ɛ (3). Kana mɛkɛn mɛ ezɛɛga mendjaala, ekeletyɛ e koko mɛbyel tak nazegwyɛ, Yezu dinaa ààpabula. Bɛdhiiti bot moo ɛ́ zɛm-zɛm, bɛ aakagu étɛp yé edi boya ɛ. Tin, dáa dinaa bot zedum koŋ nɛ Zɛɛb ɛ tɔ bwood ɛ, ekwyala di tɔ mɛkana ɛpelyaal náá, Zɛɛb eetel náá, nyɛ mot bwood. Tin, nyɛ eedjɛ nɛ bot ɛ bɔs djas ze ɛswoola mɛfulu mɔɔ.
Étɛp ɛkwyee bɛ tɔ ɛdum ɛ koŋ ɛ lɔɔ nɛ Zɛɛb, mot keletyɛ ɔ, goka ɛwa lyem tɔ ekwyala bɛngoolel ɛ mɛkpa ɛ Zɛɛb e ɛbhɛŋ ɛ na mwa. Bɛ baagoka nɛ ɛwa tɔ mɛlyo mɛ bɛ nagwak nɛ bɛtsasɛs ɛ Yezu Klisto (3.2). E sok mɛkana mɛ bhɔɔba ɛ Pyɛɛd nadi ekwyalaa ɛ, bɛdhiiti bɛmɛkana ɛ Pɔl naaguaa (3.15). Sa mot ààsaa ɛgu etɛp di ekwyala tɔ mɛkana mak ɛ wɔ di ààgu mɛsuk mɛ tak tɔ Ɛbhɛŋ ɛ na mwa (1.20), nɛghu àànyɔ ɛtiibal ɛsok nɛ ɛlyo bot (3.16). E sok bɛdhiiti ekeletyɛ nɛ yii sisim na Dɛɛ di ezyɛ zɛkwyee bin ɛ, ye ɛ́ ɛnyɔɛpe.
1
1 Ye ɛ́ mam Simɔŋ Pyɛɛd, kwom e mɛsa nɛ mot-lwoma ɛ Yezu Klisto. Mɛ kwyeed mɛkana mak ɛ pɛ daa bot ɛ di nɛ kɔkɔ mbɛɛ ɛdum ɛ koŋ ɛ les nɛ Zɛɛb, tɔ epiki e Zɛɛb'es Mɛtsik-bot yis Yezu Klisto. 2 Beta náá, enɛm nɛ embɛɛ nɛ egwyem di nɛ nen etɛɛ náá, bi nɛ gu Zɛɛb nɛ Yezu Klisto Ghɛŋ'enaka!
Ɛwa zii tɔ mɛsa mɛ Zɛɛb
3 Nɛ mɛbwala mɛ, Ghɛŋ nadjɛ mena esa djas mena nadi nɛ yɛ gwyes tak ɛ étɛp mena neekɛka ɛnyɔɛpe tɔ ɛgwakel nɛ Zɛɛb. Tin, nɛ ghwyil'ɛ met, nyɛ eetel mena mot nadjóo mena tɔ duma yɛ ɔ, étɛp mena needika bot ɛ mbyak'ɛ. 4 Tɔ duma yenek, nɛ tɔ mɛbwala menek, Zɛɛb naakɛk mena eboo etɛtɛ ekɛk. Deenek, ɛbela bi aabela ekɛk binek ɛ, yɛ aasa náá, embee mɛkwosak mɛ bɔs'ak di eleeg bot ɛ, dus tɔ len. Tin bi aakadi ɛ́ bot ɛ di nɛ mbɛɛ sisim dáa Zɛɛb ɛ.
5 Étɛp tak ɛ, saka mɛghaaz mɛ ɛkɛl kɔ ɛdum ɛ koŋ ɛ len nɛ Zɛɛb, ɛkɛ tɔ tsik epiki. Deenek, bhis ɛkɛ tɔ tsik epiki, ye goka ɛ́ nɛ ɛbaadi nɛ tɛtɛ ɛgu esa ee Zɛɛb di ekwyɛl ɛ. 6 Kɔ ɛgu esa Zɛɛb di ekwyɛl ɛ, da bi ɛ baagu ɛdjɛɛd mɛnyel men. Bhis ɛdjɛɛd mɛnyel men, da bi ɛ baadi lyem bhwood. Kɔ lyem bhwood, da bi ɛ baadi tɔ ɛgwakel nɛ Zɛɛb. 7 Tin, tɔ ɛdi tɔ ɛgwakel nɛ Zɛɛb, dika nɛ tɛtɛ kwyɛl nɛ bɔn nyɛɛg bin e zɛɛga mendjaala. Bhis ɛdi nɛ tɛtɛ ɛgwakel pak'en, dika tɔ kwyɛl. 8 Yɛ bɛ náá, bi ɛ nɛ mbɛɛ mɛfulu menek ɔɔ, da bi ɛ didi esesa yɛ ɔɔ. Yɛ waadjedjɛ etɛtɛ bhum tɔ len, deenek, bi aakatɔ́ sok tɔ ɛgu ɛ Ghɛŋ'enaka Yezu Klisto. 9 Mot di ààbɛ nɛ mbɛɛ mɛfulu menek ɔɔ, nyɛ ɛ́ dáa mot edhim: nyɛ ɛ́ nɛ mis mendiila. Mbii yenɔk mot eedjisa náá, Zɛɛb naazedis edhuud ɛ mesyem mɛ na mwa.
10 Bɔn nyɛɛg, dum nɛ tɛp tak ɛ, saka mɛghaaz mɛ ɛlyaal náá, ye ɛ́ Zɛɛb ɛ nadjóo bin nɛ baatɔ́ bin. Tin, bi ɛ di esa deenek ɔɔ, bi aanàkabaabema ɛbɛk. 11 Deenek ɛ, Zɛɛb ɛ waabɛɛ bin ze ɛni ɛ tɔ ɛyoŋ ɛ na kɔm-kɔm ɛ Mɛtsik bot'enaka Yezu Klisto, Ghɛŋ'ena. 12 Étɛp tak ɛ, mɛ aagheetetaala bin etɛp binek. Mɛ nɛ gu náá, bi nɛ gu ye ɛnyɔɛpe, ɛkwosak ɛ lam ɛ náá, bi pyet ɛlyelɛpe tɔ sosoob nɛ etsɛɛtsɛ bi nagwak ɛ. 13 Mɛ bee ɛ náá, dáa mɛ dinaa nɛ tsik ɛ, mɛ goka ɛ́ nɛ ɛgheetetaala bin etɛp binek étɛp bi needi djem. 14 Tin, mɛ nɛ gu náá, dwoo ɛsyee ɛ lam moo kunaa, dáa Ghɛŋ'enaka Yezu Klisto naazetel mɛ ɛ. 15 Deenek, mɛ waasa náá, ye nakozoodi bhis ɛsyee ɛ lam, bi gheetetaala nɛ etɛp bak.
Bot ɛ nabee duma ɛ Klisto ɔ
16 Eghɛŋ bis nalɛɛ bin etɛp dum nɛ ɛzyɛ ɛ́ Ghɛŋ'es Yezu Klisto tɔ boo mɛbwala mɛ ɛ, ye nabɛ ɛ́ ààbɛ kɔ esesa esua-sua. Tin, ye ɛ́ etɛɛ náá, bis ɛ bɛtyaasɛs nabee mɛkas mɛ ɛ. 17 Deenek, nyɛ naabela duu nɛ duma Zɛɛb Sɛɛg. E ɛwala ɛlenek, gwood ɛ Zɛɛb nagek tɔ boo mɛkas ɛ náá: «Mot'ak ɛ mɔn'am mɛ di ekwyɛl ɔ, ye ɛ́ nyɛy ɛ mɛ natɔ́ nɛ mɛmyaala djasMat 3.17; 17.5. .» 18 Bisɔ bɛmet naagwak gwood dáa nagek pɛ tɔ gwoo ɛ, e sok bis nadi sama wat nɛ nɛ pɛ kɔ ɛtsok ɛ na dɛɛ ɛ.
19 Tin, bis nɛ wa lyem tɔ mɛpka mɛ bɛngoolel ɛ mɛpka Zɛɛb. Dɔɔ nɛ biyɔ pe, bi baagoka ɛ nɛ kobaka nɛ yɛ: ye ɛ́ tyee wat nɛ lambi di egoo tɔ ghooghom ɛ, kɛkum ɛwala mɛlem di elem ɛ, da mɛkas mɛ dwoo ɛdjɛ gwyɛ tɔ elyem bin ɛ. 20 Tin, bi goka ɛ́ nɛ gu náá, mot tok nɛ ghwyil ɛgoola mɛkpa ɛ Zɛɛb dáa lyem ɛ kwyɛl ɛ. 21 Ye tok nɛ sa bɛngoolel ɛ mɛkpa ɛ Zɛɛb nalɛɛ náá yɛ aasael di edus nɛ ɛkwosak bɔɔ bɛmet. Ye ɛ́ Sisim na Dɛɛ nadi edjɛ bɛ ghwyil ɛlii etɛp binek.
1:17 Mat 3.17; 17.5.