1 Judanöŋ mewö jiiga ambazip liliköm eŋgiba kinda eŋgekeri, Josefnöŋ körek yeŋgö jeŋine toroqeba könaŋi köyatiba nanŋi galöm köl aŋgumamgö lömböriba osiyök. Miaŋgöra Josefnöŋ kewö silata qerök: “Eŋön mönö körekŋanök nömosöta deŋget. “Mewö jiiga deŋgetka Ijipt azi kunŋan kösutŋine qahö kiniga Josefnöŋ nanŋi könaŋi mi darumunurupŋi yeŋgöra kewö indelök:*Apo 7.13 2 Yaŋön amburereŋ aka ötömbepuk qei sahöriga Ijipt ambazip gumnöŋ malgeri, yeŋön mi möta Farao kiŋgö jakömbuak mire anda buzup keuŋi mi jigetka mötket.

3 Josefnöŋ sahöta kinda darumunurupŋi mi kewö jii mötket: “Ni Josef! Iwinan tok jebuk malja me qahö?” Mewö jii mötketmö, darumunŋan uruŋinan kot gwözöŋniga aurum tililiŋgöba jeŋe öne kinda keu kun qahö mötmöriba meleŋ waŋgibingö osiget. 4 Osiba kingetka Josefnöŋ yeŋgöra kewö jiyök: “Eŋön mönö nöŋgö kösutne ki kaget. “Mewö jii kagetka kewö jiyök: “Ni Josef, darumunŋini bohoni memegöra algetka Ijipt kayali, mönö mia.

5 “Mönö uruköŋjiliŋ kude mötme. Anutunöŋ eŋön kömumbepuköra ni mutuk melaim niŋgiiga qeljiŋe ki kabiga iŋini kaze. Ni bohoni memegöra al niŋgigetka ki kayali, miaŋgöra mönö nanŋinaŋgöra irimsesewöl kude möt aŋgume. 6 Bödi kiaŋön lök yambu yahötkö dop gölme dop köla ahöza. Mi toroqeba kunbuk yambu 5:gö dop ahöiga nalö miaŋgö uruŋe gölme qem kömöt qahö aka nene ölŋi qahö miwikŋaiba tokoba malbin.

7 “Anutunöŋ mönö köna wewelipköŋambuk wuataŋgöba eŋgö malmalŋinaŋgö bohonŋi jöhöiga toroqeba jebuk mala gwölönarök miwikŋaim eŋgiba gölme qakŋe malmegöra mötza. Miaŋgöra aka ni mutuk melaim niŋgiiga qeljiŋe ki kabiga iŋini kaze. 8 Miaŋgöra eŋön qahö melaim niŋgiget tandök akzapmö, Anutunöŋ mönö ölŋa melaim niŋgiiga ki kayal. Yaŋön kuŋgum niŋgiiga Farao kiŋgö jembonŋi mutukŋi aka jakömbuak miriŋe wanat nup memakzei, körek yeŋgö ketaŋamŋina akzal. Mewö akiga Anutunöŋ Ijipt kantri jömukŋanök mi nöŋgö böröne aliga azi kembuŋina akzal.

9 “Iŋini mönö dölki wahöta ösumŋinan iwinaŋgöreŋ liliŋgöba anda keu kewö jigetka mötma: ‘Göhö nahöngi Josef yaŋön keu kewö jiza: Anutunöŋ ni kuŋgum niŋgiba Ijipt kantri jömukŋanök nöŋgö böröne aliga azi kembuŋina akzal. Miaŋgöra göŋön mönö nalö kude qem körimanmö, zilaŋ nöŋgöreŋ kaman. 10 Ki kaba ölöp tatat dumdumgi Gosen gölmenöŋ möhamgöba nane kösutne malman. Gi aka isimoröurupki, göhöreŋ lama bulmakau kambuŋi kambuŋi aka öröyuai pakpak buŋagi ahözawi, mi mönö memba kölolohoba kame.

11 “Bödi kiaŋön mönö kunbuk toroqeba yambu 5:gö dop ahöm öŋgöma. Nalö miaŋgö uruŋe gi, mirigahö saiwaurupki me tinitosolomurupki tosatŋi yeŋgöreŋök kunŋan bödi mala nenegö mözöqözöröm aka kömum gororoŋgöbapuk. Miaŋgöra mönö Gosen gölmenöŋ kaba mala wani yuaigöra osimei, nöŋön mi eŋgiba malmam.’ Iwininaŋgöra keu mi mönö mewö jigetka mötma.*Apo 7.14

12 “Ni nanak ölŋa ki kinda eŋgöra keu jizali, mi ölöp nanŋini jeŋinan nek kutuze aka muni Benjaminöŋ mewöyök ni nek kutuza. 13 Miaŋgöra iŋini mönö iwinaŋgöreŋ anda Ijipt kantrinöŋ qetbuŋa ketaŋi pakpak niŋgigetka maljali aka yuai pakpak ekeri, miaŋgö kösohotŋi mi iwini jigetka mötma. Mi möriga mönö ösumok waŋgita eta ki kame.”

14 Mewö jiba böröŋi munŋi Benjamingö imbiŋe gili geiga sahöriga Benjaminöŋ mewöŋaŋök aŋgöm waŋgiba sahörök. 15 Toroqeba böröŋi daturupŋi körek yeŋgö imbiŋine gili geiga sahöta numbuŋini yöhötim neyök. Miaŋgö andöŋe darumunurupŋan yambuk keu eraum-mötket. 16 Josefkö darumunurupŋan kageri, miaŋgö buzupŋan Farao kiŋgö jakömbuak mire aniga Farao kiŋ aka jembonurupŋi pakpak yeŋön mi möta uruölöwak mötket.

17 Mewö möta Farao kiŋnöŋ Josefköra kewö jiyök: “Darumunurupki mönö jinöŋga kewö akŋe: ‘Sukinapŋini mönö doŋki qakŋine ala kunbuk liliŋgöba miriŋine Keinan gölme anme. 18 Anda iwiŋini aka saiwaurupŋini eŋguaŋgita liliŋgöba nöŋgöreŋ kame. Ki kagetka nöŋön gölme ölöp kötökŋi Ijipt kantri uruŋeyök möwölöhöba eŋgibiga ölöp miaŋgö kelökŋi miwikŋaiba nem söŋgaip aka malme.’

19 “Mewöyök kewö jim kutum eŋginöŋga akŋe: ‘Ijipt kiaŋgöreŋök mönö hosgö kareŋi tosatŋi memba anda anöm-moröurupŋini miaŋgöreŋ al eŋgiba iwiŋini waŋgita mohotŋe ki kame. 20 Miriŋinaŋgö yuaiŋi tosatŋi Keinan gölmenöŋ mosötmei, miaŋgö waimanjatŋi kude akŋe. Nöŋön miaŋgö salupŋe Ijipt kantri jömuk kiaŋgö yuaiŋi ölöp kötökŋi mi eŋgibiga buŋaŋini akŋa.’ ”

21 Farao kiŋnöŋ mewö jiiga Israelgö nahönurupŋan miaŋgö dop aket. Josefnöŋ Farao kiŋgö jimkutukutu keuŋi wuataŋgöba hosgö kareŋi tosatŋi eŋgiyök. Mewöyök köna anangö nene semön tosatŋi eŋgiyök. 22 Mi eŋgibagun daturupŋi mohot mohot yeŋgö opo malukuŋini dölökŋi totoŋine eŋgiyökmö, munŋi Benjamingöra opo maluku dölökŋi börö kun waŋgiba moneŋ silwö köt 300 waŋgiyök. 23 Iwiŋaŋgöra Ijipt kantrigö yuai ölöp sorokŋi jesöŋgö memba doŋki ten mieŋgö qakŋine aliga anget. Mewöŋanök doŋki ambiŋi ten mieŋgö qakŋine wit padi, bered aka nene tosatŋi iwiŋaŋgö köna semöna aliga bisiba anget. 24 Angetka Josefnöŋ darumunurupŋi melaim eŋgii anbingö aketka keu kewö jii mötket: “Iŋini könanöŋ anda aŋgururuk kude akŋe.”

25 Mewö jiiga Ijipt mosöta anda Keinan gölmenöŋ iwiŋini Jeikobköreŋ aŋgotket. 26 Aŋgota iwiŋinaŋgöra keu kösohot kewö jiget: “Josefnöŋ mönö toroqeba jebuk malja. Ijipt kantri jömukŋanök mi yaŋgö böröŋe ahöiga azi kembuŋina aka malja. “Mewö jigetka keu mi qahö möt nariyöhaŋgöra uruŋi toroqeba amöriiga tarök.

27 Mewö tarökmö, Josefnöŋ keu pakpak jiyöhi, mi jiget mörök aka hosgö kareŋi tosatŋi i waŋgita Ijipt anmapköra ali kayöhi, iwiŋini Jeikobnöŋ mi eka kinda uru sileŋan köleŋni könöpkönöp ahök. 28 Könöpkönöp aka kewö jiyök: “O mi alakŋa! Mi möt köhöizal. Nahöni Josefnöŋ mönö toroqeba jebuk malja. Nöŋön mönö anda i ekagun könaŋgep ölöp kömumam. “Mewö.