Mɛkana bot ɛ Ebele
Ebele
Ɛniel
Yak ɛ́ mɛkana mɛ nakwyalaa étɛp eYuda nadi edu Klisto ɔ. Mot nakwyal yɛ ɔ, nyɛ ààguaa, sa di tsɛɛtsɛ tɔ tak ɛ́ náá, mot nakwyal yɛ ɔ nɛ gu ekwyala ɛnyɔɛpe etɛɛ náá, ye ɛ́ dum nɛ ekwyala binek ɛ́ nyɛ di elyaal etsɛɛtsɛ etɛp nyɛ di ekaada tɔ mɛkana mak ɛ.
Ekeletyɛ mɛkɛn naadyeebatiigaa, mɛtiiga mɛ tak nadi epus náá, bɛ kɛsɔsɔwa. Étɛp tak ɛ, bɛ nakwyal bɛmɛkana étɛp bɛ neepyet, ààbula bhis.
Eghɛŋ bɛbhaab, Zɛɛb naagwakel bɛ nɛ bot ɛ mbyak eYuda. Nyɛ naalɛɛ nɛ nɔɔ náá, mot ɛ syem ɔɔ, bɛ go tit étɛp buwa, deenek, Zɛɛb aapel mesyem mɛ. Tin, mɛkana mak lɛɛ ɛ́ náá, ɛbhɛŋ ɛ na bes Zɛɛb sa nɛ bot ɛ di edum koŋ nɛ mɔn'ɛ ɔ, ye ɛ́ Yezu ɛ́ di mɔɔ bhata ɛ Zɛɛb nakaa buwa kɔ ɛsu ɛ mesyem mɛ bot djas ɛ. Bot djas di edum koŋ nɛ nɛ ɔ, bɛ tokapɛ nɛ gwyes ɛbaaka buwa bɛtit étɛp mesyem mɔɔ. Deenek, ɛbɛŋ ɛ na bes eedhaa yii na mwa. Étɛp náá, sa Yezu Klisto nasa nɛ bot ɛ, yɛ eedhaa yii efofop, yɛ Moiiz, nɛ Alɔn zɛnɔɔ yɛ Zozue nasa ɛ.
Mɛtsek mɛ mɛkana mak ɛ dáak:
Klisto ɛ́ mɔn ɛ Zɛɛb nɛ tsɛɛtsɛ, nyɛ ɛ́ sa Zɛɛb di ɛ (1.1-3)
Yezu eedhaa efofop (1.4—2.18)
Yezu eedhaa Moiiz nɛ Zozue (3.1—4.13)
Yezu ɛ́ boo ghaa-Zɛɛb (4.14—7.28)
Yezu zyɛ ɛ́ nɛ ɛbhɛŋ ɛ di edhaa yii na mwa ɛ (8.1—9.22)
Buwa Yezu ɛ́ ngɔt, ye ɛ́ buwa mɛsik (9.23—10.31)
Bɛdhiiti eboo bot ɛ nadi edum koŋ nɛ Zɛɛb sok ɔ (11.1-40)
Djhoobaŋaka Yezu (12.1—13.19)
Mɛpka mɛ mɛsik nɛ mɛswosel (13.20-25)
1
Zɛɛb nalii ɛ́ tɔ nuub mɔn'ɛ
1 Eghɛŋ namwa, Zɛɛb naalii nɛ bɛbhaab'enaka esok nɛ esok. Nyɛ naalii nɛ nɔɔ membi nɛ membi mɛ elii djas tɔ enuub bɛngoolel ɛ mɛkpa ɛ Zɛɛb, 2 mos, é mɛlu mɛ mɛsik mena dika mos'aak, nyɛ kalii nɛ nena ɛ́ tɔ nuub mɔn'ɛ. Ye ɛ́ nyɛy ɛ́ di, mot aalik nɛ esa djas ɔ, dum nɛ nɛ ɛ Zɛɛb nakus gwoo nɛ bɔs. 3 Ye ɛ́ mɔn tak ɛ́ di mɛkas mɛ duma ɛ Zɛɛb. Ye ɛ́ nyɛy ɛ́ di elyaal dáa Zɛɛb di ɛ. Nyɛ ɛ́ di epyet esonok djas nɛ ghwyil mɛkpa mɛ nuub'ɛ. Bhis nyɛ nasilal ɛdis ɛ bot edhuu e mesyem mɔɔ ɛ, nyɛ naazɛnɔɔ nyel di-si pɛ tɔ gwoo, pɛ mbɔ eghɛŋ ɛ Zɛɛb, na ghaa mɛbwala. 4 Zɛɛb naasa náá, mɔn'ɛ di kɔ elo efofop. Etɛɛ náá, nyɛ naadjɛ nyɛ boo din ɛ mɛbwala dhaa yii efofop.
Mɔn ɛ Zɛɛb ɛ́ kɔ elo efofop
5 Ye ɛ́ tsɛɛtsɛ náá, Zɛɛb dinaa ààpaake nɛ dhiiti fofop'ɛ ngɔt náá:
«Wɔy ɛ́ mɔn'am, kana dwoo pan mos'ak,
mɛ eebya wɔMɛd 2.7..»
Tin, nyɛ ààpakoke-keak nɛ dhiiti fofop náá:
«Mɛ waaboodi nɛ nɛ sɛɛg,
nyɛ aadi nɛ nam ɛ́ mɔn.»
6 Tin, é sok Zɛɛb nadhis mɔn mɛgwyak mɛ kɔ bɔs ɛ, nyɛ nabɛ ɛ́, nyɛ naake náá:
«Efofop ɛ Zɛɛb djas goka ɛ́ nɛ ɛduwal ɛ nyɛ!»
7 Dum nɛ efofop, ye nabɛ ɛ́ Zɛɛb naake náá:
«Nyɛ naasa náá, efofop bɛ di tyee epup.
Tin, nyɛ naasa náá, bot ɛ mɛsa mɛ di tyee ngel duMɛd 104.4..»
8 Tin, dum nɛ mɔn, nyɛ naake náá:
«Zɛɛb, boo mɛkoozi mɔ ɛ́ kɔm-kɔm sii nɛ kɔm.
Deenek, ye ɛ́ é ɛkɛ tɔ esosoob ɛ wɔ di edjɛɛd ɛyoŋ ɛ lɔ.
9 Wɔ kwyɛl ɛ́ epiki, da wɔ ɛ́ bhina ɛbiyo,
dum nɛ tɛp tak ɛ, Zɛɛb Sɛɛg, Zɛɛb'ɔ natɔ́ wɔ étɛp wɔ di mot-mɛsa mɛ.
Nyɛ naso wɔ mul mɛ ebotan kɔ lo ɛ́ étɛp tak,
tɔ sama bɔn ɛ nyoog djas, ye ɛ́ wɔy ɛ́ nyɛ nasɛ́ɛ.»
10 Zɛɛb naabake náá:
«É mɛken tɔɔ, ye ɛ́ wɔy Ghɛŋ ɛ nakus bɔs,
dɔɔ nɛ wɔy ɛ́ nasa gwoo nɛ mɛmbɔ mɔ ɛmet.
11 Esonok binek djas aadi ɛ́ nɛ ɛsik,
ye ɛ́ kabɛ wɔy ɔ, wɔy aadi ɛ́ kɔm-kɔm.
Gwoo nɛ bɔs ɛ́ waapulel dáa ekaad.
12 Wɔ waabwaada bɛ dáa bɛ di ebwaada kaad ɛ,
deenek, wɔ waakaswoola bɛ ɛ́ dáa bot di eswoola ekaad e nyel ɛ.
Yɛ kabɛ wɔy ɔ, wɔy ààswoola, tsik'ɔ tok nɛ ɛsik.»
13 Zɛɛb nabɛ ààke nɛ dhiiti fofop'ɛ ngɔt náá:
«Dia si pɛ kyee mbɔ eghɛŋ bam,
kɛkum dwoo mɛ aasa náá, bot ɛ mɛbhuka di dáa poba wɔ di ekɛl mɛbɔ mɔ kɔ tak ɛ.»
14 Efofop ɛ́ bɛzɛ? Bɛ tok esisim di esa mɛsa mɛ Zɛɛb ɔ? Zɛɛb lwom bɛ ɛ́, étɛp bɛ neegheekwyee-kwyee bot aabela tsik na kɔm-kɔm ɔ.