Zems
Agau e nugau zebigeg
Agau e Zems nug sikut weun. Dudu asiu agal dabeleu Zems go Yesus nugau amag pet. Zems go Kristen duailel Zerusalem ban uzan darem agal gumaraneu du banou. Duailel ipal ag agal oiagab Yesus en petak emen ag uhu oimai, uminaimai, emgasag gasag beu beu betei daremenin. Zems go duailel go sikut wai mareun. Go Kristen duailel ein igul naliu mabun en sikut weun.
Agau e sesamorabun en ze
1:1 Zems nug duailel ‘Amban’ awareun.
1:2-8 Ig uhu oi amam, bo, igual oigeb selai mui daimai, igual oigeb Yesus en petak emun go gusig mai dab.
1:9-11 Ecesab asiu a dudu mui, dudu ecesab tamacag mui, agal ze.
1:12-18 Ig Satan nug bimaig piba, igul eg i mab.
1:19-27 Ig Uwait nugau ze gaul i duab. Ig gonugau ze doimai, sesamoraimai, salau murab.
2:1-13 Ag dudu ipal agal iweiu uligaimai, go dudu egeg ta, naliu ta, i awaran.
2:14-26 Igual oigeb Yesus en petak aimai, gaul i dab. Igual oigeb petak aimai, dudu ipal abai marabun salau naliu mab.
3:1-18 Ig igual minomig suban gumab.
4:1–5:6 Ig em e ebuan igul eg unum utab. Guzenaimai, awau dabun igul tutak sesamorab.
5:7-20 Ig uhu oimai, subantal gusig tapai daimai, Uwait nug aurai dab.
1
O zaiar, iz Zems, Uwait mui igual Dubanou Ban, Yesus Kristus mui goagal salau du nug, ag Israel duailel emgasag beu beu bitei daremen sikut wai marem.
Uhu wabun igul.
O izal zaiar, ag uhu asiu oiban, oiagab eg i umau, agal oiagab siksikai mui, damau. Einen, ag abiu uhu go agal oiagab Yesus en petak emen patai uligaraba, ag gusig tapai dabun umamen. Gonun, ag umkoskos gusig tapai dan. Go igul ag ibalagab gusig zumau, ag suban damamen. Gonun, Uwait nugau igul ag ibalagab i wagemamau. Tam pet tam, agal igul naliu banou usalaimai, Uwait nugau igul unum sesamoramamen.
Bo, duair in ag ula go dabeleu naliu tam, go Uwait nug dabeleu naliu go murabun auraba, Uwait nugtal go muramau, einen, Uwait nug duailel agal igul i sisiaramau, go duailel unum ougab siksikai mui gaul maraneu. Bo, go Uwait nug ein ece murabun auraimai, gonugau dabeleu aliag i mamau, go gonugau ougab petak mui eiman auramau. Duair in go dabeleu aliag mui eiman auraneu, go a ebeg wol nug pataraneu sul guzenaneu. 7-8 Guzenai duair gonugau dabeleu aliag dareu, go ein igul macaneun du go gusig tapai i daneu. Gonun, go ece tub Uwait ebuan wabun i dabilamau.
Du in go ecesab asiu tamacag, go siksikamau, einen, Uwait nugau ameg ebu go wanib mui. 10 Bo, du tub go ecesab asiu mui, Uwait nug gonugau wanib naliu go wanib gaul pet abai muraba, go siksikamau. Einen, go a sisil sul duliamau. 11 Am banou zuba, gonugau wes a musib pataba, iweiu naliu duliaimai, zilagai noimai, eg waneu. Go sul, ecesab asiu mui du han salau mai damau ziwas ebu a sisil guzenaneu sul guzenamau.
12 Du in uhu tub go ebu zuba, gusig tapai daneu go siksikamau. Go uhu unum etuboroimai, Uwait nug dorog muzmuz awau dabun gusig muramau. Duair in Uwait en ougab nug noumaneu, Uwait nug ece naliu go murai aneun. 13 Bo, du in igul eg mabun ougab asaimai, gonugau dabeleu, ‘Uwait nug igul eg go mabun bimai peu’ aimai i ze mamau. Uwait go igul eg mabun i bimaig pianeu. Tam pet tam, igul eg nug Uwait bimag piabun iborain tam. Kolital, Uwait nug du tub igul eg mabun bimag i pimau. 14 Bo, ig tutak tutak igual dabeleu eg nug igul eg mabun bimaig pina, igul eg manem. 15 Igul eg mabun dabeleu go ig bimaig pina, igul eg mina, igul eg go banou usalina, igual doropig noumamam.
16 O izal zaiar, dudu ipal agen polumarebi, ag dabeleu eg i wan. 17 Ece naliu mui, igul naliu unum wanem go igual memenig Uwait nug eiman gaul alaneu, gonugtal al emes wag darem usalareun. Go umkoskos gusig tapai daneu, go am saum banou maimai, ginampet macaneu sul tam, go umkoskos guzental dacaneu. 18 Uwait nugtal gonugau dabeleu eiman, igual memenig usaleun. Gonugau petak ze eiman, ig ee ug amegai useg macaneu sul tapai migabun migeun. Ece ipal unum go usalareun iguan zilacaranem.
Ze suban doimai, salau man.
19 O izal zaiar, ag go suban abiu macan. Ag unum, dudu ipal agal ze suban doiban, ag pigai ze koli i awaran. Ag pigai i aiag sisilamau. 20 Du in go pigai aigsisilaneu du, go Uwait nugau igul naliu i sesamoraneu. 21 Gonun, wal igul mui, igul eg ipal macanemen go utan. Ag agtal agal wanimag banou uteiban, Uwait nug ze go agal oiagab oug mareun gusig patan. Ze gonug agal doropag imaraimai, kasarabun iboin.
22 Ag Uwait nugau ze gaul i don. Ag ze doimai, ‘Ig du naliu darem’ aimai i poluman. Gonugau ze doiban, sesamoran. 23 Einen, du in go Uwait nugau ze doimai, i sesamoraneu go du iror oimai, gonugau siameg pianeu sul. 24 Go gonugau siameg iror ebu uligaimai, utei beteimai, gonugau siameg ein sul uligeun, go pigai dabug sikaneu. 25 Bo, ig Uwait nugau kasai ze suban sesamoremun, igul eg nug go koli gusig i gumigamau. Gonun, duair in go kasai ze go sesamorabun umkoskos suban nanalaimai, go gaul doimai, i dabug sikaneu, go ze go sesamoraneu, gonun, Uwait nug gonugau igul uligaimai, gonugau salau macaneu naliu abu kalai muramau.
26 Bo, du tub nug Yesus en ougab petak aimai, enaneu, ‘Iz umkoskos zobu pianem’ bo, du go gonugau ogusau suban i gumaneu, gonugau ogusau eiman ze gaul gaul macaneu. Du go gue nugtal nug polumuraneu. Uwait nugau ameg ebu go zobu gaul pianeu. 27 Bo, du in go Yesus en ougab petak aimai, igul naliu mui, aunagul mui, wab ailel uhu a mui, isanaraimai, em e ebuan igul eg i sesamoraneu, Uwait igual memenig du go gonugau ameg ebu gonugau ougab petak eun araog moroimai, go ze tamacag, go du naliu auramau.