Mbra ŋwaʼaŋlɨ
Pita
Kāoŋ nu pa thɔ nnu
Ŋwaʼaŋlɨ yei nāʼaŋ Pita mfɛ ni pa ntou pichəɨ pa ghaŋ piŋ llɛshhɨ. Pita ni ndɔ̄gɔ nthi mi nɔ taʼa ŋoŋ ŋa pugu Jishɔ ni mbɔ ndɨɨ ŋa Jishɔ ni fāʼa nu nɛ, nɔ nāʼaŋ nu ŋkwiŋ pa ghaŋ piŋ ni pa nnu haʼaŋ pi ni njɛʼi vugu nɔ ghɔ nɛ.
Pa njəɨlɨʼɨ mifɨɨ ni nthɔ nchhu nu ŋa nɔ haʼaŋ Jishɔ lɔ naa nthɔ nɛ, mbaʼa a shi nuʼuŋ mbɨnɨ nthɔ. Pugu shini ndɔ mbīʼi ŋa llɛmbhi sháʼa thɔ nu, nnɛ paʼa ndɔ nchhɔ chɔmbhi yugu moŋ shɨ̄gao mbhɔ. Pita nāʼaŋ nthɔ nchhu nu ŋa wuʼɔ nɔ haʼaŋ ju nduthɔ yi ni njəɨ ndighaʼo Jishɔ ŋkuoŋ mbra nɛ, a nɔ haʼaŋ shesheŋoŋ shi njəɨ ndɨɨ ŋa Jishɔ shi mbɨnɨ nthɔ nɛ. Pita shrā ntɨ́gɨ pa masha mifɨɨ páa, ndɔ nāʼaŋ njɔ́ ŋa Minnwi shi mfɛ ni pugu nɛ.
Pita nōoŋ ŋa nnu ŋa a chwīe pɨ̄nɨ nu Jishɔ yīri nɛ pɔ ŋa ŋgwa pāʼa ŋkǔnu yugu ni phɨ. Pa ghaŋ piŋ fāʼo nɔ chhɔ nu chɔmbhi shishiʼi ŋa a lɨnaoŋ ni kwàʼa nɔ haʼaŋ pugu chhɔ njwɛrɛ po fhi pugu shhɛ fhi llɔ mbhɔ Minnwi mbhɔ lɨʼɨ ŋa ndɨndɨ pɔ nɛ.
1
Māʼaŋ nu chrà
1 Ŋwaʼaŋlɨ yei llɔ mbhɔ mu Shemu Pita, mbɔ muuŋ fàʼa, ndɔ mbɨnɨ mbɔ ŋgaŋ ntaoŋ Jishɔ Krishto ŋgə̄ɨ nu ni pəɨ ŋa pəɨ fāʼo piŋ ŋa a taʼa ŋkwaŋ pugu pa yigi ntɔgɔ pi ŋkuoŋ ndɨndɨ Minnwi via ndɔ mbɔ ŋkwe via, Jishɔ Krishto nɛ.
2 Ǹduoŋ ŋa Minnwi pīgi pwapuŋ yi pugu pa ghɨghrɨ yi ni pəɨ moŋ ji nu vi pugu pa Jishɔ Taathɔ via.
Ŋkwaŋ haʼaŋ ghaŋ piŋ fāʼo nɔ chhɔ nu chɔmbhi yugu nɛ
3 Ntɔgɔ pi ŋkuoŋ njɨ yi nɔ Minnwi, a fɛ ŋguoŋ yaoŋ ŋa a pie ŋa pia fāʼo nɔ chhɔ nu chɔmbhi pɔgɔ Minnwi. Pia fāʼo ŋguoŋ maoŋ pei ghao ntɔgɔ pi ŋkuoŋ ji nu mi, mbɔ ju yɛ ŋa a gɛ̄ via ŋa pia thɔ njəɨ vi ntɔgɔ pi ŋkuoŋ ndighaʼo yi pugu pa mbha nnu shiʼi. 4 Ntɔgɔ pi moŋ yei shɛndaoŋ, a fɛ pa mbwa kàʼa pugu pa kàʼa liɛŋ ni pia, nnɛ ŋa ŋkie ŋkuoŋ pa kàʼa pighɔ minthɛ pəɨ tei pɨrɨ nu ŋa a pɔ moŋ mbhi nthɛ khwǎ phɨ nɛ, mfāʼo púoŋ ŋa a pɔ nɔ yi Minnwi.
5 Nthɛ yei nnu, paʼo ni ŋguoŋ ghrɨ́ yɔ ghao nɔ pīgi nu mbha nnu shiʼi ŋkuoŋ piŋ, ŋkuoŋ mbha nnu shiʼi yɔ pīgi ji nu nnu, 6 ŋkuoŋ ghɔ pīgi wɛ̄iŋ noŋ, ŋkuoŋ wɛ̄iŋ noŋ pīgi tiishii, ŋkuoŋ tiishii pīgi pɔgɔ Minnwi, 7 ŋkuoŋ pɔgɔ Minnwi pīgi khwǎ moŋ piŋ, ŋkuoŋ khwǎ moŋ nda piŋ pīgi khwǎ ŋguoŋ ŋgwa.
8 Nthɛ ŋa p̈əɨ mfāʼo pa mbha nnu pei ndɔ ŋkuʼɔ moŋ ghɔ mbīgi ŋgə̄ɨ shhɨ, kaŋ pəɨ shi nji Taathɔ via mbɔ Jishɔ Krishto moŋ shɛndaoŋ ŋa a shi nchwīe pəɨ fāʼa shishiʼi ndɔ njuŋ ntíɛŋ nɛ. 9 Nthɛ ŋa shesheŋoŋ ŋa a pou pa mbha nnu pei nɛ, ligi yi thɔ nchri nu ti nchəɨŋ moŋ nthɨŋkwo ŋa a lɔ nuʼuŋ njəɨ lɨʼɨ, ŋkwo līʼɛ ŋkwaŋ haʼaŋ pi shɨ̄gao vi moŋ pa phɨ ŋa a ni mbɔ moŋ ghɔ nɛ.
10 Nthɛ yie ghɔ ma pa lǐŋ paŋ, p̂əɨ ya mbaʼo nɔ nōoŋ nu ŋa Minnwi gɛ̄ vəɨ ndɔ nchuʼɔ vəɨ nɔ ŋgwa pi shini, nthɛ ŋa p̈əɨ nchwīe pa nnu pei, paʼa pəɨ lɔ ma ŋgū moŋ piŋ yəɨ. 11 Nthɛ ŋa moŋ yei shɛndaoŋ, pi shi mfɛ ghrɨ́ ni pia nɔ nii nu moŋ Shaʼafuoŋ ki ndugwi yi, mbɔ yi Taathɔ ndɔ mbɔ ŋkwe via, Jishɔ Krishto.
12 Nthɛ yie ghɔ, ǹshi ŋguʼɔ nchhɔ ŋkwiŋ vəɨ ŋguoŋ ndɨɨ ni pa mbha nnu pei, njiʼi nthɛ pi nɔ haʼaŋ pəɨ ji ndɔ ŋkwo ya mbhi kwo yəɨ moŋ nnu shini ŋa pəɨ fāʼo nɛ. 13 M̀bīʼi ŋa a kāʼo vəɨ nɔ kwɛ̄nɛ nu vəɨ ntɔgɔ pi ŋkuoŋ kwiŋ nu vəɨ, nɔ haʼaŋ ŋ̀guʼɔ mbɔ yi maoŋ nɛ, 14 nji nu ŋa ndɨɨ shrāo frɛinoŋ nchíʼa yei kwo para nɔ haʼaŋ Taathɔ via Jishɔ Krishto ni ŋkwo chwīe ǹji nɛ. 15 M̀baʼo nu ni ŋguoŋ kāa nu ghao nnɛ ŋa ǹshi ŋga mieŋ mbhi yei, pəɨ kwiŋ pa nnu pei moŋ sheshe ndɨɨ.
Pa ŋgwa ŋa pugu ni njəɨ ndighaʼo Krishto
16 Pigi shini ndɔ njōu pi njiŋ mishweishwei ŋa ŋgwa pīʼi ni lɨna thɔ yugu ndɨɨ ŋa pigi ni nchwīe pəɨ ji thɔ nu Taathɔ via, mbɔ Jishɔ Krishto, moŋ ghrɨ́, ndɔ ti pigi ni ŋka yəɨ pi ndighaʼo yi. 17 Ndɨɨ ŋa Minnwi Tǎa ni mfɛ ndighaʼo ni Jishɔ Krishto ndɔ nōoŋ vi nɔ ŋoŋ ndiɛŋ nɛ, Ndighaʼo Tɛthɛ ghɔ ni nchhu ghɔ ŋa, “Yei ŋkiɛŋ Muuŋ a ŋa ŋ̀khwā, m̀fāʼo pwatua nthɛ vi.” 18 Pigi ŋkaa pigi ni njaʼo ŋggì yei llɔ po nthɛ ŋa pigi pugu ni mbɔ ŋkuoŋ mbra Minnwi ghɔ kaʼa, mbɔ mbra taoŋtaoŋ.
19 Pia fāʼo chrà ŋa pa njəɨlɨʼɨ Minnwi ni nchhu nɛ, mbɔ yaoŋ ŋa a nthɛ ŋoŋ fāʼo tɨnɨnjuʼɔ ŋkuoŋ ghɔ, ŋa a pie ŋa pəɨ niʼiŋ njùʼɔ yəɨ ŋkuoŋ ghɔ nɔ laŋ ŋa a kɨɨ nu moŋ njiŋ ti mbhi shi nuʼuŋ ndaŋ, líʼɛ fɨ́nəɨ muuŋ tutuʼu thɛ njùʼɔ pəɨ. 20 A pwa ŋa pəɨ fǔoŋ nji yei, ŋa ŋkɨ̀nɨ Minnwi ŋa pa Njəɨlɨʼɨ Minnwi nāʼaŋ moŋ Ŋwaʼaŋlɨ Minnwi nɛ lɔ mbie ŋa ŋoŋ tūgu pi ŋkwaŋ haʼaŋ a ywɛrɛ ji nɛ.*1:20 Yichəɨ njiŋ lɨʼɨ yei pɨnɨ mbɔ ŋa ŋkɨ̀nɨ Minnwi ŋa pa njəɨlɨʼɨ Minnwi ni nāʼaŋ moŋ ŋwaʼaŋlɨ nɛ shini ndɔ ndhɔ pi moŋ mbīʼi nu pa njəɨlɨʼɨ pighɔ. 21 Nthɛ ŋa yichəɨ chrà llɔ mbhɔ njəɨlɨʼɨ Minnwi shini ndɔ mbɔ fɔ ŋa a llɔ pi moŋ khwā njùʼɔ ŋoŋmishua, ndɔ ŋgwa ni nchrā llɔ mbhɔ Minnwi nɔ haʼaŋ Jijwɛ Minnwi ni mfɛ njɨ ni pugu nɛ.
*1:20 1:20 Yichəɨ njiŋ lɨʼɨ yei pɨnɨ mbɔ ŋa ŋkɨ̀nɨ Minnwi ŋa pa njəɨlɨʼɨ Minnwi ni nāʼaŋ moŋ ŋwaʼaŋlɨ nɛ shini ndɔ ndhɔ pi moŋ mbīʼi nu pa njəɨlɨʼɨ pighɔ.