Mɛsa mɛ Bot ɛ Lwoma
Mɛsa
Mɛkɛn mɛ ekwyala
Mɛkana mɛ mɛsa mɛ bot ɛ lwoma ɛ bhɔɔba Mbɛɛ Bhaadal ɛ Luk nakwyal ɛ. Nyɛ kaada ɛ dáa bot ɛ lwoma, bot ɛ Yezu nalwom ɔ nagoola bhaadal. Bɛ nakan ɛgoola ye ɛ́ pɛ Yeluzalɛm, bhii tak pɛ kɔ epes e mɛdhik mɛ nadi mbaka-mbaka nɛ tin ɛ, bhii tak pɛ kɔ mɛdhik mɛ di é ngwoob ɛ ngwoob boo dii mɛsɔn Meditelane ɛ. Deenek, bɛ naasa lwomel Yezu nalwom náá, bɛ sa ɛ (Luk 24.47-48, bot ɛ lwoma 1.8).
É mɛkɛn mɛ mɛkana mɛ bot ɛ lwoma, Yezu eebyet tɔ gwoo pɛ dáa Zɛɛb (1.9). Nenak nyɛ tokapɛ e di wat bɛ nɛ bɛ nɔɔ dáa nyɛ nadidi sok ɛ, e di'enek, nyɛ eedhis bɛdjekel bɛ Sisim na Dɛɛ, nadus pɛ dáa Zɛɛb ɛ (ɛlaŋel ɛ ebá). Sisim tak ɛ di djɛ bɛ ghwyil ɛ kɛgoola embɛɛ esa e Zɛɛb sa ɛ. Mɛkɛn nɛ mɛsik mɛ mɛkana mɛ bot ɛ lwoma, Sisim na Dɛɛ ɛpedul bɛdhiiti bot ɛ di dum koŋ nɛ Zɛɛb ɔ pɛ dáa Yezu.
Kɛkum pɛ ɛlaŋel ɛ kam nɛ ebá, mot-lwoma Pyɛɛd di mot ghoŋ tɔ etɛp ee di kaadaa tɔ mɛkana mɛ bot ɛ lwoma ɛ.
Bɛdjekel ɛ Yezu ɛ eYuda, bɛ ɛ́ kuku ɛtɔ́ pɛ kok Ndjaa-ebuwa Yeluzalɛm, tin, bɛ nadi lii kɔ ɛsu ɛ lyoel'ɔ (ghɛŋ'ɔ). Deenek, tyee wat nɛ Yezu, bɛ nabɛ ààdi é gwakel nɛ bɛghaa-Zɛɛb (ɛlaŋel ɛ elɛl kɛkum yii etɛn).
Bot ɛ zedum koŋ nɛ Zɛɛb ɔ eezɛtɔ́ kɔ mɛl mɛ kyee dik Yude djas, pɛ Samali nɛ pɛ mɛdhik mɛ sis. Bɛ nadi goola Mbɛɛ Bhaadal pɛ dáa bot ɛ membyak me sis ɛlaŋel ɛ etɛn nɛ elɛl kɛkum ɛlaŋel ɛ kam nɛ ebá (8—12). Yenek ɛ dhiiti sa na bes. Eghɛŋ tak, eYuda bɔɔ ɛmet ɛ nazodi é gu Zɛɛb ngɔt tak. Bɛ nadi gek náá, bot ɛ bɛdhiiti bɛzɛɛb ɛ sis tok nɛ ghwyil ɛ gu nyɛ. Tinaak, Yezu Klisto ɛpesa náá, bot djas di nɛ ɛgwakel nɛ Zɛɛb. Bɛzɛɛga ekeletyɛ, nɛghu bɛzɛɛga mendjaala ɛ pe byel. Ye ɛpebilel ɛbilel nɛ ɛbilel. Bot ɛ di tɔ tak ɔ bot ɛ mbyak eYuda nɛ bot ɛ membyak me sis.
Kana pɛ pak ɛlaŋel ɛ kam nɛ elɛl, mot-lwoma Pɔl ɛ ka zɛdu bhis ɛ Pyɛɛd tɔ ekwyala e mɛkana mɛ bot ɛ lwoma. Yezu Klisto ɛ nadjóo Pɔl (ɛlaŋel ɛ etɛn nɛ ená). Bot ɛ zɛɛga mendjaala Antyɔs pɛ kyee dik Siili zo ka zɛsɛɛ nyɛ nɛ bɛdhiiti bot nakwaa di gyee nɛ nɛ ɔ, étɛp bɛ neekɛgoola Mbɛɛ Bhaadal ɛ Yezu Klisto ɛtsetaɛpe pɛ mɛdhik mɛ sis. E ɛkɛn é ɛlaŋel ɛ kam nɛ elɛl, kɛkum ɛlaŋel ɛ mɛkam-mɛmbá nɛ etɛn nɛ elɛl, liial ɛ mɛdjoŋ mɛ lwomelɛ. Ye kaada ɛ dhaa Mbɛɛ Bhaadal eezedjala mbaka-mbaka nɛ Meditelane kɛkum pɛ ghaada Lɔm nadi boo ghaada ekukuma kyee dik tak ɛ.
Mbɛɛ Bhaadal ɛ Yezu Klisto Luk nakwyal ɛ ɛpeliial ghɛŋ Yezu nadi kɔ bɔs ɛ. Dum nɛ mɛkana mɛ mɛsa mɛ bot ɛ lwoma, ye ɛ́ ɛkɛn ɛ étɛp ee ɛwala ɛ bot ɛ zɛɛga ndjaa mendjaala. Ye ɛ́ ɛwala ɛ bot ɛ di dum koŋ nɛ Zɛɛb ɔ di ekeletyɛ ɔ ɛpegoola mɛlu djas nɛ é e di djas Mbɛɛ Bhaadal ɛ Yezu. Bɛ goola ye ɛ́ pɛ dáa bot ɛ membyak djas nɛ pɛ dáa bot ɛ bɛzɛɛb djas, pɛ dáa eboo bot, nɛ pɛ dáa bɔɔ dhyeeb, pɛ dáa bɛkum ɛ bot nɛ pɛ dáa bɛdjel.
1
Yezu eekɛk bot ɛ lwoma Sisim na Dɛɛ
1 Wɛn sɔ'am Teofil, tɔ mɛkana mam yii ɛsok, mɛ naakaada etɛp ee Yezu nasa ɛ, nɛ mɛlyo mɛ nyɛ nalyo djas e mɛkɛn «tɔɔɔ» ɛ, 2 zɛkum dwoo Zɛɛb naben nyɛ tɔ́ tɔ gwoo ɛ. Ɛsok nɛ nyɛ nabyet tɔ́ tɔ gwoo, ye nabɛɛ nyɛ eelik bot ɛ lwoma mɛlyo nɛ ghwyil Sisim na Dɛɛ. 3 Etɛɛ náá, bhis ɛsyee ɛ lɛ, nyɛ nadidi ɛ é lelyaal bɛ nyel, étɛp bɛ neemyaal náá, nɛ tsɛɛtsɛ nyɛ ɛ́ nɛ tsik. Mɛlu mɛkam-mɛná, nyɛ nadi é lelyaal bɛ nyel, nyɛ nadi é lii nɛ nɔɔ kɔ ɛsu ɛ Ɛyoŋ ɛ Zɛɛb. 4 Dhiiti dwoo nyɛ nadi é dɛ edee lɔɔg wat bɛ nɛ bɛ nɔɔ, nyɛ eezɛke nɛ nɔɔ náá: «Sa mot ààtseta nɛ ghaada Yeluzalɛm. Bwoodka sa Saag'am nakɛk ɛ, sa mɛ nalɛɛ bin ɛ. 5 Etɛɛ náá, Zaŋ Nduuel-bot naduu bot Zɛɛb ɛ́ tɔ mɛdii, gɔs ɛ náá, tɔ kil mɛlu mɛ di zyɛ yenek, biyɔ aaduwa Zɛɛb ɛ tɔ Sisim na Dɛɛ.»
Zɛɛb eezɛben Yezu tɔ́ tɔ gwoo
6 Deenek, bot ɛ nasɛɛga e di wat bɛ nɛ Yezu ɔ ɛ boozɛdji nyɛ náá: «Ghɛŋ, ye ɛ́ é ɛwala ɛlak ɛ́ wɔ aagomal ɛyoŋ ɛ Yisalaɛl ee?» 7 Yezu eezɛbɔɔza náá: «Dum nɛ tɛp ɛwala nɛ dwoo ɛlenek ààgwyák biyɔ, etɛɛ náá, Saag'am ɛ nazekoobal yenek nɛ ghwyil ɛ. 8 Yɛ kabɛ biyɔ, bi ɛ́ waabela boo ghwyil esok Sisim na Dɛɛ aasul kɔ lin ɛ bi aadi ɛ́ bɛtyaasɛs bam pɛ Yeluzalɛm, pɛ kyee dik Yude nɛ Samali kɛkum pɛ mɛsik mɛ bɔs.» 9 Bhis Yezu nake deenek ɛ, nyɛ eezɛbyet tɔ́ tɔ gwoo, bɔɔ djas é bee, wɔ gwaa eguud zokazɛdipal nyɛ é mis mɔɔ. 10 Dáa bɛ nadi gwyák tɔ́ gwoo esok Yezu nadi é byet ɛ, e di tak bot ɛbá nɛ ekaad ee na puu eezɛtuula bɛ, 11 bɛ eezɛke nɛ nɔɔ náá: «Bot ɛ Ghalile, étɛp yé bi di gwyɛ é gwyák tɔ gwoo? Yezu yenɔk mot Zɛɛb zedis nyɛ pak'en bin nyɛ tɔ́ tɔ gwoo ɔ, nyɛ aabaazobula ɛ dhatyee bi bee nyɛ é byet enek.»
Mot nagila Yudas ɔ
12 Bot ɛ lwoma eezɛsik pɛ Yeluzalɛm, dusa pɛ ɛtsok ɛ pyeeb Oliv. Ɛtsok ɛ tak natseta nɛ ghaada ɛ́ tyee pes ɛwala ɛwat é kyeed mɛko. 13 Dáa bɛ nakum pɛ Yeluzalɛm ɛ, bɛ eezɛni tɔ dhiiti dhɛŋ nadi pɛ ɛko ɛ́, ye nabɛɛ e di bɛ nadi zyezyɛ nɛ ɛsɛɛga sok ɛ. Ye nabɛɛ Pyɛɛd, Zaŋ, Zak, Andele, Filip nɛ Toma, zɛnɔɔ Bhaatelemi, nɛ Matye, Zak mɔɔ Alfe, Simɔŋ mot di tɔ ɛdhuu ɛ bot ɛ nadi djóoaa eZɛlɔt ɔ, zɛnɔɔ Yudas, mɔɔ Zak. 14 Bɔɔ djas, bɛ nabɛ ɛ nɛ mɛfulu mɛ ɛsesɛɛga é zɛɛga mendjaala bɛ nɛ boa, nɛ Maali nyɛɛg ɛ Yezu, zɛnɔɔ bɔn nyɛɛg ɛ Yezu esok nɛ esok.
15 Dwoo wat wɔ gwaa bot ɛ nadi dum koŋ nɛ Zɛɛb ɔ zokazɛsɛɛga e di wat, mɛtaŋ mɛ bot ɛ tak nabɛ tyee bot dhet nɛ mɛkam-mɛmbá. Wɔ gwaa Pyɛɛd zɛtiaa tetel kuku ɛbwak ɛ lɔɔ, nyɛ eezɛke náá: 16 «Bɔn ɛ nyɛɛg bam, ye bɛ ɛ́ yɛ eegoka náá, sa Sisim na Dɛɛ naloolɛɛ tɔ ekwyala e Zɛɛb ɛ sɛɛ. Pɛ tɔ nuub ɛ Dhavid, nyɛ naaloolii dum nɛ Yudas náá. Ye ɛ́ Yudas ɛ nadul bot ɛ nazɛmɛt Yezu ɔ. 17 Nyɛ nadi ɛ́ ngɔt tɔ lɔɔg'es bot ɛ lwoma, nyɛ nabɛ ɛ nyɛ eebela yɛ kyee ɛkɛɛ tɔ lwomel bis nalwomaa ɛ. 18 Deenek, nɛ epata ee bɛ nadjɛ nyɛ étɛp nyɛ nazekɛ seeb Yezu ɛ, nyɛ naabɔm pyeeb. Nyɛ nabɛɛ nyɛ eeduma si nɛ ɛghet é bɔs, mɔ tii nyɛ, mendja djas pɛ kel. 19 Bot ɛ Yeluzalɛm djas naagwak tɛp tak, e di tak ɛ bɛ naget pyeeb tak tɔ lii'ɔɔ ɛ “Akɛldama”. Ye kwyɛl ɛlɛɛ ɛ́ “pyeeb ghiya”.»
20 «Tinaak, beeka sa di kwyala tɔ mɛkana mɛ mɛdjeeb ɛ:
“Ndjaŋ'ɛ goka nɛ ɛlik ɛ́ wum;
sa dhiiti mot ààlik tɔ tak.”
Ye nabaakwyalel ɛ́ náá:
“Da dhiiti mot ɛ zɛdjila nyɛ tɔ mɛsa mɛ.*Mɛd 69.26; 109.8”
21 «É goka nɛ ɛnɔŋaa ɛ, mot ngɔt tɔ sama bot ɛ nadi é gyee mena nɛ bɛ nɔɔ esok mena nadi é kɛka mɛlu djas mena nɛ Ghɛŋ Yezu ɛ: 22 kɛkan dwoo Zaŋ naduu nyɛ Zɛɛb ɛ, kɛyaka nɛ dwoo Zɛɛb nadis nyɛ pak'enaka ɛ́. Mot tak aakadi ɛ́ tiaa-sɛs mena bɛ nɔɔ, étɛp kɛbaŋa nɛ bot náá, Yezu naazegom bhis ɛsyee ɛ lɛ.»
23 Tin, bɛ eezɛlyaal bɛ bot ɛbá: Ye nabɛɛ Zozɛf. Dhiiti din ɛ lɛ nabɛɛ Bhaalsabhas, nyɛ nabaadi é djóoaa ɛ́ Justus. Zɛ nɔɔ Mathias. 24 Bhii tak bot ɛ nadi dum koŋ nɛ Zɛɛb ɔ zokazɛsɛɛga, bɛ moo tin é djaala náá: «Ghɛŋ, wɔy mot di é gu ebhum elyem e bot ɔ. Lyaala bis mot wɔ tɔ́ tɔ sama bot ɛbá bak ɔ, 25 étɛp nyɛ needi ngɔt tɔ sama bot ɛ lwoma, e di mɛsa ɛ Yudas mot lik bhis tɔ́ e di di egoka nɛ nɛ ɔ.» 26 Tin, wɔ gwaa bɛ zɛsa dhiiti ɛgwyeeg, ɛgwyeeg ɛ tak ka sɛɛ ɛ́ Mathias. Mathias ɛ boozɛni tɔ sama bot ɛ lwoma kam nɛ ngɔt.
*1:20 Mɛd 69.26; 109.8