Tai Dam 2 Pê‑tô 1

Baư sư thứ song ꞌmá té ꞌtan Pê‑tô

1 Khỏi ꞌchư ꞌSi‑ꞌmôn Pê‑tô, phủ ꞌkhớng nả ꞌviạk Chảu ꞌGiê‑ꞌsu ꞌKha‑ꞌlịt, pên ꞌlam ꞌchạư páo kháo ꞌTan#chảu. Khỏi ꞌmí sư ꞌmá ha ꞌpi#ꞌnọng, đảy ꞌdọn ꞌquám đi ꞌmí ꞌmen Chảu ꞌGiê‑ꞌsu ꞌKha‑ꞌlịt phủ pên Chảu Pua ꞌPhạ ꞌchoi hảư ꞌsúm ꞌháu ók khói sia báp ꞌsội#ꞌnặn, chắng hảư ꞌpi ꞌnọng ꞌmí chaư ꞌchưa ăn ꞌnéo quí ꞌpéng ꞌsướng điêu ꞌsúm#khỏi. 2 Khỏi đé so Chảu Pua ꞌPhạ phớng ꞌdứa hảư ꞌpi ꞌnọng đảy công#ꞌphún, dú súc sáng bang chaư tứm ꞌtén ꞌmứa#nả, ꞌpưa#ꞌva ꞌpi ꞌnọng ꞌhụ chắc Chảu Pua ꞌPhạ cắp ꞌGiê‑ꞌsu phủ pên Chảu Chom ꞌsúm#ꞌháu.

Kin dú nể dăm Chảu Pua ꞌPhạ tứm ꞌtén

3 ꞌTan chảu au phép ꞌquiến Chảu Pua ꞌPhạ ꞌnặn đảy phớng ꞌdứa ꞌchu ꞌluống hảư ꞌháu ꞌmí ꞌchua ꞌlới#pay, ꞌlẹo kin dú nể dăm ꞌTan#chảu, ꞌdọn ꞌháu ꞌhụ chắc Chảu Pua ꞌPhạ phủ đảy ꞌhiạk au ꞌháu ꞌmá dú cuông ꞌhôm ꞌngáu ꞌhung ꞌhướng cắp ꞌluống đi ꞌTan#chảu. 4 ꞌDọn ꞌsướng ꞌnặn ꞌTan chảu chắng đảy chao ꞌhẹn ꞌnéo nháư luông quí#ꞌpéng, ꞌnéo ꞌchí ꞌchoi hảư ꞌpi ꞌnọng đảy ník ꞌvện sia ꞌnéo ác ꞌhại ꞌluống pưới ꞌnau ꞌsướng ꞌcốn phái ꞌmướng ꞌlum ꞌmặc#ꞌnặn, ꞌpi ꞌnọng chắng ꞌchí ꞌmí chaư ꞌsướng chaư ꞌTan#chảu.

5 Công ꞌphún Chảu Pua ꞌPhạ phớng ꞌdứa hảư ꞌháu ꞌsướng#ꞌnặn, hảư ꞌpi ꞌnọng au chaư sáư ꞌpứng nả ꞌviạk ꞌsướng tó pay#ꞌnị:

ꞌMí chaư ꞌchưa ꞌlẹo, ꞌdệt ꞌnéo đi máư

ꞌDệt ꞌnéo đi ꞌlẹo, ꞌhụ ꞌluống ꞌtáng Chảu Pua ꞌPhạ máư

6 ꞌHụ ꞌluống ꞌtáng ꞌTan chảu ꞌlẹo, hảư cứ ꞌmo chảu máư

ꞌLẹo hảư cứ chaư mẳn máư

Hảư kin dú ꞌluống nể dăm Chảu Pua ꞌPhạ máư

7 ꞌLẹo hảư ꞌhặc ꞌpéng căn ꞌsướng ꞌpi ꞌsướng ꞌnọng máư

Hảư ꞌmí chaư ꞌhặc ꞌcốn ꞌtếng lai máư.

8 ꞌVa ꞌpi ꞌnọng kin dú ꞌsướng ꞌnặn tứm ꞌtén ꞌmứa#nả, ꞌcọ báu#dản sia#ꞌlạ, ꞌpi ꞌnọng ꞌhụ chắc ꞌGiê‑ꞌsu ꞌKha‑ꞌlịt Chảu Chom ꞌsúm ꞌháu ꞌnặn ꞌcọ ꞌchí đảy ꞌláng đi ꞌmá sú ꞌTan#chảu. 9 Phủ đaư hák báu#kin dú ꞌnéo ꞌnặn lỏ#pên ꞌsướng ꞌcốn ta ꞌpháng ꞌlẹo báu hên#săng, phủ ꞌnặn ꞌcọ ꞌlứm nả ꞌviạk Chảu Pua ꞌPhạ đảy dáng ꞌdóm báp ꞌsội hảư sau ꞌpẹk saư té cón#ꞌnặn.

10 ꞌPi ꞌnọng ꞌhặc ꞌpéng, ꞌsướng ꞌnặn hảư au chaư sáư ꞌsứa cáu kin dú ꞌnéo ꞌhụ#ꞌva Chảu Pua ꞌPhạ đảy ꞌhiạk au ꞌpi ꞌnọng kéng ꞌlưạk ꞌvạy pên dên ꞌpay ꞌTan chảu#ꞌtẹ, ꞌcọ ꞌchí ꞌlớng mẳn chaư ꞌchưa báu hảư#sia, 11 ꞌlẹo ꞌGiê‑ꞌsu ꞌKha‑ꞌlịt Chảu Chom phủ đảy ꞌchoi ꞌsúm ꞌháu ók khói sia báp ꞌsội ꞌnặn ꞌcọ ꞌchí ꞌmuôn ꞌmớng ꞌchốm tỏn ꞌháu khảu ꞌmá dú ꞌhôm ꞌngáu ꞌTan chảu téng đa ꞌmứa nả ꞌlới#ꞌlới.

ꞌQuám sắng ꞌtan Pê‑tô ꞌmưa ꞌnhắng ꞌcốn

12 ꞌPưa ꞌsướng ꞌnặn, ꞌpứng ꞌviạk ꞌvạu ꞌmá ꞌnị khỏi ꞌlớng tơn ꞌpi ꞌnọng#dú, ta#ꞌva ꞌpi ꞌnọng ꞌhụ chắc ꞌlẹo kéng mẳn chaư ꞌchưa ꞌluống ꞌtáng ꞌmen ꞌtẹ#ꞌnặn. 13 Cuông ꞌchớ khỏi ꞌnhắng#ꞌcốn, khỏi ꞌchọ tơn hảư ꞌpi ꞌnọng chứ ꞌviạk#ꞌnặn. 14 Khỏi ꞌhụ#ꞌlẹo ꞌsướng ꞌGiê‑ꞌsu ꞌKha‑ꞌlịt Chảu Chom ꞌsúm ꞌháu đảy bók hảư khỏi ꞌhụ#chẻng, báu#hơng kỉ lai khỏi ꞌchí ꞌváng ꞌmo ꞌkính ꞌnị#pay. 15 Khỏi ꞌchí au chaư sáư tơn ꞌpi ꞌnọng ꞌviạk ꞌvạu ꞌmá#ꞌnặn, ꞌchớ đaư khỏi mết ꞌchua#ꞌlẹo, ꞌpi ꞌnọng ꞌcọ ꞌchí ꞌlớng chứ nả ꞌviạk ꞌnặn#đảy.

ꞌTan Pê‑tô ꞌhụ hên phép ꞌquiến Chảu ꞌGiê‑ꞌsu

16 ꞌMưa ꞌchớ ꞌsúm khỏi hảư ꞌpi ꞌnọng ꞌhụ#ꞌva, ꞌGiê‑ꞌsu ꞌKha‑ꞌlịt Chảu Chom ꞌsúm ꞌháu ꞌmí phép nháư ꞌchí táo ꞌlống ꞌmá ꞌmướng#ꞌlum, ꞌsúm khỏi báu#đảy ꞌvạu ꞌtoi ꞌquám ꞌtố ꞌlạ đai ꞌsướng ꞌcốn lắc lem téng#ók. ꞌSúm khỏi pên chứng hên cắp#ta, ꞌTan chảu ꞌmí phép ꞌquiến nháư#luông. 17 Chảu Pua ꞌPhạ phủ pên ꞌPo hảư ꞌTan chảu đảy ꞌhung nả ꞌmá#ta, ꞌmưa ꞌchớ Chảu ꞌPo phủ nháư luông ꞌhung ꞌhướng ꞌvạu#ꞌva, “ꞌTan phủ ꞌnị lo pên ꞌLụk ꞌchái ꞌhặc sương khong#ꞌháu, phủ ꞌháu sôm chaư#lai.”* 18 Chảu tô ꞌsúm khỏi ꞌcọ đảy ꞌnghín sương pák ꞌlống ꞌmá té ꞌmướng ꞌphạ ꞌmưa ꞌchớ ꞌsúm khỏi đảy dú ꞌtoi ꞌTan chảu nẳng ꞌpú khết dăm#ꞌnặn.

19 ꞌPưa ꞌsướng ꞌnặn ꞌsúm khỏi chắng ꞌmí chaư ꞌchưa nẻn lai ꞌsứa cáu ꞌtoi ꞌquám ꞌlam páo Chảu Pua ꞌPhạ đảy tẻm ꞌchiến ꞌvạy#ꞌnặn. ꞌPi ꞌnọng au chaư sáư ép ꞌhiến ꞌcọ ꞌchí#đi, ꞌpứng ꞌquám ꞌnặn pên ꞌsướng ꞌlén ꞌhung sóng sáư bón#ꞌmựt, ꞌtạu ꞌhọt ꞌmự Chảu ꞌGiê‑ꞌsu ꞌlống#ꞌmá, báu#lák săng đao lắc ꞌmướng sóng seng ꞌhung khảu cuông chaư ꞌpi#ꞌnọng. 20 Cón#mết, hảư ꞌpi ꞌnọng#ꞌhụ, ꞌpứng ꞌquám đảy tẻm ꞌchiến ꞌvạy nẳng ꞌpặp ꞌchiến ꞌquám Chảu Pua ꞌPhạ#ꞌnặn, báu#ꞌmí phaư kẻ ók ꞌtoi chaư#chảu đảy. 21 ꞌQuám Chảu Pua ꞌPhạ đảy páo ók ꞌmá ꞌnặn báu#ꞌmen ꞌluống ngắm phủ ꞌcốn cá#đaư. Chảu Khuôn Saư ꞌchuốn chaư phủ ꞌcốn hảư ꞌvạu#ók, ꞌmen ꞌquám ꞌmá té Chảu Pua ꞌPhạ ꞌtẹ#lo.

*1:17 1:17 Bớng nẳng ꞌMặt‑ꞌthai 17:5.