1 Ecˊawngˊ naˊ peˊ, leukahˊ tisutˊ naˊ, peˊ kaw htukˊ ri aˊyu imˊ hitˊ hpumˊ Eun Peucawoˊ yeuh saˊnhawˊ naˊ, ye sangsawnˊ peˊ ri ka hawcˊ. Neumneum ka naˊ koˊ, peˊ ku lakˊ yeuh a hawcˊ. Daecti maetˊmaenˊ, hk'aˊnaee Cawoˊ Yesuˊ Eun, ye sumˊ hk'oˊhk'ang tuilˊ kawlˊreng peˊ gawm yeuh a lheuˊ awnˊ na. 2 Kopti tup yawng peˊ leukahˊ sangsawnˊ tuilˊ ye ri peˊ ri tiˊca Eun Cawoˊ Yesuˊ naˊ.

3 Kaw peˊ pun ri saicˊ ri seungaˊ chakˊ naˊ cawpˊ a alo Eun Peucawoˊ. Kop awnˊ na, peˊ kaw pun ri vel hk'aˊ hkuitˊnawngˊtangˊ naˊ. 4 Peˊ ri ku peue, sawngˊ utˊ maeeˊ beunˊ ri naˊ ce meulamlam ri hk'aˊnaee vang seungaˊ chakˊ naˊ maeeˊ vang hkopyawmˊ yumyamˊ naˊ reuˊ. 5 Pawlaee va ri hotˊ hk'aˊ hkuitˊnawngˊtangˊ naˊ seunˊ kuˊ yeuh ce peue unˊ yawng Peucawoˊ Eun naˊ. 6 Pawlaee kah aˊnhawˊ yeuh pon yeuh lheuˊ, yeuh kleucˊ ceu nang aenˊ ce ri ecˊawngˊ ri naˊ ce saecˊ ti peue. Peucawoˊ kaw Eun ciyang peue yeuh mapˊ yeuhkiˊ naˊ peue seunˊ kuˊ tawn lahˊ tawn tuilˊ ye sati peˊ naˊ. 7 Kopti Peucawoˊ hpaw Eun caˊ klawng eˊ kaw meuh peue unˊ seungaˊ chakˊ, daecti kah Eun eˊ aˊyu imˊ hk'aˊnaee vang seungaˊ chakˊ naˊ. 8 Kop awnˊ na, aˊnhawˊ lawn tecla leukahˊ sangsawnˊ aenˊ na koˊ, eun hkuinˊ tecla peue, daecti tecla eun Peucawoˊ Cawoˊ tuilˊ Citˊ seungaˊ chakˊ ri naˊ ri eˊ naˊ Eun.

9 Lawng hk'aˊ leumeusˊkeus peˊ ecˊawngˊ naˊ, ye hkuinˊ kaw loˊ ri temˊ a ri peˊ. Kopti kaw peˊ leumeusˊ puri naˊ, Peucawoˊ sangsawnˊ Eun peˊ hawcˊ. 10 Neumneum ka naˊ koˊ, peˊ ku leumeusˊ ecˊawngˊ utˊ nang kuingˊ Masidoˊniˊ naˊ ce gawmˊeucˊ. Daecti ecˊawngˊ naˊ peˊ, ye sumˊ hk'oˊ peˊ naˊ gawm baet ri leumeusˊ ecˊawngˊ naˊ ce heunˊheunˊ.

11 Peˊ naˊ yeuh ri aˊyu imˊ utˊ cumyenˊ, sawngˊ yeuh kanˊ ri maeeˊ yeuh kanˊ ri tiˊ ri naˊ seunˊ kuˊ lahˊ ye ri peˊ naˊ, 12 punta hk'aˊ aˊyu imˊ peˊ ku seunyi naˊ kaw a meuh hk'aˊ yumyamˊ ce peue utˊ hk'aˊnok naˊ maeeˊ kaw peˊ unˊ loˊ ri cu aˊnhawˊ naˊ.

13 Ecˊawngˊ naˊ peˊ, ye sumˊ kah peˊ yawng lawng neumneum ce peue yeum heulˊ hawcˊ naˊ maeeˊ unˊ sumˊ kah peˊ kuit nyhapˊ seunˊ peue seubu kuˊ unˊ kueˊ vang keutuiˊ hpumˊ naˊ ce. 14 Yesuˊ yeum Eun hawcˊ Eun tang kuhˊ imˊ naˊ, yumˊ eˊ a. Kop awnˊ na, peue yeum hk'aˊnaee Yesuˊ Eun naˊ Peucawoˊ Eun kaw tang yeuh ce kuhˊ imˊ maeeˊ Yesuˊ Eun naˊ, eˊ ku yumˊ a yeut. 15 Lahˊ ye a hotˊ leukahˊ lahˊ meun Eun Peucawoˊ naˊ ri peˊ, peue kawnˊ aˊyu imˊ kawnˊ vang rot ti yam Cawoˊ Peucawoˊ tang lih Eun naˊ eˊ, neum, eˊ hkuinˊ kaw pukalˊ nanggalˊ ce peue yeum heulˊ hawcˊ naˊ ce. 16 Kopti Cawoˊ Peucawoˊ kaw Eun lih neum kuingˊ pang maoˊ naˊ maeeˊ leukahˊ tuilˊ Eun sengˊ lawsˊ nyawkˊ naˊ, maeeˊ sengˊ eun roˊ keuting ce inˊhpom ti peue naˊ, maeeˊ sengˊ piˊtaeˊraeˊ Eun Peucawoˊ naˊ. Yam awnˊ na, peue yeum hk'aˊnaee Hkrit Eun naˊ ce kaw tang kuhˊ imˊ nanggalˊ. 17 Hawcˊ koˊ, punta kaw eˊ hukˊ hk'eupˊ Cawoˊ Peucawoˊ Eun nang vawo naˊ maeeˊ punta kaw eˊ utˊ maeeˊ Heun cotˊcu ri naˊ, kuˊ kawnˊ aˊyu imˊ kawnˊ vang naˊ eˊ, eˊ naˊ pun ri yuk ri hukˊ maeeˊ peue awnˊ ce pang putumˊ naˊ tiduihˊ. 18 Kop awnˊ na, tuilˊ kawlˊreng pu peˊ ri lawng aenˊ na ti peue hawcˊ ti peue reuˊ.