Pwa Pishaʼakhɔ ŋkwaŋ haʼaŋ
Jouŋ
fɨ̄ʼɨ nɛ
Kāoŋ nu pa thɔ nu
Jouŋ lūgwi nāʼaŋ nu ŋwaʼaŋlɨ yei pi ni chhu nu njiŋ nnu ŋa a nāʼaŋ ŋwaʼaŋlɨ ghɔ nthɛ yie nɛ. A fɨ̄ʼɨ ŋa pi nāʼaŋ ŋwaʼaŋlɨ yei nnɛ ŋa ŋgwa ji ŋa Jishɔ Ju Ŋa Minnwi ni Nchuʼɔ Ntaoŋ nɔ Ŋkwe nɛ, pugu pa ŋa ŋ̈oŋ mbiŋ vi, a fāʼo chɔmbhi.
Jouŋ fɨ̄ʼɨ mishweishwei yi yei moŋ paa mɛmmɛ ghrà. Fǔoŋ yi fɨ̄ʼɨ fàʼa Jishɔ moŋ nthɛ minaoŋ. A pɨnɨ nuʼuŋ mfɨ̄ʼɨ ŋkwaŋ haʼaŋ ŋgwa ni nchwīe ndɨɨ ŋa pugu ni njaʼo ndɔ njəɨ pa fàʼa Jishɔ nɛ, Ki pugu ni ŋkakara mbiŋ vi ki pugu ni ndāa vi lāa. Moŋ mbra mmɛ ghrà, Jouŋ fɛ ndɨɨ nɔ fɨ̄ʼɨ nu pa nnu ŋa a ni ndɔ̄gɔ lɨʼɨ moŋ shwiʼi taŋ Lli Njiʼa nɛ.
Jouŋ fɨ̄ʼɨ moŋ khwachəɨ lɨʼɨ moŋ ŋwaʼaŋlɨ yei ŋkwaŋ haʼaŋ Jishɔ nōoŋ noŋ yi ni ligi yɛ ŋa Minnwi ni nōoŋ noŋ yi nɔ ghɔ ŋkaa yu nɛ. Ligi ghɔ pɔ: A Mmu. Wuʼɔ nɛnnɛ Jouŋ pɨnɨ nuʼuŋ nōoŋ khwachəɨ lì ghɔghrao ŋa Jishɔ ni nōoŋ nɛ. Jouŋ fɨ̄ʼɨ paa ŋgɛ́ ŋa Jishɔ ni ŋkuʼɔ moŋ gu pi fǔoŋ llɛ́ moŋ shwiʼi taŋ. Jouŋ chrā ntou yi ŋkuoŋ nnu fāʼo nu chɔmbhi ki mmɛ pi nɔ tɔgɔ nu mbhɔ Jishɔ. A fɨʼɨ ŋa Chɔmbhi ki mmɛ yei gha njɛ̄ ni ŋoŋ pi ndɨɨ ŋa ŋgaŋ vi piŋ Jishɔ Krishto ŋa a ju mbɔ shɛndaoŋ, mbɨnɨ mbɔ chɔmbhi, mbɨnɨ mbɔ nnu shini nɛ. Taʼa mmɛ nnu ŋa a pɔ moŋ ŋwaʼaŋlɨ yei pɔ ŋa Jouŋ lɔgɔ pa yaoŋ ŋa ŋgwa ji nɛ, māʼaŋ fɨʼɨ pa nnu moŋ jijwɛ nɔ ghɔ. Pa maoŋ pighɔ pa yaoŋ nɔ ŋkhǐ, brɛi, líʼɛ, ŋkɛ̄ʼi minjɨɨ pugu pa minjɨɨ, ndǎa grape pugu pa ntíɛŋ yi.
1
Chrà chɔmbhi
1 Ŋkaoŋ pi maa nchwīe mbhi, Chrà ghɔ ni ŋkwo pɔ, Chrà ghɔ pɔ pugu Minnwi, Chrà ghɔ pɔ Minnwi. 2 A ni mbɔ pugu Minnwi kaʼa nɔ njɛ̄ yi. 3 Sheshe yaoŋ ŋa pi pūoŋ nɛ tɔgɔ pi mbhɔ yu. A kaŋ ni ŋkiɛŋ paʼa sheshe yaoŋ ŋa pi pūoŋ nɛ lɔ mbɔ yi pūoŋ. 4 Chɔmbhi ni ndhɔ pi mbhɔ Chrà ghɔ, chɔmbhi ghɔ pɔ líʼɛ ŋgwamishua. 5 Líʼɛ ghɔ thɛ moŋ njiŋnjiŋ ndɔ paʼa njiŋnjiŋ lɔ ŋgaʼa vi.
6 Minnwi ni ntaoŋ yichəɨ ŋoŋ, ligi yi pɔ Jouŋ. 7 A ni nthɔ nɔ miŋkwentie nɔ chrà nu nthɛ líʼɛ ghɔ, nnɛ ŋa ŋguoŋ ŋgwa nthɛ pugu piŋ ntɔgɔ pi ŋkuoŋ chrà yi. 8 A shini ndɔ mbɔ ju mbɔ líʼɛ ghɔ. A ni ŋguʼɔ mbɔ pi miŋkwentie nɔ chrà nu nthɛ líʼɛ ghɔ. 9 Ŋkiɛŋ líʼɛ ghɔ ni nthɔ nu ŋkuoŋ mbhi, mbɔ líʼɛ ŋa a thɛ mfɛ líʼɛ ni ŋguoŋ ŋgwa nɛ.
10 A ni mbɔ ŋkuoŋ mbhi ndɔ pi tɔgɔ pi mbhɔ yu nchwīe mbhi, ndɔ paʼa mbhi lɔ nji vi. 11 A ni nthɔ nthɛ ji, ndɔ paʼa ŋgwa pi pighɔ lɔ ŋaʼaŋ njùʼɔ yugu ghɔ. 12 Ndɔ ni ŋguoŋ ŋgwa pɛ ŋa pugu ni ŋaʼaŋ njùʼɔ yugu ghɔ nɛ, ŋa pugu ni mbiŋ vi nɛ, a fɛ ghrɨ́ ni pugu nɔ gū nu puoŋ Minnwi, 13 mbɔ puoŋ ŋa pi lɔ mbhi vugu pi ŋkwaŋ haʼaŋ ŋgwamishua ghà mbhi nɛ, mbɔ ŋgwa ŋa pi shi lɔ mbhi vugu pi ni khwā nu ŋgwamishua, ki ni pīʼi nu mimbia ŋa a laŋ nɛ. Minnwi nduthɔ yi chwīe pi phi vugu.
14 Chrà ghɔ ni ŋgū ŋoŋmishua nshwiʼi nchhɔ shɨna pia. Pia yəɨ ndighaʼo yi, mbɔ ndighaʼo yɛ ŋa a wuʼɔ fāʼo ju nɔ taʼa fiɛŋ Muuŋ Tǎa nɛ. A ni ndɨnaoŋ ni pwapuŋ pugu pa nnu shini.
15 Jouŋ ni mbɔ miŋkwentie yi, nchhu ni njɨ ŋa, “Yei ni mbɔ ju ŋa mi ni nchrā nthɛ vi ŋa, ‘Ju ŋa a thɔ nu njiŋ a nɛ, nthɨŋkwo yi chaa nyaŋ, nthɛ ŋa a ni ŋkwo pɔ ŋkaoŋ m̀aa mbɔ.’ ”
16 Llɔ moŋ lɨnaoŋ nu mi ni pwapuŋ, a fɛ mbɔrɔ ŋkuoŋ mbɔrɔ ni pia. 17 Nthɛ ŋa pi ni mfɛ gɨ́ ntɔgɔ pi mbhɔ Mushi, ndɔ pwapuŋ pugu pa nnu shini thɔ ntɔgɔ pi mbhɔ Jishɔ Krishto. 18 Yichəɨ kaŋ taʼa ŋoŋ lɔ naa njəɨ Minnwi, ndɔ fiɛŋ taʼa Minnwi ŋa a pɔ yəɨ Tǎa nɛ, chwīe pi ji Minnwi.
Ŋkɨ̀nɨ Jouŋ Ŋgaŋ Fɛ Ŋkhǐ
(Matio 3:1-12; Maaku 1:1-8; Luka 3:1-18)
19 Pa ŋgwa Juu llɔ Jerushalɛiŋ ni ŋga ntaoŋ pa ghaŋ fɛʼiŋgiɛŋ Minnwi pugu pa ŋgwa Levi* 1:19 Ŋgwa Levi ni mbɔ ghaŋ fàʼa Nda Minnwi. ŋa pugu pie Jouŋ Ŋgaŋ Fɛ Ŋkhǐ ŋa, “Ɔ pɔ pi gɔ̌?” yei pɔ nnu ŋa Jouŋ ni nchhu nɛ. 20 Jouŋ shini ndɔ ndāa khwɛ̄ nu, a ni nja nchrā lɨʼɨ wo ki lɔ njiʼi nchiɛŋ nchò yi, nchhu nu ŋa, “Ǹshi lɔ njiʼi mbɔ Ju ŋa Minnwi Chuʼɔ Ntaoŋ nɔ Ŋkwe nɛ.”
21 Pugu pie vi ŋa, “Ti ɔ pɔ pi gɔ̌? Ɔ Elaija?”
Jouŋ khwɛ̄ ŋa, “Ŋga, ǹdɔ mbɔ ju.”
“Ɔ njəɨlɨʼɨ Minnwi ghɔ?”
Jouŋ khwɛ̄ ŋa, “Ŋga.”
22 Nɛnnɛ, pugu chhu ghɔ ŋa, “Ɔ gɔ̌? Pigi fāʼo nɔ pɨ̄nɨ nu ni khwɛ̀ nshwei ŋgwa haʼaŋ pugu taoŋ vigi nɛ. Ɔ chhu pi ŋa nthɛ noŋ yɔ?”
23 Jouŋ khwɛ̄ ŋa,
“Mi ŋggì ŋoŋ ŋa a kə̄ɨ nu moŋ ŋkǔnu njó.
‘Pəɨ pīri Shɛndaoŋ tithi ni Taathɔ ŋa a tɔgɔ fɔ nɔ haʼaŋ njəɨlɨʼɨ Minnwi mbɔ Ishaya ni nchhu nɛ.’ ”
24 Pichəɨ pa ŋgwa Farashi ŋa pugu ni mbɔ shɨna ghaŋ ntaoŋ pighɔ† 1:24 Yichəɨ shɛndaoŋ nɔ tūgu nu ghrà yei pɔ ŋa A ni ntaoŋ ŋgwa Farashi ntaoŋ ghaŋ ntaoŋ pighɔ. nɛ 25 pie vi ŋa, “Ti ɔ̈ mieŋ ki lɔ mbɔ Ju ŋa Minnwi Chuʼɔ Ntaoŋ nɔ Ŋkwe, ki lɔ mbɔ Elaija, ki lɔ mbɔ njəɨlɨʼɨ Minnwi ghɔ, ɔ thɔ kwe ŋgwa ni ŋkhǐ kiʼɛ ŋa?”
26 Jouŋ khwɛ̄ ni pugu ŋa, “Ŋ̀ga ŋkwe ŋgwa ni ŋkhǐ pi moŋ ŋkhǐ, ndɔ yichəɨ taʼa ŋoŋ thi shɨna pəɨ ŋa pəɨ shi lɔ nji vi, 27 a thɔ nu njiŋ a, ndɔ ǹdɔ njiʼi ŋkāʼo nɔ ŋoŋ ŋa mimfɛ m̀fēi ŋkɨ̌ɨ tra yi.”
28 Ŋguoŋ nnu pei ghao ni nthɔ ndɔ̄gɔ lɨʼɨ Betani, njiɛŋ nɨnəɨ Jodaŋ lɨʼɨ ŋa Jouŋ ni ŋkwe ŋgwa ni ŋkhǐ nɛ.
Jishɔ pɔ pi muuŋ minjɨɨ Minnwi
29 Mbhi gha ndaŋ, Jouŋ yəɨ Jishɔ a thɔ nu yəɨ yu, a chhu ŋa, “Līi njəɨ! Muuŋ Minjɨɨ Minnwi ŋa a kwe phɨ ŋgwa ŋkuoŋ mbhi nɛ. 30 Yei pɔ pi ŋoŋ yɛ ŋa mi ni nchrā nu nthɛ vi ndɨɨ ŋa ŋki chhu ŋa, ‘Ju ŋa a thɔ nu njiŋ a nɛ nthɨŋkwo yi chaa nyaŋ, nthɛ ŋa a ni ŋkwo pɔ ŋkaoŋ m̀aa mbɔ.’ 31 Mmu nduthɔ a shini ndɔ nji vi. Ndɔ ŋki thɔ, nchhɔ mfɛ ŋkhǐ ni ŋgwa nnɛ ŋa ŋgwa Ishrae ji vi.”
32 Jouŋ kwe ntie yi, nchhu nu ŋa, “Mi ni njəɨ Jijwɛ Minnwi shwiʼi nu mbɨŋ yu nɔ mintuʼɔlibuŋ llɔ po, nshwiʼi ŋkɨna mbɨŋ yu. 33 Mmu nduthɔ a shini ndɔ njiʼi nji vi, ndɔ ju ŋa a ni ntaoŋ a ŋa ŋ̀kwe ŋgwa ni ŋkhǐ moŋ ŋkhǐ nɛ ni nchhu vəɨ ŋa, ‘Ŋoŋ ŋa ɔ shi njəɨ Jijwɛ shwiʼi ŋkɨna mbɨŋ yu nɛ, a ju ŋa kwe nu ŋkhǐ ŋa a shi mfɛ ni ŋgwa nɛ shi mbɔ pi moŋ Jijwɛ Minnwi.’ 34 Ndɔ ǹjəɨ, ndɔ mbɔ miŋkwentie ŋa yei Muuŋ Minnwi.”
Jishɔ gɛ̄ fǔoŋ ghaŋ younjiŋ pi
35 Mbhi ni ŋga ndaŋ, Jouŋ pɨnɨ ntithi pugu pa paa ghaŋ younjiŋ pi, 36 mbɛʼi Jishɔ nɔ haʼaŋ a ni ntɔgɔ nu nɛ nchhu ŋa, “Līi njəɨ, Muuŋ Minjɨɨ Minnwi!” 37 Paa ghaŋ younjiŋ pi pighɔ ni ŋga njaʼo nnu yei, ndɔllɔ njōu njiŋ Jishɔ.
38 Jishɔ kara noŋ yi njəɨ vugu pugu thɔ nu njiŋ yu, a pie vugu ŋa, “Pəɨ taʼa pi khɔ?”
Pugu khwɛ̄ ŋa, “Rabai” (njiŋ yi pɔ ŋa “Masha”), “Ɔ laʼa pi hɨŋ?”
39 A chhu ni pugu ŋa, “Pəɨ thɔ nɛ njəɨ.” A ni mbɔ yaoŋ nɔ khwɛ minaoŋ ni naoŋchɨ ŋa pugu pugu ni ŋgə̄ɨ njəɨ lɨʼɨ ŋa a ni ndaʼa nu nɛ, pugu pugu laʼa llɛ́ ghɔ.
40 Taʼa ŋoŋ shɨna paa ŋgwa pighɔ ŋa pugu ni njaʼo Jouŋ chrā, pugu yōu njiŋ Jishɔ nɛ, ni mbɔ Andru, mbɔ ndǐŋ Shemu Pita. 41 Andru ghə̄ɨ ntāʼa ndǐŋ vi, mbɔ Shemu, nchhu ghɔ ŋa, “Pigi yəɨ Ju ŋa Minnwi Chuʼɔ Ntaoŋ nɔ Ŋkwe nɛ” (njiŋ yi pɔ ŋa “Krishto”).
42 A lɔ̄gɔ vi pugu yu ghə̄ɨ njəɨ Jishɔ. Jishɔ pɛʼi vi nchhu ŋa, “Ɔ Shemu, muuŋ Jouŋ, pi shi mɛ̄iŋ ghɔ ndwɛ pi ŋa, ‘Kefa’ njiŋ yi pɔ ŋa Pita‡ 1:42 Njiŋ Kefa pugu Pita wuʼɔ taʼa yi, mbɔ ŋa ŋgùʼɔ..”
Jishɔ gɛ̄ Fili pugu Natania
43 Mbhi ni ŋga ndaŋ, Jishɔ lɔ̄gɔ nthí mi ŋa a shi ŋgə̄ɨ Galili. Njəɨ Fili nchhu ghɔ ŋa, “Thɔ njōu njiŋ a.” 44 Fili ni ndhɔ Beshaida mbɔ laʼataoŋ pa Andru pugu Pita.
45 Fili yəɨ Natania nchhu ghɔ ŋa, “Pigi yəɨ ŋoŋ vɛ ŋa Mushi ni nāʼaŋ nthɛ vi moŋ Ŋwaʼaŋlɨ Gɨ́, pa njəɨlɨʼɨ Minnwi pɨnɨ nāʼaŋ nthɛ vi ŋkaa pugu nɛ. A Jishɔ llɔ Nasharɛ, mbɔ muuŋ Joshɛ.”
46 Natania chhu ghɔ ŋa, “A nthɛ nnu shiʼi taoŋ Nasharɛ?”
Fili chhu ghɔ ŋa, “Thɔ nɛ njəɨ.”
47 Jishɔ yəɨ Natania thɔ nu yəɨ yu, a chhu ghɔ ŋa, “Līi njəɨ, yei ŋkiɛŋ ŋoŋ Ishrae shishini, ŋa a lɔ mbɔ ŋgaŋ mifɨɨ nɛ!”
48 Natania pie vi ŋa, “Ɔ kie nɛiŋ nji a?”
Jishɔ khwɛ̄ ghɔ ŋa, “Ŋkaoŋ Fili maa mɛ̄iŋ ghɔ ndɨɨ ŋa ɔ ni mbɔ laʼo muuŋ thɨ wùnu nɛ, mi nì njəɨ ghɔ.”
49 Nnɛ Natania khwɛ̄ ŋa, “Masha, Ɔ Muuŋ Minnwi, Ɔ fùoŋ pa ŋgwa Ishrae.”
50 Jishɔ khwɛ̄ ghɔ ŋa, “Ɔ wuʼɔ mbiŋ nthɛ pi ŋa ǹshwei ghɔ ŋa mi nì njəɨ ghɔ laʼo muuŋ thɨ wùnu nɛ? Ɔ shi njəɨ pa nnu a chaa yei.” 51 A chhu ghɔ ŋa, “Shishini, ǹshwei vəɨ ŋa, pəɨ shi njəɨ po ŋaʼaŋ, pəɨ yəɨ pa ghaŋ ntaoŋ Minnwi kuʼɔ nu ndɔ nshwiʼi nu mbɨŋ Muuŋ Ŋoŋmishua.”