23
1 Polnöŋ kinda jike kaunsöl kambu mi uba eŋgeka kewö jiyök, “Azi alaurupni, nöŋön ahakmemeni pakpak mi Anutugö jemesoholŋe aka memba malbiga yaŋön eka ‘Dop kölja,’ jiiga urunaŋgö kezapnan möta ölöwaka kota mala merak ki kinjal.” 2 Polnöŋ mewö jiyökmö, jike nup galöm bohonŋi qetŋi Ananaias yaŋön kösutŋe kingeri, i jim kutum eŋgiiga nuŋgulumŋe qekötahöget. 3 *Mat 23.27-28Qekötahögetka Polnöŋ jii mörök, “Anutunöŋ mönö gi qekötahöm gihima. Göŋön miri sel tuatŋaŋgö dop akzan. Sileŋi mundanöŋ ohogetka tuatŋi akzapmö, uruŋi sewön memba injaŋi akza. Göŋön Mosesgö Köna keu memba miaŋön kewöt niŋgiba keuni jim tekömamgöra tatzanmö, töndup nangak Mosesgö Köna keu miyök qeba jim kutum eŋginöŋga nuŋguze. Mi qahö dop kölja.”
4 Polnöŋ mewö jiiga kösutŋe kingeri, yeŋön jiget, “Gi Anutugöreŋ jike nup galöm bohonŋi mepaqepaik aka gamu qem waŋgizan me?”
5 *Eks 22.28Mewö jigetka jiyök, “O alaurupni, yaŋön jike nup galöm bohonŋi akzawi, mi qahö möta jizal. Buŋa Kimbigö keu kun kewö ahöza, ‘Gi mönö könagesö kambugahö azi kembuŋi kude qesuahöman.’ ”
6 *Apo 26.5; Fil 3.5Mewö jiyökmö, jike kaunsöl kambu yeŋgöreŋök tosatŋan Sadyusi (Jike nupkö kapaŋkölköl) pati qekötahögetka tosatŋan Farisi (Köna keugö kapaŋkölköl) pati azia malget. Polnöŋ mi möta miaŋgöra jike kaunsöl kambu yeŋgö jeŋine keu kewö qerök, “Azi alaurupni, nöŋön Farisi azia akzal. Iwinan mewöyök Farisi pati azia. Kömukömuŋi yeŋön guliba wahötmei, nöŋön mewö asuhumapkö al mamböta jörömqöröm aka maljal. Mewö maljalaŋgöra aka keu jakeŋe al niŋgigetka kewöt niŋgiba jize.”
7 Mewö jiiga miaŋgöreŋök Farisi aka Sadyusi pati mieŋgö sutŋine aŋgururuk ahui jike kaunsöl kambu yeŋön jula kambu yahöt aket. 8 *Mat 22.23; Mak 12.18; Luk 20.27Sadyusi (Jike nupkö kapaŋkölköl) yeŋön kewö jizema, “Ambazip kömukömuŋi yeŋön kude guliba wahötme. Suep garata qahö malje. Öme aka uŋa mi qahö malje.” Mewö jigetmö, Farisi (Köna keugö kapaŋkölköl) pati yeŋön keu karöbut miaŋgöreŋ qekötahöba miaŋgö dop möt nariba kinjema. 9 Kambu yahöt mewö aka qetketka göju ketaŋi ahuiga Köna keugö böhi tosatŋan Farisi kambu yeŋgö sutŋineyök wahöta könöpŋambuk tereŋgöba kewö jiget, “Nini azi kiaŋgö bölöŋamŋi kun qahö miwikŋaizin. Suep garata me uŋa kunŋan keu kutum wasöta yaŋgö uruŋe ali jibawak, mi mönö denöwö dop köl eŋgibawak?”
10 Mewö jigetka aŋgururuk miaŋön kunbuk könöwiba qariyök. Qariiga awöraŋgöba Pol likeplikep örögetka anda kaiga mesiŋ taköget. Mewö tandök ahök. Mewö aiga suahö galöm bohonŋan miaŋgö keŋgötŋi möta yarö kambu kun jim kutum eŋgiiga geba Pol sutŋineyök öröba waŋgita yarö azi yeŋgö ain kiripo uruŋe alget.
11 Algetmö, suŋgem miaŋgöreŋ gaun ahöiga Kembunöŋ Polgö qöhöröŋe kinda kewö jiyök, “Mönö ewebibigabuk aka saitiŋgit malman. Nöŋgö könaŋamni Jerusalem kiaŋgöreŋ naŋgöba jiba malnöŋi, miaŋgö dop mönö Rom sitinöŋ mewöyök anda mi naŋgöba jim asariba malman.” Mewö.
Pol qebingö aŋgönaŋ meget.
12 Kembunöŋ mewö jiyökmö, miri giaŋiiga miaŋgöreŋ Juda azi tosatŋan ölöŋ tokoba Pol kömumapkö aŋgönaŋ meget. Yeŋön areŋ mi alget aka mi jöjöpaŋ keunöŋ jöhöm köhöiba kewö jiget, “Nini Pol kömumapköra mamböta nalö sutŋe kiaŋgöreŋ nene siŋgi malbin. Siŋgi mala qein kömuiga miaŋgö andöŋe ölöp nene me o kun kunbuk nembin.” 13 Azi 40 aka jaŋgö mi oŋgitkeri, yeŋön mindiriba jöjöpaŋ keu mi jöhöm köhöiba jiget.
14 Mi jibagun jitŋememe aka jike nup galöm yeŋgöreŋ anda kewö jiget, “Nini Pol kömumapköra mamböta nalö sutŋe kiaŋgöreŋ nene siŋgi malbin. Polnöŋ qahö kömuma ewö, ambazipnöŋ mönö ölŋa qesuahöm neŋgigetka dop kölma. Miaŋgöra nini mönö mindiriba jöjöpaŋ keu kewö jöhöm köhöiba maljin: Pol qein kömuiga miaŋgö andöŋe ölöp nene me o kun kunbuk nemba malbin. 15 Miaŋgöra aka iŋini mönö dölki jike kaunsöl kambu yembuk mohotŋe mindiriba suahö galöm bohonŋaŋgöreŋ anda keu kewö ala qesime, ‘Nini Polgöreŋ keu könaŋi kunbuk qesiinga jii ölŋa mötpingö mötzin.’ Mewö tandök aiga qesigetka ölöp Pol waŋgiriga eŋgöreŋ etma. Etpawakmö, könanöŋ kaba eŋgöreŋ kaŋgotmamgö akŋawi, miaŋgöreŋ mönö i qein kömumapkö jöjöröba malbin.”
16 Mewö jigetmö, qein kömumapkö aŋgönaŋ algeraŋgö buzupŋi mi Pol behötŋaŋgö kezapŋe gei mörök. Mi möta yarö azi yeŋgö ain kiripo uruŋe anda Pol taröhaŋgöreŋ öŋgöba jii mörök. 17 Jii möta suahö galöm kun qeri kaiga kewö jiyök, “Azi gwabö kiaŋön keu kun memba kazawaŋgöra göŋön i ölöp waŋgita suahö galöm bohonŋaŋgöreŋ anöŋga keu mi jii mötma.” 18 Mewö jiiga i memba waŋgita suahö galöm bohonŋaŋgöreŋ anohotka jiyök, “Kösö azi Polnöŋ noholi yaŋgöreŋ anbiga azi gwabö ki waŋgita göhöreŋ kamapköra qesim niŋgiza. Yaŋön göhöra keu kun memba kaza.”
19 Mewö jiba aniga galöm bohonŋan böröŋe memba waŋgita göraŋe anda qesim waŋgiyök, “Gi wani keuya memba kazan?”
20 Qesim waŋgiiga jiyök, “Juda jitŋememe yeŋön keu kun qesim gihibingöra jöhöba göhöreŋ kaba kewö jime: Nini Polgö keu könaŋi törörök qahö möt kömuzin. Miaŋgöra gi ölöp Pol uran waŋgitnöŋga jike kaunsöl kambu yeŋgöreŋ eriga kunbuk qesim waŋginöŋga jii könaŋamŋi ölŋi mötpin. Yeŋön mewö asuhumapköra mötze. 21 Mewö kaba jimemö, göŋön keu miaŋgö imbi ölöp kude kölman. Juda könagesö yeŋgö sutŋineyök azi 40 aka jaŋgö mi oŋgitkeri, yeŋön mindiriba Polgöra kewö jiba mi jöjöpaŋ keunöŋ jöhöm köhöiget, ‘Nini Pol kömumapköra mamböta nalö sutŋe kiaŋgöreŋ nene siŋgi malbin. Siŋgi mala qein kömuiga miaŋgö andöŋe ölöp nene me o kun kunbuk nembin.’ Mewö jiba göŋön imbi kölmangöra mamböta jöjöröba mönöze.”
22 Mewö jiiga azi gwabö mi melaiba kewö jii mörök, “Buzup ki jinöŋ mötzali, mi kun kude jinöŋ mötma.” Mewö.
Pol waŋgitketka Sisaria taonöŋ anök.
23 Suahö galöm bohonŋan mi möta suahö galömyahötŋi etkoholi kayohotka kewö jii mörohot, “Iŋiri mönö timbi azi 200, hos yarö azi 70 aka liŋgip yarö azi 200 mi jim kutum eŋgiyohotka merak suŋgemgö 9 kilok miaŋgöreŋ Sisaria anmegöra jöjöröme. 24 Mewöyök hos tosatŋi meköba möhamgöm eŋgiba Pol kungö qakŋe ala köyan kölgetka suŋgem kiaŋgöreŋök premiö Feliksgöreŋ anma.” 25 Mewö jii mörohotka premiögöra kimbi kun kewö ohoyök,
26 “O Öŋgöŋgöŋamni sorok premiö Feliks! Klodius Lisias, nöŋön jölöŋgi jizal.
27 “Juda yeŋön azi ki memba jöhöba qein kömumapköra aket. Mewö aketmö, Rom mindimindiri gawmangö (jimkutukutu) paspot memba maljawi, nöŋön mi möta miaŋgöreŋök yarö kambu yembuk kaŋgota sel jöhöm waŋgiba meköba bohonŋi jöhöyal.
28 Wani keugöra keu jakeŋe aljei, nöŋön miaŋgö könaŋi mötmamgö möta waŋgita Juda yeŋgö jike kaunsöl kambu yeŋgö jeŋine al waŋgial.
29 Al waŋgibiga keu jakeŋe ala nanŋini Köna keugö kösawöraŋ keuŋi keuŋi miaŋgöra aŋgururuk aka tuarenjoŋ aka jim waŋgigetka miwikŋaial. Mi miwikŋaialmö, yuai bölöŋi kömumapkö dop me kösö mire alin tatmawaŋgö dop mi qahö ahök. Yeŋön keu mewöŋa kun qahö jiget möral.
30 Mi qahö möralmö, kunöŋ yaŋgö buzup keuŋi kewö indeli möral: Tosatŋan ‘Azi mi qein kömuma,’ jiba aŋgönaŋ alget ahöza. Buzup keu mi möta dölkiaŋgöreŋök melaibiga göhöreŋ kaza. Keu jakeŋe al waŋgibingö mötzei, nöŋön i mewöyök jim kutum eŋgibiga göhö jemesoholge kaŋgota keuŋini pakpak aukŋe jim miwikŋaigetka mötman.”
31 Kimbi mewö ohoiga yarö azi jim kutum eŋgigeri, yeŋön keu mi wuataŋgöba Pol memba waŋgita söŋaupnöŋ miri qetŋi Antipatris miaŋgöreŋ anget. 32 Anda miri giaŋiiga yarö azi hosŋinambuk yeŋön Pol waŋgita köna toroqeba angetmö, timbi azi yeŋön nanŋinak liliŋgöba yarö azi yeŋgö ain kiripo uruŋe kaget. 33 Yarö azi hosŋinambuk yeŋön Sisaria taonöŋ aŋgota kimbi mi premiö waŋgiba Pol mewöyök yaŋgö jeŋe alget. 34 Algetka kimbi oyoŋda “Pol mi wani prowinsgöra?” jiba qesiyök. Qesiiga “Silisia prowins azia,” mewö jiget mörök. 35 Mewö jiget möta jiyök, “Keu jakeŋe al gihibingö mötzei, yeŋön mewöyök kaŋgotketka miaŋgöreŋ ölöp qesim gihimam.” Mewö jiba jim kutuiga Pol waŋgita kiŋ Herodkö jakömbuak mirigö kiripo uruŋe ala jegalöm mem waŋgiget. Mewö.