Mɛkana ɛ Pɔl, yii bɔɔba
Bot ɛ ghaada Tesalonik
Mɛsɔ mɛ mɛkana mak nakwyalel ɛ
Mɛkana mɛ bɔɔba Pɔl nakwyal baalii ɛ́ dum nɛ sa Pɔl nalii tɔ mɛkana mɛ yii mɛkɛn ɛ. Dáa mɛlu di edhaa dáak, ye ɛ́ dáa ekeletyɛ di nɛ lyem pɛ ɛko etɛɛ náá, Ghɛŋ Yezu dinaa ààpaabula.
Kɔ ghaada Tesalonik, bɛdhiiti ke ɛ́ náá, dwoo ɛ Ghɛŋ eezekum (2.2). Bɛdhiiti bot ɛ́ ɛpebyen ɛsa mɛsa (3.6-12). Bɛ ɛpeke náá, ye ààkaval dhiiti sonok etɛɛ náá, Ghɛŋ moo aazyɛ.
Tɔ mɛkana mak, Mot nakwyal ɔ ɛpetetɔ́ nɛ ɛlii dum nɛ mɛlyo mɛ, dɔɔ nɛ mɛfulu mɛ ekeletyɛ waadi nɛ yɛ ɛ.
Mɛkana mak ɛpedul mɛlɔ nɛ ekeletyɛ náá, sa bɛ ààleebee náá, bi eezekum edi di egoka ɛ. Ɛgwaal ɛ lɔɔ ààgoka nɛ ɛlu ɛ bɛ náá, bɛ di ɛnyɔɛpe nɛ ɛsa mɛsa mɔɔ.
Mɛtsek mɛ mɛkana mak ɛ dáak:
1) Mɛswosel (1.1-2)
2) Ɛbula ɛ Klisto ɛ́ waasa náá, esonok djas bula é ze (1.3-12)
3) Ghɛŋ Yezu dinaa ààpaabula (2.1-12)
4) Ɛpyet tɔ ɛdum ɛ koŋ nɛ Zɛɛb (2.13-17)
5) Mendjaala nɛ mɛsa (3.1-15)
6) Mɛswosel mɛ mɛsik (3.16-18)
1
Mɛswosel
1 Ye ɛ́ mam Pɔl, zɛnɔɔ Silas nɛ Timote, bis kwyal mɛkana mak étɛp bot ɛ zɛɛga mendjaala ghaada Tesalonik, bot ɛ di edum koŋ nɛ Zɛɛb Sɛɛg'enaka nɛ Ghɛŋ Yezu Klisto ɔ: 2 Beta náá, Zɛɛb Sɛɛg'enaka nɛ Ghɛŋ Yezu Klisto sa bin enɛm nɛ embɛɛ nɛ ɛdjɛ bin egwyem!
Ghɛŋ waazyɛ étɛp ɛzɛpɛ́ɛ bot ɛ bɔs
3 Bɔn nyɛɛg bam, bis goka ɛ́ nɛ ɛbulal bhɔɔ nɛ Zɛɛb mɛlu djas kɔ ɛsu ɛ len. Ye goka ɛ́ náá, bis sesa yɛ, etɛɛ náá, bis ɛpebee ɛdum ɛ koŋ ɛ len nɛ Zɛɛb ɛpetɔ́ sok, dɔɔ nɛ kwyɛl bi di nɛ yɛ pak'en ɛpebyet mɛlu djas. 4 Dum nɛ tɛp tak ɛ, bis di elii tɛp'en nɛ mɛbun djas tɔ ezɛɛga mendjaala, etɛɛ náá, bi ɛpesa zii tɔ ɛdum ɛ koŋ ɛ len nɛ Zɛɛb, ye nakoozodi mɛtiiga nɛ mezuk mɛ bi di eboma nɛ yɛ ɛ. 5 Tin, mezuk menek ɛpelyaal náá, Zɛɛb nɛ pɛ́ɛ bot tɔ epiki. Mezuk menek ɛ waasa náá, bi di bot ɛ di egoka nɛ ɛni tɔ ɛyoŋ ɛ Zɛɛb ɔ bi di ezuk étɛp tak ɛ. 6 Nɛ tsɛɛtsɛ, ye ɛ́ ɛnyɔɛpe é mis mɛ Zɛɛb nɛ ɛbulal mezuk nɛ bot ɛ di ezuk bin ɔ, 7 nɛ ɛdjɛ mɛwala nɛ biyɔ bot ɛ́ di ezuk ɔ, dɔɔ nɛ bisɔ pe. Tin, etɛp binek aasael ɛ é sok Ghɛŋ Yezu aatuula pɛ tɔ gwoo nɛ efofop bɛ e mɛbwala ɛ. 8 Tin, Ghɛŋ ɛ́ waatuula tɔ boo ngel du, étɛp ɛzɛwa bot ɛ́ di ebyen ɛgu ɛ Zɛɛb nɛ bot di ààlooba nɛ Mbɛɛ Bhaadal ɛ Ghɛŋ'enaka Yezu ɔ é feŋ. 9 Tin, feŋ yɔbɔ aadi ɛ́ ɛsyee na kɔm-kɔm, étɛp bɛ needi ɛtsetaɛpe nɛ Ghɛŋ, ɛtsetaɛpe nɛ duma yɛ, ɛtsetaɛpe nɛ mɛbwala mɛ. 10 Etɛp binek aasael ɛ́ dwoo Ghɛŋ aazyɛ ɛ. Bot ɛ edɛɛ djas ɛ waaduwal nyɛ, bot ɛ di edum koŋ nɛ nɛ ɔ waamyaala nɛ nɛ. Deenek, bi aadi ɛ́ tɔ lɔɔg bot ɛ tak, etɛɛ náá, bi naadum koŋ nɛ Mbɛɛ Bhaadal bis nagoola bin ɛ.
11 Ye ɛ́ etɛp tak ɛ bis di ààkat ɛdjaala Zɛɛb kɔ ɛsu ɛ len. Bis ɛpedjaala nɛ Zɛɛb'is náá, nyɛ sa náá, bi kɛdaa nyɛ nadjóo bin ɛ. Tin, bis ɛpewaab náá, nɛ ghwyil mɛbwala mɛ, nyɛ kwyee bin étɛp bi neesa enɛm esa ee bi di ekwos ɛsa ɛ, nyɛ sa náá, ɛdum ɛ koŋ ɛ len nɛ Zɛɛb nyen tɔ mɛsa men djas bi di esa ɛ́. 12 Deenek, din ɛ Ghɛŋ'enaka Yezu ɛ́ waabela duu kɔ ɛsu ɛ len, nyɛy pe ɛ́ waadjɛ bin duu. Yenek djas ɛ́, ɛkɛɛ enɛm nɛ embɛɛ e Zɛɛb'is nɛ yii Ghɛŋ Yezu Klisto.