Bekwel Efɛɛz 1

Mɛkana ɛ Pɔl pɛ dáa Bot ɛ dɛl ɛ

Efɛɛz

Ɛniel

Mɛkana ɛ Pɔl pɛ daa bot ɛ ghaada Efɛɛz, nakwyalaa ɛ étɛp ezɛɛga bot di pɛ kyee dik Azi, ye kadi edjóoaa mos Tuulki ɛ. Mɛkana tak nakwyalaa ɛ, nyɛy e membok (3.1; 4.1), mɛkana mɛ tak ɛpekaada nɛ ɛsɛɛg bɛmɛlyo mɛ mɛsik ɛ Pɔl pɛ daa ezɛɛga mendjaa mendjaala menek. Mɛkana tak lii ɛ nɛ bot di ààbɛ bot ɛ mbyak eYuda ɔ.

Tin, ɛsuk ɛ mɛkana mak nɛ bot ɛ ghaada Efɛɛz ye ɛ́ dum nɛ sa Zɛɛb di ekwyɛl ɛsa ɛ. Tin, ye ɛ́ sa wat di náá, ye nabɛ ɛ́ syela ee Yezu eezɛsa náá bot gu yɛ. E geka ɛsa etɛp binek, nadi ye ɛ́ tak, tin, eezɛnyen nɛ Yezu Klisto. Ye nabɛ ɛ́ dum nɛ mɛkɛn mɛ bhwak, gwoo nɛ bɔs. Ye ɛpelii dum nɛ ɛgwakel pak bot ɛ di kɔ ɛko ɛ bɔs nɛ ɛgwakel pak bot nɛ Zɛɛb. Tin, tɔ sa nyɛ nadi ekwyɛl ɛsa yenek, zɛɛga ndjaa mendjaala nabɛ ɛ́ nɛ boo di. É sok mot nakwyal mɛkana mak di elii étɛp zɛɛga ndjaa mendjaala ɛ, ye ɛ́ étɛp sa nadhaa tɔ ezɛɛga mendjaa mendjaala mɛ kyee e dik binek, di edhaa bɛ nyel ɛ. Deenek, zɛɛga ndjaa mendjaala ɛ dáa nyel ɛ Klisto. Nyel tak ààkat ɛwyee, nyɛ ɛ́ daa ndjaa nazesumaa nɛ Klisto ɛ. Tin, ekeletyɛ tetɔ́ nɛ ɛsum ɛ yɛ. Ndjaa tak ɛ sama wat nɛ Klisto tɔ ghwyil mɛbwala tyee wat dáa moma di sama wat nɛ ngom'ɛ.

Tɔ bɛmɛlaŋel yii mɛkɛn kɛyaka nɛ yii elɛl (1—3), mot nakwyal mɛkana ɛpebasal kɔ ɛsu ɛgwalel dika nyen mos'aak, etɛɛ náá, Yezu nadjɛ tsik'ɛ kɔ mɛlaaba. Ekeletyɛ di ààbɛ bot ɛ mbyak eYuda ɔ, moo ɛ́ bot ɛ mbyak wat nɛ ekeletyɛ di tɔ dhaad mbyak eYuda ɔ. E di'enek, bɔɔ djas zoobelaa ɛ enɛm esa wat e Zɛɛb. Tin, Klisto naazebwak pap syen, nyɛ eesɛɛg bot ɛ nadi koko ààdi edi wat ɔ. E di'enek, nyɛ eedjɛ bɔɔ djas egwyem.

Tɔ mɛlaŋel yii ená kɛyaka nɛ etɛn nɛ wat (4-6), mot nakwyal mɛkana ɛpelɛɛ nɛ ekeletyɛ ɛ́ náá, bɛ baal ɛdum ɛ koŋ ɛ lɔɔ nɛ Zɛɛb, nɛ ɛgwakel zɛnɔɔ egwyem ee Zɛɛb di edjɛ bɛ ɛ. Deenek, mɛghaaz ɛpedjɛaa bɛ étɛp bɛ needi nɛ mɛfulu na bes. Mot nakwyal mɛkana ɛpedjɛ mɛlyo dáa bot di egoka nɛ ɛdi tɔ mɛbyel mɔɔ (5.21; 6.9). Étɛp ɛmɛt ɛ mɛlyo mak ɛnyɔɛpe ɛ, wɔ goka ɛ́ nɛ gu dáa bot ɛ na mwa nadidi ɛ. Tin, mɛtiŋ nabɛ ɛ́ ɛ náá, boa goka ɛ́ nɛ ɛlooba nɛ botom bɔɔ. Botom nabɛ ɛ́ ekukuma bɔɔ. Mot nakwyal mɛkana mak lii daŋ-daŋ ɛ nɛ botom, yɛ bɛ náá, bɛ ekukuma ɔɔ, bɛ goka ɛ́ nɛ ɛdi dáa Klisto, mot nadjɛ tsik'ɛ ɔ. Deenek, yɛ aadi ɛ́ tyee sa na bes bot ɛ ɛlɛɛ nɛ botom náá, kwyɛlka bɛl bin (5.25-33) Deenek, yɛ aadi ɛ́ tyee sa bes é ghɛŋ na mwa, wɔ lɛɛ nɛ ekukuma náá, bɛ nɛ kukuma pɛ tɔ gwoo (6.9).

Mɛswosel

1 Ye ɛ́ mam Pɔl, mot-lwoma ɛ Yezu Klisto tɔ ɛkwosak ɛ Zɛɛb. Mɛ kwyal mɛkana mak ɛ étɛp bɔɔ Zɛɛb di pɛ ghaada Efɛɛz ɛ, bot ɛ di edum koŋ nɛ Yezu Klisto ɔ. 2 Beta náá, Zɛɛb Sɛɛg'enaka nɛ Ghɛŋ'enaka Yezu Klisto djɛ bin enɛm nɛ embɛɛ nɛ egwyem.

Enɛm esa ɛ Zɛɛb étɛp bot ɛ mbyak'ɛ

3 Duu nɛ Zɛɛb, Sɛɛg ɛ Ghɛŋ'enaka Yezu Klisto. Ye ɛ́ nyɛy naazesɛɛ mena mɛtel. Mɛtel mɛ tak nasɛɛaa mena kɔ ɛ su ɛ membi esonok di dus tɔ gwoo ɛ. Etɛɛ náá, menaka ɛ́ tɔ ɛgwakel nɛ Klisto. 4 Tin, ɛsok nɛ bhwak nɛ kusel, Zɛɛb naazeloozesɛ́ɛ mena étɛp mena needika bot bɛ, étɛp mena needi dɛɛ ààbɛ nɛ ɛbɛk. Tɔ boo lyem kwyɛl'ɛ. 5 Zɛɛb naaloozemyam náá, nyɛ aasa náá, mena dika bɔɔ bɛ kɔ ɛsu ɛ Yezu Klisto. Ye ɛ́ deenek ɛ nyɛ nakwyɛl náá, ye sael tɔ ɛkwosak ɛ lɛ. 6 Djhoodjɛka duu nɛ Zɛɛb kɔ ɛsu ɛ ɛkɛɛ nyɛ nazedjɛ mena nɛ lyem wat kɔ ɛsu ɛ Mɔn'ɛ nyɛ di ekwyɛl ɔ.

7 Ye ɛ́ kɔ ɛsu ɛ ghiya ɛ Klisto ɛ, menabɛlka di pɛka. Tin, mesyem mena eebaapelaa, Zɛɛb naatel mena dáa enɛm nɛ embɛɛ bɛ di ebɔk ɛ. 8 Nyɛ naalwoodal mena nɛ enɛm nɛ embɛɛ bɛ, étɛp mena needika bot ɛ etsoŋ, nɛ bot ɛ mɛtsel dhaa nyel. 9 Tin, nyɛ eesa náá, mena guka sa nyɛ nadi kwyɛl ɛsa ɛ. Deenek, esa e tak nabɛ ɛ́ dinaa syela ɛ. Mɛsa mɛ tak nabɛ ɛ́ yɛ aasael ɛ nɛ Klisto. 10 Sa tak ɛ yii Zɛɛb aasa é ghɛŋ mɛlu aadjala ɛ, yɛ aadi ɛ́ ɛsɛɛg esa djas di kɔ ɛko ɛ bɔs nɛ yii di tɔ gwoo ɛ, etɛɛ náá, Klisto needi kukuma esa binek djas.

11 Tɔ ɛgwakel ɛ lena nɛ Klisto, mena nabelaka ɛkɛɛ nakɛkaa mena ɛ. Etɛɛ náá, Zɛɛb naazeloosɛ́ɛ mena tɔ ɛkwosak ɛ lɛ. Tin, Zɛɛb sa esonok djas ɛ dáa nyɛ di ekwyɛl ɛ, nɛ dáa nyɛ di ekwos ɛ. 12 Menabɛlka, bot nadi bot ɛ mɛkɛn é ɛwa ɛbwaalel ɛ lena nɛ Klisto ɔ, djhoodjɛka duu nɛ Zɛɛb etɛɛ náá, nyɛ boo kukuma. 13 Biyɔ pe, bhis bi nagwak mɛkpa mɛ etsɛɛtsɛ ɛ, Mbɛɛ Bhaadal nadjɛ bin tsik ɛ, bi naadum koŋ nɛ Klisto. Dáa bi nadum koŋ nɛ nɛ ɛ, Zɛɛb naawa geka yɛ kɔ len. Geka tak ɛ, Sisim na Dɛɛ ee nyɛ nakɛk bin ɛ. 14 Sisim na Dɛɛ ɛpedjɛ mena ɛbwaalel ɛ esa ee Zɛɛb nakwom étɛp bot ɛ mbyak'ɛ. Tin, nyɛ lɛɛ nɛ nena ɛ náá, menabɛlka bot ɛ di bot bɛ ɔ, mena aabelaka ye ɛ́, é sok mena aadika mena moo pɛka ɔ. Tin, mena aamyaalaka nɛ duma Zɛɛb.

Mendjaala ɛ Pɔl

15 Ye ɛ́ dum nɛ tɛp tak ɛ dinaa, mɛ naagwak dáa bot nadi elii kɔ ɛsu ɛdum ɛ koŋ ɛ len nɛ Ghɛŋ Yezu ɛ, dɔɔ nɛ kwyɛl bi baadi nɛ yɛ nɛ bot djas zedum koŋ nɛ Zɛɛb ɔ. 16 Deenek, mɛ ààkat ɛbulal bhɔɔ nɛ Zɛɛb kɔ ɛsu ɛ len. Mɛ nɛ taala nɛ nen tɔ mendjaala mam. 17 Mɛ ɛpedjaala nɛ Zɛɛb Sɛɛg mot duma, Sɛɛg ɛ Ghɛŋ'enaka Yezu Klisto. Nyɛ djɛ bin Sisim etsoŋ, ye neetel bin étɛp bi neegu nyɛ ɛnyɔɛpe. 18 Tin, mɛ ɛpebaadjaala étɛp Zɛɛb neebɛɛ bin mis tɔ mɛkas mɛ, étɛp bi neegu mɛbɔk mɛ ɛbwaalel ɛ nyɛ djóo bin étɛp tak ɛ. Deenek, étɛp bi neegu mɛnyɔ mɛ esa e lyak ee nyɛ aadjɛ nɛ bot ɛ mbyak na dɛɛ. 19 Bi neegu mɛbɔk mɛ mɛbwala mɛ nyɛ di nɛ yɛ étɛp menabɛlka bot ɛ di edum koŋ nɛ nɛ ɔ. Tin, mɛbwala mɛ tak ɛ ye ɛ́ yii Zɛɛb nabatalyaal yɛ nɛ ghwyil djas ɛ, 20 é ghɛŋ nyɛ nagomal Klisto pak myoŋ ɛ. Bhii tak, nyɛ naadil nyɛ é mbɔ eghɛŋ bɛ tɔ gwoo. 21 Klisto naanɛɛgaa kɔ efofop djas, kɔ esisim djas, kɔ ghwyil djas, kɔ mɛbwala djas. Din ɛ Klisto ɛ di ekɔk kɔ min djas di kɔ ɛko ɛ bɔs ɛ, ààkobɛ-bɛak e bhwak bot di'ak, ye ɛ́ dɔɔ nɛ bhwak di ezyɛ ɛ́. 22 Zɛɛb eesa Klisto kɔk kɔ esonok djas, nyɛ naadjɛ eghɛŋ tɔ zɛɛga ndjaa mendjaala étɛp nyɛ needi kɔk kɔ esonok djas di nɛ tsik ɛ. 23 Zɛɛga ndjaa mendjaala ɛ dáa nyel ɛ Klisto. Tin, Klisto ɛ́ tɔ lɔɔ, ye ɛ́ nyɛy ɛ di lwoodal esonok djas tɔ bot djas.