Efesus Kimbi
Polnöŋ Efesus yeŋgöra Kimbi alök.
Jim-asa-asari keu
Polnöŋ Rom sitigö kösö mire tata Efesus urumeleŋ kambu yeŋgöra Kimbi ki ohoyök. Efesus mi Eisia prowinsgö siti bohonŋi. Siti miaŋgö uruŋe kölköl-örörö gwötpuk ahömalget. Polnöŋ misin nup memba liliköi indimŋi karöbut ahiga Efesus kaba yambu karöbut miaŋgöreŋ Buŋa keu jiba malök. Efesus sitinöŋ Juda ambazip tosatŋi miri toŋi yeŋgö sutŋine malgeraŋgöra Polnöŋ kimbi ki ohoba kewö kusum eŋgiyök, “Kraistnöŋ lök kambu yahöt toroqeiga urumeleŋ kambu mohok-kun akzahot.” (2.15-16),(3.6) Anutunöŋ jitsihitŋi aka kalem möriamŋi urumeleŋ kambu neŋgöra denöwö ali ahözawi, mi gwötpuk jim asariza. (3.10) Miaŋgö dopkeu karöbut kewö jiyök:
1. Urumeleŋ könagesö eŋön sile sep busu mohot aketka Kraistnöŋ nanŋak nöröpŋini akza. (1.23; 4.15-16)
2. Urumeleŋ könagesö eŋön miri mohot tandök aketka Kraistnöŋ eŋgö tandöŋini kömbönaŋi akza. (2.21-22)
3. Urumeleŋ könagesö eŋön ambi buŋa ewö aketka Kraistnöŋ apŋaŋgö tandök akza. (5.25-27) Mewöyök Kraistnöŋ Efesus eŋgö kambu yahöt toroqem etkiiga miaŋgöra sile sep busu mohot akze. Asakŋaŋgö ambazip akeraŋgöra malmalŋinaŋgö goro keuŋi keuŋi ohoyök. Mewö.
Buk kiaŋgö bahöŋi bohonŋi 4 mi kewö:
Keu mutukŋi keu 1.1-2
Kraist aka urumeleŋ könagesö 1.3–3.21
Kraistpuk malmal dölökŋi 4.1–6.20
Kimbigö keu kötŋi bohonŋi 6.21-24
1
* Apo 18.19-21; 19.1Anutunöŋ Pol ni jitsihitŋaŋgö dop melaim niŋgiiga Kraist Jisösgö aposol akzal. Mötnarip alaurup sarakŋi Kraist Jisösbuk qekötahöba Efesus sitinöŋ maljei, nöŋön embuk keu eraum mötpingöra kimbi ki ohozal.
Anutu Iwinini aka Kembu Jisös Kraist yetkön mönö kalem möriam eŋgiyohotka luainöŋ malme.
Kraistnöŋ Anutugö kötumötuetŋi neŋgimakza.
Neŋön Kembunini Jisös Kraistkö Iwi Anutuŋi möpöseimakin. Yaŋön nini Kraistpuk qekötahöinga uruninan ölöwakŋapköra Suep mirigö kötumötuetŋi aka kalemŋi könaŋi könaŋi mi urunine alöha kayambu asuhui mala kotket. Anutunöŋ nini mutuk möpŋaŋgö möpŋeyök kewö akingöra möwölöhöm neŋgiyök: Kraistnöŋ nam köl neŋgiiga neŋön yaŋgö buŋaŋi sarakŋi aka Anutugö jemesoholŋe keunini qahö kinbin. Mewö möwölöhöm neŋgiba miaŋgö andöŋe Suep gölme miwikŋaiba al etkiyök. Nalö miaŋgöreŋök könahiba ambazip jöpaköm neŋgiba mala korök.
Jöpaköm neŋgiba urusihimŋaŋgö dop qeljiŋe keu jit areŋi ala keunini kewö jim teköyök: Jisös Kraistnöŋ nam köl neŋgiiga Anutunöŋ neŋgömeiga nanŋi nahönböraturupŋi akin. Wölböt Nahönŋi neŋgöra melaiiga eta Anutugö kalem möriamŋaŋgö kukösumŋi buŋabuŋaŋambuk köleŋda söŋgöröŋi qahö öne neŋgiyök. Nini mönö kalem möriamŋi miaŋgöra Anutu möpöseim waŋgimakin. * Kol 1.14Anutugö kalem möriamŋaŋgö köweŋi mi keta bölökŋi. Miaŋgö dop Jisösnöŋ sepŋi mokoba miaŋön sohopnini meyök. Mi meyöhaŋgöra Anutunöŋ ölöp siŋgisöndoknini mosöta saŋgoŋ neŋgimakza.
Yaŋön kalem möriamŋi mi köweŋeyök keleŋmaleleŋ mokoiga qaknine öŋgöyök. Mötkutukutuŋi öŋgöŋgöŋi pakpak miaŋgö dop kewö möt asarim neŋgiyök: Anutunöŋ mutuk nanŋi uruŋe keu areŋ jöhöba möri ölöwahiga tölapŋe ahöi öne mala kotketmö, Kraistnöŋ Anutugö keu jitŋaŋgö dop wuataŋgöba eta neŋgöreŋ indeliga eka mörin. 10 Anutunöŋ mutuhök kalem möriam areŋaŋgö könaŋi kewö mötmöriyök, “Anutu nöŋön areŋ mi wuataŋgöba mala malbiga nalöŋi törörök kam kuŋguiga miaŋgöreŋ ölŋambuk aiga kewö asuhuma: Körek Suep mirigö jakeŋi jakeŋi miaŋgöreŋ me gölmenöŋ ahuba maljei, nöŋön mönö mi pakpak mindiriba jöhöm eŋgimam aka Kraist kuŋgum waŋgibiga körek yeŋgö bohonŋini mohot aka malma.”
11 Anutunöŋ mutuhök nanŋi uruŋaŋgö dop keu jöhöi ahözawi, mönö areŋ miaŋgö dop kuŋgukuŋgu keuŋi jiiga yuai pakpak asuhumakza. Nanŋi areŋi miaŋgö dop qeljiŋe Juda könagesö nini nanŋi buŋaŋi aka malbingöra jim teköba al neŋgiyök. Miaŋgö dop nini tosatŋan Kraistpuk qekötahöinga meköm neŋgiiga buŋaŋi börösamot ewö aŋgön köla memba maljin. 12 Juda könagesö neŋön Kraistnöŋ galöm köl neŋgimapkö mamböta qeljiŋe jörömqöröm ak waŋgiba mala korini, yaŋön nini Anutugö kukösumŋi buŋabuŋaŋambuk möpöseiba malbingöra aka möwölöhöm neŋgiyök.
13 Kian kantri eŋgöreŋök tosatŋan mewöyök Kraistpuk toroqeba qekötahöget. Amötqeqegö Ölöwak Buŋaŋi jigetka keu ölŋi mi möta uruŋini meleŋget. Uŋa Töröŋi yaŋön Anutu buŋaŋaŋgö muŋgem aiwesökŋi akza. Uŋa mi melaii etmapkö keu jöhöyöhi, yaŋön mönö mi uruŋine ali geyök. Kraist möt narim waŋgigetka Anutunöŋ aiwesökŋi kömbönaŋi mi mekötahöm eŋgiiga malje. 14 Anutunöŋ könagesöurupŋi Suep Buŋa neŋgimamgö keu jöhöyöhi, mi membingö aiwesökŋi Uŋa Töröŋi mi mutuk al neŋgiyök. Uŋa Töröŋi urunine ali maljawaŋgöra mönö kewö möt köhöizin: Anutunöŋ lök sohopnini memba buŋaurupŋi ahinga biaŋ gölmenöhök neŋguaŋgiriga Suepnöŋ öŋgöba oyaeŋkoyaeŋ akin. Miaŋgöra mönö Anutugö kukösumŋi buŋabuŋaŋambuk möpöseimakin. Mewö.
Polnöŋ Anutu möpöseiba kewö köuluköyök:
15 Mewö oyaeŋkoyaeŋ akingöra aka nöŋön Efesus eŋgöra köulukömakzal. Eŋön Kembu Jisös pöndaŋ möt nariba ambazip sarakŋi pakpak uruŋinan jöpaköm eŋgimakzei, tosatŋan miaŋgö buzup keuŋi jigetka möral. 16 Miaŋgöra buzup keu mi mörali, nöŋön mewöyök eŋgöra aka Anutu möpöseiba mala qahö mosöral. Qahö. Nöŋön köuluköba miaŋgöreŋ mötmörim eŋgimakzal.
17 Mötmörim eŋgiba Kembunini Jisös Kraistkö Anutuŋi mi kewö köuluköm waŋgimakzal, “O Iwi kukösum Toŋi, gi mönö Uŋagi Töröŋi Efesus alaurup eŋgiman. Uŋa mi uruŋine alnöŋga mötkutukutuŋini qainŋi kun asuhuiga Anutugö könaŋi ölöpŋanök indeliga möt yaköme. 18 Anutu, gi mönö uru jeŋini mem asarinöŋga nangi Buŋagahö könaŋi möt yaköme.” Anutunöŋ nanŋi ambazip sarakŋi neŋgöra Suep Buŋa kukösumŋi buŋabuŋaŋambuk mi neŋgimamgö keu jöhöiga iŋini yuai mi asuhumapkö al mamböta jörömqöröm akŋegöra eŋgoholök. Jörömqöröm aketka Jisösnöŋ kunbuk asuhuiga aködamunŋinambuk akŋei, iŋini oyaeŋkoyaeŋ miaŋgö könaŋi möt sölöŋgömegöra köulukömakzal.
19 Möt narim waŋgiinga Anutugö kukösum köhöikŋan urunine sehiba nup memakzawi, miaŋön mönö keta bölökŋi teteköŋi qahö akza. Iŋini miaŋgö könaŋi möt kutumegöra köulukömakzal. Ösum-mumuŋi wewelipŋambuk miaŋön silenini kutuba inahöm neŋgimakzawi, Anutunöŋ miaŋgö kukŋi kewö kondel neŋgiyök:
20  * Sum 110.1Anutunöŋ kukösumŋi nupnöŋ ala Kraist mem gulim waŋgii kömupnöhök wahörök aka waŋgiriga Suep mire öŋgöba selŋi selŋi liliköba jakeŋi jakeŋi eŋgoŋgiriga Anutunöŋ böröŋi ölŋe dum tatat mutukŋe ali tatza. 21 Ali jakömbuak dumŋe tata öröyuai pakpakö bohonina kinja. Bem suahö galöm aka yeŋgö nemböŋine jembon pom aka gawman kiap öŋgöŋgöŋi eretŋi kukösumŋinambuk kembu ak neŋgimakzei, Kraistnöŋ mönö mi körek pakpak galöm köl eŋgimakza. Suep mire, gölmenöŋ aka mietkö sutŋire galöm qet pakpak qet eŋgigetka bisizei, Kraistnöŋ mi körek eŋgoŋgita öŋgöza. Gölmegö nalö kewöŋeyök qahöpmö, könaŋgep nalö qainŋi kun asuhuiga mal öŋgöbini, miaŋgöreŋ mewöyök öröyuai pakpak galöm köla mal öŋgöma.
22  * Sum 8.6* Kol 1.18Anutunöŋ uŋa, ömewöröme, ambazip aka öröyuai pakpak mi memba eta Kraistkö bapŋe al neŋgii malinga Kembunini öŋgöŋgöŋi akza. Anutunöŋ Kraist mi urumeleŋ könagesö neŋgiba bohonini kinmapköra kuŋgum waŋgiiga malja. 23 Yaŋön kötal neŋgiba bohonini aiga neŋön yaŋgö ölŋaŋgö köna börö su-urupŋi akzin. Kraistnöŋ nöröwök aiga qahö dop kölbawakmö, neŋön yaŋgö törömunŋi aka toroqeinga ölŋan asuhum tiŋgiriga dop kölja. Kraistnöŋ mewöŋanök öröyuai pakpakö törömunŋina kun aka toroqeiga körek pakpak mieŋön mönö Anutugö aködamunŋinambuk asuhuba dop köla anakze. Mewö.

*1:1: Apo 18.19-21; 19.1

*1:7: Kol 1.14

*1:20: Sum 110.1

*1:22: Sum 8.6

*1:22: Kol 1.18