Fǔoŋ ŋwaʼaŋlɨ chɔshi
Teshalonika
Kāoŋ nu pa thɔ nnu
Chɔshi Teshalonika ni mbhī Pɔɔ. Fɛ̀ʼi ni ŋgū moŋ chɔshi yei llɔ mbhɔ pa ŋgwa Juu haʼaŋ pugu ni ŋgɨ̄ʼə fàʼa Pɔɔ, ŋa a ni ŋgə̄ɨ nu shhɨ shiʼi shɨna pa ŋgwa taoŋ nduoŋ haʼaŋ pugu ni nchhɔ ŋkhwā nnu Minnwi pa ŋgwa Juu nɛ. Nthɛ fɛ̀ʼi yei, Pɔɔ lɔllɔ Teshalonika ŋgə̄ɨ Bɛria. A ni ŋga ndaʼa Pɔɔ ghə̄ɨ Koriŋ, Timoti shwei vi ŋkwaŋ haʼaŋ pa nnu ni nyīeŋ nu Teshalonika nɛ, nnɛ Pɔɔ nāʼaŋ ŋwaʼaŋlɨ nɔ māʼaŋ nu ghrɨ́ ndɔ mfɛ tɨnɨnjuʼɔ ni pa ghaŋ piŋ fɔ.
Pɔɔ tōo Minnwi nthɛ piŋ yugu pugu pa khwǎ yugu, ndɔ ŋkwiŋ vugu ni ŋkwaŋ chɔmbhi ŋa a ni nchhɔ nu ndɨɨ ŋa pugu pugu ni mbɔ kaʼa nɛ ndɔ ŋkhwɛ̄ pa píe ŋa a ni ndɔllɔ moŋ chɔshi ghɔ nthɛ nnu mbra thɔ nu Krishto nɛ. Chɔshi yei ni mfāʼo khuthɔ ni nnu ŋa a shi mbɔ ni ŋgwa pɛ ŋa pugu khu ŋkaoŋ Jishɔ maa mbɨnɨ nthɔ nɛ, pugu pa ŋa Jishɔ shi mbɨnɨ nthɔ pi ndɨɨ khɔ. Pɔɔ ŋkhwɛ̄ pa nnu pei kiʼɛ ndɔ nchhu ni pugu ŋa pugu ghə̄ɨ shhɨ nchhɔ fāʼa pa fàʼa pugu ndɔ njwɛrɛ mbra thɔ nu Jishɔ moŋ kwàʼa.
1
Chrà ŋa pi māʼaŋ ni chɔshi Teshalonika
1 Ŋwaʼaŋlɨ yei llɔ mbhɔ mu Pɔɔ, ni Shaila* 1:1 Pi pɨnɨ mɛ̄iŋ vi ni Shivanu., ni Timoti. Pigi nāʼaŋ mfɛ ni chɔshi Teshalonika, mbɔ ŋgwa Minnwi Tǎa pugu Jishɔ Krishto mbɔ Taathɔ. Pwapuŋ Minnwi pugu ghɨghrɨ yi pɔ mbɨŋ pəɨ.
Fɨʼɨ piŋ haʼaŋ ŋgwa Teshalonika fāʼo nɛ
2 Pigi ghà ŋguʼɔ ntōo Minnwi ŋguoŋ ndɨɨ nthɛ vəɨ ghao. Nduoŋ Minnwi ni pəɨ ŋguoŋ ndɨɨ moŋ pa luoŋ yigi, 3 nchhɔ ŋkwiŋ fàʼa yəɨ ŋa piŋ yəɨ chwīe pəɨ fāʼa nɛ, pugu pa ŋkwaŋ haʼaŋ khwǎ yəɨ mbɨŋ Jishɔ chwīe pəɨ fāʼa ki jwɛ nɛ, pugu pa ŋkwaŋ haʼaŋ pəɨ tīi shii nthɛ kwàʼa mbɨŋ Taathɔ, mbɔ Jishɔ Krishto shhɨ Minnwi via ndɔ mbɔ Tǎa via nɛ.
4 Pa lǐŋ paŋ ŋa Minnwi khwā nɛ, pigi ji ŋa Minnwi chuʼɔ vəɨ 5 nthɛ ŋa pwa pishaʼakhɔ ŋa pigi ni nchīi ni pəɨ shini ndɔ ŋguʼɔ mbɔ ni chrà təʼɨ vi, a ni nthɔ moŋ ghrɨ́ Jijwɛ Minnwi, pugu pa ŋkiɛŋ tɨnɨnjuʼɔ ŋa ŋkɨ̀nɨ ghɔ pɔ pi nnu shini, wuʼɔ nɔ haʼaŋ pəɨ ji ŋkwaŋ haʼaŋ pigi ni nchhɔ chɔmbhi yigi ndɨɨ ŋa pia ni mbɔ kaʼa nɛ, a ni mbɔ nthɛ pi yəɨ shiʼi. 6 Pəɨ ni mbīni vigi mbɨnɨ mbīni Taathɔ nthɛ ŋa pəɨ ni mbiŋ chrà Minnwi ni pwanjuʼɔ llɔ mbhɔ Jijwɛ Minnwi moŋ ntou ŋgəʼɨ. 7 Nnɛ pəɨ pɔ nɔ pa lì ni ŋguoŋ ghaŋ piŋ ghao moŋ Mashedonia pugu pa moŋ Akaya.
8 Nthɛ ŋa ŋkɨ̀nɨ Taathɔ lɔ ŋguʼɔ ntaoŋ mbhɔ pəɨ nyīeŋ pi moŋ Mashedonia pugu Akaya, ndɔ moŋ ŋguoŋ lɨʼɨ ghao, ŋgwa thɔ njaʼo ŋkwaŋ fɨʼɨ piŋ ŋa pəɨ fāʼo mbɨŋ Minnwi nɛ, nnɛ, pigi lɔ nuʼuŋ ndɔ mfāʼo nɔ chrà nu sheshe nnu. 9 Nthɛ ŋa pugu nduthɔ yugu fɨ̄ʼɨ fɨʼɨ ŋkwaŋ haʼaŋ pəɨ ni ntuo vigi shiʼi nɛ. Pugu ni mbɨnɨ mfɨ̄ʼɨ ŋkwaŋ haʼaŋ pəɨ ni ŋkara njəɨ Minnwi, llɔ ŋkuoŋ ghaʼo nu pa nnwi, nɔ fāʼa nu mbhɔ Minnwi maoŋ ndɔ mbɔ Minnwi nnu shini nɛ, 10 nɔ ywɛrɛ nu Muuŋ vi llɔ po. Muuŋ vi yei Jishɔ ŋa a ni ŋkuʼɔ ni ju moŋ gu, mbɔ ju ŋa a kwe via moŋ pɨgɨtua Minnwi ŋa a shi nthɔ nɛ.