1 Gwarek jaŋgöŋinan qariba öŋgöiga Juda ambazip kambu yahöt aka malget. Tosatŋan kantri tosatŋeyök kaba Grik keu jiget aka tosatŋan nanŋine gölmeŋine mala kota Arameik aka Hibru keu jiget. Mewö malgetka nalö miaŋgöreŋ goranora (noragora) asuhuyök. Grik keu jigeri, yeŋön kewö jigetka böliyök, “Aposol yeŋön nalö dop nene inap mendeŋ neŋgimakzemö, Grik keu ambi malö neŋgö nene inap bahöŋi mi bahösapsap neŋgimakze. Öröröŋ qahö misigetka qahö dop kölja.”

2 Mewö jigeraŋgöra aka aposol 12 yeŋön gwarek kambu köl öröm eŋgiget tokogetka kewö jiget, “Neŋön silegö nup memba nene mendeŋda eŋgiba Anutugö Buŋa nupköra nalönini ölöp qahö dop köli urugö nupninan etpapuk. Mi kude dop kölja. 3 Mewögöra alaurupnini, mötket! Eŋön mönö nanŋini sutŋineyök nupbauk miwikŋaim eŋgime. Uŋa Töröŋan azi uruŋini kokolak qeiga Anutunöŋ mötkutukutuŋi qainŋi kun al eŋgii qetbuŋa ölöpŋi memba kinjei, mönö azi mewöŋi 7 meköm eŋgime. Mi meköm eŋgigetka nup mi eŋgiinga mi galöm köla memba malme. 4 Yeŋön mewö malmemö, naninak nalö jömukŋanök köuluköba Anutugöreŋ Buŋa keu jegep kinda jim sehiba malbin. Nup miaŋgöreŋ mönö pöndaŋ kinbin.”

5 Mewö jigetka kambu pakpak yeŋön “Ölöp dop kölja!” jiget. Mewö jiba azi qetŋi Stiwen meköget. Stiwen mi Anutu köhöikŋanök möt narim waŋgiiga Uŋa Töröŋan uruŋi kokolak qei malök. Toroqeba azi kewö meköba möwölöhöm eŋgiget: Filip, Prokorus, Nikanor, Timon, Parmenas aka Nikolas. Nikolas mi kian kantrigö siti qetŋi Antiokia miaŋgöreŋ ahuba könaŋgep Juda azia aka uruŋi Kraistköreŋ meleŋnök. 6 Mi meköba möwölöhöm eŋgigetka aposol yeŋgö jemesoholŋine öŋgöm angetka böröŋini nöröpŋine ala köuluköba kötuetköm eŋgiget.

7 Anutugöreŋ keu jim sehigetka töhötmöriamŋambuk aiga gwarek yeŋgö jaŋgöŋinan Jerusalem sitinöŋ qariba sehiyök. Jike nup galöm yeŋgö kambunöhök sehisehiŋi yeŋön mewöyök uruŋini meleŋda Jisös möt nariget. Mewö.

8 Anutugö kalem möriamŋi aka kukösumŋi miaŋön nupbauk azi Stiwengö uruŋi kokolak qei kinda aiwesök aŋgöletot ketaŋi ketaŋi mi ambazip sutŋine mei asuhuget. 9 Mi asuhugetmö, Juda tosatŋan wahöta Stiwen aŋgötuarenjoŋ ak waŋgiget. “Lolohoba kageraŋgö köuluk miri kambu”*Köuluk miri kambu kungö qetŋi mi kewö asuhui qetket: Ambazip pomŋi yeŋön tosatŋi bohonŋini eŋgömegetka buŋaŋini aka toŋinaŋgö welenŋini öne qeba mala (sleiw) böröŋineyök lolohoba kageri, yeŋön mönö nanŋini köuluk miri kambuŋini ala qetŋini mi mewö qetket. yeŋgö sutŋine Juda tosatŋan Sairini aka Aleksandria Ijipt siti yahöt miaŋgöreŋök liliŋgöba kaba kinget. Azi mewöŋan mindiriba wahöta Silisia aka Eisia prowinsnöhök kageri, yeŋgö kambunöhök Juda azi tosatŋi eŋgömemba mohotŋe Stiwenbuk möndöŋda goranora aka jitnakölik erauget.

10 Mewö jigetmö, Uŋa Töröŋan Stiwen sölölöhöi mötkutukutu ketaŋaŋgö qakŋe keuŋi meleŋda jiyöhi, mi Juda yeŋön qeapköbingö osiba etket. 11 Osiba eta mömölaköba anda azi tosatŋi miwikŋaiba kuŋgum eŋgiba kaba kewö jiget, “Yaŋön mepaqepaik keu jiba miaŋön Moses aka Anutu qetal etkii mörin.”

12 Mewö jiba anda ambazip kambu, yeŋgö jitŋememe aka Köna keugö böhi mieŋgö urugege keu jigetka uruŋini könöp jeyök. Könöp jeiga kölölohoba kaba Stiwen öröba meraköba memba jike kaunsöl kambu yeŋgö jeŋine anget. 13 Anda azi tosatŋi eŋguaŋgitketka kota Stiwengö sileŋe keu muneŋi ala kewö naŋgöba jiget, “Azi kiaŋön mönö jöwöwöl jikenini aka Mosesgöreŋ Köna keu tuarenjoŋ aka qahö mosörakzapmö, mi toroqeba jimahakza. 14 Tuarenjoŋ aka kewö jii mörin, ‘Jisös, Nazaret azinöŋ mönö jöwöwöl jike ki köndeŋniga qeqelaŋlaŋ ahöma aka Mosesnöŋ Köna keu neŋgii ahözawi, mi uteköma.’ ”

15 Mewö jigetka jike kaunsöl kambugö totokonöŋ tatkeri, yeŋön körekŋan Stiwen törörök ugetka kaisoŋgolomŋan Suep garata tandök ewö ahiga eka mötket. Mewö.