18
Veng Babuˊlon lhuˊjah ka
1 Hawcˊ awnˊ na, uiˊ pun ri nyu inˊhpom seubu naˊ lih eun neum kuingˊ pang maoˊ naˊ ti peue. Eun kueˊ tiˊca keuting. Munhpungˊ kuˊ cengˊ eun naˊ a cengˊ bhenˊ keuteˊ naˊ. 2 Eun taˊulˊ ri lahˊ lawsˊ,
“Lhuˊjah ka, veng keuting Babuˊlon naˊ lhuˊjah ka hawcˊ.
Veng keuting aenˊ a keutˊ ri meuh vang utˊ seucaˊ hawcˊ.
A meuh vang utˊ ka seucaˊ rai naˊ.
A meuh vang utˊ ka simˊ hk'awˊjeuk naˊ maeeˊ simˊ hk'oˊklehˊ hk'oˊkeunah naˊ ku ceu.
3 Kopti peue ceu gawmˊeucˊ naˊ nyui ce ri yuicˊ ri leuumˊ pliˊ bui
lenˊcu ka veng naˊ.
Hkunˊhawˊhkamˊ ka bhenˊ keuteˊ naˊ ce lenˊcu ri veng naˊ.
Kopti meuh a yeuh pon yeuh lheuˊ ka veng naˊ, peue ka hkaiˊ ka bhenˊ keuteˊ naˊ ce baet ri meuneum hukˊ.”
4 Hawcˊ koˊ, uiˊ pun ri mhawngˊ leukahˊ seubu neum kuingˊ pang maoˊ naˊ, a lahˊ,
“Peue Uiˊ naˊ peˊ, punta kaw peˊ unˊ pun ri peus mapˊ ka veng naˊ,
maeeˊ kaw peˊ unˊ pun ri hkamˊ kuˊ keunhapˊ keuting kuˊ kaw meuh ri ka naˊ,
pucti lih hk'aiˊ veng awnˊ a reuˊ.
5 Kopti mapˊ ka veng awnˊ jokˊ a ri hukˊ lhungˊ rot ri kuingˊ pang maoˊ naˊ hawcˊ.
Peucawoˊ Eun keutuiˊ hpumˊ kuˊ kleucˊ rai yeuh ka naˊ hawcˊ.
6 Seunˊ kuˊ rai tawn tuilˊ ka ri peue naˊ, tang tuilˊ a keutah ri ka reuˊ.
Kuˊ rai tawn yeuh ka naˊ, tang tuilˊ a keutah ri ka lalˊ pun reuˊ.
Kawkˊ kuˊ tawn hkawoˊ ka ri tuilˊ peue nyui naˊ, tang hkawoˊ a reng hk'aiˊ ka lalˊ pun reuˊ.
7 Kuˊ yeuh pon yeuh lheuˊ ka ri tuˊ ri meun naˊ a lawn heunˊ aˊneng koˊ,
kah kuˊ kuit nyhapˊ klehˊklaiˊ naˊ kueˊ ri ka peunawˊ yeut reuˊ.
A hpumˊ keuting lahˊ a nang hpumˊ ri naˊ meun,
‘Mokˊ uiˊ ri meuh nangˊhawˊhkamˊ. Uiˊ hkuinˊ meuh aˊya seunao.
Uiˊ hkuinˊ kaw laee duing kueˊ seunyi kuit nyhapˊ naˊ.’
8 Kop awnˊ na, hk'aˊnaee ti seunyi naˊ yawo kuˊ keunhapˊ keuting heunˊ ceu naˊ a kaw peuengˊ ri ingˊ lec veng awnˊ na.
A meuh hk'aˊ yeum, hk'aˊ kuit nyhapˊ maeeˊ hk'aˊ utˊ ngeupˊ.
Veng naˊ a kaw pun ri haˊ hk'ue ri ngawl naˊ,
kopti Cawoˊ Peucawoˊ Cawoˊ tawsˊ aˊmu ka naˊ tiˊca keuting Eun naˊ.”
Peue loeˊ muk yam ri veng Babuˊlon
9 Yam hkunˊhawˊhkamˊ bhenˊ keuteˊ kuˊ lenˊcu, yeuh kuˊ yeuh pon yeuh lheuˊ ri veng naˊ nyu ce tuˊ ngawl ka veng haˊ naˊ, ce kaw klehˊklaiˊ yam ri veng awnˊ na. 10 Kopti lhatˊ ce ri kuˊ tukhka ka veng awnˊ a naˊ, ce cawng vang seungai naˊ, ce lahˊ,
“Oˊ, veng keuting Babuˊlon
veng tiˊca keuting, pun mi hk'aˊ jhaˊ hawcˊ,
pun mi hk'aˊ jhaˊ hawcˊ.
Hk'aˊnaee ti nali naˊ yawo, hk'aˊ tawsˊ aˊmu Eun Peucawoˊ naˊ rot a ri mi hawcˊ.”
11 Peue ka hkaiˊ ka bhenˊ keuteˊ naˊ ce kaw klehˊklaiˊ yam ri veng awnˊ na, kopti kaw a unˊ laee kueˊ nang leuvaee hk'eung ce naˊ. 12 Hk'eung ce naˊ a meuh hk'ilˊ, leumuil, seumu sengˊ, sengˊ seukleuˊ, hpenˊ linin chakˊ, hpenˊ yawtmong, hpenˊ naiˊ,*18:12 Hpenˊ naiˊ naˊ ti peue hanˊ vaikong naˊ peue taingˊ a meuh hpenˊ. hpenˊ seurakˊ nyawkˊ, hkuˊ homˊ ku ceu, hk'eung ku ceu plengˊ ri neum nga keusangˊ naˊ, hkuˊ ngos heunˊ, tong, lhecˊ, seumu paing, 13 lhoˊ caiˊheungˊ, hk'eung homˊ, ten tuˊ homˊ, hkuˊ puis homˊ muis Lawˊban, leuumˊ pliˊ bui, lamawn hkuˊ sanlon, hpunˊ mocˊ, hkawocungˊ, aˊmoe, konˊyungˊ, rawng, law ka rawng, tuˊ peue maeeˊ civit peue naˊ.
14 Ce kaw lahˊ, “Pliˊ kuˊ seumal sok mi naˊ pon a hk'aiˊ dak tiˊ mi heulˊ hawcˊ. Hk'aˊ meuneum naˊ maeeˊ hk'eung yeuh mi samˊran naˊ lu a gawmˊeucˊ heulˊ hawcˊ. Mi hkuinˊ kaw laee pun ceu nang awnˊ ce keutah baee. 15 Peue ka hkaiˊ kuˊ pun ri meuneum kopti paingˊ ce hk'eung nang veng awnˊ a naˊ kopti lhatˊ ce ri kuˊ tukhka ka veng awnˊ na, ce cawng vang seungai naˊ. Ce kaw klehˊklaiˊ yam ri veng awnˊ na. 16 Ce lahˊ,
‘Oˊ veng keuting, pun mi hk'aˊ jhaˊ hawcˊ, pun mi hk'aˊ jhaˊ hawcˊ.
Chuipˊ mi hk'eung hpenˊ linin chakˊ, hpenˊ yawtmong maeeˊ hpenˊ seurakˊ nyawkˊ naˊ.
Tuˊ mi naˊ a cengˊ yhapyhap ri hk'ilˊ, seumu sengˊ maeeˊ sengˊ seukleuˊ naˊ.
17 Hk'aˊnaee ti nali naˊ yawo, hk'eung ngos heunˊ mi naˊ a lulaic heulˊ hawcˊ.’ ”
Roˊ ka reu naˊ ce ku peue, peue pawk reu, peue yeuh kanˊ nang reu maeeˊ peue yeuh kanˊ uiiˊ aˊyu ri ri mhaˊseumutˊ naˊ ce gawmˊeucˊ ce kaw cawng vang seungai naˊ. 18 Yam nyu ce tuˊ ngawl ka veng haˊ naˊ, ce kaw klawng ri lahˊ, “Tup duing kueˊ a veng seubu seunˊ veng keuting aenˊ na aw?” 19 Ce kaw sawngˊ ghuimˊ cingˊ ri naˊ ri peuluing. Ce kaw klehˊklaiˊ yam ri veng awnˊ na. Ce lahˊ,
“Oˊ, veng keuting, pun mi hk'aˊ jhaˊ hawcˊ, pun mi hk'aˊ jhaˊ hawcˊ.
Kopti meuh a hk'aˊ meuneum ka veng naˊ,
cawoˊ reu nang mhaˊseumutˊ naˊ ce ku keutˊ ri meuneum ku peue ri.
Hk'aˊnaee ti nali naˊ yawo, mi pun ri lulaic heulˊ hawcˊ.
20 Oˊ, kuingˊ pang maoˊ, cuinchangˊ ri veng aenˊ na reuˊ.
Peue Eun Peucawoˊ, peue caee Eun Yesuˊ maeeˊ peue suip leukahˊ Eun Peucawoˊ naˊ peˊ renˊkawn reuˊ.
Peucawoˊ tawsˊ Eun aˊmu ri veng awnˊ a tangˊ peˊ hawcˊ.”
Veng Babuˊlon raiˊ ka heulˊ
21 Hawcˊ awnˊ na, inˊhpom tiˊca keuting naˊ eun nyon seumu keuteul seumu mawˊ keuting naˊ nang mhaˊseumutˊ naˊ. Eun lahˊ,
“Veng keuting Babuˊlon naˊ
kaw a pun ri nyon ri tec ri reng seunˊ awnˊ na yeut.
Aˊnhawˊ hkuinˊ kaw laee pun ri nyu a baee saecˊ ti peue.
22 Aˊnhawˊ hkuinˊ kaw laee pun ri mhawngˊ
sengˊ htawm ce peue tetˊ tingˊ, peue puingˊ piˊ maeeˊ peue puingˊ piˊtaeˊraeˊ naˊ nang veng aenˊ na baee.
Hk'aˊ kanˊ naˊ ku ceu, aˊnhawˊ hkuinˊ kaw laee pun ri nyu
nang yeuh a nang veng aenˊ na baee.
Aˊnhawˊ hkuinˊ kaw laee mhawngˊ
sengˊ mawˊ mocˊ nang veng aenˊ na baee.
23 A hkuinˊ kaw laee kueˊ
cengˊ ka kawkˊ ngawl naˊ nang veng aenˊ na baee.
Aˊnhawˊ hkuinˊ kaw laee mhawngˊ
sengˊ konˊhk'ihˊ seula nang veng aenˊ na baee.
Peue ka hkaiˊ mi naˊ meuh ce peue lhungˊ peue keuting pang bhenˊ keuteˊ naˊ.
Loˊ mi kahtaˊ naˊ mi yeuh peue kleucˊ hk'aˊ ri gawmˊeucˊ.
24 Nhamˊ ce peue suip leukahˊ Eun Peucawoˊ naˊ, nhamˊ ce peue Eun Peucawoˊ naˊ
maeeˊ nhamˊ ce peue pun ri hkamˊ toh peue ri pang bhenˊ keuteˊ naˊ ce gawmˊeucˊ, pun ri nyu a nang veng awnˊ a.”