1 Ǹaʼaŋ māʼaŋ fɨʼɨ ni lì yei, nɔ haʼaŋ muuŋ piʼi mikəʼɨ nda pugu nɛ, ti mfɛ pi nɔ haʼaŋ ŋguoŋ yaoŋ shi ndɛ mbɔ pi ji nɛ, a lɔ njiʼi nchaa ŋkǔna. 2 A fāʼo nɔ yaʼo nu nchò pa ŋgwa ŋa pugu lɨna nu ni ju ti a shi nuʼuŋ ŋkuʼɔ ŋgū mmɛŋoŋ ŋkāʼo nɔ ndɨɨ haʼaŋ tǎa vi ni nūʼɔŋ nɛ. 3 A wuʼɔ nɔ haʼaŋ a ni mbɔ ni pia ndɨɨ ŋa pia ni ŋguʼɔ mbɔ puoŋ prɔ nɛ, pia ni mbɔ pa kǔna mbhɔ pa nùʼɔŋ ŋkuoŋ mbhi yei.

4 Ndɔ ndɨɨ ni ŋga ŋkāʼo, Minnwi taoŋ Muuŋ vi, miŋgwɛ phi vi, a fāʼo nɔ nūʼɔŋ nu gɨ́ Mushi, 5 nɔ yuoŋ nu pa ŋgwa pɛ ŋa gɨ́ tuo vugu nɛ pugu lūgu, nnɛ ŋa pinthɛ Minnwi lɔ̄gɔ via nɔ puoŋ pi. 6 Nthɛ ŋa pəɨ pa puoŋ nɛ, Minnwi fɛ Jijwɛ Muuŋ vi njùʼɔ pia, mbɔ Jijwɛ ŋa a yūa ŋa, “Baba, Tǎa a.” 7 Nɛnnɛ, ɔ lɔ nuʼuŋ mbɔ pi ŋkǔna, ɔ pɔ pi muuŋ. Nthɛ ŋa ɔ pɔ pi muuŋ nɛ, Minnwi fɛ ŋguoŋ yaoŋ ŋa a fāʼo nɛ vɛ.

8 A ni mbɔ ndɨɨ shhɨ, mbɔ ndɨɨ ŋa pəɨ shini ndɔ naa nji Minnwi nɛ, pəɨ ni mbɔ pa ŋkǔna mbhɔ pa maoŋ ŋa pugu lɔ ndɔ mbɔ nnwi nɛ. 9 Ti ndwɛ ŋa pəɨ kwo ji Minnwi nɛ, ki nthɛ pi ŋa Minnwi kwo ji vəɨ nɛ, pinthɛ pəɨ kie pi nɛiŋ mbɨnɨ ŋkara mbɨnɨ ŋkuoŋ nùʼɔŋ ŋkuoŋ mbhi yei ŋa a lɔ njiʼi mfāʼo ghrɨ́ ki ghɛ̀rɛ nɛ, pəɨ tāʼa nu mbɨnɨ mbɔ pa ŋkǔna mbhɔ pa nùʼɔŋ pighɔ ŋkamuʼɔŋ? 10 Pəɨ ghà ndɨna ni nūʼɔŋ nu pichəɨ pa mmɛ llɛ́ pugu pa taŋ, pugu pa ndɨɨ ni pa ŋgaʼo. 11 M̀fāʼo pɔ́gɔ nthɛ vəɨ ŋa ŋgəʼɨ ŋa ǹjəɨ nthɛ vəɨ nɛ phɛ pi gha. 12 Pa lǐŋ paŋ, m̀baʼo mbhɔ ŋa p̂əɨ pɔ nɔ mmu, nthɛ ŋa mummu kwo pɔ nɔ pəɨ.

Pəɨ lɔ njiʼi mfāaŋ nnu mbɨŋ mu. 13 Pəɨ ji ŋa a ni mbɔ nthɛ pi ŋa noŋ a shini ndɔ nja mbɔ shiʼi nɛ ŋa ŋki chīi ŋkɨ̀nɨ pwa pishaʼakhɔ ni pəɨ fǔoŋ ŋgɛ. 14 Ndɔ njiʼi nthɛ pi nɔ haʼaŋ noŋ a ni mbɔ nnɛ nɛ, mbɔ nɔ mōoŋ nu ni pəɨ nɛ, pəɨ shini ndɔ ndāa a ki nchɨ̄ʼə a, pəɨ ni mbiŋ a nɔ ŋgaŋ ntaoŋ Minnwi, nɔ Krishto Jishɔ nduthɔ yi. 15 Ti ndwɛ, a lɔ̄gɔ khɔ ndɔ̄gɔ lɨʼɨ ni fɨʼɨ pwanjuʼɔ yɛ ŋa pəɨ ni mfāʼo nɛ? Mmu nduthɔ a, minthɛ ǹchhu ŋa pəɨ kaŋ ni nthɛ pəɨ fuʼu muuŋ ligi yəɨ mfɛ vəɨ nɔ haʼaŋ a kaŋ ni njiʼɛ. 16 Ŋ̀ka pɨnɨ mbɔ pi mbɨ̌na vəɨ ndwɛ nthɛ ŋa ǹchhu nnu shini ni pəɨ nɛ?

17 Ŋgwa pighɔ nōoŋ nu ŋa pugu fāʼo ndɨɨ yəɨ ntou yi ndɔ paʼa ndɔ mbīʼi pi shiʼi nthɛ vəɨ. Pugu tāʼa nu mfɛ̄nɛ vəɨ yəɨ mu, nnɛ ŋa pəɨ kɨna ni ŋguoŋ njùʼɔ yəɨ njiŋ pugu. 18 Ŋ̈oŋ mfāʼo ntou khwǎ nɔ chwīe nu shiʼi, kaŋ a pwa, ndɔ â chwīe ŋguoŋ ndɨɨ ghao, ki lɔ ŋguʼɔ mbɔ pi ndɨɨ ŋa pia pɔ kaʼa nɛ. 19 Pa puoŋ mi puoŋ paŋ, m̀bɨnɨ nchhɔ ŋgwie noŋ a nɔ miŋgwɛ shūu ŋa a phi nu nɛ, nnɛ ti pəɨ nuʼuŋ ntɨnɨ moŋ Krishto. 20 Ǹjūa ŋa pia kaŋ ni mbɔ pi kaʼa, ŋ̀kwri ŋkwaŋ ŋggì ŋa ǹchrā nu nɔ nɛ, nthɛ ŋa m̀fāʼo ntou fiŋthɔ nthɛ vəɨ.

21 Pəɨ shwei a, pəɨ ŋa pəɨ khwā nɔ kɨna nu ŋkuoŋ gɨ́ nɛ, pəɨ shiʼa njwɛrɛ yaoŋ ŋa gɨ́ ghɔ chhu nɛ? 22 Nthɛ ŋa pi nāʼaŋ ŋa Abrahaŋ ni mfāʼo paa puoŋ pimbia, taʼa yi pɔ mǔuŋ vi pɔ miŋgwɛ ŋkǔna, yichəɨ pɔ muuŋ vɛ ŋa a shini ndɔ mbɔ kǔna nɛ. 23 Pi ni mbhi muuŋ vɛ ŋa mǔuŋ vi ni mbɔ miŋgwɛ ŋkǔna nɛ, ntɔgɔ pi ŋkuoŋ mbiʼi nu nnu ŋgwamishua, ndɔ mbhi muuŋ vɛ ŋa mǔuŋ vi miŋgwɛ ŋa a shini ndɔ mbɔ ŋkǔna nɛ, ntɔgɔ pi ŋkuoŋ kàʼa Minnwi.

24 Ndwɛ, paa piŋgɛ pei thi pi nɔ ligi yaoŋ, pugu pɔ nɔ paa kɨ̀na. Taʼa yi, mbɔ Haga, pɔ nɔ yɛ kɨ̀na ŋa Minnwi ni ŋgwrā pugu pa puoŋ Ishrae ŋkuoŋ Mbra Shinai nɛ. A ni mbhi puoŋ pugu pɔ pa ŋkǔna. 25 Haga yei pɔ pi nɔ mbra Shinai moŋ laʼataoŋ Arabia, mbɔ nɔ Jerushalɛiŋ shiʼa nthɛ ŋa a pɔ moŋ kǔna pugu pa puoŋ pi. 26 Ndɔ yɛ Jerushalɛiŋ ŋa a pɔ po nɛ, lɔ njiʼi mbɔ moŋ kǔna ndɔ mbɔ mǔuŋ via. 27 Nthɛ ŋa pi nāʼaŋ ŋa:

28 Pəɨ ndwɛ, ma lǐŋ paŋ, pɔ pi puoŋ Minnwi ntɔgɔ pi ŋkuoŋ kàʼa wuʼɔ nɔ haʼaŋ Aiji ni mbɔ nɛ. 29 Ndɔ wuʼɔ nɔ haʼaŋ ndɨɨ ghɔ muuŋ yɛ ŋa pi ni mbhi vi ntɔgɔ pi ŋkuoŋ pīʼi nu ŋgwamishua nɛ ni mfɛ ŋgəʼɨ ni yɛ muuŋ ŋa pi ni mbhi vi ntɔgɔ pi ŋkuoŋ ŋkwaŋ haʼaŋ Jijwɛ Minnwi ni ntāʼa nu nɛ, a wuʼɔ haʼaŋ a pɔ ndwɛ nɛ.

30 Ndɔ Ŋwaʼaŋlɨ Minnwi chhu pi ŋa? A chhu ŋa, “Yōu miŋgwɛ ŋkǔna pugu muuŋ vi, nthɛ ŋa mbaʼa muuŋ miŋgwɛ ŋkǔna ghɔ lɛ ma mfāʼo maoŋ tǎa pugu muuŋ vɛ miŋgwɛ ŋa a lɔ mbɔ ŋkǔna nɛ kaʼa.” 31 Nnɛ, ma lǐŋ paŋ, pia lɔ njiʼi mbɔ pi puoŋ miŋgwɛ ŋkǔna ghɔ, pia pɔ pi yi miŋgwɛ yɛ ŋa a lɔ mbɔ ŋkǔna nɛ.