Tai Dam ꞌMặt‑ꞌthai 2

ꞌSáy ép ꞌhụ bươn đao sáo vảy ꞌháu Chảu ꞌGiê‑ꞌsu

1 ꞌChớ Chảu ꞌGiê‑ꞌsu ók nẳng ꞌmướng Bết‑ꞌlê‑ꞌhêm, phén đin Du‑đai pang pua ꞌHê‑ꞌlột, ꞌcọ ꞌmí mốt ꞌcốn dú ꞌtáng ꞌphượng ta ꞌvến#ók, pên ꞌsáy ép ꞌhụ ꞌmá ꞌtáng bớng bươn bớng#đao, ꞌtiếu ꞌtáng pay ꞌhọt ꞌmướng luông ꞌGiê‑ꞌlu‑ꞌsa‑ꞌlêm, 2 ꞌlẹo tham#ꞌva, “Chảu ꞌchái ꞌnọi phủ ók ꞌmá pên pua ꞌphắn ꞌcốn ꞌDiu ꞌnặn dú cá#đaư? ꞌSúm khỏi đảy hên đao mai thơng chảu ꞌchái ꞌhung khửn ꞌtáng ta ꞌvến#ók, ꞌsúm khỏi chắng ꞌmá sáo vảy ꞌháu ꞌtan#ꞌló.”

3 Pua ꞌHê‑ꞌlột đảy ꞌnghín ꞌsướng ꞌnặn, ꞌpọm ꞌtếng#cá dên ꞌpay nẳng ꞌmướng luông phaư ꞌcọ ꞌhọn ꞌhún ꞌtún#chaư. 4 Pua ꞌdiến khék ꞌpứng mo cốc cắp ꞌpứng ꞌsáy bók ꞌluột ꞌláng hảư ꞌphắn ꞌcốn ꞌDiu ꞌnặn ꞌmá#ꞌsúm, ꞌlẹo tham sau#ꞌva, “Chảu ꞌKha‑ꞌlịt [phủ ꞌchí ók ꞌmá pên pua ꞌphắn ꞌcốn ꞌDiu ꞌnặn] ꞌchí ók nẳng bón#đaư?”

5 Sau tóp ꞌva, “ꞌChí ók nẳng ꞌmướng Bết‑ꞌlê‑ꞌhêm, phén đin Du‑đai, ꞌpưa#ꞌva ꞌlam páo ꞌquám Chảu Pua ꞌPhạ té pang ꞌchạu ꞌnặn đảy tẻm ꞌchiến ꞌvạy#ꞌva:

6 ꞌMướng Bết‑ꞌlê‑ꞌhêm cuông phén đin Du‑đa

Bón ꞌnị ꞌcọ báu ꞌnọi nả sia ꞌpứng ꞌmướng luông cuông phén đin Du‑đa săng#ꞌná

ꞌDọn ꞌva ꞌmướng ꞌnị ꞌchí ꞌmí chảu phủ nháư ók ꞌmá

ꞌLăm đu ꞌcốn ꞌI‑ꞌsa‑ên dên ꞌpay Chảu Pua#ꞌPhạ.”

7 ꞌSướng ꞌnặn pua ꞌHê‑ꞌlột chắng ꞌlặc khék mốt ꞌsáy ép ꞌhụ bươn đao ꞌnặn#ꞌmá, ꞌlẹo đảy tham sau#ꞌva, “Đuông đao ꞌnặn hên ók ꞌchớ đaư#ꞌtẹ?” 8 ꞌMưa ꞌhụ ꞌlẹo pua ꞌcọ đảy bók sau pay cá ꞌmướng Bết‑ꞌlê‑ꞌhêm, sắng sau#ꞌva, “Pay sáo ha phủ ꞌnọi ꞌnặn hảư#ꞌkhặc, ꞌchớ sáo hên ꞌlẹo chắng ꞌcứn ꞌmá bók#ꞌháu, ꞌpưa ꞌháu ꞌcọ ꞌchí đảy pay vảy ꞌháu#ꞌtan.”

9 ꞌMưa sau ꞌnghín ꞌquám pua sắng ꞌlẹo ꞌcọ ꞌdiến ók#pay. ꞌChớ ꞌnặn đuông đao sau đảy hên ꞌtáng ta ꞌvến ók ꞌnặn ꞌdiến ók uôn ꞌtáng sau pay ꞌtặn ꞌhọt bón chảu ꞌchái ꞌnọi dú chắng#ꞌdặng. 10 Mốt sau hên đao ꞌsướng ꞌnặn ꞌcọ ꞌmuôn ꞌmớng#ꞌhêng. 11 ꞌMưa sau khảu cuông ꞌhướn ꞌcọ hên chảu ꞌchái ꞌnọi cắp phủ pên ꞌếm ꞌchư ꞌMa‑ꞌli‑a. Mốt sau chắng múp ꞌlống ꞌlạy chảu ꞌchái ꞌnọi#ꞌnặn. Sau khay ꞌhóm au khong quí ꞌpéng ók ꞌmá pên ꞌchương tỏn ꞌsướng#ꞌcắm, hương#hom, dang ꞌmạy#hom, ꞌmá vảy ꞌháu chảu ꞌchái#ꞌnọi. 12 Lăng ꞌnặn Chảu Pua ꞌPhạ bók mốt sau nẳng ꞌláng phăn#ꞌva, báu#hảư ꞌcứn ꞌmứa ha pua ꞌHê‑ꞌlột. ꞌSướng ꞌnặn sau chắng ꞌcứn ꞌmứa ꞌmướng sau ꞌtáng ứn#sia.

Au chảu ꞌchái pay ꞌsuôn ꞌvạy cá phén đin ꞌmướng Ê‑díp

13 ꞌMưa mốt ꞌsáy ép ꞌhụ bươn đao ók pay sia ꞌlẹo ꞌcọ ꞌmí tiên ꞌchạư chăm ꞌmứ Chảu Pua ꞌPhạ phủ pên Chảu Chom ók ꞌmá bók Dô‑ꞌsệp nẳng ꞌláng phăn#ꞌva, “Tứn#ꞌí, hảư ꞌphạo au chảu ꞌchái ꞌnọi kéng phủ pên ꞌếm chảu ꞌchái ꞌpai pay cá phén đin ꞌmướng Ê‑díp, ꞌlẹo hảư dú hẳn ꞌtạu ꞌhọt ꞌháu ꞌmá bók#máư, ꞌpưa pua ꞌHê‑ꞌlột đang ꞌchí sáo khả chảu ꞌchái ꞌnọi#sia.”

14 ꞌSướng ꞌnặn Dô‑ꞌsệp chắng tứn#khửn, ꞌpá ꞌme ꞌlụk chảu ꞌchái ók pay cuông ꞌcứn#ꞌnặn, pay cá phén đin ꞌmướng Ê‑díp, 15 ꞌlẹo ꞌcọ đảy dú hẳn ꞌtạu pua ꞌHê‑ꞌlột tai. ꞌSướng#ꞌnặn, ꞌpưa hảư hên pên ók ꞌtoi ꞌquám Chảu Pua ꞌPhạ phủ pên Chảu Chom hảư ꞌlam páo ꞌquám ꞌTan chảu đảy ꞌvạu ꞌvạy cón ꞌnặn#ꞌva, “Chảu Pua ꞌPhạ bók hảư ꞌlụk ꞌchái ꞌTan chảu ók khói sia phén đin ꞌmướng Ê‑díp.”

16 ꞌSướng ꞌnặn, pua ꞌHê‑ꞌlột ꞌhụ chắc mốt ꞌsáy ép ꞌhụ bươn đao ꞌnặn ꞌlứa#chảu, ꞌcọ ꞌdiến pút nhay#lai, [ꞌpưa é khả chảu ꞌchái ꞌnọi ꞌnặn hák pua báu#ꞌhụ ꞌmen phủ#đaư]. Pua chắng sắng hảư ꞌcốn pay khả đếc ꞌnọi phủ ꞌchái nẳng phổng ꞌlố ꞌmướng Bết‑ꞌlê‑ꞌhêm ꞌnặn sia#mết, ꞌnặp té đếc ꞌnọi phủ ꞌchái tuổi song pi ꞌlống#ꞌmá, ꞌmen ꞌchọp ꞌchớ ꞌmự bươn pua ꞌhụ nẳng mốt ꞌsáy ép ꞌhụ bươn đao#ꞌnặn. 17 ꞌSướng#ꞌnặn, chắng hên pên ók ꞌtoi ꞌquám Chảu Pua ꞌPhạ hảư pú ꞌGiê‑ꞌhêm‑da pang ꞌchạu phủ pên ꞌlam páo ꞌquám ꞌTan chảu đảy ꞌvạu ꞌvạy cón ꞌnặn#ꞌva:

18 Đảy ꞌnghín sương khék hảy chốm ꞌcháng khí khôm cuông bản ꞌLa‑ꞌma

ꞌSướng ꞌnáng ꞌLa‑ꞌsên hảy ha ꞌlụk ꞌnọi chảu

ꞌNáng báu ꞌphắng ꞌquám ún ꞌphướn ꞌsướng#đaư, ꞌpộ ꞌlụk chảu báu#ꞌmí sia#ꞌlẹo.

19 Tó ꞌmá, pua ꞌHê‑ꞌlột tai#ꞌlẹo, Dô‑ꞌsệp ꞌnhắng dú nẳng phén đin ꞌmướng Ê‑díp ꞌnặn, ꞌcọ hên tiên ꞌchạư chăm ꞌmứ Chảu Pua ꞌPhạ phủ pên Chảu#Chom, ꞌmá bók nẳng ꞌláng phăn#ꞌva, 20 “Tứn khửn au chảu ꞌchái ꞌnọi kéng phủ pên ꞌếm chảu ꞌchái ꞌcứn ꞌmứa phén đin ꞌmướng ꞌI‑ꞌsa‑ên ꞌnớ, phủ é khả chảu ꞌchái ꞌnọi ꞌnặn tai ꞌlẹo#lo.”

21 ꞌSướng ꞌnặn Dô‑ꞌsệp chắng tứn#khửn, ꞌpá ꞌme ꞌlụk chảu ꞌchái ꞌcứn ꞌmứa ꞌhọt phén đin ꞌmướng ꞌI‑ꞌsa‑ên. 22 Hák đảy ꞌnghín kháo#ꞌva, ꞌtan ꞌA‑ꞌkhê‑ꞌlao dú phén đin Du‑đai đảy khửn ꞌnăng ꞌmướng sứp pua ꞌHê‑ꞌlột phủ pên#ꞌpo. Dô‑ꞌsệp ꞌcọ#dản, chắng báu#é pay phén đin Du‑đai ꞌnặn. Chảu Pua ꞌPhạ tơn ꞌtan nẳng ꞌláng phăn#máư, ꞌtan chắng ꞌpá ꞌme ꞌlụk chảu ꞌchái pay cá phén đin ꞌKha‑ꞌli‑ꞌlê, 23 pay dú ꞌmướng#ꞌnưng ꞌchư ꞌNa‑ꞌsa‑ꞌlệt. ꞌSướng ꞌnặn ꞌcọ hên pên ók ꞌtoi ꞌquám Chảu Pua ꞌPhạ hảư ꞌlam páo ꞌquám ꞌTan chảu đảy ꞌvạu ꞌvạy cón ꞌnặn#ꞌva, ꞌcốn ꞌtếng lai ꞌcọ ꞌchí khék ꞌtan pên ꞌcốn ꞌmướng ꞌNa‑ꞌsa‑ꞌlệt.