8
Peue Jhawpˊ rit keuting ka kati satˊcaˊ hk'uˊ
1 Lawng kuˊ lahˊ eˊ naˊ yeuh a kiˊ, kueˊ eˊ peue jhawpˊ rit keuting yeuhkiˊ hawcˊ. Eun mokˊ hk'aˊ tiˊ aˊtawmˊ ka tenceoˊ Eun Cawoˊ tiˊca keuting nang kuingˊ pang maoˊ naˊ. 2 Eun yeuh kanˊ hk'aˊnaee vang hk'oˊ munˊ seungaˊ kuˊ meuh tupˊ neumneum kuˊ Peucawoˊ tangˊ Eun naˊ, a hkuinˊ meuh kuˊ tangˊ peue.
3 Peue jhawpˊ rit keuting naˊ ce ku peue, pun ce ri tangˊ ri uinˊ ri tan lapsawngˊ maeeˊ kuˊ tan naˊ. Kop awnˊ na, saecˊ meuh Peue jhawpˊ rit keuting awnˊ Eun ku kah ri kueˊ kuˊ tan yeut. 4 Eun lawn utˊ pang bhenˊ keuteˊ naˊ koˊ, Eun hkuinˊ kaw pun ri meuh peue jhawpˊ rit. Kopti kueˊ a ri isˊ nang kaw tan kuˊ tan hotˊ leukahˊ ritroe tangˊ a ri uinˊ naˊ hawcˊ. 5 Peue jhawpˊ rit awnˊ ce yeuh kanˊ hk'aˊnaee vang hk'oˊ munˊ seungaˊ kuˊ plengˊ ri seunˊ ruprang maeeˊ aˊlawng ka kuˊ kueˊ nang kuingˊ pang maoˊ naˊ. Kop awnˊ na, yam Moˊse kaw eun plengˊ tupˊ vang hk'oˊ munˊ naˊ, Peucawoˊ Eun deunˊ sati eun “Plengˊ a seunˊ kuˊ tuhˊ Uiˊ mi nyu pang gong naˊ ku ceu ka reuˊ.”*8:5 Pucti heulˊ 25:40 6 Daecti kanˊ Yesuˊ pun Eun ri rap ri ti naˊ a keuting hk'aiˊ kanˊ ce naˊ. Seunˊ awnˊ na, kati satˊcaˊ kuˊ Yesuˊ meuh Eun nang seunaˊ naˊ a ku keuting hk'aiˊ kati satˊcaˊ hk'imˊ naˊ, a tangˊ ri pang kleumˊ ka kati satˊcaˊ chakˊ lheuˊ awnˊ na.
7 Kopti kati satˊcaˊ nanggalˊ naˊ a lawn unˊ kueˊ vang ri koˊ, unˊ laee loˊ ri sok kati satˊcaˊ kuˊ seubu naˊ baee. 8 Daecti Peucawoˊ nyu Eun vang ri ka naˊ. Eun lahˊ a ri peue naˊ ce,
“Peucawoˊ paoˊ Eun yam awnˊ kaw a rot.
A meuh yam kaw Uiˊ tangˊ kati satˊcaˊ hk'uˊ
ri peue ceu Iˊsarelaˊ naˊ ce
maeeˊ peue ceu Yuˊdah naˊ ce.
9 A unˊ meuh kati satˊcaˊ
tangˊ Uiˊ ri aˊtaˊ aˊya ce
yam teukˊ Uiˊ tiˊ ce
pucti heulˊ hk'aiˊ kuingˊ Eˊjiˊtuˊ naˊ,
kopti unˊ keutawnˊ ce ri kati satˊcaˊ Uiˊ naˊ
maeeˊ Uiˊ hpawtˊ ri tec ce,
Peucawoˊ Eun paoˊ a yeuh keutitˊ.
10 Aenˊ meuh a kati satˊcaˊ hk'uˊ kaw Uiˊ tangˊ ri peue ceu Iˊsarelaˊ naˊ ce
yam kawnˊ kaw ingˊ naˊ, Peucawoˊ Eun paoˊ a yeuh keutitˊ.
Uiˊ kaw seueˊ leukahˊ ritroe ri naˊ hk'aˊnaee hpumˊ ce naˊ.
Uiˊ kaw temˊ a nang meulˊ bhumˊ ce naˊ.
Uiˊ kaw meuh Peucawoˊ ce,
ce ku kaw meuh peue Uiˊ yeut.
11 ‘Yawng Peucawoˊ Eun reuˊ’, peue hkuinˊ kaw laee suip ri sangsawnˊ peue utˊ keunam caonaoˊ,
aˊkoˊ ecˊawngˊ ri naˊ ce,
kopti kaw ce yawng Uiˊ ku peue ri gawmˊ
nang aetˊ hk'aiˊ peue naˊ ce maeeˊ nang keuting hk'aiˊ peue naˊ ce.
12 Kopti kaw Uiˊ ploeˊ mapˊ rai ce naˊ
maeeˊ Uiˊ kaw unˊ laee kuit rot ri mapˊ ce naˊ baee.”†8:12 Yeramiˊ 31:31-34
13 Eun lahˊ kati satˊcaˊ aenˊ a meuh “kati satˊcaˊ hk'uˊ”. Eun yeuh kati satˊcaˊ nanggalˊ naˊ meuh nang hk'imˊ ka. Kuˊ hk'imˊ naˊ unˊ lingˊ, a kaw raiˊ.