Mɛkana ɛ Pɔl, yii bhɔɔba pɛ daa Timote
Timote Bɔɔba
Ɛniel
Mɛkana mɛ mɛmbá nakyeeda nɛ Timote ɛ, ye nabɛ ɛ́ lwomel e mɛsik mɛ mot-lwoma Pɔl, nyɛy e membok (2.9), ye nabɛ ɛ́ mbula bot nabet nyɛ (1.15; 4.10-16). Eghɛŋ tak, nyɛ nabɛ ɛ́ nyɛ eezenaagu náá, nyɛ moo aagwyɛ (4.6). Nyɛ naamwana nɛ Timote mot nadi egyee nɛ nɛ tɔ mɛsa ɔ, mot nyɛ nadi ekwyɛl dáa mɔn ɔ.
Mɛkana mak kaadaa ɛ tsik ɛ Pɔl: étɛp mɛsa mɛ dáa mot lwoma, mɛlyo mɛ, mezuk mɛ kɔ ɛsu ɛ Mbɛɛ Bhaadal. Pɔl ɛpedjɛ mɛlyo nɛ Timote. Nyɛ ɛpedjɛ nyɛ mɛghaaz náá, nyɛ waaboma nɛ mezuk kɔ ɛsu ɛ mɛsa mɛ Klisto (2.1-13). Bhii tak, nyɛ ɛpebaalɛɛ náá, nyɛ goola ɛnyɔɛpe mɛkpa mɛ Zɛɛb (2.14—4.15). Dum nɛ tɛp tak ɛ, Timote goka ɛ́ nɛ ɛkaab ɛni tɔ bɛ mɛwɔ, ɛlum koŋ nɛ bot ɛ mesyem, ɛbaŋa mɛfulu mɛ Pɔl. Ɛsok nɛ etɛp djas, nyɛ goka ɛ́ nɛ ɛdi sosoob nɛ mɛlyo mɛ Pɔl nɛ yii bɛdhiiti bɛlyoel ekeletyɛ nalyo nyɛ ɛ́.
Bhis eboo bɛtyaasɛs ɛ Yezu aagwyɛ ɛ́, bot ɛ nadjila bɛ e mɛsa mɛ etyaasɛs ɔ, nabaazokɛ ɛ dáa bɔɔ. Ye ɛ́ deenek ɛ, bɛ nabaal ɛnyɔɛpe mɛkpa mɛ bɛ nagwak nɛ bɛlyoel bɔɔ ɛ. Tin, bɛ baagoka ɛ nɛ ɛlaa bɛmɛkana mɛ na Dɛɛ. Eghɛŋ Pɔl nakwyal Timote bɛmɛkana ɛ, e sok tak, bɛmɛkana mɛ tak nadi ɛ́, yii Ɛbhɛŋ ɛ Namwa, nɛghu ba bɛdhiiti bɔɔ epes mɛkana mɛ Ɛbhɛŋ ɛ na Bes. Ekwyala bak djas ɛ «nɛ boo mɛtaŋ étɛp ɛlyo bot etsɛɛtsɛ, étɛp ɛsa náá bot myaal, étɛp ɛkoobal embee mɛsa mɔɔ, étɛp ɛsa náá mot di nɛ tsik epiki» (3.16).
1
Mɛswosel
1 Ye ɛ́ mam, Pɔl mot-lwoma ɛ Yezu Klisto tɔ ɛkwosak ɛ Zɛɛb, mɛ ɛ́ wak ɛ étɛp ɛgoola bin tsik. Ye ɛ́ tsik Zɛɛb edjɛ mena kɔ ɛsu ɛgwakel ɛ lena nɛ Yezu Klisto. 2 Mɛ kwyal mɛkana mak ɛ nɛ wɔy Timote mɔn'am mɛ di ekwyɛl ɔ: beta náá, enɛm nɛ embɛɛ, nɛ lyem ghoŋ, nɛ egwyem ɛ Zɛɛb sɛɛg bɛ nɛ Yezu Klisto di nɛ nɔ.
Pɔl ɛpeghaapɛɛ Zɛɛb kɔ ɛsu ɛ Timote
3 Mɛ ɛpeghaapɛɛ Zɛɛb mot mɛ di esa mɛsa mɛ nɛ lyem wat dáa bɛbhaab'am nasa ɛ. Mwos nɛ pum e sok mɛ di edjaala Zɛɛb ɛ, mɛ nɛ dyeebadjaala étɛp'ɔ. 4 Mɛ ɛpetaala meŋal mɔ, e di'enek, mɛ ɛ́ nɛ gwyes ɛbee wɔ étɛp lyem'am neelwood nɛ mɛmyaala. 5 Mɛ ɛpebaataala dɔɔ nɛ ɛdum ɛ koŋ nɛ Zɛɛb, wɔ zedum nɛ lyem wat ɛ. Ye ɛ́ kɔkɔ mbi ɛdum ɛ koŋ nɛ Zɛɛb yii naye yɔ Loyis nɛ nyoog Enis nadi nɛ ye ɛ́. Mɛ eemyal náá, kɔkɔ mbi ɛdum ɛ koŋ ɛlenek ɛ tɔ lɔ.
Zuka nɛ nam kɔ ɛsu ɛ mbɛɛ Bhaadal
6 Ye ɛ́ étɛp tak ɛ mɛ baadi elɛɛ nɛ nɔ náá, baawyɛl mɛgoo mɛ ɛkɛɛ ɛ Zɛɛb nadjɛ wɔ ɛ, e sok mɛ nakɛl wɔ mɛmbɔ ɛ. 7 Etɛɛ náá, Sisim Zɛɛb nadjɛ mena ɛ, ye nabɛ ɛ́ ààbɛ etɛɛ náá mena di bɛtyak-bel, ye ɛ́ Sisim ghwyil, yii kwyɛl nɛ yii ɛdil ɛ lyem.
8 Sa wɔ ààdi nɛ syen ɛgoola Mbɛɛ Bhaadal ɛ Ghɛŋ'enaka. Sa wɔ ààbaadi nɛ syen nɛ nam, mot di kwom kɔ ɛsu ɛ lɛ ɔ. Deenek, myaala ɛzuk sama nɛ nam étɛp Mbɛɛ Bhaadal. Tin, dia nɛ ɛbwaalel nɛ ghwyil Zɛɛb di edjɛ mena ɛ. 9 Nyɛy ɛ́ natsik mena, nɛ ɛsa náá mena dika bot ɛ́ dhaad mbyak'ɛ. Ye nabɛ ɛ́ ààbɛ kɔ ɛsu ɛ enɛm esa bena, ye nabɛ ɛ́ egeka bɛ met nɛ enɛm nɛ embee bɛ met. Tin, Zɛɛb naadjɛ mena enɛm nɛ embɛɛ binek e ze ɛ Yezu Klisto, ɛsok nɛ nyɛ nɛkus bhwak. 10 Tin, ɛkɛɛ enɛm nɛ embɛɛ tak kazɛnyen mos ɛ e ɛtuula ɛ mɛtsik-bot menaka Yezu Klisto. Nyɛy ɛ mot nakwak ɛsyee ɔ, dum nɛ Mbɛɛ Bhaadal ɛ nyɛ natel mena tsik na kɔm-kɔm. 11 Zɛɛb naadjɛ mɛ mɛsa mɛ ɛdi mot-lwoma nɛ lyoel, étɛp ɛkɛgoola Mbɛɛ Bhaadal. 12 Kɔ ɛsu ɛ tak ɛ, mɛ di ebee mezuk mɛ mɛ di ezuk'aak. Mɛ tok nɛ syen étɛp tak etɛɛ náá, mɛ nɛ gu mot mɛ wa ɛbwaalel ɛ lam nɛ nɔ ɛnyɔɛpe. Tin, mɛ ɛpemyaal náá, Zɛɛb ɛ́ nɛ ghwyil ɛbaal sa nyɛ nadjɛ mɛ ɛ kɛkum dwoo epɛɛ ɛ. 13 Deenek, mɛkpa mɛ etsɛɛtsɛ wɔ nagwak nɛ nam ɛ, ye ɛ́ di mɛkpa mɛfulu mɛ tsik'ɔ. Tin, pyeta tɔ ɛdum ɛ koŋ nɛ Zɛɛb, kwyɛla bot nɛ kwyɛl di edus pɛ daa Yezu Klisto ɛ. 14 Deenek, baala mbɛɛ mɛlyo djas nazedjɛaa wɔ nɛ ghwyil Sisim na Dɛɛ di tɔ lena ɛ.
Esosoob ɛ Onezifɔɔd nɛ yii bot ɛ mɛbyel mɛ
15 Wɔ nɛ gu náá bot ɛ kyee dik Azi djas naazekaab mɛ, tɔ sama bot ɛ tak, ye nabɛ ɛ́ nɛ Fizɛl bɛ nɛ Elmozɛn. 16 Beta náá, Ghɛŋ sa enɛm esa bɛ nɛ bot ɛ mɛbyel ɛ Onezifɔɔd, etɛɛ náá, nyɛ naadyeebadjɛ mɛ mɛghaaz. Tin, nyɛ nabɛ ɛ́ ààgwak syen nɛ nam, mam mot membok. 17 Deenek, dáa nyɛ tuula tɔ ghaada Lɔm ɛ, nyɛ naawa zii e ɛsaa mɛ, kɛbela mɛ. 18 Tin, beta náá, Ghɛŋ sa enɛm esa e Zɛɛb nɛ nɛ dwoo epɛɛ. Wɔy ɛmet nɛ baagu ɛnyɔɛpe esa djas nyɛ nasa nɛ nam pɛ kyee dik Efɛɛz ɛ.