Tai Dam ꞌMặt‑ꞌthai 28

Chảu ꞌGiê‑ꞌsu ꞌcứn ꞌhéng ꞌmá

1 Lăng ꞌmự ꞌdặng ꞌcắm* ꞌlẹo ꞌhung ꞌchạu ꞌmự chủ#ꞌnhợt, ꞌnáng ꞌMa‑ꞌli‑a ꞌcốn bản ꞌMặc‑đa‑ꞌla cắp ꞌnáng ꞌMa‑ꞌli‑a ứn ꞌnặn au căn pay bớng thẳm bón pốc ꞌmiện Chảu ꞌGiê‑ꞌsu. 2 Cuông ꞌchớ ꞌnặn ꞌmí phén đin nưng#ꞌhéng, ꞌpưa#ꞌva tiên ꞌchạư chăm ꞌmứ Chảu Pua ꞌPhạ phủ pên Chảu Chom ꞌnặn ꞌlống ꞌmá té ꞌmướng#ꞌphạ, pay kỉnh tón đán hắp pák thẳm ꞌnặn ók sia ꞌlẹo ꞌnăng dú ꞌtếng tón đán#ꞌnặn. 3 Tiên ꞌchạư phủ ꞌnị ꞌhung lưởn ꞌsướng ꞌphạ pa‑láp lưởm, ꞌchương ꞌnung ꞌcọ đón lưởn ꞌsướng#ꞌven. 4 Mốt lính các pák thẳm ꞌnặn ꞌcọ dản sắn lai ꞌdiến tai#ꞌsống. 5 Tiên ꞌchạư ꞌvạu sú song phủ ꞌnhính ꞌnặn#ꞌva, “ꞌNhá dản săng#ꞌnớ. Khỏi ꞌhụ ꞌpứng chảu ꞌmá sáo Chảu ꞌGiê‑ꞌsu phủ ꞌchọ tók ꞌneng lếc sáư ꞌtếng ꞌmạy tháng khen#ꞌnặn. 6 ꞌTan chảu báu#dú nỉ cá#đaư. ꞌTan chảu ꞌcứn ꞌhéng ꞌmá ꞌlẹo ꞌsướng ꞌTan đảy ꞌvạu ꞌvạy#cón. ꞌMá bớng#ꞌí, bón ꞌnị lo bón ꞌmiện khon ꞌTan chảu#ꞌná. 7 Hảư ꞌpứng chảu ꞌcứn ꞌmứa ꞌvắn ꞌvắn, bók mốt ꞌcốn ꞌtoi ꞌtáng ꞌTan chảu ꞌhụ#ꞌva, ꞌTan chảu ꞌcứn ꞌhéng ꞌmá#ꞌlẹo, ꞌchí pay cá phén đin ꞌKha‑ꞌli‑ꞌlê cón#sau, ꞌlẹo ꞌchí hên ꞌTan chảu dú#hẳn. Hảư chứ ꞌtoi ꞌquám khỏi bók#ꞌnớ.”

8 Tiên ꞌchạư bók ꞌsướng ꞌnặn ꞌlẹo, song phủ ꞌnhính chắng ꞌphạo ók pay sia thẳm#đán, ꞌtếng dản ꞌtếng ꞌmuôn ꞌmớng#lai, ꞌlen pay bók mốt ꞌcốn ꞌtoi ꞌtáng Chảu ꞌGiê‑ꞌsu ꞌhụ. 9 ꞌChớ song phủ ꞌnhính đang pay ꞌnặn Chảu ꞌGiê‑ꞌsu đảy ꞌmá ꞌpọ sau#ꞌva, “ꞌChốm ꞌmuôn ꞌpứng#ꞌnọng.” Sau ꞌdiến au căn ꞌmá ꞌlạy ꞌlống khắm tin ꞌTan#chảu. 10 ꞌLẹo Chảu ꞌGiê‑ꞌsu bók sau#ꞌva, “ꞌPứng ꞌnọng ꞌnhá dản săng#ꞌnớ. Pay bók ꞌpứng ꞌpi ꞌnọng ꞌtoi ꞌtáng ꞌháu ꞌnặn pay cá phén đin ꞌKha‑ꞌli‑ꞌlê, ꞌchí hên ꞌháu dú#hẳn.”

Bók hảư lính ꞌvạu bẻo

11 ꞌChớ song phủ ꞌnhính đang pay ha mốt ꞌtoi ꞌtáng Chảu ꞌGiê‑ꞌsu, mốt lính các pák thẳm ꞌnặn ꞌmí ꞌsán ꞌcốn khảu pay cuông ꞌmướng ꞌGiê‑ꞌlu‑ꞌsa‑ꞌlêm, ꞌtố sú ꞌpứng mo cốc ꞌhụ ꞌchu ꞌnéo nả ꞌviạk pên ók#ꞌnặn. 12 ꞌPứng mo cốc chắng ꞌsúm cắp mốt thảu ké bản#ꞌmướng, sô ꞌván căn ꞌlẹo ꞌcọ au ꞌngớn ꞌmá hảư mốt lính các lai#măn, 13 ꞌlẹo bók hảư sau ꞌvạu bẻo#ꞌva, ꞌchớ ꞌtếng#ꞌcứn, đang ꞌnón lắp#dú, mốt ꞌtoi ꞌtáng ꞌGiê‑ꞌsu ꞌmá ꞌlặc au khon pay#sia. 14 ꞌVa ꞌviạk ꞌnặn quan tỉnh#ꞌhụ, ꞌsúm phu hák ꞌchí kẻ khay cắp#quan, báu#hảư lo dản#săng.

15 Mốt lính đảy ꞌngớn ꞌlẹo ꞌcọ pay ꞌvạu bẻo ꞌtoi ꞌquám mo cốc#bók. ꞌQuám bẻo ꞌnặn chắng tiếng ꞌsa pay ꞌhọt ꞌpứng ꞌcốn ꞌDiu ꞌmá ꞌtạu#ꞌkhạy.

Chảu ꞌGiê‑ꞌsu sắng hảư ók pay bók son ꞌchu ꞌphắn ꞌcốn

16 Mốt síp ết ꞌcốn ꞌtoi ꞌtáng Chảu ꞌGiê‑ꞌsu ꞌnặn au căn pay cá phén đin ꞌKha‑ꞌli‑ꞌlê ꞌhọt ꞌpú bón ꞌTan chảu bók hảư pay ꞌpọ#ꞌnặn. 17 ꞌMưa ꞌchớ sau ꞌlé hên Chảu ꞌGiê‑ꞌsu sau ꞌcọ au căn ꞌlạy vảy#ꞌháu, hák#ꞌva ꞌmí ꞌsán ꞌcốn ꞌnhắng hướng ꞌngớ#ꞌva báu#ꞌmen Chảu ꞌGiê‑ꞌsu. 18 Chảu ꞌGiê‑ꞌsu chắng ꞌmá sắng sau#ꞌva, “ꞌQuiến phép ꞌtếng mết nẳng ꞌmướng ꞌphạ ꞌmướng ꞌlum Chảu Pua ꞌPhạ ꞌcọ dao hảư ꞌháu#ꞌlẹo. 19 ꞌSướng ꞌnặn hảư ꞌpứng ꞌnọng ók pay bók son ꞌchu ꞌphắn ꞌcốn hảư sau ꞌhụ ꞌtoi ꞌtáng#ꞌháu. ꞌDệt ꞌhịt bắp‑ti‑sa‑ꞌma hảư sau ꞌtoi ꞌchư siêng Chảu#ꞌPo, Chảu ꞌLụk cắp Chảu Khuôn#Saư. 20 Bók hảư sau ꞌdệt ꞌtoi ꞌchu ꞌquám ꞌháu đảy bók ꞌpứng ꞌnọng ꞌmá#ꞌnặn. ꞌLẹo ꞌháu ꞌcọ ꞌlớng ꞌlớng dú cắp ꞌnặp pheng ꞌpứng ꞌnọng ꞌtạu ꞌhọt ꞌkháo lả sút pang#ꞌnị.”

*28:1 28:1 ꞌToi ꞌluột ꞌláng ꞌcốn ꞌDiu, ꞌmự ꞌdặng ꞌcắm lỏ ꞌmen ꞌmự thứ#bảy.