Mɛkana ɛ Pɔl, Pɛ daa bot ɛ
Ghaada Filip
Ɛniel
Pɔl nakus zɛɛga ndjaa mendjaala ghaada Filip ɛ, é mɛdjoŋ mɛ ebá ɛgoola Mbɛɛ Bhaadal. Ye ɛ́ zɛɛga mendjaala mɛkɛn Pɔl nakus kɔ kyee dik Elɔp ɛ. Ghaada Filip ɛ́ pɛ ɛko ɛ dik nɛ pɛ ɛdjem ɛ dwoo ɛ kyee dik Ghɛlɛk, tɔ kyee dik Masedwan.
Mɛkana ɛ Pɔl pɛ daa ekeletyɛ ghaada Filip lyaal ɛ tɛtɛ ɛgwakel nyɛ di nɛ yɛ pak bɛ nɛ bot ɛ zɛɛga ndjaa mendjaala ɛ. É sok nyɛ nadi ekwyal mɛkana tak ɛ, nyɛ nadi ɛ́ é membok. Étɛp tak ɛ lyem'ɛ nadi ekpaa etɛɛ náá, nyɛ nabɛ ààbɛ nɛ ghwyil ɛkwyee bɛ. Pɔl ɛpekwyɛl ɛdjɛ bɛ mɛghaaz, étɛp bɛ neepyet tɔ ɛdum ɛ koŋ ɛ lɔɔ nɛ Zɛɛb. Deenek, nyɛ ɛpelɛɛ bɛ kwyɛl nyɛ di nɛ yɛ nɛ nɔɔ. Nyɛ ɛpebaabem ba kɔ ɛsu ɛ lɔɔ. Etɛɛ náá, bɛdhiiti bot ɛpegoola bhaadal mɛkɔŋ étɛp bɛ neekekɔk kɔ lɔɔ (1.15-17; 2.21; 3.2,18). Pɔl ɛpegek ɛkyeed bot ɛ bɛ nɛ bɛ nɔɔ di egyee tɔ mɛsa ɔ pɛ ghaada Filip. Nyɛ nagek deenek ɛ, étɛp bɛ neekɛkwyee bot ɛ zɛɛga mendjaala, da bɛ ɛ́ bula nɛ menduk mɔɔ (2.19-30). Pɛ yɔbɔ kyee, bot ɛ ghaada Filip naakyeed mɛtom pɛ daa Pɔl (4.10-20). Tɔ mɛkana Pɔl nakyeed pɛ daa bot ɛ Filip ɛ, nyɛ naaghaapɛɛ bɛ. Nyɛ naadjɛ bɛ pe mɛlyo, étɛp bɛ neebela mɛghaaz kɔ ɛsu ɛdum ɛ koŋ ɛ lɔɔ nɛ Zɛɛb.
Pɔl eeka é mis mɛ bot ɛ ghaada Filip etɛp di dum nɛ tsik nɛ ɛsyee ɛ Ghɛŋ Yezu ɛ (2.6-11). Yezu naabet ekum nyɛ nadi nɛ yɛ pɛ daa Sɛɛg ɛ. Dum nɛ tɛp tak ɛ, Zɛɛb nadjɛ nyɛ di ekukuma kɔ bot djas nɛ kɔ esonok djas. Ye ɛ́ tyee wat nɛ dáa Pɔl nalum koŋ nɛ eboo bot ɛ nyɛ nadi egu pɛ Yeluzalɛm ɛ (3.3-10). Deenek, nyɛ naamyaal ɛzuk kɔ ɛsu ɛ Yezu Klisto batakɛkum tɔ membok. Nyɛ ɛ́ ndjem étɛp ɛdjɛ tsik'ɛ met, kɔ ɛsu ɛ ɛdum koŋ ɛ lɛ nɛ Yezu. Nyɛ ɛ́ nɛ ɛbwaalel náá, nyɛ waagom dhiiti dwoo pak myoŋ. Nyɛ ɛpelyo nɛ bot ɛ Filip náá, bɛ du geka yɛ (3.17; 4.9).
Tɔ ekwyala mɛkana mɛ djas, Pɔl nadi emyaala nɛ sa ɛdum ɛ koŋ ɛ lɛ nɛ Zɛɛb di edjɛ nyɛ ɛ. Nyɛ ɛpedjɛ mɛghaaz nɛ bot ɛ Filip náá, bɛ di tɔ mɛmyaala. Mɛmyaala menek goka ɛ́ nɛ ɛdi tak ye nakoozodi tɔ mɛtsak, nɛ tɔ mezuk, é ghɛŋ ekeletyɛ di tɔ ɛgwakel pak'ɔɔ ɛ, Ghɛŋ Yezu ɛ nɛ nɔɔ.
1
Mɛswosel
1 Ye ɛ́ mam Pɔl nɛ Timote ekwom e mɛsa ɛ Yezu Klisto. Bis kwyal mɛkana mak ɛ, étɛp bot ɛ ghaada Filip, nɛ bot di mos bot ɛ Zɛɛb kɔ ɛsu ɛ Yezu Klisto ɔ. Dɔɔ nɛ bot ɛ di edjɛɛd zɛɛga ndjaa mendjaala ɔ, zɛnɔɔ eDhyakɛlɛ. 2 Beta náá, Zɛɛb Sɛɛg'ena nɛ Yezu Klisto Ghɛŋ'enaka sa bin enɛm nɛ embɛɛ nɛ ɛdjɛ bin egwyem.
Pɔl ɛpebulal bhɔɔ nɛ Zɛɛb
3 Mɛ nɛ bulal bhɔɔ nɛ Zɛɛb é mɛwala djas mɛ di etaala nɛ nen ɛ. 4 Mɛ nɛ dyeebamyaala é mɛwala djas mɛ di edjaala étɛp'en ɛ, 5 kɔ ɛsu ɛ mɛkwyeea mɛ bi nakwyee mɛ tɔ ɛgoola Mbɛɛ Bhaadal, kana dwoo bi nakan ɛmyaal Zɛɛb ɛ kɛkum dwoo pan mos'ak. 6 Tin, mɛ ɛ́ nɛ ɛbwaalel náá, Zɛɛb mot nakan mbɛɛ mɛsa mak pak'en ɔ, nyɛ aatɔ́ nɛ yɛ, kɛsilal dwoo ɛbula ɛ Yezu Klisto. 7 Mɛ ɛ́ nɛ gham ɛwa bin tɔ lyem'am. Etɛɛ náá, biyɔ djas ɛ sama nɛ nam tɔ ɛkɛɛ ee Zɛɛb nadjɛ mɛ ɛ. Nɛ tsɛɛtsɛ, bi ɛ́ sama nɛ nam ye nakoozodi, dáa mɛ di nenak é membok'ak nɛghu é sok mɛ di elyaal nɛ bot náá, Mbɛɛ Bhaadal mɛ di egoola ɛ ye ɛ́ etsɛɛtsɛ ɛ. 8 Zɛɛb ɛ́ tyaases'am, mɛ nɛ kwyɛl biyɔ djas dáa Yezu Klisto di ekwyɛl bin ɛ.
9 Gwakeka sa mɛ di ewaab nɛ Zɛɛb tɔ mendjaala mam ɛ: ye ɛ́ náá, bi di nɛ mɛkwyɛla pak'en dhaa tyɛ. Da bi ɛ́ di bot ɛtiibal nɛ bot ɛgu etɛp ɛnyɔɛpe. 10 Deenek, bi needi nɛ ghwyil ɛtiibal sa di ɛnyɔɛpe ɛ. Tin, bi aadi ɛ́ ààbɛ nɛ edhuud, ààbɛ nɛ sa ɛbiyo wat dwoo Klisto aazyɛ ɛ́. 11 Beta náá, bi di nɛ mɛsa mɛ epiki e Zɛɛb di tɔ len ɛbuɛpe kɔ ɛsu ɛ Yezu Klisto, étɛp ɛduwal ɛ Zɛɛb, nɛ ɛdjɛ nyɛ duma.
Mbɛɛ Bhaadal ɛpegoolaa djala dik
12 Bɔn nyɛɛg, mɛ kwyɛl ɛ bi gu náá, sa mɛ naboma nɛ ye ɛ́, ye naasa náá, Mbɛɛ Bhaadal goolaa djala dik. 13 Deenek, esodja ee di ebaal ndjaa boo kukuma ɔ nɛ bɛdhiiti bot djas nɛ kagu nenak náá, mɛ ɛ́ é membok ɛ etɛɛ náá, mɛ ɛ́ mot-mɛsa ɛ Klisto. 14 Dáa bɛtɛ bɔn nyɛɛg nabee mɛ é membok ɛ, bɛtɛ nɛ bot pak'ɔɔ naazɛwa ɛbwaalel ɛ lɔɔ nɛ Ghɛŋ, bɔɔ batabela mɛghaaz mɛ ɛgoola Mbɛɛ Bhaadal ɛ Zɛɛb ààbɛ nɛ bwoo.
15 Ye ɛ́ tsɛɛtsɛ náá, bɛdhiiti bot pak'ɔɔ ɛpegoola Mbɛɛ Bhaadal ɛ Klisto nɛ mbee lyem. Etɛɛ náá, bɛ ɛ́ nɛ mbee egeka nɛ nam. Tin, bɛdhiiti bɔn nyɛɛg goola Mbɛɛ Bhaadal ɛ Klisto ɛ nɛ mbɛɛ lyem. 16 Bot ɛ di egoola Mbɛɛ Bhaadal nɛ mbɛɛ lyem ɔ, bɛ goola yɛ nɛ kwyɛl djas. Etɛɛ náá, bɛ nɛ gu náá, mɛsa mam wak ɛ́ ɛlyaal nɛ bot náá, Mbɛɛ Bhaadal mɛ di goola ɛ, ye ɛ́ tsɛɛtsɛ. 17 Tin, bɛdhiiti bot goola Mbɛɛ Bhaadal ɛ Klisto ɛ nɛ mbee lyem. Ɛkwosak ɛ lɔɔ ɛ́ ɛpul, bɛ saŋ ɛ náá, bɛ baabil mezuk mam tɔ membok. 18 Ye nakozoodi náá, egeka bɔɔ ɛ́ ɛnyɔɛpe nɛghu egeka bɔɔ àànyɔ, sa di enyɔ ɛ, ye ɛ́ náá, Mbɛɛ Bhaadal ɛ Klisto ɛpegoolaa. Deenek, mɛ ɛ́ nɛ mɛmyaala, mɛ aazodidi ɛ́ tɔ mɛmyaala. 19 Etɛɛ náá, mɛ nɛ gu náá, etɛp binek djas lyaal ɛ náá, Zɛɛb waatsik mɛ kɔ ɛsu ɛ mendjaala men nɛ ghwyil ɛ Sisim ɛ Yezu Klisto di ekwyee mɛ ɛ. 20 Tin, mɛ tok nɛ ghwyil ɛdi nɛ sen dáa ye di náá, mɛ ɛ́ nɛ boo ɛbwaalel ɛ. Mos, mɛ nakoozogwyɛ, mɛ nakoozodi nɛ tsik, duma ɛ Klisto aadi ɛ́ nɛ nam é edi djas mɛ aadi ɛ́.
21 Etɛɛ náá, ye ɛ́ bɛ mam ɔɔ, Klisto ɛ́ di tsik. É di'enek, ɛsyee moo ɛ́ mbɛɛ sa. 22 Tin, yɛ bɛ náá, ɛdi nɛ tsik ɛpesa náá mɛ sa enɛm esa ɔɔ, é di'enek, mɛ ààgu sa mɛ aasɛ́ɛ pak ɛsyee nɛ tsik ɛ. 23 Mɛ moo ɛ́ pak bɛman, mɛ ɛpekwyɛl ɛbet tsik mɛ di nɛ yɛ'aak, étɛp mɛ needi sama nɛ Klisto. Deenek ɛ di ɛnyɔɛpe ɛ. 24 Tin, ye ɛ́ ɛnyɔɛpe kɔ ɛsu ɛ len náá, mɛ zoodi nɛ tsik. 25 Dáa mɛ di nɛ ɛbwaalel ɛ tsik dáak ɛ, mɛ nɛ gu náá, mɛ aadidi ɛ́ sama nɛ nen étɛp mɛ needjɛ bin mɛghaaz mɛ ɛtɔ́ sok, nɛ ɛdi ɛ tɔ mɛmyaala tɔ ɛdum ɛ koŋ nɛ Zɛɛb. 26 Etɛɛ náá, é ghɛŋ mɛ aabula zɛdi pak'en ɛ, bi aadi ɛ́ nɛ mɛmyaala kɔ ɛsu ɛ sa Yezu Klisto aasa nɛ nam ɛ.
27 Bi goka ɛ́ nɛ ɛkɛ dáa Mbɛɛ Bhaadal ɛ Klisto di elɛɛ ɛ. Tin, mɛ zyɛ zɛbee bin nɛghu mɛ di ààzyɛ ɔɔ, ye nyɔ ɛ́ náá, bi ɛ́ di ghiŋ tɔ sisim wat. Ye nyɔ ɛ́ náá, bi ɛ́ di epyet nɛ lyem wat étɛp ɛdum ɛ koŋ nɛ Zɛɛb kɔ ɛsu ɛ Mbɛɛ Bhaadal. 28 Sa bi ààgwak bwoo nɛ bot ɛ mɛbhuka men. Yɛ aadi ɛ́ ndem di elyaal náá, biyɔ, bi eezebela tsik, bɔɔ, bɛ eezewo ze. Tin, etɛp binek djas dus ɛ́ pɛ daa Zɛɛb. 29 Etɛɛ náá, Zɛɛb naadjɛ bin ghwyil ɛsa mɛsa mɛ Klisto. Tin nyɛ naadjɛ bin mbɛɛ bhwoob ɛdum ɛ koŋ nɛ nɛ. Yɛ ààpasik tin, nyɛ naabaadjɛ bin ghwyil ɛzuk dáa nyɛ nazuk ɛ. 30 Mena ɛpeduuka tuub wat. Bi nɛ gu ɛnyɔɛpe náá, é ghɛŋ sok mɛ nadi eduu tuub tak, nenak mɛ baazoduu ɛ́ tuub tak wat. Mos, biyɔ ɛ́ kadi eduu tuub tak.