1 Jeikobnöŋ jeŋi uba wahöta Isonöŋ aziurupŋi 400 yembuk mohotŋe könanöŋ kageri, mi eŋgehök. Miaŋgöra nahönböraturupŋi mendeŋ eŋgiba Lea, Reizöl aka welen ambiyahötŋi yeŋgö böröŋine al eŋgiyök.

2 Mewö al eŋgiba kewö areŋgöm eŋgiyök: Welen ambiyahötŋi yetkön nahönböraturupŋiri eŋguaŋgita mutuk anget. Yeŋgö andöŋine Leanöŋ nahönböraturupŋi yembuk angetka Reizöl aka nahönŋi Josef yetkön qöndökŋi anohot.

3 Saiwaŋi mewö areŋgöm eŋgiba nanŋak yeŋgö wösöŋine mutuk anda simin köla gölmenöŋ bamgöba wahöriga indimŋi 7 aiga anda datŋaŋgö jemesoholŋe aŋgorök. 4 Aŋgorökmö, Isonöŋ munŋi ekŋamgöra ösumŋan kiŋkiŋgöba kaba suhumgöm waŋgiba böröŋan imbiŋe gili geiga numbuŋi yöhötim neiga urusahöt auyohot. 5 Isonöŋ jeŋi uba wahöta Jeikobkö anöm-moröurupŋi eŋgeka munŋi qesim waŋgiyök: “Ki denike yeŋön göbuk kaze?” Qesim waŋgiiga kewö meleŋnök: “Anutunöŋ kalem möriamŋi qakŋe nahönbörat ki welen azigi ni niŋgiyök.”

6 Mewö meleŋniga welen ambiyahötŋi yetkön nahönböraturupŋiri yembuk dowe kaŋgota simin köla gölmenöŋ bamgöget. 7 Miaŋgö andöŋe Lea aka nahönböraturupŋi yeŋön mewöŋanök dowe kaŋgota simin köla gölmenöŋ bamgöget. Teteköŋe Josef aka Reizöl yetkön dowe kaŋgota simin köla gölmenöŋ bamgöyohot.

8 Mewö aketka Isonöŋ kewö qesim waŋgiyök: “Azi aka sömbup kambu pakpak könanöŋ miwikŋaim eŋgizali, mi könaŋi denöwögöra melaim eŋginöŋga kaze?” Mewö qesim waŋgiiga kewö jiyök: “O azi kembuni, nöŋön mi göhö jege ak-kömukömu miwikŋaimamgöra aka melaim eŋgial.”

9 Mewö jiyökmö, Isonöŋ keu kewö jiyök: “O muni, mi nöŋgöreŋ gwötpuk lök dopne ahöze. Miaŋgöra mi ölöp toroqeba nangi buŋaya aka ahöma.”

10 Mewö jiiga Jeikobnöŋ kewö jiyök: “Mewö qahö. Göŋön neksihim aka ala ölöpŋi ak niŋginöŋga göhö jemesoholgi ekiga Anutugö jemesoholŋi ewö akza. Miaŋgöra nöŋön göhö jege ak-kömukömu miwikŋaizal ewö, mönö kalemni ki ölöp buŋa qem aŋguman. 11 Anutunöŋ kalem möriam kondel niŋgiiga mala kotpiga yuai pakpak osimakzali, mi pakpak ölöp ahöm niŋgiza. Mewögöra uruölöwak kalemni memba kageri, mi ölöp meman. “Mewö jiba kapaŋ köla malöhaŋgöra Isonöŋ uruölöwak kalemŋi mi buŋa qem aŋguyök.

12 Buŋa qem aŋguba kewö jiyök: “Mönö ölöp mosöta köna anbin. Nöŋön köiputŋini akiga eŋön ölöp nömbuk kagetka anbin.”

13 Mewö jiyökmö, Jeikobnöŋ kewö jiyök: “Azi kembuni, mötnöŋ. Nahönböraturupni yeŋön ösumŋini eretŋi akze aka lama namŋi aka bulmakau namŋi moröŋini juzu eŋgimakzei, nöŋön mi köyan köl eŋgimakzal. Mewö aiga i köna anmegöra wehön mohotkö dop könöpuk eŋguataŋgöbinak ewö, yeŋön mönö ösumŋini eriga kambu körek pakpak kömumbeak. 14 Mewögöra azi kembuni, gi ölöp mutuk anöŋga welen azigi nöŋön ösöŋösöŋ andöge guataŋgöba kamam. Sömbup eŋguataŋgöbi wösöne mutuk anmei aka nahönböraturupni ösumŋinaŋgö dop ösöŋösöŋ kaba mala mala biaŋ Seir mire ketaŋamni göhöreŋ kaŋgotpin.”

15 Mewö jiiga Isonöŋ kewö jiyök: “Mewö aiga nöŋön ölöp aziurupni tosatŋi eŋgömosötpiga göbuk ösöŋ kame. “Mewö jiiga Jeikobnöŋ kewö qesiyök: “Gi mönö wuanöŋgöra mewö akanak? O azi kembuni, ni göhö jege ak-kömukömu miwikŋaibiga lök dop köl niŋgim teköza.”

16 Mewö jiiga Isonöŋ wehön miaŋgöreŋök liliŋgöba anda Seir miriŋe aŋgorök. 17 Jeikobnöŋ Sukot mire anda miaŋgöreŋ nanŋi miriŋi esiba sömbupurupŋi yeŋgöra koumŋi koumŋi qeyök. Mewögöra miri gölme miaŋgö qetŋi Sukot (Koumkoum) qerakze. Mewö.

18 Jeikobnöŋ mewö Mesopotemia (Padan Aram) gölme mosörök. Mosöta kaba Keinan gölmegö taon qetŋi Sekem miaŋgöreŋ ölöpŋanök ölulup kaŋgorök. Kaŋgota opo seri koumŋi taon kösutŋe gölme köröŋe möröreŋgöba kuŋguba tatket. 19 *Jos 24.32; Jon 4.5Opo seri koumŋi gölme köröŋe kuŋguyöhi, yaŋön gölme kitipŋi mi Sekemgö iwiŋi Hamor yaŋgö nahönurupŋi yeŋgöreŋök silwö kötŋi 100 miaŋön bohonŋi meyök. 20 Bohonŋi memba miaŋgöreŋ jöwöwöl alta kun memba qetŋi “El, Israelgö bem Anutuŋi,” mewö qerök. (El bem)