1 Kian kantri yeŋön mewöyök Anutugöreŋ keu memba aŋgön kölgeri, miaŋgö buzupŋi mi aposol aka urumeleŋ alaurup Judia prowins dop köla mala mötket. 2 Miaŋgöra Pitönöŋ Jerusalem sitinöŋ liliŋgöba öŋgöiga Juda sileŋine Anutugö aiwesök yandigetka uruŋini meleŋgeri, yeŋön jijiwilit (jelikit) aka jim waŋgiget. 3 Jim waŋgiba kewö jiget, “Kian kantri azi Anutugö aiwesökpuk qahö maljei, gi mönö wuanöŋgöra anda yembuk köisirik tata nene nenöŋ? Mi qahö dop kölja.” 4 Mewö jigetka könakönahiŋeyök könahiba yuai asuhuyöhi, mi körek pakpak areŋambuk jim asarim eŋgiba kewö jiyök,

5 “Nöŋön Jopa sitinöŋ mala köuluköbiga Kembugö alburupŋan nuŋguiga tata imut kun kewö ehal: Suepnöŋ aŋaŋiiga könde ketaŋi kun erök. Könde mi opo tuatŋi ketaŋaŋgö tandök ewö ahök. Garata yeŋön yuai miaŋgö waŋgömŋi 4 miaŋgöreŋ memba naŋgöbeak, miaŋgö tandök ewö nöŋgö kösutneyök eta ahöyök. 6 Eta ahöiga yuai miaŋgö uruŋe törörök ekiga sömbup könaŋi könaŋi miaŋgöreŋ tatket. Sömbup tosatŋi mi gölmenöŋ köna 4:ŋan tiba anakze. Tosatŋi kalŋi könöpŋinambuk akze. Tosatŋan wösöŋinan ölölöŋgöba anakze. Mewöyök nei könaŋi könaŋi könakemba bölbölgöba anakzei, yuai mewö mi könde miaŋgö uruŋe mohotŋe etketka eŋgehal. 7 Eŋgekiga qet kun mewöyök asuhuba kewö jii möral, ‘Pitö, mönö wahöta yuai ki qeba ohoba nenöŋ.’

8 “Mewö möralmö, nöŋön kewö jial, ‘O Kembu, ni miaŋgöra imbiloŋloŋ mötzal. Yuai dönqizin aŋgöjörakŋambuk mewöŋi mi nalö kungen nöŋgö numbunan qahö oseiyök. Miaŋgöra mi mönö qahö kötökŋi nemam.’ 9 Mewö jibiga qet miaŋön kunbuk Suepnöhök asuhuba kewö jiyök, ‘Anutunöŋ yuai jim könjörari ahözawi, göŋön miaŋgö qetŋi aŋgöjörakŋambuk mewö kude qetman.’ 10 Yuai mewöŋi mi indimŋi karöbut asuhuyök. Mewö asuhuiga yuai pakpak mi kunbuk örögetka Suepnöŋ liliŋgöba öŋgöyök. 11 Öŋgöba atatop (jiatatoŋ) köliga nalö miaŋgöreŋök Korniliusnöŋ Sisaria taonöhök azi karöbut melaim eŋgii nöŋgöreŋ kageri, yeŋön miri tarini, miaŋgö naŋguŋe kinget.

12 “Naŋguŋe kingetka Uŋanöŋ kewö jim kutum niŋgii möral, ‘Gi mönö uruyahöt yaköriba yembuk anman.’ Keu mi mötpiga urumeleŋ alaurupni 6 yeŋön mewöyök Jopa mosöta nömbuk Sisaria taonöŋ anin. Sisaria aŋgota suahö galöm miaŋgö mire öŋgöin. 13 Öŋgöinga keu kösohot kewö ak neŋgiyök, ‘Garata kunŋan nöŋgö mire asuhuiga ekiga kinda kewö jii möral: Gi mönö Jopa mire kolek ala azi qetŋi Saimon, qetŋi kun Pitö i waŋgita kaget. 14 Yaŋön kaiga Buŋa keu jiiga gi aka saiwaurupkan mi möt nariba uruŋini meleŋgetka körek amöt qem eŋgiiga letotme.’

15 “Kösohot mi ak neŋgiiga nöŋön könahiba Buŋa keu jial. Mi jibi mötketka Uŋa Töröŋan könakönahiŋe neŋgö urunine geyöhi, mönö miaŋgö dop kezap ala mötketka yeŋgö uruŋine mohot geyök. 16 *Apo 1.5Yaŋön geiga ekiga miaŋgöreŋök Kembugö keu kun nöŋgö mötmötnöŋ kaŋgori mötmörial. Keu mi kewö, ‘Jonöŋ o töhönöŋ melun mem eŋgiyökmö, nöŋön Uŋa Töröŋi uruŋine ala miaŋön melun mem eŋgimam.’ 17 Neŋön Kembu Jisös Kraist möt narim waŋgiinga Anutunöŋ kalemŋi neŋgiyöhi aka yeŋön möt narigetka Anutunöŋ kalemŋi miyök eŋgö uruŋine mewöyök alök. Miaŋgöra aka ni ewöŋan mönö denöwö Anutu kukösum Toŋi esapköba qetal waŋgibileŋak? Yaŋön mewö ak eŋgiiga nöŋön aŋgön köl waŋgimamgö osial.”

18 Pitönöŋ kösohotŋi mewö jii möta uruŋini amörii bönjöŋ aiga Anutu möpöseiba kewö jiget, “Ölŋa, nini urunini meleŋda malmal köhöikŋaŋgö buŋaya akzin mötzinmö, Anutunöŋ köna mohot mi kian kantri ambazip yeŋgöra mewöyök al eŋgii ahöza. Mi mönö dölki asariba möt kutuzin.” Mewö.

19 *Apo 8.1-4Stiwen qeget kömuyöhaŋgöra aka kahasililiŋ asuhuiga urumeleŋ ambazipnöŋ deŋda liliköba anda kaget. Anda kagetka tosatŋan köwet jitŋe Fonisia gölmenöŋ anget. Tosatŋan köwet kutuba gölme jölanŋi qetŋi Saiprus miaŋgöreŋ anget. Tosatŋan Siria prowinsgö sitiŋi qetŋi Antiokia anget. Mewö deŋda angetmö, ambazip sutŋine Jisösgö Buŋa keu mi Juda ambazip yeŋgörök jigetka mötket. Kian kantri yeŋgöra mi qahö jiget. 20 Qahö jigetmö, Saiprus aka Sairini azi tosatŋan yeŋgö sutŋine malget. Yeŋön kian gölmenöŋ qariba Antiokia sitinöŋ kaŋgota gölme toŋi yembuk Grik keunöŋ eraum möta Kembu Jisösgö Ölöwak Buŋa mi mewö Juda qahö yeŋgöra mewöyök jim asarim eŋgiget. 21 Mi jim asarim eŋgigetka Kembunöŋ yembuk mali ösumŋan ambazip uruŋini kuŋgum eŋgii gwötpuk yeŋön Kembu Jisös möt nariba uruŋini meleŋda yaŋgöreŋ qekötahögetka kambuŋini qariiga ketaŋi ahök.

22 Mewö aiga miaŋgö buzupŋan anda Jerusalem könagesö yeŋgö kezapŋine gei mötket. Mi möta Barnabas melaigetka Antiokia sitinöŋ anök. 23 Anda aŋgota Anutunöŋ kalem möriamŋi ambazip eŋgii ölöwakeri, mi jeŋan eka möri öŋgöi söŋgaiba qambaŋi kewö jiyök, “Iŋini mönö körek pakpak uruŋini qezaköba köhöiba Kembubuk qekötahöba kinme.” 24 Barnabasnöŋ azi ölöpŋi aiga Uŋa Töröŋan uruŋi kokolak qeiga uruyahöt andö qeba uruŋi jömuk miaŋön Jisös möt narim waŋgiba malök. Miaŋgöra ambazip gwötpukŋan uruŋini meleŋda Kembugö kambunöŋ toroqegetka qariyök.

25 Barnabasnöŋ Antiokia mosöta Sol jarumamgöra Tarsus taonöŋ anök. 26 Anda miwikŋaiba waŋgiri Antiokia sitinöŋ kayohot. Kaba miaŋgöreŋ mohotŋamŋire (yara) yambu mohot jömukŋanök mala zioz nup memba uruŋini meleŋgeri, mi kambuŋi kambuŋi köla kusum eŋgiyohotka ambazip gwötpukŋan mötmöt memba urukönömŋine alget. Antiokia ambazipnöŋ mutukŋi könahiba gwarek qetŋini Kraistkö alaurup (kristen, Kraistkö buŋa) qeta malget. Mewö.

27 Nalö miaŋgöreŋ kezapqetok ambazip tosatŋan Jerusalem mosöta Antiokia sitinöŋ eta kaŋgotket. 28 *Apo 21.10Yeŋgöreŋök kun qetŋi Agabus mi wahöta Uŋa Töröŋan sölölöhöi buzup keu kewö jii mötket, “Bödi ketaŋan asuhuba gölmeŋi gölmeŋi dop köla ahöma.” Mewö jiiga miaŋgö dop sisa kiŋ qetŋi Klodius yaŋgö galömkölköl nalöŋe asuhuyök. 29 Mi asuhuiga gwarek yeŋön mindiriba urumeleŋ alaurupŋini Judia prowinsnöŋ malgeri, mi naŋgöm eŋgiba mindimindiri naluk ketaŋi alget anmapkö keu jöhöget. 30 Keu mi jöhöget aka miaŋgö dop ölŋa aket. Yeŋön moneŋ aka yuai tokoba Barnabas Sol yetkö böröŋire ala melaim etkigetka Jerusalem anda urumeleŋ könagesö yeŋgö jitŋememeurupŋini eŋgeka eŋgiyohot. Mewö.