1 Yam Yesuˊ seuconˊ Eun naˊ, Eun nyu peue meuneum naˊ seueˊ ce leumuil tan hk'aˊnaee vang tan leumuil ka nya hk'oˊ munˊ keuting naˊ. 2 Eun ku nyu aˊya seunao hk'oˊtukyak naˊ seueˊ ka paec aetˊ lalˊ paec yeut. 3 Eun lahˊ, “Kaw Uiˊ lahˊ a ri peˊ neumneum, aˊya seunao hk'oˊtukyak aenˊ tan ka heunˊ hk'aiˊ peue gawmˊeucˊ. 4 Kopti ce ri, hueˊ ce a lih vang kueˊ ri heunˊ naˊ ce tan a. Daecti beunˊ aenˊ ka koˊ, ka saecˊ hk'oˊtukyak, ka ku tan kuˊ kaw uiiˊ aˊyu ri naˊ gawmˊeucˊ ka.”

5 Kuˊ yongˊ ka nya hk'oˊ munˊ keuting seumu chakˊ ngam maeeˊ kuˊ tan ri Peucawoˊ Eun aenˊ ce naˊ, yam tapaeˊ naˊ ngonˊ lahˊ ce a ri puri naˊ, Yesuˊ Eun lahˊ a, 6 “Kuˊ pun peˊ ri nyu aenˊ ce, kaw a rot yam seumu po ri hk'aˊpang puri naˊ unˊ laee vang a saecˊ ti meulˊ. A kaw pun ri seutˊ ri tec ri ku meulˊ ri.”

7 Ce mhaingˊ Eun, “Seuraˊ, ceu nang titˊ ce a ciˊ kaw meuh yamnhawˊ? Punta kaw eˊ yawng yam awnˊ kaw a hk'awsˊ meuh naˊ, a ciˊ kaw kueˊ hetˊ keunhawˊ?”

8 Eun topˊ a, “Punta kaw peue unˊ cang copˊ ri ti peˊ naˊ, uinˊ sati ri reuˊ. Kopti peue heunˊ naˊ kaw ce peus muis Uiˊ naˊ ce naˊ ingˊ lahˊ, ‘Meuh uiˊ Heun ri’, maeeˊ ‘Yam ka naˊ kaw a hk'awsˊ rot hawcˊ.’ Peˊ naˊ, pawlaee hotˊ ce heulˊ. 9 Yam pun peˊ ri mhawngˊ lawng peuengˊ suikˊ maeeˊ kuingˊ naˊ fuin a ri naˊ, pawlaee hpumˊ seuyuk. Lawng aenˊ kaw a kah ri meuh nanggalˊ, daecti a hkuinˊ kaw nang keulawnˊ rot yam tisutˊ naˊ.”

10 Hawcˊ koˊ, Eun lahˊ a ri ce, “Peue ti ceu hawcˊ ti ceu, kuingˊ ti kuingˊ hawcˊ ti kuingˊ, peue kaw kleucˊ puri. 11 A kaw kueˊ inˊsanˊ keuting heunˊ pok, utˊ ngeupˊ maeeˊ peuyhat aˊnga heunˊ duihˊ. Kuˊ hk'oˊlhatˊ nyawkˊ maeeˊ hetˊ keuting neum pang maoˊ naˊ a kaw pucti.

12 Daecti nanggalˊ yam aenˊ ce gawmˊeucˊ unˊ nang meuh ka naˊ, peue kaw mheutˊ ri keunhapˊ peˊ. Ce kaw cusˊ peˊ heulˊ nang saˊla vang hk'oˊ munˊ naˊ maeeˊ nang htawngˊ naˊ. Ce kaw va peˊ heulˊ ri hkunˊhawˊhkamˊ maeeˊ cawoˊ veng naˊ ce. Aenˊ ce gawmˊeucˊ a meuh kopti muis Uiˊ naˊ. 13 A meuh kopti aenˊ na, peˊ kaw pun ri hkamˊ saˊhkiˊ ri ce. 14 Daecti kuit a deut nang hpumˊ peˊ naˊ nanggalˊ, kaw peˊ unˊ hkiˊkeung ri kuˊ kaw ri topˊ kahˊ naˊ. 15 Kopti punta ransu peˊ naˊ kaw ce unˊ cang htuˊhtingˊ toˊtamˊ pun peˊ naˊ, Uiˊ kaw tuilˊ cuˊyi leukahˊ ri peˊ. 16 Saecˊ meuh makuiingˊ, awngˊecˊ, ecˊawngˊ maeeˊ aˊmawo peˊ naˊ ce kaw fuin peˊ. Ce kaw toh peˊ yeum ngonˊ. 17 Kopti meuh a Uiˊ ri, peue gawmˊeucˊ peue kaw nyu peˊ pereng ri. 18 Daecti huikˊ cingˊ peˊ naˊ a hkuinˊ kaw lu saecˊ ti nyeng. 19 Kopti cang hpumˊ keutawnˊ peˊ naˊ, peˊ kaw pun ri aˊyu imˊ.

20 Yam pun peˊ ri nyu muk suikˊ naˊ rop ce nang veng Yeruˊsalaem naˊ, peˊ kaw yawng veng awnˊ kaw a hk'awsˊ rot yam lu ka. 21 Yam awnˊ na, peue utˊ nang kuingˊ Yuˊda naˊ kah ce hk'uih hukˊ nang gong, peue utˊ nang veng naˊ kah ce pucti hk'uih, peue utˊ hk'aˊnok veng naˊ ce pawlaee tang ingˊ nang veng. 22 Kopti saˊhkatˊ yam awnˊ na meuh ka saˊhkatˊ yam ciyang, aenˊ a meuh punta kuˊ temˊ ri nang htawm naˊ kaw a htonnuk naˊ. 23 Saˊhkatˊ yam awnˊ na kaw a meuh kuˊ hk'oˊlhatˊ keuting pun aˊya nyhelˊ maeeˊ nang kueˊ konˊ pui naˊ ce. Kuˊ kuit nyhapˊ nyawkˊ naˊ kaw a rot pang bhenˊ keuteˊ aenˊ na. Hk'aˊ seungeuengˊ peulel Eun Peucawoˊ naˊ kaw a rot hk'aˊpang peue aenˊ ce. 24 Ce kaw pun ri yeum ri leungawng. Peue kaw mheutˊ ce meuh peue htawngˊ teukˊ ce heulˊ ku kuingˊ. Peue ceu seubu naˊ ce kaw japˊbuin veng Yeruˊsalaem naˊ rot ti saˊhkatˊ ce naˊ htonnuk ka.

25 A kaw kueˊ hetˊ hk'aˊnaee seunyi, aˊchiˊ, seumeuengˊ naˊ ce. Pang bhenˊ keuteˊ naˊ, peue ceu ku ceu peue kaw kuit nyhapˊ kuit yak kvangˊmawo ri mhaˊseumutˊ naˊ, maeeˊ ba leuumˊ naˊ sengˊ lawsˊ ka. 26 Peue kaw unˊ pawn kuiˊ ri, kopti lhatˊ nyawkˊ peue ri kuˊ kaw kueˊ pang bhenˊ keuteˊ naˊ kopti tiˊca ka maoˊ naˊ ku ceu ka a kaw pun ri keuyuihˊ fuiiˊfaiˊ*21:26 Iˊsayaˊ 13:10; 34:4. 27 Yam awnˊ na, peue kaw pun ri nyu Konˊ aiˊ peue naˊ lih Eun hk'aˊnaee putumˊ naˊ ri munhpungˊ tiˊca keuting ri naˊ. 28 Yam ceu nang titˊ tangˊ a ri kueˊ meuh naˊ, peˊ naˊ kuhˊ cawng ri mungˊ reuˊ. Kopti de mi kaw ri pun hk'aˊ htut lawtpon naˊ hawcˊ.”

29 Yesuˊ keutec Eun leukahˊ leupongˊ ri ce, “Keueˊ ri kleumˊ pliˊ keutuic naˊ maeeˊ kleumˊ hkuˊ naˊ ce gawmˊeucˊ ka reuˊ. 30 Yam gluhˊ ka naˊ, peˊ yawng meun kaw a hk'awsˊ rot yam kucˊ. 31 Seunˊ awnˊ na, yam pun peˊ ri nyu ceu nang awnˊ kueˊ meuh ka naˊ, peˊ kaw yawng kuingˊ Eun Peucawoˊ naˊ kaw a hk'awsˊ rot hawcˊ.

32 Kaw Uiˊ lahˊ a ri peˊ neumneum, cu yam peue maetˊmaenˊ naˊ unˊ nang pon ce naˊ, ceu nang aenˊ ce gawmˊeucˊ a kaw meuh neum. 33 Maoˊ naˊ maeeˊ bhenˊ keuteˊ naˊ kaw a raiˊ, daecti leukahˊ Uiˊ naˊ a hkuinˊ kaw raiˊ.

34 Uinˊ sati ri meulamlam ri reuˊ, unˊ meuh koˊ, kaw peˊ hk'uicˊ hpumˊ ri kuˊ renˊkawn pang bhenˊ keuteˊ naˊ, kuˊ cang yuicˊ maeeˊ kuˊ kuit nyhapˊ ri aˊyu peˊ naˊ. Seunyi yam awnˊ na kaw a rot pang peˊ yam unˊ pawn peˊ kuiˊ ri seunˊ hk'iˊ peˊ hk'ai naˊ. 35 Kopti seunyi meu yam awnˊ na kaw a rot hk'aˊpang peue utˊ pang bhenˊ keuteˊ naˊ peue gawmˊeucˊ. 36 Punta kaw peˊ cang pon kuˊ kaw meuh awnˊ ce gawmˊeucˊ naˊ maeeˊ kaw peˊ cang cawng nanggalˊ Eun Konˊ aiˊ peue naˊ, saecˊ yamnhawˊ, koˊ meulamlam ri hk'oˊ munˊ reuˊ.”

37 Yesuˊ Eun sangsawnˊ nang kangˊhkungˊ ka nya hk'oˊ munˊ keuting naˊ keuyuit. Eun heulˊ itˊ pang gong Sanlon naˊ ku bul. 38 Punta kaw ce leuceng Eun naˊ, peue gawmˊeucˊ naˊ ce ingˊ cu ri nang kangˊhkungˊ ka nya hk'oˊ munˊ keuting naˊ tangˊ neum peunngup cawo naˊ.