Tai Dam Dô‑ꞌhăn 21

Chảu ꞌGiê‑ꞌsu ók hảư mốt ꞌtoi ꞌtáng ꞌTan chảu hên máư

1 Lăng ꞌpứng nả ꞌviạk ꞌnặn, Chảu ꞌGiê‑ꞌsu ók hảư mốt ꞌtoi ꞌtáng ꞌTan chảu hên máư nẳng nong luông Ti‑bê‑ꞌlia, pên ꞌsướng#ꞌnị:

2 ꞌMưa ꞌchớ ꞌnặn cuông mốt ꞌtoi ꞌtáng Chảu ꞌGiê‑ꞌsu ꞌmí chết ꞌcốn dú ꞌtoi căn#ꞌsướng:

ꞌTan ꞌSi‑ꞌmôn Pê‑tô

ꞌTan ꞌThô‑ꞌma (ꞌchư ꞌnọi khék Đi‑đim)

ꞌTan ꞌNa‑ꞌtha‑ꞌna‑ên ꞌtáy bản Ca‑ꞌna phén đin ꞌKha‑ꞌli‑ꞌlê

ꞌPứng ꞌlụk ꞌchái ꞌtan ꞌSê‑bê‑đai [ꞌchư Da‑cô‑bô kéng Dô‑ꞌhăn]

cắp song ꞌcốn máư phủ ꞌtoi ꞌtáng Chảu ꞌGiê‑ꞌsu ꞌcọ dú#hẳn.

3 ꞌSi‑ꞌmôn Pê‑tô bók sau#ꞌva, “Khỏi ꞌchí pay ha pa#ꞌnớ.”

Sau#tóp, “ꞌSúm ꞌháu pay ꞌtoi căn#ꞌnớ.”

Sau ꞌtếng#cá chắng au căn khảu ꞌhứa#pay, ꞌcứn ꞌnặn sau báu#đảy sắc#tô. 4 ꞌHung ꞌchạu#ꞌmá, hên Chảu ꞌGiê‑ꞌsu dưn dú ꞌhím#bốc, hák mốt sau báu#ꞌhụ chắc phủ ꞌnặn ꞌmen Chảu ꞌGiê‑ꞌsu. 5 ꞌTan chảu khék tham sau#ꞌva, “ꞌPứng ꞌnọng ꞌhặc#ꞌpéng, báu#đảy#a?”

Sau#tóp, “Báu#đảy cá#đaư.”

6 Chảu ꞌGiê‑ꞌsu chắng bók sau#ꞌva, “Hảư pếng ꞌmóng ꞌlống ꞌtáng khoa ꞌhứa ꞌlẹo hák ꞌchí#đảy.”

Sau chắng pếng ꞌmóng ꞌlống, pa ꞌdiến ꞌmá khảu ꞌmóng#lai, ꞌlạk ꞌmóng khửn ꞌhứa chao báu#đảy. 7 ꞌCốn ꞌtoi ꞌtáng phủ Chảu ꞌGiê‑ꞌsu ꞌhặc ꞌnặn chắng ꞌvạu sú Pê‑tô, “ꞌMen Chảu ꞌGiê‑ꞌsu ꞌnế.”

ꞌSi‑ꞌmôn Pê‑tô đảy ꞌnghín ꞌsướng ꞌnặn ꞌdiến au sửa ꞌmá ꞌhặng eo (ꞌpưa báu#ꞌnung sửa#ꞌhí), ꞌlẹo ꞌtéo ꞌlống ꞌnặm#pay. 8 ꞌPứng ꞌcốn ꞌtoi ꞌtáng ꞌTan chảu phủ ứn ꞌnặn ꞌnhắng dú nẳng ꞌhứa đảy au ꞌhứa khảu phắng ꞌtếng ꞌlạk ꞌmóng ꞌmí pa ꞌnặn ꞌmá#ꞌtoi. Sau báu#dú đắc ꞌhím bốc kỉ#lai, dáo hả síp ꞌvá#thôi. 9 ꞌMưa sau khửn bốc ꞌlẹo ꞌdiến hên ꞌmí cong ꞌpháy thán đang#mảy, ꞌmí pa kéng khảu béng tay#é. 10 Chảu ꞌGiê‑ꞌsu bók sau#ꞌva, “Au pa ꞌpứng ꞌnọng ꞌchọm cang đảy ꞌnặn ꞌmá kỉ tô é#ꞌnớ.”

11 ꞌSi‑ꞌmôn Pê‑tô ꞌcứn khảu ꞌhứa pay ꞌlạk ꞌmóng khửn#bốc. Đảy pa tô nháư ꞌtếng mết ꞌmí 153#tô. Pa ế ꞌcơ ꞌnặn ꞌmóng ꞌcọ báu#khát. 12 Chảu ꞌGiê‑ꞌsu bók sau#ꞌva, “ꞌPứng ꞌnọng ꞌmá kin khảu ꞌchạu#ꞌí.”

ꞌPứng ꞌcốn ꞌtoi ꞌtáng ꞌTan chảu báu#ꞌmí phaư dám tham ꞌTan chảu lỏ#phaư, ꞌpưa#ꞌva sau ꞌhụ chắc ꞌmen Chảu ꞌGiê‑ꞌsu ꞌlẹo. 13 ꞌTan chảu ꞌmá au khảu béng tay kéng pa chí păn hảư sau#kin. 14 ꞌMen ꞌtưa thứ#sam, Chảu ꞌGiê‑ꞌsu ók ꞌmá hảư mốt ꞌcốn ꞌtoi ꞌtáng ꞌTan chảu hên lăng ꞌmưa tai ꞌlẹo ꞌcứn ꞌhéng#ꞌmá.

Chảu ꞌGiê‑ꞌsu ổ cắp ꞌtan Pê‑tô

15 Kin khảu#ꞌlẹo, Chảu ꞌGiê‑ꞌsu chắng tham ꞌSi‑ꞌmôn Pê‑tô, “ꞌSi‑ꞌmôn ꞌlụk ꞌchái ꞌtan Dô‑ꞌhăn, ꞌnọng ꞌhặc ꞌháu lai ꞌsứa sau#báu?”

ꞌSi‑ꞌmôn Pê‑tô tóp, “ꞌMen#lo, ꞌchiếng ꞌTan chảu ꞌhụ ꞌlẹo, ꞌnọng ꞌhặc ꞌTan#chảu.”

Chảu ꞌGiê‑ꞌsu bók Pê‑tô ꞌva, “ꞌCoi ꞌliệng au phen ꞌdo ꞌnọi ꞌháu#ꞌnớ.”*

16 Chảu ꞌGiê‑ꞌsu tham ꞌSi‑ꞌmôn Pê‑tô ꞌtưa thứ#song, “ꞌSi‑ꞌmôn ꞌlụk ꞌchái ꞌtan Dô‑ꞌhăn, ꞌnọng ꞌhặc ꞌháu#báu?”

ꞌSi‑ꞌmôn Pê‑tô tóp, “ꞌMen#lo, ꞌchiếng ꞌTan chảu ꞌhụ ꞌlẹo, ꞌnọng ꞌhặc ꞌTan#chảu.”

Chảu ꞌGiê‑ꞌsu bók Pê‑tô ꞌva, “ꞌCoi ꞌlăm đu bớng ꞌdéng au phen ꞌdo ꞌháu#ꞌnớ.”

17 Chảu ꞌGiê‑ꞌsu tham ꞌSi‑ꞌmôn Pê‑tô ꞌtưa thứ sam, “ꞌSi‑ꞌmôn ꞌlụk ꞌchái ꞌtan Dô‑ꞌhăn, ꞌnọng ꞌhặc ꞌháu#báu?”

Pê‑tô ꞌnghín Chảu ꞌGiê‑ꞌsu tham chảu ꞌtưa thứ sam#ꞌva, “ꞌNọng ꞌhặc ꞌháu#báu,” ꞌdiến khổ chaư lỏ#tóp, “ꞌChiếng ꞌTan#chảu, ꞌTan hák ꞌhụ ꞌchu#ꞌnéo, ꞌcọ ꞌhụ chắc#ꞌva ꞌnọng ꞌhặc ꞌTan chảu#ꞌlẹo.”

Chảu ꞌGiê‑ꞌsu bók ꞌva, “ꞌCoi ꞌliệng au phen ꞌdo ꞌháu#ꞌnớ. 18 ꞌHáu ꞌvạu ꞌsư hảư ꞌnọng#ꞌhụ, ꞌmưa ꞌchớ ꞌnọng ꞌnhắng nóm ꞌcọ hák ꞌhặng sai eo#au, é pay cá đaư lỏ#pay. ꞌChớ thảu ꞌmá#ꞌlẹo, ꞌnọng ꞌchí ꞌnhó ꞌmứ khửn hảư phủ ứn ꞌhặng#hảư, ꞌlẹo au ꞌnọng pay bón báu#é#pay.”

19 Chảu ꞌGiê‑ꞌsu ꞌvạu ꞌsướng ꞌnặn, ꞌchị bók hảư Pê‑tô ꞌhụ#ꞌva, ꞌmắn ꞌchí tai ꞌnéo đaư ꞌpưa hảư ꞌchư siêng Chảu Pua ꞌPhạ đảy ꞌhung#ꞌhướng. ꞌLẹo Chảu ꞌGiê‑ꞌsu bók#ꞌva, “ꞌMá ꞌtoi ꞌháu#ꞌnớ.”

20 Pê‑tô ꞌngoại nả pay hên ꞌcốn ꞌtoi ꞌtáng phủ Chảu ꞌGiê‑ꞌsu ꞌhặc ꞌnặn ꞌmá ꞌtoi#lăng, (phủ đảy inh sáư ꞌTan chảu ꞌmưa sau đang kin ꞌléng cón ꞌTan chảu ꞌchí ꞌchọ pắt#ꞌnặn, tham nả ꞌviạk phaư ꞌchí phản ꞌTan#chảu). 21 Pê‑tô hên phủ Chảu ꞌGiê‑ꞌsu ꞌhặc ꞌnặn ꞌdiến tham, “ꞌChiếng ꞌTan#chảu, phủ ꞌtoi lăng ꞌmá ꞌnị lăng ꞌmá ꞌchí pên ꞌnéo#đaư?”

22 Chảu ꞌGiê‑ꞌsu tóp, “ꞌVa ꞌháu é hảư phủ ꞌnị ꞌnhắng ꞌtạu ꞌhọt ꞌchớ ꞌháu táo ꞌlống ꞌmá ꞌcọ báu#nuống ꞌpán ꞌhọt ꞌnọng#ꞌnệ. Hảư ꞌnọng ꞌmá ꞌtoi ꞌháu#ꞌnớ.”

23 ꞌPưa ꞌsướng ꞌnặn chắng ꞌmí ꞌquám tiếng pay ꞌtua ꞌpi ꞌnọng phủ ꞌchưa Chảu ꞌGiê‑ꞌsu, ꞌhiạk ꞌcốn ꞌtoi ꞌtáng phủ ꞌTan chảu ꞌhặc ꞌnặn ꞌchí báu#tai. Hák#ꞌva Chảu ꞌGiê‑ꞌsu báu#đảy ꞌvạu ꞌnéo#ꞌnặn, ꞌmí ꞌto#ꞌvạu, ꞌva ꞌTan chảu é hảư phủ ꞌnặn ꞌnhắng ꞌtạu ꞌhọt ꞌchớ táo ꞌlống ꞌmá ꞌcọ báu#nuống ꞌpán ꞌhọt Pê‑tô, ꞌvạu ꞌsịn#thôi. 24 Phủ ꞌnặn lo ꞌmen ꞌcốn ta hên ꞌmứ ꞌchị chắng đảy tẻm ꞌchiến ꞌpứng ꞌviạk ꞌvạu ꞌmá#ꞌnị. ꞌSúm khỏi ꞌhụ#ꞌva ꞌpứng ꞌviạk ꞌtan phủ pên chứng ꞌnị ꞌcọ ꞌmen#ꞌtẹ.

25 ꞌViạk Chảu ꞌGiê‑ꞌsu đảy ꞌdệt ꞌnặn ꞌnhắng ꞌmí lai#ꞌnéo, ꞌva ꞌchí tẻm ꞌvạy#mết, khỏi ngắm#ꞌva, ꞌtếng#cá phén đin ꞌmướng ꞌlum báu#ꞌmí bón ꞌpó ꞌvạy ꞌpứng ꞌpặp sư ꞌnặn#lo.

*21:15 21:15 Phen ꞌdo ꞌnọi ꞌnặn, kẻ ꞌva, ꞌpứng ꞌcốn ꞌtoi ꞌtáng Chảu ꞌGiê‑ꞌsu.