Mɛkana ɛ Zak
Zak
Mɛkɛn
Mɛkana mɛ Zak ɛ dhatyee mot di sɛɛg bot étɛp ɛlɛɛ bɛ tɛp ɛ: ye ɛ́ mɛdjek nɛghu ɛdjɛ mɛghaaz nɛ ezɛɛga mendjaa mendjaala di kɔ ɛko ɛ bɔs ɛ. Tin, Zak kwyal mɛkana mak ɛ, nɛ ekeletyɛ ezɛɛga dhaad mbyak eYuda. Etɛɛ náá, bɛ ɛ́ si mɛtiŋ mɛ bot ɛ mbyak eGhɛlɛk ee di kɔ dik bot ɛ Lɔm ɔ.
Mɛkana mɛ Zak djɛ ekeletyɛ ɛ́etsoŋ. Ye ɛkwyɛlɛlɛɛ ɛ, dáa eKeletyɛ di gokanɛ ɛkɛ tɔ ɛdum koŋ ɛ lɔ nɛ Zɛɛb ɛ. É di'enek, bot zedum koŋ nɛ Zɛɛb ɔ, ɛpewaab etsoŋ binek pɛ daa Zɛɛb. Tin, Zɛɛb nɛ djɛ bɛ yak (1.2-8; 3.13-18). Bɛ ɛ́ nɛ ghwyil ɛ kakwak sa djas di kwyɛl ɛ pul mot ɛ: etɛp djas bɛ di bhoma nɛ yɛ ɛ (1.2-4), ɛkwosak ɛdi mot ekuma (1.9-11; 5.1-6), ɛkwosak ɛsa mot ɛbiyo (1.2-18; 4.1-9), ɛben ɛ nyel (4.13-16). Mɛkana lɛɛ dáa: ɛdum koŋ nɛ Zɛɛb pus mot ɛ nɛ ɛsa. Deenek, bot tok nɛ ghwyil ɛ di tɔ tɛtɛ ɛgwakel nɛ Zɛɛb, mɛsa mak àànyen (2.14-26). ɛsa deenek ɛ eekwyɛlɛlɛɛ, wɔ tiibal nɛ lyem ɔ ɛmet sa di biyo ɛ. Ye ɛ́ baadi nɛ lyem nɛ bɛsɔ bɔ: ɛsa mɛnyɔ nɛ bot di tɔ pwom ɔ, sa ààwɔ aadi tetɛp kɔ bɛsɔ bɔ nɛghu ɛbee náá wɔ eedhaa bɛ, ɛsiiza mɛkpa mɔɔ (ye ɛ́ tɔ 3.1-12).
Tin, ààbɛ nɛ mɛso, Zak kwyal wak ɛ nɛ bɛdjel ɛ bot (ye ɛ́ tɔ 2.6). Bɛ ɛ́ nɛ gwyes ɛdi nɛ ekuma, etɛɛ náá elyem bɔɔ ɛ tɔ esa e bɔs. É di'enek, mɛkana waab bɛ ɛ, sa bɛ ààbhina bɛdjel ɛ bot kɔ ɛsu ɛ pwom ɛ bela yɔɔ (2.1-13). Tin, mɛkana lɛɛ: Ekuma àànyɔ dum nɛ mbi bɛkuma bot di sa nɛ ye ɛ́ (5.1-6).
Deenek, beeka sa zekwyaala tɔ ɛsik ɛ mɛkana di lɛɛ nɛ ekeletyɛ ɛ́: kwyeeka bɛsɔ bin, djaalaka étɛp bɛsɔ bin, bulaleka bot zedjɛl ɔ e ze.
1
Mɛswosel
1 Mam Zak, kwom e mɛsa ɛ Zɛɛb, nɛ Ghɛŋ Yezu Klisto, mɛ eeswos membyak kam nɛ ebá*membyak kam nɛ ebá ye lyaal wak ɛ bot Yisalaɛl dum koŋ nɛ Yezu Klisto, yii dhaad mbyak eYuda dii kɔ mɛdhik djas ɛ., dii mɛdhik nɛ mɛdhik kɔ ɛko ɛ bɔs djas ɔ.
Etsoŋ nɛ ɛdum ɛ koŋ nɛ Zɛɛb
2 Bɔn nyɛɛg bam, bi ɛ dhaa tɔ membi mɛ mɛbhowal djas ɔ, dika nɛ boo mɛmyaala. 3 Bi nɛ gu náá, ɛdum ɛ koŋ ɛ lin nɛ Zɛɛb ɛkwak mɛbhowal ɔ, yɛ waadjɛ bin zii. 4 Bi goka ɛ́ nɛ ɛdi nɛ zii, étɛp bi needi esosoob e bot, tin, sa sonok wat ààwyii tɔ len.
5 É di'enek, mot ngɔt tɔ len ɛ di ààbɛ nɛ etsoŋ ɔ, nyɛ goka ɛ́ nɛ ɛwaab nɛ Zɛɛb. Deenek, Zɛɛb waadjɛ nyɛ nɛ etsoŋ nɛ bum lyem wat, tɔ enɛm nɛ embɛɛ bɛ. 6 Tin, esok nyɛ dii djaala náá, Zɛɛb djɛ nyɛ dhiiti sonok ɛ, nyɛ goka ɛ́ nɛ ɛdum koŋ nɛ Zɛɛb, sa nyɛ ààbem ba. Etɛɛ náá, mot di bem ba ɔ, nyɛ ɛ́ dhatyee bhuuge dii pup di ghɛɛ, kɛghɛɛg yɛ e di djas ɛ. 7 Deenek, sa kɔkɔ yenɔk mot ààgek náá, nyɛ aabela sonok pɛ daa Ghɛŋ. 8 Etɛɛ náá, nyɛ ɛ́ nɛ mɛso tɔ lyem, nyɛ sa esonok bɛ djas ɛ nɛ bhum elyem ebá.
Edjel nɛ mɛvu
9 Ye goka ɛ́ náá, mɔn nyɛɛg dii tɔ edjel ɔ myaala, etɛɛ náá, Zɛɛb eedjɛ nyɛ boo duu. 10 Tin, da mɔn nyɛɛg kadi mot ekum ɛ myaala nɛ dáa Zɛɛb aasil nyɛ ɛ́. Etɛɛ náá, dáa zɛm mɛ mɛbhek, di ààbɔya ɛ, ye ɛ́ tyee wat nɛ mot ekum pe aanàbɔya. 11 Gwyes dyeebawyɛl ɛ nɛ boo mɛkas di ses mɛbhek ɛ. Tin, zɛm ɛkwyit ɔ, enɛm bɛ djas eesi. Ye ɛ́ tyee wat, nɛ dáa mot ekum aadiib nɛ ekum bɛ ɛ.
Mot nɛ mot ɛ di wa nyel'ɛ tɔ mɛbhowal
12 Mɛmyaala nɛ mot di pyet ghiŋ tɔ mɛbhowal ɔ. Etɛɛ náá, mot aapyet ghiŋ tɔ mɛbhowal ɔ, nyɛ aabela efute e tsik na kɔm-kɔm ee Zɛɛb nakɛk nɛ bot ɛ di nɛ kwyɛl nɛ nɛ ɔ. 13 Tin, mot di tɔ mɛbhowal ɔ, sa nyɛ ààke náá: «Ye ɛ́ Zɛɛb ɛ di bowal mɛ.» Etɛɛ náá, Zɛɛb tok nɛ ghwyil ɛ bela geka ɛbowal mot, nɛghu ɛpus ɛ mot tɔ ɛbiyo. 14 Tin, mbee ɛkwosak ɛ mot nɛ mot ɛ di dul mot tɔ mbee etɛp. 15 É di'enek, wɔ bet náá ɛkwosak tak dhaa wɔ nyel ɔ, ye kadul wɔ ɛ tɔ esyem. Bhii tak, wɔ dyeebagyee tɔ esyem ɔ, ye kadul wɔ ɛ tɔ ɛsyee. 16 Bɔn nyɛɛg bam, nàkɔɔka mɛnyel min. 17 Embɛɛ esonok djas bot di bela ɛ, nɛ esa ee di ɛnyɔɛpe ɛ dus ɛ tɔ gwoo, pɛ daa Zɛɛb Sɛɛg yena, Mɛkus esa ee mɛkas djas di tɔ gwoo ɛ. Gwyes nɛ ngɔn ɛ nɛ ghwyil ɛ swoola. Deenek, pɛ tɔ lɛ tok nɛ zwoola, ààbɛ-bɛak nɛ tseŋa náá, ye koo edhim batsa. 18 Nyɛ ɛmet ɛ nakwyɛl ɛdjɛ bis tsik'ɛ nɛ mɛkpa mɛ na tsɛɛtsɛ. Etɛɛ náá, bis needi bot ɛsok tɔ esa djas ee nyɛ nakus ɛ.
Ɛgwak ɛ mɛkpa mɛ Zɛɛb nɛ ɛkɛ dáa di lɛɛ ɛ
19 Bɔn nyɛɛg bam, bi goka ɛ́ nɛ ɛmɛt ɛnyɔɛpe sa mɛ di lɛɛ bin'aak: Mot nɛ mot kwyɛs nɛ ɛgwak. Yɛ ààgoka náá, mot kwyɛs ɛlii, ààkwyɛs nɛ ɛbela ɛbuk. 20 Etɛɛ náá, esok mot di nɛ ɛbuk ɛ, nyɛ tok nɛ ghwyil ɛ kɛ tɔ epiki emis ɛ Zɛɛb. 21 Deenek, mwaska mendi nɛ mbee mɛsa min djas di zyɛ tɔ ɛbuk ɛ. Myaalka nɛ ɛsil ɛ nyel djas, mɛkpa mɛ Zɛɛb di bɛ tyee bhek tɔ ebhum elyem bin ɛ. Etɛɛ náá, bi neebela tsik.
22 Nà kɔɔka mɛnyel min, ye goka ɛ́ náá, esok bi di gwak mɛkpa mɛ Zɛɛb ɛ, bi goka ɛ́ nɛ ɛkɛ tyee mɛkpa mɛ tak di lɛɛ ɛ. 23 Etɛɛ náá, mot dii gwak mɛkpa mɛ Zɛɛb, da nyɛ kadi ɛ́ ààkɛ tyee mɛkpa mɛ tak di lɛɛ ɛ, nyɛ ɛ́ dhatyee mot di bee ɛbhoobɛlɛ tɔ ɛnyen. Tin, nyɛ nazobee ɛ dáa nyɛ di ɛ. 24 Bhii tak, dáa nyɛ nabee ɛbhoobɛlɛ, e ɛwala ɛlenek nyɛ eetɔ́, djisa dáa ɛbhoobɛlɛ di ɛ. 25 Bela náá, mot ɛ gwak nɛ ɛsiiza ɛsuk ɛ tɛtɛ etsi ee Zɛɛb, dii pɛk bot ɔ. Mot tak ɛ di é gogwak mɛkpa mɛ Zɛɛb ɔ, nyɛ aanàkwaadjisa yɛ. Tin, nyɛ waakɛ tyee mɛkpa mɛ tak di lɛɛ ɛ. Mbii yenɔk mot aadi ɛ́ tɔ mɛmyaala dum nɛ esa djas nyɛ di sa ɛ.
26 Mot ɛ ke náá, nyɛ mot di djaala Zɛɛb ɛnyɔɛpe ɔ. Bela náá, nyɛ mot di kwyɛs nuub ɔ, nyɛ eekɔɔ nyel ɛ, mendjaala mɛ ɛ toto. 27 Beeka tɛtɛ mbi mendjaala yii Zɛɛb Sɛɛg'ena di emyaala nɛ ye ɛ: ɛkwyee bɔɔ nyel nɛ bɛkus ɛ boa tɔ mezuk mɔɔ. Baabeeka sa di nɛ edɛɛ emis Zɛɛb ɛ: ye ɛ́ náá, sa wɔ ààbet náá, bot ɛ di lum Zɛɛb koŋ ɔ, saab mɛfulu mɔ.
*1:1 membyak kam nɛ ebá ye lyaal wak ɛ bot Yisalaɛl dum koŋ nɛ Yezu Klisto, yii dhaad mbyak eYuda dii kɔ mɛdhik djas ɛ.