1 Nalö sutŋe miaŋgöreŋ Ismael könagesögö kölköl-örörö azi yeŋön Josef waŋgita Ijipt kantrinöŋ aŋgota bohonŋi memegöra alget. Algetka Ijipt azi kun qetŋi Potifar, Farao kiŋgö jembonŋi kun aka malmalŋaŋgö sikiriti yeŋgö suahö galömŋina malöhi, yaŋön i söŋgöröŋi meiga welenqeqeŋi omaŋi ahök.

2 Mewö aka maliga Kembunöŋ Josefpuk kiniga yuai pakpak aka memba malöhi, miaŋgöreŋ mönö töhötmöriam miwikŋaiyök. Yaŋön toŋi Ijipt azi yaŋgö mire malök.*Apo 7.9 3 Mewö maliga Kembunöŋ Josefpuk kinda kondot waŋgiiga yuai pakpak böröŋan memba malöhi, miaŋön mönö töhötmöriamŋambuk ahök. Mewö aiga toŋan mi ehök. 4 Toŋan mi ehi ölöp dop köliga yaŋgö jeŋe eksihim miwikŋaiiga jiiga nanŋi malmalŋaŋgö galömŋi ahök. Potifarnöŋ Josef kuŋgum waŋgiiga miriŋaŋgö yuai pakpak galöm köliga sukinap buŋaŋi pakpak yaŋgö böröŋe aliga köyan köla malök. 5 Miriŋaŋgö yuaiŋi aka sukinap buŋaŋi mi pakpak Josefnöŋ galöm kölmapköra böröŋe ala malöhi, Kembunöŋ nalö miaŋgöreŋök könahiba Ijipt azi miaŋgö miri yuaiŋi mi Josefköra aka kötuetköba malök. Potifargö miriŋe aka nupŋe öröyuaiŋi pakpak ahöyöhi, mi mönö kötumötuet qakŋe ahöyök. 6 Mewö ahöiga Potifarnöŋ öröyuaiŋi ahöm waŋgiyöhi, mi pakpak Josefkö böröŋe al teköba kinda nanŋak i me wai miaŋgö waimanjatŋi kun qahö mörök. Yaŋön nene nemamgöra mohot mötkurumkurum aka malök. Josefkö sileŋi öndölböndöl qariiga kaisoŋgolomŋan eksihimŋambuk ahöiga malök.

7 Mewö maliga nalö tosatŋi teköiga Potifargö anömŋan Josef eka eksihimŋi möta kewö jiyök: “Gi mönö kanöŋga nömbuk ahöbit.”

8 Mewö jiyökmö, yaŋön mi tököba toŋaŋgö anömŋi kewö jii mörök: “Qahö! Mötnöŋ, toni nanŋak miriŋe öröyuai ahözawaŋgö waimanjatŋi qahö ahakzapmö, sukinap buŋaŋi pakpak mi mönö nöŋön galöm köla malmamgöra nöŋgö böröne al teköiga ahöza.

9 Mewö ahöiga miri kiaŋgö uruŋe i aka ni netkö kukösumniran mönö öröröŋ ahöza. Göŋön anömŋi akzanaŋgöra gi aŋgön köl niŋgiyökmö, yuai tosatŋi kun mi nöŋgöra qahö aŋgön kölök. Miaŋgöra nöŋön denöwögöra aka ahakmeme bölöŋi kötökŋi mewöŋi mi aka miaŋön Anutu qetala siŋgisöndok akileŋak?” 10 Mewö jii möta keu mewöŋi mi wehön dop Josefköra jiba malökmö, yaŋön töndup mi qetala mala yaŋgö ahöahö dumnöŋ anda yambuk ahöbitkö imbi qahö kölök. Mewö yambuk mohotŋe malbitkö mewöyök tököyök.

11 Mewö tököba maliga wehön kunöŋ mirigö welenqeqeurupŋi yeŋgöreŋök kunŋan miri uruŋe qahö maliga Josefnöŋ nupŋi jijiŋi memamgöra miri uruŋe öŋgöyök. 12 Öŋgöiga ambi miaŋön Josefkö malukuŋe qelanjiba memba kewö jiyök: “Gi mönö kanöŋga nömbuk ahöbit. “Mewö jiyökmö, Josefnöŋ malukuŋi mi yaŋgö böröŋe mosöta ölöŋ köla diŋdiŋgöba sombemnöŋ sileŋe erök. 13 Malukuŋi yaŋgö böröŋe mosöta ölöŋ köla sombemnöŋ eröhi, ambi miaŋön mi ehök.

14 Mi eka mirigö welenqeqeurupŋi eŋgoholi kagetka yeŋgöra kewö jiyök: “Mötket, apnan Hibru azi mi waŋgita mirinine kayöhi, yaŋön mönö göngönahit ak neŋgiba malja. Yaŋön nömbuk ahöbitköra nöŋgöreŋ kotzapmö, nöŋön qet gigilahözal. 15 Qet gigilahöbiga möta malukuŋi nöŋgö wösöne mosöta ölöŋ köla diŋdiŋgöba sileŋe geza.”

16 Mewö jiba Josefkö malukuŋi kösutŋe ali ahöi Josefkö toŋan liliŋgöba kamapkö mamböta tari kayök. 17 Kaiga kösohotŋi mewöyöhök jii möriga kewö jiyök: “Hibru welenqeqe azi mi waŋgitnöŋga neŋgöreŋ kayöhi, yaŋön mönö nömbuk göngönahit akŋamgöra nöŋgöreŋ kotza. 18 Kotzapmö, nöŋön qet gigilahöbiga möta malukuŋi nöŋgö wösöne mosöta ölöŋ köla diŋdiŋgöba sileŋe geza.”

19 Mewö jiiga Josefkö toŋan anömŋan kösohot mewö jii möriga kewö jiyök: “Göhö welenqeqegan mönö mewö ak niŋgiza. “Mewö jii möta irimŋi seholiiga uruŋi könöp jeyök. 20 Uruŋi könöp jeiga jiiga Josef memba Farao kiŋgö kösö mirinöŋ azi galöm köl eŋgiba malgeri, mönö kösö miri miaŋgöreŋ alget geba ahöba malök. 21 Josefnöŋ kösö miri miaŋgöreŋ malökmö, Kembunöŋ Josefpuk kinda kötuetköba ak kömum waŋgiba mali kösö mirigö galöm bohonŋan mi eka yaŋgöra eksihim mörök.*Apo 7.9 22 Eksihim möröhaŋgöra azi pakpak kösö mire tatkeri, mi Josefnöŋ galöm köl eŋgimapköra yaŋgö böröŋe al eŋgiyök. Yuai pakpak miaŋgöreŋ aka memba malgeri, mi Josefnöŋ jim kutum eŋgiyöhaŋgö dop aka memba malget.

23 Kembunöŋ Josefpuk kinda kötuetköm waŋgiba kondoriga yuai pakpak aka memba malöhi, mi töhötmöriamŋambuk asuhuba ahöyök. Miaŋgöra kösö mirigö galöm bohonŋan Josefnöŋ yuai pakpak denöwö galöm köla jim kutum eŋgiba malöhi, miaŋgö waimanjatŋi kun qahöpmahöp möta malök. Mewö.